Paul di bura
Rome vene
rofu
Ago di ini adina
Paul yaku Rome vene rofu bura reyo, ini adina bi Rome ekalesia vene rofu egoru rena di ida dogo regamo. Ini nirorotari rena ago bi mironari meda bedakairi, ekalesia vene fogori, moimai resi ini aedena dudu Spain rofu bogo. Ekalesia vene di mokena vari gira aena di ada yora ni-itara regi bura reyo, makai ekalesia vene ini veguri reremama regedi. Mina burari bi Paul di sina tau tora iniye buka beri bura reyo kana.
Rome ekalesia vene kokora nina koina niyori, bi ini usa usa nina ago ina rofu nisi bura di adina niyo: “Adina mina ago buniri Sei di mokena rorobo moi ogau rido: bi mokena vari gira aena dudu ouresi kora resi koina nigo.” (1.17)
Paul yaku mina ago di adina tau vakoi ni-itara redo. Amiye tau vakoi, Jew vene ma tutubena idana vene, bi Sei sa moi rorobo riyainedi, ini adina ina tau vakoi bi vegu no di vava gabireri raga rededi. Amiye moi rorobo regedi, mokena vari gira Iesu Keriso rofu aena dudu. Mina usi Paul yaku vegu Keriso sa nioteimaro; mina bi Sei sa auta rena ruaka deyo. Mokena vari gira aedo amiye bi amuta Sei sa mina nufa, ye Sei di Vima yaku vegu no ma muyena di vava rofu erufudo. Koro 5—8 ri Paul ka Sei di ago gira di adina ma ini Vima di vava mokena vari gira aedo amiye di veguri ni-itara reyo. Mina usi nifeidena amiye gokai Jew vene ma tutubena idana vene bi Sei di nirorotari rena vegu amiye rofu raga rededi mina nioteimaro. Ini ago bi Jew vene yaku Iesu etofa reyadi, ye mina vegu bi Sei di nirorotari rena ago ideri. Ye makai amiye tau vakoi rofu, Sei di buni tora gade Iesu Keriso ri, moi negau rido. Ka mokeyo Jew vene bi toga Iesu etofa de regedi. Metona agori, Paul yaku gokai ekalesia amiye di vegu amedo kana bura reyo. Ini ago tora bi uka mana di ida amiye idanasa auta regi di ago. Ini agori bi Sei rofu naivo rena, gavamani ma yokoi yokoi rofu reremama rena ma uka di mokena di nikaitena rofu nioteimaro. Ago amiye yokoi yokoi rofu ma Sei di roka moi odoro rina ago dudu, ini ago koina niyo mini.
Beika sina ideri
Ago di ini adina ma ini mokena 1.1–17
Moi vegu rina di adina 1.18—3.20
Sei di moi vegu rina di ida 3.21—4.25
Vegu ruaka Keriso ideri 5.1—8.39
Israel vene Sei di nirorotari renari 9.1—11.36
Ekalesia vene di reremama vegu 12.1—15.13
Metona ago ma amiye yokoi yokoi rofu yuata nina ago 15.14—16.27
1
1 Na Paul, kaere bi Iesu Keriso di moimai rei tavoi reida amiye, ya rofu bura reida. Sei yaku na nifeidena amiye kana raka nisi Sei di ago buni nirausi regi auba reyo.
2 Sei senagi ini ago kikifari ini ago niyadi vene dudu mina ago buni nitore reyo. 3 Bi ini Mida dada bura reyadi, kaere bi amiye roaitari David di tutubena gutuna vata niyo; 4 ma Vima kikifa dudu Sei di mida vava nufa niogau reyo, ini muyenari gutuna moi dadi rae reyo dada, ina kaere bi Iesu Keriso uni Varika amiye. 5 Una bi ina dudu buni tora gade ma nifeidena vene di reremama moiyafa, ye amiye mokena vari gira aesi ini ago neidegedi, ini roka gagani gagani vene tau vakoi ini fogori dada. 6 Ma ya kaere mina fogori ka Iesu Keriso yaku ya raka nido, inasa auta reyainedi.
7 Mina sina bi Rome ri amededi vene tau rofu, kaere bi Sei ini uka masi iniye ini vene roka nido:
Uni Baba Sei ma Varika amiye Iesu Keriso di buni tora gade ma uka amuta ya maragane.
Buni tora gade mana di usa usa nina
8 Yomakai dudu ago kora regida, Iesu Keriso dudu ya tau vanu dada, nai Sei rofu buni tora gade maida, adina bi, kono tora noibanuri yi mokena vari gira aena di sina niogau redo. 9 Adina Sei bi nai ninegau redo amiye, kaere nai vima dudu ini Mida di ago buniri naivo reida. Ina diba na bi toga toga ya fafau ago mokegasa 10 toga toga usa usa nida, ye ari yokoiri Sei di ura dada, na bi ida baku resi ya rofu baegida. 11 Adina nai uka dadido ya vene vegika, ye Vima ini moimai yokoi mina yasa anarauda regida ma yeiva moiyagane. 12 Ye makai uniye uni mokena vari gira aena dudu ya na niegira regedi, ma na ka ya niegira regida.
