Yohanes wean i namifi naꞌuk wol ntub-lufa, ma Yesus Kristus nangrihi verin ia
Tbas afa ovi veki
Kitab ini nfalyawang naꞌa afa ovi Yesus Kristus nfaturu ovu nangrihi verin Yohanes, naꞌut i wean i namifi, naꞌuk wol ntub-lufa (1:1). Yesus nfaturu ovu nfalyawang afa ovi veka rvotuk ra. Yesus nfaturu lan tenan a ma neluk Tamata Yanan, ma nbana naꞌa damar wan learira ra (1:12-16). Nata nfaturu vali ne, Ia neluk Domba Yanan ma ndir-ebang Ubu wan i ndoku ma nfareta naꞌa lanit ratan (5:6-14). Nfaturu munuk wean inyai, beti nfaturu vali ne, Ia wean suldadu rira dawan i nban-ulu verin suldadu ra, ma navul kuda ngangiar isa (19:11-16). Nata nfaturu ne, Ia wean Domba Yanan i nfareta ovu Ubu naꞌa kota Yerusalem ngorvaꞌan i nmerat urun a (suci) (21:22-23; 22:1-5).
Yohanes ntulis kitab ini naꞌut i tamata ra rwi-rwa tamata inorang ra, tevek rorang Yesus. Naꞌut inyai, na rfareta tamata ovi rnaꞌa negara ovi Roma nfareta ira, ma rsangatur ma raraning Roma rira raja dawan i rfanara ia ne, Kaisar. Tali tamata ovi rorang Yesus, na fareta Roma ra rfedan boku, tevek rafena ma rsangatur ma raraning Kaisar. Ira rfalak ne, rira Duilaꞌa verin Yesus aꞌuk, wol verin Kaisar. Naꞌuk boku vali rafla talik rira inorang a, tevek rbobar. Ba afa ovi Yohanes ntulis naꞌa kitab ini nfangrebat tamata ovi rorang Yesus ralarira ra, boma deka rafla talik rira inorang verin Yesus.
Kitab ini nfamalik naꞌa afa ovi veka rvotuk ra. Afa avyai felarira ra rsialing ira. Vaivatul kiasan ovi rvotuk naꞌa afa ovi Yesus nfaturu ra, rotu ma tamata ovi lalan a rorang Yesus, bisma rfan-aran. Naꞌuk fiang ini, vaivatul kiasan avyai munuk ihirira ra wol lyawan. Velik ne wean inyai, naꞌuk kitab ini ihin mngaꞌun a lyawan urun: naꞌa lanit i vavan a, na tamata ra rwi-rwa ita tamata ovi torang Yesus, naꞌuk deka tafla talik dida inorang a, tevek naran Ni amar a, na Duilaꞌa Yesus veka nfaleka munuk tamata ovi rira sian Ia, ovu Ia veka nfareta, nata ti wol ni wahan (11:15). Ba ita tamata ovi torang Ia veka tfareta vali ovu Ia.
Naꞌa kitab ini, na Yohanes nfamalik kota ifitu, ovu roh ifitu ovi rtali Ubu (1:4; 3:1); Ubu Ni kalolin ifitu vali (1:3; 14:13; 16:15; 19:9; 20:6; 22:7; 22:14); faliak ifitu ovi tfalak ma al traning Ubu (5:12; 7:12); trea vali damar wan ifitu (1:12), ovu afa liak rivun vali (1:16; 5:1, 6; 8:2; 12:3; 15:6-7; 17:9). Nomor “ifitu” yai ihin a ne, afa i kena urun ovu natnemu.
