Yohanes ni surat i ntulis lan a
Tbas afa ovi veki
Tamata ovi lalan a rorang Yesus rfalak ne, Yohanes ni surat i ntulis lan ini, ntulis naꞌa kota Efesus, ma nkirim verin tamata ovi rorang Yesus naꞌa propinsi Asia Koꞌu. Naꞌut inyai, na itrana roak ia.
Naꞌut i Yohanes ntulis surat ini, na nabi boku rair afa ovi wol kena ra, ira nabi siklabir ira. Nabi siklabir avyai rfalak ne, Kristus wol tamata urun Ia. Felan a watan wean tamata. Ira rfalak vali ne, velik ne dida afa ovi totu ra sian, naꞌuk wol akataka, tevek tenadida ra watan saꞌi sian. Yohanes nfalak ne, rira afa ovi rair ra munuk wol kena lahir. Ia nfalak vali ne, Ubu Yanan a Yesus, neluk tamata. Wean i tkaꞌa Ubu, na dida vavaꞌat ra veka wean urun Ia. Ihin a ne, tahil ma tatalik tali dida salasilan ra, ma tot-orang Ni fareta ra, ovu tsilobang ita.
Afa liak ovi Yohanes ralan nfalak a, bisma tbas naꞌa (1 Yohanes 5:13). Ia nfalak ne, “Utulis surat ini verin mia tamata ovi myorang roak Ubu Yanan a, boma mkyaꞌa lahir ne, bira vavaꞌat kakiwal roak.” Naꞌa surat ini, na ita veka tbas naꞌa faneak ovi rfangrebat raladida ra, boma tkaꞌa ne, Ubu nala roak vavaꞌat kakiwal verin ita (2:3, 5-6; 3:10, 14, 24; 5:11-12, 18-20). Wean i torang Duilaꞌa Yesus, na ita veka wol tbobar roak Ubu (2:28; 3:19-22; 4:16a, 17-18; 5:14).
Surat ini ihin a
Vaivatul ovi Yohanes ntulis lan. (1:1-4)
Vaivatul ovi Yohanes ntulis lan: Ita tnaꞌa Ubu Ni lyawan a. (pasal 1:5—2:27)
A. Wean i tkaꞌa Ubu, na tatalik roak dida afa sian ovi totu ra, ma torang aꞌuk Ni afa ovi nfareta ma totu ra. (pasal 1:5—2:27)
B. Ita torang ne, Raja i ntevut dida salasilan ra (Mesias), inyai Yesus. (2:18-27)
Vaivatul ovi rorang vaivatul ovi ntulis lan: Ita teluk roak Ubu Yanan ra (2:28—4:6)
A. Dida afa ovi totu ra wol wean tamata ovi nait sian nleal ira. (2:28—3:24)
B. Ita torang ne, Raja i ntevut dida salasilan ra, inyai Yesus, ovu Ia neluk tamata. (4:1-6)
Bagian i nban-muri: Silobang ovu inorang a. (pasal 4:7—5:12)
A. Ita musti tsilobang ita. (pasal 4:7—5:5)
B. Ita torang ne, Ubu Yanan i nmata verin ita, inyai Yesus. Ia nmata, ma nala vavaꞌat kakiwal verin tamata ovi rorang Ia. (5:6-12)
Afaki notu mi Yohanes ntulis surat ini. (5:13)
Vaivatul ovi rban-muri ra. (5:14-21)
1
Ubu Ni Vaivatul i nala vavaꞌat
1 Surat ini nfamalik ne, tali lalan a, naꞌut i Ubu beti notu lanit ivavan a, na Ni Vaivatul i nala vavaꞌat verin tamata ra, nanaꞌa roak. Amrenar Ia ovu amrea Ia ovu matamami ra. Ami amsiꞌik roak Ia ovu amkena roak Ia ovu limamami ra.* 1:1 Yohanes ntulis Ni Vaivatul, ihin a ne, Yesus Kristus. Yohanes ntulis surat ini, naꞌuk nala vaivatul ami lalawatan: amsiꞌik, amrenar, dll. Ia ntulis wean ini al nfaturu ne, ia ovu rasul liak ra ralarira isa ma rsurak a rair tamata ra. 2 Ia i nala vavaꞌat a, nvotuk roak naꞌa lanit ivavan ini, ma amrea lahir Ia. Ba amfamalik afa ovi amrea yai, ovu amfalyawang verin mia ne, Ia nala vavaꞌat kakiwal verin tamata ra. Naꞌut i lanit ivavan wol nanaꞌa obin, na Ia nanaꞌa roak ovu Yamadida Ubilaꞌa. Naꞌuk fiang ini, Ubu nfavotuk roak Ia verin ami. 3 Afa ovi amsiꞌik ovu amrenar roak yai, amfamalik vali verin mia, boma raladida isa naꞌa dida sidovung a. Ralad isa vali ovu Yamadida, ovu Yanan a Yesus Kristus. 4 Amtulis munuk afa ovi verin mia, boma nfatnemung raladida lolin ra.
Iki nvaꞌat naꞌa lyawan ralan, na ia ntali Ubu
5 Ami amrenar roak ivar ini tali Yesus, ba amfalak verin mia ne, Ubu vanan a saꞌi lyawan, ba dedan a wol nanaꞌa roak Ia.† 1:5 Ubu lyawan Ia, ba nmerat urun, wean lyawan. Lyawan ni musu verin dedan a, tevek dedan nvua afa sian lalawatan, wean salasilan ra ovu nitu ra. 6 Wean i tfalak ne, ralad isa ovu Ia, naꞌuk tvaꞌat naꞌa dedan ralan obin, na tsiklabir roak, ovu wol tot-orang afa mngaꞌun ovi Ubu nfalyawang lalawatan verin ita. 7 Naꞌuk wean i tvaꞌat naꞌa lyawan ralan wean Ubu nanaꞌa lyawan ralan, na veka ralad isa ovu tamata inorang ra, ovu Ia nfamerat ita lalawatan tali dida salasilan ra munuk nahu Yanan a Yesus laran i nvoat a. 8 Wean i tfalak ne, wol dida salasilan, na ita kaꞌi tlabir watan tenadida ra, ovu Ubu Ni vaivatul mngaꞌun ra wol rnaꞌa raladida ra. 9 Ubu wol nsiklabir, ba wean i tatorung dida salasilan ra verin Ia, na Ia veka not-orang lahir afa ovi nfalak ra, ma naꞌi vatuk dida salasilan ra ovu nfamerat raladida ra tali dida sian ovi totu ra. 10 Wean i tfalak ne, wol totu salasilan, na inyai wean lahir i tfalak ne, Ubu nsiklabir, ma Ni vaivatul ra wol rnaꞌa raladida ra.
*1:1 1:1 Yohanes ntulis Ni Vaivatul, ihin a ne, Yesus Kristus. Yohanes ntulis surat ini, naꞌuk nala vaivatul ami lalawatan: amsiꞌik, amrenar, dll. Ia ntulis wean ini al nfaturu ne, ia ovu rasul liak ra ralarira isa ma rsurak a rair tamata ra.
†1:5 1:5 Ubu lyawan Ia, ba nmerat urun, wean lyawan. Lyawan ni musu verin dedan a, tevek dedan nvua afa sian lalawatan, wean salasilan ra ovu nitu ra.