1 Ubu Ni sansinir isa ntali lanit ratan* 11:1 Wol lyawan naꞌa vai Yunani ne, iki nala aa etal yai verin Yohanes. Naꞌuk tafsiran etal dawan rfalak ne, Ubu te Ubu Ni sansinir nala aa etal yai. nala aa etal isa, wean takil i al rukur afa verin yaꞌa. Ia nfalak verin yaꞌa ne, “Muti ma mukur Ubu Ni Rahan Dawan Falurut a, ovu wan i baꞌi rasnuri aa ovi voarira ra lolin verin Ubu.† 11:1 Terjemahan boku rfalak ne, Yohanes musti nukur wan i ba'i rasnuri rira korban ra verin Ubu. Mrekan vali tamata ovi rfadawang Yaꞌa naꞌa ralan eri. 2 Deka mukur lean dawan i nlilit Ubu Ni Rahan Dawan Falurut a,‡ 11:2 Bis tfalak vali ne, Yahudi rira Rahan Dawan Falurut a. tevek ala roak verin tamata ovi wol rorang Yaꞌa. Tamata avyai veka rta sorat kota i nmerat urun yai,§ 11:2 Terjemahan boku rfalak kota i nmerat urun yai, nfaturu Yerusalem. ti naran vulan vutfaꞌat rahin irua. 3 Yaꞌa veka ala ngrebat verin Ning tamata irua i rfamalik Ning vaivatul ra, ma reluk roak kadaravit ovi rotu tali kadut nur ma al nfaturu ne, ralarira lalau urun. Ira rarenar lahir tali Ubu ma ti rfamalik verin tamata ra, ti naran amar rivun isa ratut irua vutnean.”* 11:3 Ini sama ovu vulan vutfaꞌat rahin irua. 4 Ning tamata irua yai, ira wearira aa zaitun irua ovu damar wan irua, ma rdiri Ubu i nfareta lanit ivavan a wahan ralan a.† 11:4 Msiꞌik aa zaitun ovu damar wan irua naꞌa Zakharia 4:1-14 5 Wean tamata boku mane rwi-rwa tamata irua yai, na rira ngrebat ma yafu ntali vavarira nti murin ma nasnuri munuk tamata ovi rira sian ira. Ba tamata ovi mane rotu sian ira veka rmata munuk. 6 Ubu nala ngrebat verin ira ma rotu ma wol daꞌut, naꞌut i rfamalik Ni afa ovi nfalak ra. Ira rira ngrebat vali ma rotu ma wear naꞌa lara, ovu rotu ma sian afaka watan nkena lanit ivavan ini, naꞌut inba watan, wean i ralarira ra rfalak a.

7 Ti ma tamata irua rfalyawang munuk roak afa ovi Ubu nfalak ma musti rfamalik, na afwatan sian i veka ntali tivat matmatan i bilaman urun ia yai veka nangal nala ovu nfedan tamata irua yai.‡ 11:7 Afwatan sian naꞌa ayat ini naktufan urun i lahir. 8 Matmatan avyai tenarira ra rnaꞌa watan lingaꞌan ralan naꞌa kota i rbaku rira Duilaꞌa naꞌa aa walwalur. Tamata ra rira faliak naꞌa kota yai ne, Sodom ovu Mesir, tevek tamata ovi rleal kota yai sian urun ira.§ 11:8 Kota naꞌa ayat ini nfaturu kota Yerusalem. 9 Tamata tali arun ra munuk, ahu ra munuk, bangsa ra munuk, ovu vali tali vai ra munuk, naꞌa lanit ivavan ini veka rsiꞌik tamata matmatan avyai amar itelu ovu amar isa ni lihir a.* 11:9 Amar itelu ovu amar isa ni lihir a, ihin a naꞌa vai Mala ne, tiga setengah hari. Msiꞌik vali ayat 11. Ira munuk wol rtorung ma rfadoku tamata matmatan avyai naꞌa van ralan.† 11:9 Lan ana, tamata ovi rnaꞌa Israel rfadoku tamata matmatan ra naꞌa van ralan. Ira wol roving tamata matmatan ra, wean fiang ini totu. 10 Tamata ovi wol rorang Ubu naꞌa lanit ivavan a munuk, inar lolin urun, tevek tamata irua i rarenar lahir tali Ubu ma ti rfamalik Ni vaivatul ra, rmata roak. Ba rotu snoba ma kaꞌi rsivelik rangrangwaha, tevek tamata irua yai wol bisma rotu roak ma susa dawan nkena ira.

11 Naꞌuk amar itelu ovu amar isa ni lihir nelak roak, na Ubu nal-ewal nan a verin Ni tamata irua yai ma rvaꞌat ewal, ba rbatar ma rdiri. Ba tamata ovi rsiꞌik ira rbobar urun i lahir. 12 Tamata irua yai rarenar vai isa dawan urun tali lanit ratan nma ma nera ira. Vai yai nfalak ne, “Mya lanit ratan ini!” Nata irua rarata lanit ratan roak, ma mutan ra rkuma ira. Tamata ovi rira sian ira, rsiꞌik i rarata a.

13 Naꞌut inyai vali, na brian munuk, ruru dawan urun ma sepersepuluh kota yai namaꞌar. Tamata rivun ifitu rmata lahir, tevek ruru yai. Tamata liak ra rbobar ma raruru lalean ira, ma rtorung ma rfadawang Ubu i naꞌa lanit ratan a.

14 Sian urun i lahir hi norang i ula lalean a, nkena roak lanit ivavan a, ma nbosal roak. Naꞌuk, eka msyiꞌik! Sian urun i lahir hi nomor itelu a veka nma lahir.‡ 11:14 Msyiꞌik vali 8:13, 9:12.

15 Ubu Ni sansinir tali lanit ratan i nomor ifitu nafraik ni tvuri a, na urenar sansinir ovi rtali lanit ratan rangrihi ma vairira dawan urun ma rfalak ne, “Ba fiang ini, dida Duilaꞌa ovu Raja i ntevut tamata ra tali rira salasilan ra, nfareta munuk roak raja ovi rnaꞌa lanit ivavan ovu rira tamata ra. Ia veka nfareta, nata ti a wol ni wahan.”

16 Ba fareta dawan vutrua rahin ifaꞌat ovi rdoku rira kadera ra ma rfareta a, ma rnaꞌa Ubu wahan ralan a, rsangatur ma rfadawang Ia. 17 Ira rfadawang Ia ma rfalak ne,

19 Ba Ubu Ni Rahan Dawan Falurut i naꞌa lanit ratan a natvadil, ovu bisma trea vatvatat i rfadoku Ubu Ni inukun vutu ovi nala roak verin Musa yai. Nata, fitik a nfitik ma nti watan roak veli, ovu urenar dodung a ngoan ma nir-nar. Ruru dawan ovu daꞌut es i dawan urun nsuta vali.* 11:19 Vatvatat i tbas naꞌa ayat ini nanaꞌa Ubu Ni Rahan Dawan Falurut ralan a. Msiꞌik Keluaran 25.