Kitab ini ihin a
Yohanes ni vaivatul ovi ntulis lan ovu ni salam a (1:1-8)
Afa ovi rvotuk lan a (pasal 1:9—3:22):
A. Yesus nfaturu ne, Ia nma ma neluk Tamata Yanan, ma nbana naꞌa damar wan ifitu learira ra. (1:9-20)
B. Surat ifitu verin tamata ovi rorang Yesus rira sidovung ra naꞌa kota ifitu. (pasal 2—3)
Afa ovi rorang afa ovi rvotuk lan a (nomor irua) (pasal 4:1—16:21)
A. Yesus nfaturu ne, Ia wean Domba Yanan i ndir-ebang Ubu wan i ndoku ma nfareta naꞌa lanit ratan. (pasal 4—5)
B. Domba Yanan nkamsat segel ifitu. (pasal 6:1—8:5)
C. Rafraik tvuri ifitu. (pasal 8:6—11:19)
D. Faneak ifitu ovi rfalyawang naꞌa afa ovi veka rvotuk ra. (pasal 12—16)
Afa ovi rorang afa ovi rvotuk lan a (nomor itelu). (pasal 17:1—21:8):
A. Yohanes nsiꞌik vata isa i tamata ra rkaꞌa roak ne, vatlean ia, naran Babel. (pasal 17:1—19:10)
B. Yesus nfaturu ne, Ia veka navul kuda ma nfaleka munuk Ni tamata ovi rira sian Ia. (pasal 19:11—21:8)
Afa ovi rvotuk marmuri lalean a (nomor ifaꞌat): Yohanes nsiꞌik vata isa i Domba Yanan veka nala roak ia neluk awan. Vata yai ihin a ne, ita tamata ovi torang Yesus. (pasal 21:9—22:5)
Snurak ovi rban-muri lalean (22:6-21)
1
Vaivatul ovi rbana ula lalean naꞌa kitab ini
1 Buku ini nfalyawang naꞌa afa ovi Ubu nfaturu verin Yesus Kristus, ma nfalak verin tamata ovi rkarya verin Ia naꞌa afa ovi Ubu nfadoku ra. Afa avyai veka rma lahir. Yesus Kristus nsinir Ni sansinir isa tali lanit ratan nsuta ma nfalyawang munuk afa avyai verin Yohanes i neluk tamata sansinir verin Ubu, boma nkaꞌa vali afa avyai. 2 Ba Yohanes nfamalik munuk lahir Ubu Ni vaivatul ra ovu afa ovi Yesus Kristus nfalak ovu notu ra, tevek ia nrea ovu nrenar roak afa avyai. 3 Ubu nala vaivatul ovi rnaꞌa buku ini verin Ni nabi. Ubu naflahar tamata i nbas vaivatul avyai verin tamata ovi rorang Yesus rira sidovung ra, ovu tamata ovi rarenar ma rot-orang lahir, tevek afa ovi Ubu nfalak yai, rira amar a sarseri roak.
Yohanes nala salam verin tamata inorang rira sidovung ifitu naꞌa propinsi Asia
4 Terang a valing averi, yaꞌa ini Yohanes. Ususan surat ini verin tamata inorang rira sidovung ifitu naꞌa propinsi Asia. Era ma fara Ubu naflahar mia ma nala Ni rala lolin a ovu malinan a verin mia. Salam i ula lalean ntali Ubu i fiang ini nanaꞌa, ovu nanaꞌa roak naꞌut i lanit ivavan wol nanaꞌa obin, ovu veka nanaꞌa lalawatan, nata ti wol ni wahan. Salam i norang i ula lalean yai, ntali Ni Roh i rfanara Ia ne, roh ifitu i rdir-lilit Ia naꞌa wan i ndoku ma nfareta naꞌa lanit ratan.* 1:4 Tafsiran ra rfalak ne, nomor ifitu kena urun, ovu natnemu lahir. Roh ifitu naꞌa ayat ini ihin a ne, Ubu Ni Roh. Wean i tamata Yahudi rfalak ne, roh ifitu, na ihin a ne, Ubu Ni Roh nkaꞌa afakataka munuk. 5 Salam i nban-muri lalean ntali vali Yesus Kristus i nfamalik lalawatan afa ovi kena ra. Afa ovi kena ra munuk rtali Ubu. Ubu nfavaꞌat lan lalean Yesus tali matmatan, ma nfareta munuk raja ovi rnaꞌa lanit ivavan a.
Ia nlobang ita, ovu laran a nvoat roak ma al nfatalik ita tali ngrebat i notu ma tamata ra inar ma rotu salasilan ra. 6 Ia notu roak ma tnaꞌa Ubu Ni Fareta, ma veka teluk mela falurut verin Yaman a Ubilaꞌa ma totu afa ovi ralan nfalak ma totu ra. Ba traning Yesus ma tfamalik Ni ngrebat a. Ia nfareta lanit ivavan a, nata ti wol ni wahan. Kena urun.
7 Mya ma tsiꞌik! Ita veka tsiꞌik Yesus nafnavul mutan ra nma. Tamata ra munuk veka rsiꞌik Ia. Tamata ovi rsungu Ia ma nmata veka rsiꞌik vali. Tamata ovi rnaꞌa lanit ivavan munuk veka rvakar urun, tevek Ia. Ba veka wean urun inyai! Kena urun.
8 Ubilaꞌa nfalak ne, “Yaꞌa ini Alfa ovu Omega; ihin a ne, Yaꞌa ula lalean Yaꞌa, ovu Yaꞌa vali veka ubana marmuri lalean. Fiang ini Yaꞌa unaꞌa, ovu unaꞌa roak naꞌut i lanit ivavan wol nanaꞌa obin, ovu veka unaꞌa lalawatan, nata ti wol ni wahan. Yaꞌa ini Ubu. Ning ngrebat a nlia munuk.”† 1:8 Alfa ovu Omega ihirira ne, huruf i nbana ula lalean ovu huruf i nbana marmurin lalean naꞌa vai Yunani ni ejaan a.
