1 Agaw adon, ako si Paulus yamapiriso sabap ng pyapangagadan ko yang sogo kanak ni Isa Almasi na magpayapat adto kamayo na dili ng Yahodi. 2 Sang way dowa-dowa kyakatigaman mayo na syasarig kanak ng Tohan yani na gawbuk para sang kamayo kadyawan. 3 Kay pyapakatigam kanak ng Tohan yang kanan kahanda na wa akatigami sangaon. Na, aon day tagbis na syosorat ko makapantag sinyan ansini na sorat. 4 Kong basaun mayo, akatigaman da mayo na yatagan ako ng pagsabot sining tinago na kahanda na yan makapantag sang Almasi. 5 Sang yalabay na panahon wa pa apakatigaman ng Tohan adto sang mga manosiya daw ono yang kahanda nan. Awgaid adon pyapakatigam da nan pinaagi sang kanan Nyawa adto sang mga sahabat na pipili nan kipat sang mga magpapakatigamay sang pyapakatigam nan kanilan. 6 Aw yani yang kahanda nan na sabap sang pagpangintoo sang Madyaw na Gogodanun, kamo na dili ng Yahodi, amakadawat oman kamo sang kariko ng kadyawan na atag ng Tohan kanami na bangsa Israil, aw amainang oman kamo ng kabain sang jamaa na magonawa ng lawas ng Almasi, aw amakadawat oman kamo upud kanami sang pyapasad ng Tohan sabap sang pagkasambok mayo sang Almasi.

7 Na ako, pipili ako ng Tohan sini na gawbuk ng pagpayapat ng Madyaw na Gogodanun sabap sang looy aw kabarakat nan. 8 Sang kariko ng mga otaw na sakop ng Tohan ako yang way kapatot na dait atagan sini na gawbuk, awgaid pipili nan ako antak magpayapat sang mga dili ng Yahodi ng makapantag sang kadyawan na di amasokat na atag kanilan ng Almasi. 9 Aw syosogo nan ako antak magpakatigam sang kariko ng mga otaw daw monono yang pagtoman ng Tohan sang kanan kahanda na wa nan apakatigaman sangaon. Sang yalabay na panahon tyatago inyan ng Tohan na yan yang yagabaoy sang kariko ng mga butang 10 kay antak adon sabap sang mga yamangintoo sang Almasi na silan yang tyatawag na jamaa, mapakita da nan adto sang mga yagadato sang pangawangkawangan na magonawa ng mga malaikat aw mga di natun makita na aon kapatot aw kabarakat daw ono yang kaum ng katigam ng Tohan.* 3:10 Yang katigam ng Tohan makita ansang jamaa kay ansan magakasambok yang kariko ng mga otaw na yamangintoo sang Almasi na maskin ono yang bangsa atawa tribo nilan. Aw idto oman yang kahanda nan. 11 Na, ininang yani ng Tohan sobay sang pyagakahanda nan sangaong ona pa. Aw yatoman da nan yang kahanda nan sabap kang Isa Almasi na kanatun Tagallang. 12 Na adon, sabap sang kanatun pagpangintoo sang Almasi aw sabap ng yagakasambok da kita adto kanan, di da kita amalluk domood sang Tohan kay aon kanatun kasigorowan na atarimaun nan kita. 13 Agaw, pangayoon ko kamayo na di kamo kawaan ng katigsun sang pangatayan mayo sabap sang mga kasikotan na kyakaagian ko para kamayo kay yani para sang kamayo kadyawan.

14 Na, sabap sang kariko ng kadyawan na pyagakahanda kanatun ng Tohan mosojod ako antak magdowaa adto sang Tohan na kanatun Ama. 15 Yan yang pyagasikunan ng kariko na adto sang sorga aw adi sang donya, aw yang kariko ng byabaoy sakop da nan. 16 Pangayoon ko sang Tohan na sobay sang bali na kabarakat aw kadyaw nan atabangan nan kamo aw pakatigsunun nan yang kamayo pangatayan sabap sang Nyawa nan. 17 Magauya gao yang Almasi sang pangatayan mayo sabap sang pagpangintoo mayo kanan. Aw magonawa sang kaoy na yakagamot ng maum adto sang lopa, yakagamot gao yang kinabowi mayo sang looy ng Tohan. 18 Pangayoon ko oman na masabot gao mayo upud sang kadaigan pa na mga sakop ng Tohan daw ono yang bali na kadakowa ng looy ng Almasi. 19 Aw maskin bunna na di gaid natun amasabot yang dakowa na looy nan, pangayoon ko na akatigaman mayo yang looy nan kamayo. Aw ansinyan makita gao sang kinabowi mayo yang batasan aw kinaiya na yagasikun sang Tohan sampay na waa day akasaway kamayo.

20 Adon, pojiun ta yang Tohan kay sabap sang kanan kabarakat na idi sang kanatun pangatayan amainang nan yang labaw pa sang maskin ono na apangayoon atawa madumdum natun. 21 Sabap sang ininang nan para sang jamaa aw sabap sang ininang ni Isa Almasi pojiun ta yang Tohan sampay sang way kataposan! Amin.