13 Nai usika ourena, nai ura bi ya diba niyaganedi na bi uru tau ya rofu baegida (idu gua mamo bi kebi reyo). Mina ye tutubena idana vene yasa yi fogori moimai resi butu regida.✡ Acts 19.21 14 Na bi nai ago yokoiri vene* ago yokoiri vene: Greek agori mina bi Greek vene. ma yava ika idana vene rofu ago nirausi regida, mokena tora nufa vene rofu, ma ada de nufa vene rofu. 15 Mina resi ka ya kaere Rome ri amededi, bi nai uka dadido ya rofu ago buni nirausi regida.
Ago buni di vava
16 Na bi† Bura bedakai ka Keriso di nufa. ago buni fafau maena de, adina bi Sei di vava, kaere amiye tau mokena vari gira aego, ouresi mina bi Jew vene ma tutubena idana vene‡ tutubena idana vene: Greek agori mina bi Greek vene. ka moi vegu rigo.✡ Mk 8.38 17 Adina mina ago buniri Sei di mokena rorobo moi ogau rido: bi mokena vari gira aena dudu ouresi kora resi koina nigo. Bura reyo kana, “Mokena rorobo amiye bi mokena vari gira aena dudu vegu amego.”✡ Hab 2.4
Amiye tau noibanu di vegu no
18 Adina Sei di gubuyo resi kota rena amiye di vegu no dada omari gutuna moi ogau rido Sei di mokena kana de ma mokena rorobo de vene tau vakoi fafau, kaere ini Sei di mokena kana de vegu dudu ago rama biri ridedi. 19 Adina beika Sei dada diba nigedi, bi sui de, idu negauri oteimaro mini, Sei iniye yaku mina vene rofu oteimaro dada. 20 Adina Sei yaku senagi oma ma kono riyori gutuna, bi vena de, idu ini toga toga amedo vava ma ina bi beika kana, bi ramari vei mama reyadi; bi beika baika Sei yaku riyo dudu vei mama reyadi dada. Mina dada amiye bi ida yokoi dudu ina rofu nisui de regifa! 21 Adina Sei diba niyadi, idu bi Sei kana ini roka moi odoro de risi buni tora gade de maradi. Idu ini mokena bi tavoi tavoi reyo ma ini uka ada de kana.✡ Eph 4.17–18 22 Ye iniye niyadi bi mokena vabara nufa, idu ada de kana niyadi; 23 resi Sei kaere toga toga amedo di vabara fufuta masi vana dudu riyo vima amiye muyego kana ma erena, vibani yuka 4 nufa ma variva kana nivakegamadi.✡ Deut 4.16–18
24 Mina resi Sei yaku ini uka di ura rena vegu kino reyadi rofu ekure reyo. Makai iniye ini fogori ini roaita moi no regedi. 25 Ina vene yaku Sei di ago rama gedu masi ofa ago moisi beika Sei yaku riyo, mina nivakesi naivo regamadi, idu beika baika tau riyo amiye bi de, kaere bi toga toga buni tora gade madedi! Rama.
26 Mina resi, Sei yaku moi no rena di ura rofu ekure reyo. Adina ini rema yaku rumanasa varena vegu feresi rema bounasa varegamadi, amiye di mokena buni kana de. 27 Rumana vene ka makai, remasa varena vegu fufuta masi iniye iniye rofu ura regamadi, ye rumana vene yaku maena rena vegu no iniye iniye rofu resi ini ideri ini no di kaunava moigamadi.
28 Ma beika bi rama, mina dudu Sei rofu mokegi moi kekevata uyadi, ini mokenari Sei di mokena mokei itu reyadi, ye Sei yaku beika rena de vegu mina regi ina vene rofu mokena no ekure reyo. 29 Ina vene bi mokena rorobo de vegu,§ Bura bedakai ka koa rena nufa. uka esika mana, udu ma vegu no rena mina tau vakoi nufa vata baeyo; bi maunu nina, amiye umuyena, ruda rena, ofa nimana ma gubuyo vata baeyo. Ina bi fufuta sina nidedi vene, 30 nifafana rededi vene, Sei rofu gubuyo rededi vene, negiyagiya nufa, iniye roka ni moi tora resi nivasena resi vegu no besa besa asanu rena mokesi nono baba di ago de neidededi; 31 bi dona auna di moke moke nufa, nitore rena ago de resi bi uka buni de** Bura bedakai ka vegu no de erufudedi nufa. ma iriyeduka nufa de vene. 32 Ina diba Sei di ago gira dada, kaere mina kana vegu rededi bi buni bi muyegedi. Ina yaku maka rena de, idu kaere amiye rededi, ka ni mama regedi gira moisi reyaganedi.