17
Afa ovi rotu ma tamata ra rotu aꞌuk salasilan ra
Matius 18:6-7,21-22; Markus 9:42
1 Yesus nfalak verin Ni tamata ovi rorang Ia ne, “Ita tkaꞌa roak ne, afa ovi rotu ma tamata ra rotu aꞌuk salasilan ra veka rnaꞌa, naꞌuk sian urun i lahir verin tamata ovi rotu ma tamata liak ra rotu salasilan. 2 Ni lolin a, rkeak vatu dawan isa naꞌa tamata avyai relarira ra ma relik ira rti tahat ralan. Rotu wean inyai, na lolin lia tali tamata avyai rotu ma tamata i ni inorang a kakoꞌu nleka ma notu salasilan.* 17:2 Tamata i relik ia nti tahat ralan naꞌa ayat ini ihin a ne, tamata nmata. Inyai lolin nlia Ubu nukun ma dawan ia, tevek ia notu ma tamata liak notu salasilan. 3 Wean inyai bi, msyiꞌik ma lolin afa ovi myotu ra! Wean i terabir-valibira isa notu salasilan, na mtyabu ia. Ba wean i nahil ma ntalik roak tali ni salasilan ra, na myabun ia. 4 Wean i notu salasilan verin mia fafitu naꞌa amar isa, ovu vali newal nala fafitu ia nma verin mia ma nfalak ne, ‘Yaꞌa ahil roak, ba era ma myabun yaꞌa,’ na mia musti myabun ia.”
Inorang i nangrebat a
5 Nata Yesus Ni rasul ra rfalak verin Ia ne, “Duilaꞌa Yesus, fara fwangrebat mami inorang a!” 6 Duilaꞌa nfalak ne, “Wean i bira inorang a veran sesawi ni vatul watan, na mia bisma fyalak verin aa dawan ini ne, ‘Mutvutuk lahir ma roal mdiri tahat ralan,’ na veka norang watan mia!”† 17:6 Sesawi ni vatul koꞌu rahi aa liak ra rira vatul ra, naꞌuk nmela ma naꞌa aa dawan.
Tamata sansinir isa ovu duan a
7 “Wean i tamata isa tali bir tinemun ni tamata sansinir nkarya naꞌa ni vaꞌi a, te nwanar ni afwatan ra, ma wean i newal ia tali ni karya, na tamata yai veka nfalak verin ni sansinir yai ne, ‘Mwa ma mufnaꞌan kikyai!’?‡ 17:7 Tamata sansinir naꞌa ayat ini wol ni hak akataka, wol naꞌan kadi, ovu vali musti not-orang lalawatan afa ovi ni dawan nfalak ra. Lan ana, Vaidida nfalak tamata sansinir ne, iria lesan. 8 Velik aba, wahal lahir! Ia veka nfalak verin ni sansinir yai ne, ‘Mususan afamtahan verin yaꞌa. Moru mu ravit i nmerat a, ma mdiri msiꞌik ma ufnaꞌan-ufnenu munuk veki, beti mufnaꞌan-mufnenu vali.’ 9 Ia veka nraning ni sansinir yai? Wahal lahir, velik ne notu munuk ni karya ovi nala verin ia. 10 Wean watan inyai verin mia vali. Wean i myotu munuk roak afa ovi Ubu nfalak ma myotu ra, na ni lolin a, fyalak ne, ‘Ami tamata sansinir ami watan, ovu wol fyawamami lahir, ba amotu aꞌuk afa ovi musti amotu ra.’ ”
Yesus notu ma lolin ewal tamata vutu ovi rira suhut ngabaa
11 Yesus nahu propinsi Samaria ovu propinsi Galilea rira elat ratan a ma nbana nti Yerusalem. 12 Naꞌut i Yesus nti naran ahu isa, na tamata vutu ovi rira suhut ngabaa rma rtuan Ia. Ira rdiri ma yaꞌi raroa ira tali Yesus,§ 17:12 Suhut ngabaa ihin a naꞌa vai Mala ne, kusta. Ini suhut aleman ma bis notu ma tamata liman, ean ovu wan liak ra rakvisal. 13 ma rafwak ne, “Yesus, Tuan Guru! Mlobang ami.”
