6
1 Arae foron tikiin foim ke God, keme sising gam le gong gam langre famais kia. 2 Aisaia 49:8Wara i tarah,
“Na aunbiing tutus kiak,
ia ka ongen o,
ke na biingen fafaliu,
ia ka lupes o.”
Ongen u! Igii sau e aunbiing tutus ke God. Igii sau e biingen fafaliu.
Tifat ke Pol na palgan Tatawin
3 Biil keme ier le kemen tel ti tier ae in tel fakut sal salan tikas, tarama fanu ri ka orek laulau una foim kimem. 4 Isau le, na foron tier tikii keme tel u, keme finngas u tom le kemem foron fafauun tekentu ke God: Keme tifat na aunbiing keme tafe tatawin, aunbiing keme kalkalsakai fangungut, aunbiing keme mamais, 5 Aposel 16:23aunbiing ri paket kemem, aunbiing keme kiis na kamkabet, aunbiing fanu ri kawil kemem ini ngaliaf, aunbiing foim i rakrakai, aunbiing keme matene, ke aunbiing na fitol. 6 Keme finngas sinang ae i kalkaluu, rokap na tasum, sinangun kiis fofo, ke sinangun falupes. Ke keme foim ini rakrakai ken Tanwa Kalkaluu, ini sinangun famais tekentu, 7 ini orek tekentu, ke ini rakrakai ke God. Ma keme ka pose na tortores na sinang arae tier una fapaket na mia kemem ke na kaisa kemem. 8 Taftawa fanu ri bulat lo kemem le biil, ri use falaulau kemem le ri usefages kemem, isau le keme tel foim tom. Keme orek tekentu, isau le fanu ri use u le kemem lem. 9 Ri usum lo kemem, isau le ri tara le biil ri usum lo kemem. Minet i fatat kemem, isau le keme liu tom. Ri paket kemem, isau le biil ri siimete kemem. 10 Keme fuun ini mamais, isau le keme laes la masau. Keme lauu, isau le keme tel ifuun e fanu ri ka kalok. Biil ti minmara kemem, isau le foron tier tikii kimem.
11 Foron talmem, fan Korin, keme ka use foron tier tikii ta usuf gam, ma balmem i sapeng usuf gam. 12 Balmem biil i babat usuf gam, isau le gam babat na balmi usuf kemem. 13 Igii ia orek usuf gam arae gam berberat tom kiak: I rokap le gam sabin gamen sapeng na balmi usuf kemem, una kiliis sinang ae keme tel ta u ulo gam.
Gong Gam Patep turan Fanu ae Biil ri Unune
14 Gong gam patep turan fanu ae biil ti unune kiri. Tortores na sinang ifasi arafa turan sinang laulau? Ke malal in fatala arafa turan kubunor? 15 Matngan sosomangat arafa imel na fatpoto Karisito ke Satan? Matngan sani i fafasi na fatpoton nenge tom unune ke kaltu ae biil i unune? 16 1Korin 3:16; 6:19; WokPris 26:12; Esekiel 37:27Matngan sosomangat arafa ifasi le in mel na fatpoton Felun Tunmapek ke God turan foron god famfabal? Ma kere tom kere Fel ke God ae i liu fitliu. God i use ta u aragii,
“Ian kiis naisri
ma iak la na fatpoto ri,
ian God kiri
ma rik fanu kiak.”
17 Aisaia 52:11I e wara, Kumguui ka tara sabin aragii,
“Gamen suu koseng ri,
ma gamek tampaek koseng ri.
Ke gong gam sigil ti tier ae i duh na matang,
isi iak somangat pes gam.”
18 2Samuel 7:14; 1Stori 17:13; Aisaia 43:6; Jeremia 31:9“Kumguui ae Rakrakai kia i liuliu kulkulef, i use u sabin aragii,
‘Ian Tama gam,
ma gamek berberat kiak
ke foron keleflik kiak.’ ”