Peter
di ouresi bura
Ago di ini adina
Peter di ouresi bura bi ekalesia vene rofu bura reyo. Mina vene bi “Sei di vo niyo vene”, kaere bi Asia keika di meda baedo enana eta rofuri rerevaida niyadi. Mina bura di ago tora bi ini bura vededi vene rofu egira regika, adina ini mokena vari gira aena dada toe ma esika esika maro. Bura reyo amiye yaku bura vededi vene di mokena Iesu Keriso di ago buni fafau ina vene rofu oteimaradi, adina Iesu di muyena ma dadi rae rena ma Sei nitore reyo dudusa dena meda yaku ina vene rofu uka mokena madedi. Makai resi bi ini toe moigedi, adina ini mokenari diba nigedi bi ini mokena vari gira aena bi rama ba ide. Ye “Iesu Keriso di ogau nina ariri” ini obini moigedi. (1.7)
Toe di medari, mina egira rena agosa bura reyo amiye yaku ka bura vededi vene rofu guyaguya niyo ina bi Keriso di vene kana ameyaganedi.
Beika sina ideri
Ago di ini adina 1.1–2
Sei di moi vegu rido di oteimana ago 1.3–12
Vegu akeke amena rofu egira rena ago 1.13—2.10
Ekalesia amiye esika esika moina di medari di moimai 2.11—4.19
Ekalesia amiye di ave nina ma naivo naivo rena 5.1–11
Metona ago 5.12–14
1
1 Na Peter, kaere bi Iesu Keriso di nifeidena amiye—
Sei di auba reyo vene kaere bi Pontus, Galatia, Cappadocia, Asia ma Bithynia gagani gaganiri rerevaida nisi amededi vene idana kana rofu mina bura reyaka. 2 Baba Sei senagi ya diba nisi auba reyo ma ini Vima ya akeke rigo, ye Iesu Keriso di ago neidegedi ma ini dava yaku ya moi ruaka rigo.
Sei di buni tora gade ma ini uka amuta ya rofu besa tanu maraine.
Toga amei baena uka mokena
3 Buni tora gade Sei uni Varika amiye Iesu Keriso di Baba rofu manadi! Ini iriyeduka tora gade dada ,dudusa vata nina vegu una maro, Iesu Keriso muyenari gutuna dadi rae reyo ida dudu. Mina bi toga amei baena di uka mokena una vata baeyo. 4 Ye Sei yaku gugura buni tora gade ini vene rofu dogo redo, mina asanu regika nari resifa. Ina yaku mina omari dogo redo, ye mironari bi iko, no o abiye de nigedi. 5 Mina bi ya rofu, yi mokena vari gira aena dudu, Sei yaku ini vava dudu nari rei mona redo ma yi moi vegu rina di ari di metonari, ya rofu ogau nigi dogo reyo.
6 Mina dada ada tora iniye refa, idu mina ituari beika toe idana idanari atesi yi uka yarena iniye rededi. 7 Ye mina idari, yi mokena vari gira aena bi rama ba ide oteimago. Goro fore ka moi sikori rigo, ma bi itari orisi ini no moi yakugo. Ma yi mokena vari gira aena yaku goro fore besa ebu resi Iesu Keriso di ogau nina ariri, bi ini roka moi odoro risi vabara iniye ma kikifa rena magedi. 8 Gokai beika vena de reyadi,* vena de reyadi; bura bedakai diba de niyadi nufa. idu uka madedi ma gua vena de rededi, idu mokena vari gira ina rofu aededi. Ye ya bi ini roka moi odoro rina dudu, ada tora gade resi gokai sina ago nigi anua rededi, 9 adina yi mokena vari gira aededi di obini bi yi vima moi vegu rigika.