14 Ba Yesus nsiꞌik ira ma nfalak ne, “Miti ma fyaturu tenabira ra verin Yahudi rira mela falurut ra, ma rsiꞌik tenabira ra ne, lolin roak te wahal.” Naꞌa rira banbanan obin, na lolin lahir ira tali rira suhut a. 15 Tamata isa tali tamata vutu yai, ti ma nsiꞌik tenan a, na lolin roak ia tali ni suhut a, ba newal ia ma nfadawang Ubu ovu vain dawan. 16 Nata nsangatur naꞌa Yesus wahan ralan a, ovu nfalak fara weninyai verin Ia. Tamata yai ntali Samaria.* 17:16 Tamata Yahudi ovu tamata Samaria rsikifan ira (isa wol inan lahir isa), ba tamata Samaria yai nfakabava tenan verin Yesus, na nfabriang ira munuk. 17 Yesus nfalak ne, “Inlangin a otu ma tamata vutu lolin ewal roak ira tali rira suhut a te wahal? Tamata isi yai rnaꞌa inba? 18 Wean inbinimi wol tamata isa vali tali ira rma ma rfalak fara weninyai verin Ubu, naꞌuk tamata i wol Yahudi ini saꞌi nma aꞌuk?” 19 Yesus nfalak verin tamata yai ne, “Mdiri ma mewal oa kikyai, tevek mu inorang a notu ma lolin roak oa.”
Naꞌut i Ubu veka nma ma nfareta lanit ivavan a
Matius 24:23-28,37-41
20 Tamata Farisi ifira rorat Yesus ne, “Lafira, na Ubu nma ovu Ni Fareta Ralan a?” Ba Yesus nfalak ne, “Ubu Ni Fareta Ralan wol nma ovu faneak ovi tamata ra rsiꞌik, 21 ovu vali tamata ra wol bisma rfalak ne, ‘Eka msyiꞌik, Ia naꞌa ini, te naꞌa ineri!’ Tevek Ubu neluk raja ma nfareta lanit ivavan ini naꞌa roak ralabira ra.”
22 Ba Yesus nfalak verin Ni tamata ovi rorang Ia ne, “Ni amar a veka nma ma inabira ma msyiꞌik Yaꞌa, Tamata Yanan Yaꞌa, naꞌa amar isa watan, naꞌuk mia wol bisma msyiꞌik. 23 Tamata ra veka rfalak verin mia ne, ‘Msyiꞌik Ia naꞌa ineri!’ Te, ‘Msyiꞌik Ia naꞌa ini!’ Mia deka miti ineri, ovu deka myorang ira. 24 Tevek Yaꞌa, Tamata Yanan Yaꞌa, veka uma ewal lanit ivavan ini, ma vanang wean lahir i fitik nyelar tali lanit wahan nti lanit wahan. 25 Naꞌuk Yaꞌa musti utuan veki wawaꞌuk i dawan urun a, ovu tamata ovi fiang ini rvaꞌat ra veka ralaꞌing Yaꞌa.
26 Amar i Yaꞌa, Tamata Yanan Yaꞌa veka uma, na tamata ra veka wean lahir naꞌut i Nuh nvaꞌat a.† 17:26 Kejadian 7:6-24 27 Naꞌut inyai, na tamata ra rafnaꞌan, rafnenu ovu rsifa wean watan wean a, ti naran amar i Nuh nrata ni kabal a. Nata wear dawan nma ma nfedan munuk ira.‡ 17:27 Nuh ni kabal ini wol ni lar, ovu wol ni mesin. Naꞌut i Nuh nvaꞌat a, na tamata ra rvaꞌat wean biasa watan, ba wol rkaꞌa ne, brian munuk, na rmata lahir! 28 Amar yai wean vali naꞌut i Lot nvaꞌat obin. Tamata rafnaꞌan, rafnenu, rfedi-rfaha afa, ravuri-rava ovu rotu rira rahan ra.§ 17:28 Kejadian 18:20—19:25 29 Naꞌut amar i Lot nban-talik kota Sodom, na Ubu nfasuka yafu ovu belerang wean lahir daꞌut tali lanit ratan, ma nvisal tamata ra munuk.
