15
Ifit e Angelo ae ri Pose na Ifit e Tatawin
1 Namih, ia ka par nenge tara na fakileng bae na kukulii, ae i neng keskes. Ia par ifit e angelo ri pose na ifit e piran tatawin. I e farfarop na foron tatawin, wara le foron tatawin ae, i e farfarop na ngaliaf ke God. 2 Ke ia ka par nenge tier ae i par arae palgantes ri tel u ini galas ae ri ka ikis ta u turan yiif. Ma awii na baban palgantes ae, ia ka par fanu ae ri ka fapu ta rakrakai ken muruuw aka turan tantanwa ke fakileng na asa. Ri pose na foron gita ae God i ta ta u usuf ri. 3 KisimBek 15:1Ke ri ka sek seksek ke Moses fafauun ke God, ke seksek ken Natun Sipsip aragii:
“Kumguui God, o rakrakai kanaka,
foron foim kiam i laumet kanaka ma i neng keskes.
O king ken foron mat tikii,
sinangum i tortores ma i tekentu.
4 BukSong 86:9; Jeremia 10:7Kumguui, o keskes sau o kalkaluu.
Se biil in to bulat lo wo?
Ma se biil in me asam?
Foron mat tikii rin la
ma rik lotu unaisam,
wara le foron tortores na foim kiam,
ka tapiek malal tah.”
5 KisimBek 38:21Namih, ia ka par una kukulii ke ia ka par Felun Tunmapek ae i kalkaluu kanaka ka sapeng, i e fel ae God i kiis lo. 6 Ifit e angelo ae ri pose na ifit e tatawin, ri ka suu tina Felun Tunmapek. Ri kilkiliis ini foron rokap na kaen ae i fuuh ma i kilangkilang ke ri ka pus ini goul na matan mangia ri. 7 Namih, neng lon ifet e fakfakiis ae ri liu, ka ta ifit e dis ae ri tel u ini goul usuf ifit e angelo ae. Foron dis ae ifuun ini ngaliaf ke God ae i liu fitliu ma biil ti farfarop lo. 8 KisimBek 40:34; 1King 8:10,11; 2Stori 5:13,14; Aisaia 6:4Ke, Felun Tunmapek ka fuun ini bau tina memeh ke God ke tina rakrakai kia. Ma biil ifasi tikas in kau na Felun Tunmapek papang na aunbiing ifit e tatawin sing ifit e angelo ae in rop.