10 Mina moi vegu rina dada, senagi senagi Sei di ago niyadi vene, kaere Sei di buni tora gade ya moigedi di sina niyadi, bi vei dogo rei mona resi Sei di agori bi maina reyadi. 11 Ina vene bi maina regamadi goina medari vata nigo ma gokai kana dudu ogau nigo.† goina medari vata nigo ma gokai kana dudu ogau nigo; o goina amiye vata nigo ma goina medari vata nigo. Mina bi meda Keriso di vima, kaere ina vene dudu yaku ninegau reyo; niyadi Keriso bi esika esika moigo, ma gabi bi ini vabara ogau nigo. 12 Sei yaku ini ago nidedi vene rofu niokuyo ini moimai renari bi ina kaya di de naivo reyadi, idu bi ya vene‡ ya vene; bura bedakai una nufa. di naivo reyadi. Mina bi ago buni di beika tau niyadi vene, Vima kikifa omari gutuna, moi feideyo di vava dudu sena ya vene rofu niogau reyadi. Ye naivo naivo vima beika ogau nigo mina vegika ura rededi.
Amei kikifa di vegu di raka nina
13 Mina resi moimai rena fafau mokei mona resi yi yuka vana nari regasa Iesu Keriso ogau nigori, buni tora gade ya rofu baego, mina rofu uka mokena ae mona refa. 14 Sei di mida kana, ini ago neidesi yi senagi ada gira di vegu di ura rena ga ourefeidefa. 15 Idu yi beika tau regedi bi kikifa dudu, Sei kaere ya raka niyo kana, 16 ini adina bura reyo, “Ya bi amei kikifa refa, ini adina na bi kikifa.”✡ Lev 11.44–45; 19.2
17 Ma Sei, kaere bi amiye tau di no, bi ida yokoi maka dudu kota redo, yokoi yokoi ini beika redo kana. Ina rofu Baba kana raka nigedi vonisi, bi konori amededi di medari bi ori dudu, ya kaya nari rei mona refa. 18 Mina ye, ya ya diba, beika rofu ya voi reyo yaku ya erufuyo, mina bi beika rama de vegu yi tutubena ya maradi. Mina bi moi sikori rigo diya goro o siriva kana de. 19 Idu mina bi Keriso ini dava dudu davana tora mina maro, kaere bi ori sisika mamoe mida, ini roaitari no yokoi de o ara yokoi de mina kana. 20 Sei yaku oma ma kono rina koderi, bi sena auba reyo, idu ari baena tumu nigediri, ya dada moi ogau riyo. 21 Ina dudu mokena vari gira Sei rofu aededi, kaere bi muyenari gutuna moi dadi rae resi vabara maro, ye yi mokena vari gira aena ma yi uka mokena bi Sei fafau aededi mini.
22 Yi anema yora niyadi ago rama rofu bi§ Bura bedakai ka Vima dudu nufa. yi vima moi ruaka riyo ma yi usika ourena rofu uka noibanu maradi, mina bi yi uka noibanu dudu** yi uka noibanu dudu; bura bedakai uka kikifa dudu nufa. ya kaya ya kaya uka noibanu mabifo. 23 Ya bi dudusa vata niyadi, yi nono baba muyededi dudu de, idu vegu toga toga amena di mida mida kana, Sei di ago toga vegu amedo dudu. 24 Adina:✡ Is 40.6–8
“Amiye tau bi oruma kana,
ma ini vabara bi suma dakimu di farofaro kana.
Oruma rarako nigedi ma farofaro yaregedi,
25 idu Varika amiye di ago bi toga toga ameibobigo.”
Mina ago bi ago buni ya rofu niokudo.
*1:8: vena de reyadi; bura bedakai diba de niyadi nufa.
†1:11: goina medari vata nigo ma gokai kana dudu ogau nigo; o goina amiye vata nigo ma goina medari vata nigo.
‡1:12: ya vene; bura bedakai una nufa.
✡1:16: Lev 11.44–45; 19.2
§1:22: Bura bedakai ka Vima dudu nufa.
**1:22: yi uka noibanu dudu; bura bedakai uka kikifa dudu nufa.
✡1:24: Is 40.6–8