30 Veka wean vali inyai naꞌut i Yaꞌa, Tamata Yanan Yaꞌa, uma ma ufavotuk tenang a.* 17:30 Tamata ra wol ranovak ne, Yesus veka nma ma nfabriang ira ma nukun lanit ivavan munuk. 31 Naꞌa amar yai, na tamata ovi ryari ira naꞌa rira rahan ratan ra, deka rsuta ma rala rira afa ovi rnaꞌa rira rahan ralan, ovu vali tamata ovi rkarya naꞌa rira vaꞌi ra wol bisma rewal roak ira rti rira rahan ra.† 17:31 Tamata Yahudi rira rahan ra wol vunarira, ba ira baꞌi rdoku naꞌa rahan ratan, wean i tdoku naꞌa sirtetan a. 32 Mingnanang afa i nkena roak Lot awan a.‡ 17:32 Kejadian 19:26 Lot awan nfulak wahan ma nsiꞌik Sodom, tevek snain nlobang ni metan ra. 33 Tamata iki watan nfikir aꞌuk ni vavaꞌat naꞌa lanit ivavan a, na ia veka wol ni vavaꞌat kakiwal a. Naꞌuk iki watan wol nfikir ni vavaꞌat tevek norang Yaꞌa, velik ne tamata ra rfedan ia, na ia veka ni vavaꞌat kakiwal.§ 17:33 Matius 10:39, Markus 8:35; Yohanes 12:25 34 Yaꞌa ufalak verin mia ne, naꞌa ovan i veka uma ewal yai, na wean i utuan tamata irua rtuba koꞌi isa, na Ubu veka nala isa, naꞌuk isa nanaꞌa watan. 35 Wean i vata irua rbutar slaru naꞌa batu putar, na Ubu veka nala isa, naꞌuk isa nanaꞌa watan.” [ 36 Wean i tamata irua rnaꞌa vaꞌi, na Ubu veka nala isa, naꞌuk isa nanaꞌa watan.]* 17:36 Vai Yunani ni naskah mnanat urun ra wol rira ayat ini. 37 Ba Yesus Ni tamata ovi rorang Ia rorat Ia ne, “Duilaꞌa, afa yai veka nvotuk naꞌa inba?” Ba Ia nfalak verin ira ne, “Wean i matmatan ra rnaꞌa inyai, na manut nangan dawan ovi baꞌi raꞌan afa matmatan ra rnaꞌa vali inyai.”† 17:37 Afa ovi Yesus nfalak ra naꞌa ayat ini ihin a ne, manut nangan dawan ovi baꞌi raꞌan matmatan ra rfaturu ma lyawan wan i matmatan nanaꞌa. Naꞌa Yesus Ni amar i veka nma, na veka lyawan vali verin tamata ra munuk.
*17:2 17:2 Tamata i relik ia nti tahat ralan naꞌa ayat ini ihin a ne, tamata nmata. Inyai lolin nlia Ubu nukun ma dawan ia, tevek ia notu ma tamata liak notu salasilan.
†17:6 17:6 Sesawi ni vatul koꞌu rahi aa liak ra rira vatul ra, naꞌuk nmela ma naꞌa aa dawan.
‡17:7 17:7 Tamata sansinir naꞌa ayat ini wol ni hak akataka, wol naꞌan kadi, ovu vali musti not-orang lalawatan afa ovi ni dawan nfalak ra. Lan ana, Vaidida nfalak tamata sansinir ne, iria lesan.
§17:12 17:12 Suhut ngabaa ihin a naꞌa vai Mala ne, kusta. Ini suhut aleman ma bis notu ma tamata liman, ean ovu wan liak ra rakvisal.
*17:16 17:16 Tamata Yahudi ovu tamata Samaria rsikifan ira (isa wol inan lahir isa), ba tamata Samaria yai nfakabava tenan verin Yesus, na nfabriang ira munuk.
†17:26 17:26 Kejadian 7:6-24
‡17:27 17:27 Nuh ni kabal ini wol ni lar, ovu wol ni mesin. Naꞌut i Nuh nvaꞌat a, na tamata ra rvaꞌat wean biasa watan, ba wol rkaꞌa ne, brian munuk, na rmata lahir!
§17:28 17:28 Kejadian 18:20—19:25
*17:30 17:30 Tamata ra wol ranovak ne, Yesus veka nma ma nfabriang ira ma nukun lanit ivavan munuk.
†17:31 17:31 Tamata Yahudi rira rahan ra wol vunarira, ba ira baꞌi rdoku naꞌa rahan ratan, wean i tdoku naꞌa sirtetan a.
‡17:32 17:32 Kejadian 19:26 Lot awan nfulak wahan ma nsiꞌik Sodom, tevek snain nlobang ni metan ra.
§17:33 17:33 Matius 10:39, Markus 8:35; Yohanes 12:25
*17:36 17:36 Vai Yunani ni naskah mnanat urun ra wol rira ayat ini.
†17:37 17:37 Afa ovi Yesus nfalak ra naꞌa ayat ini ihin a ne, manut nangan dawan ovi baꞌi raꞌan matmatan ra rfaturu ma lyawan wan i matmatan nanaꞌa. Naꞌa Yesus Ni amar i veka nma, na veka lyawan vali verin tamata ra munuk.