Yohanes nsiꞌik Kristus vanan i nfitik a nyadat a ma felan lolin urun, naꞌut i namifi naꞌuk wol ntub-lufa
9 Yaꞌa ini Yohanes, terabir-valibira yaꞌa, tevek itmunuk torang Yesus Kristus. Tamata ra rwi-rwa ita tevek torang Ia, ovu tnaꞌa roak Ni Fareta a, ovu vali tatahang raladida watan. Rvatuk yaꞌa ma uti unaꞌa nuhu isa naran Patmos, tevek ufamalik Ubu Ni vaivatul ra, ovu ufamalik Yesus. 10 Naꞌut amar kareda a, na Ubu Ni Roh a nfareta yaꞌa, ovu urenar vai isa ngoan a dawan ma wean tvuri. 11 Vai yai nfalak ne, “Mtulis munuk afa ovi mrea yai naꞌa buku, ma mala verin tamata ovi rorang Yesus rira sidovung ifitu ini: Efesus, Smirna, Pergamus, Tiatira, Sardis, Filadelfia ovu Laodikia.”
12 Ba ufulak wahang a, ma al udava vai i nangrihi nma verin yaꞌa yai. Ti ma ufulak wahang a, na urea damar wan ifitu. Damar wan avyai, rotu tali masa.‡ 1:12 Yohanes nfamalik afa ovi nrea wean i namifi, naꞌuk wol ntub-lufa. Vai mala nfalak ne, penglihatan. 13 Naꞌa damar wan ifitu yai fruarira ra, na afa isa felan a wean i ntali Ubu ma neluk tamata. Ni ravit a blawat i noru a nsuta naran lahir ean ra. Ni bakreat i ala nveva yaran a, rotu tali masa. 14-16 Wahan a vanan ma wean naꞌut i lera ndirlola a. Ulun a ovu Ni vut a rangiar ma wean avat minan. Matan vanan ma wean yafongan. Ean nyadat ma wean tembaga i rasnuri ia naꞌa yafu ma rfamasa roak ia ma nyadat. Vain a dawan ma ngoan a wean saksakan dodun. Liman mela ntaha nara ifitu ovu nahin blawat i namneran mela-balit a, ntali vavan a nma murin.§ 1:14-16 Tafsiran etal dawan rfalak ne, afa yai ni vut a nangiar.
17 Ti ma urea Ia, na ti ufangofak lahir tenang a naꞌa wahan ralan a, wean tamata i nmata roak a. Naꞌuk Ia nlauk liman mela a ma nkena yaꞌa ma nfalak ne, “Deka bwobar! Yaꞌa ini ula lalean Yaꞌa ovu vali uban-muri lalean. 18 Yaꞌa ini ning vavaꞌat kakiwal. Yaꞌa ini umata roak, naꞌuk eka msyiꞌik, fiang ini uvaꞌat ewal roak, nata ti wol ni wahan. Yaꞌa utaha vali kusi verin matmatan ra, ovu Ning ngrebat vali ma ufareta matmatan ra ma rvaꞌat ewal.
19 Ba mtulis munuk afa ovi mrea roak yai: Afa ovi fiang ini rvotuk roak, ovu afa ovi veka rvotuk naꞌa amar ovi veka rma ini. 20 Afa fanfonak i lan a wol mkaꞌa naꞌa nara ifitu i mrea roak naꞌa limang mela a, ovu damar wan ifitu i rotu tali masa yai, ihin a wean ini: Nara ifitu yai rfaturu ne, Ubu Ni sansinir tali lanit ratan ovi rwanar tamata ovi rorang Yesus rira sidovung ifitu yai. Damar wan ifitu yai nfaturu sidovung ifitu yai.”
*1:4 1:4 Tafsiran ra rfalak ne, nomor ifitu kena urun, ovu natnemu lahir. Roh ifitu naꞌa ayat ini ihin a ne, Ubu Ni Roh. Wean i tamata Yahudi rfalak ne, roh ifitu, na ihin a ne, Ubu Ni Roh nkaꞌa afakataka munuk.
†1:8 1:8 Alfa ovu Omega ihirira ne, huruf i nbana ula lalean ovu huruf i nbana marmurin lalean naꞌa vai Yunani ni ejaan a.
‡1:12 1:12 Yohanes nfamalik afa ovi nrea wean i namifi, naꞌuk wol ntub-lufa. Vai mala nfalak ne, penglihatan.
§1:14-16 1:14-16 Tafsiran etal dawan rfalak ne, afa yai ni vut a nangiar.