13
Ayubu anaaza alumbe kesiye
na Mlungu
na Mlungu
1 Gaga gosi nágaona na matso gangu,
na nchigasikira na masikiro gangu,
nami nchigaelewa.
2 Go mmanyago mwimwi, nami nagamanya.
Tamkanizidi marifwa.
3 Ela nalonda nigombe na iye Mwenye Nguvu Zosi,
nalonda nlumbe lau rangu na Mlungu.
4 Ela mwi munaniziga na maneno ga handzo,
mwimwi mosi mu aganga msiofwaha chitu.
5 Kalapho mungenyamala,
mungeonekana muna ikima!
6 Vivi phundzani nidzihehere,
phundzani maneno ga kanwa yangu.
7 Dze, mundamuhehera Mlungu na mambo ga handzo
na kuchenga kpwa sababuye?
8 Dze, mundampendeleya Mlungu
na kumhehera?
9 Vino achikuchunguzani mundaonekato?
Au munaweza kumchenga, dza mchengavyo mwanadamu?
10 Kpwa kpweli iye andakudemurirani
ichikala munapendeleya atu chisiri-siri.
11 Dze, nyo ukuluwe taundakuogofyerani?
Dze, kandakutishirani?
12 Maneno genu ga ikima ni dza misemo isiyo mana dza ivu,
na maneno genu ga kudzihehera ni dza ngome za ulongo.
13 Nyamalani, nirichani nigombe,
ganiphahe ndigoniphaha.
14 Ni tayari hata ichikala ni kufwa, nifwe.
15 Andaniolaga, nami sina kuluphiro,
ela ndahehera mwendo wangu mbereze.
16 Kuku ndiko ndikokala kutivywa kpwangu,
mana asiyemuogopha Mlungu kandamsengerera bii.
17 Phundzani vinono go nigombago,
nago gakuinjireni mwenu masikironi.
18 Lolani nikadzitayarisha kudzihehera,
ninamanya kukala ni ndaisabiwa kukala sina lawama.
19 Ni ani ndiyenipinga?
Mana wakati uho ndakala nkanyamala na kufwa.
20 Navoya unihendere mambo mairi bahi,
nami sindadzifwitsa mberezo.
21 Wuuse mkpwonoo unaonipiga
na usiriche kuogofyako kukaniondosa.
22 Phahi niiha, nami ndaihika,
au uniriche nigombe, nawe unijibu.
23 Go makosa na dambi zangu ni ngaphi?
Nimanyisa uasi wangu na dambi yangu.
24 Kpwa utu wani unanifwitsira usoo,
na kunihenda aduio?
25 Dze, undaogofyera kodza riphepheruswaro ni phepho?
Na kuzoresa wiswa mkavu?
26 Mana unaandika mambo mai ga kunishitaki,
na kunihenda nirisi makosa gangu ga wanacheni.
27 13:27 Ayubu 33:11Unafunga magulu gangu gogoni,
na kulola njira zangu zosi,
na kutiya alama nyayo zangu ili unimanye ko ndikophiya.
28 Kpwa hivyo nabubudzika dza utu uolao,
dza nguwo yoriwa ni popho.