7
Ama Lamatua tao cap mi 144.000 (cangasu èpa nguru èpa riho) dhèu
1 Hèia jaꞌa ladhe kèdhi ana pajuu Lamatua dhèu èpa puru mai nèti sorga, titu ètu èpa madha ngèlu ètu rai-haha ne, ho taha ngèlu. Ka ngèlu bisa boe tiu asa dꞌara dhasi, rai-dedha, dènge ajꞌu-ajꞌu.✡ Yermia 49:36, Daniel 7:2, Sakaria 6:5 2 Lamatua hia si koasa, ho ra paꞌele iie rai-dedha dènge dꞌara dhasi. Ka jaꞌa kèdhi hari ana pajuu dhu leo ca dhèu nèti sorga, mai nèti dhimu. Na mai nèti dènge cap Ama Lamatua dhu mamuri taa-taa. Hèia na rodhe mi ana pajuu dhèu èpa sèra, peka na, 3 “Mate ku! Baku paꞌele iie ku rai-dedha, do dꞌara dhasi, do ajꞌu sèra. Mate toke jiꞌi tao ngare ku cap mi katangarèi dhèu unu Lamatua sèra.”✡ Yeskial 9:4, 6
4 Èle èèna ka, rèngu peka dènge jaꞌa, na, ana pajuu ne tao le tadha mi dhèu unu Lamatua sèra. Dhèu sèra aaꞌi-aaꞌi ra 144.000 (cangasu èpa nguru èpa riho) dhèu, dhu mai nèti suku Israꞌel. Nuka:
5 nèti suku Yahuda, 12.000 (canguru dua riho) dhèu;
suku Ruben, 12.000 dhèu;
suku Gad, 12.000 dhèu;
6 suku Aser, 12.000 dhèu;
suku Naftali, 12.000 dhèu;
suku Manase, 12.000 dhèu;
7 suku Simeon, 12.000 dhèu;
suku Lewi, 12.000 dhèu;
suku Isaskar, 12.000 dhèu;
8 suku Sebulon, 12.000 dhèu;
suku Yusuf, 12.000 dhèu;
aa nèti suku Benyamin, 12.000 dhèu.
Dhèu mola-mèci koa-kio Ama Lamatua dènge Ana Kalèbho
9 Èle èèna ka, jaꞌa kèdhi dhèu ae titu kèna, dhu ige kore boe. Rèngu mai nèti suku aaꞌi-aaꞌi, nèti udhu-rasa aaꞌi-aaꞌi, nèti kabarai aaꞌi-aaꞌi, aa nèti lii aaꞌi-aaꞌi ètu rai-haha. Rèngu pakaboko tangara asa kadera paredha, aa asa Ana Kalèbho kahèi. Dhèu sèra pake kodho pudhi, aa ra kèpe dènge rèu palam. 10 Ka aaꞌi-aaꞌi ra koa-kio, aku rèngu na,
“Jiꞌi koa-kio Ama Lamatua jiꞌi,
dhu madhèdi ètu kadera paredha Na.
Jiꞌi dedꞌe padedha-dedha Ana Kalèbho ne kahèi!
Rèngu seꞌe ka dhu pala mamuri hia jiꞌi.
Rèngu seꞌe ka dhu bhoke jꞌara mamuri hia jiꞌi.”
11 Ropa padhai lii rare sèmi èèna, ana pajuu Lamatua nèti sorga dhu rai-reo rare kadera paredha ne, patitu kètu urutuu ra, toke rèhu dꞌai rai, tangare asa kadera paredha aae ne. Katua-katua dènge èpa badha aae sèra, tao madhutu sèmi èèna kahèi. Rèngu aaꞌi-aaꞌi ra pahaha iisi mi Ama Lamatua, 12 aa ra peka na,
“Tareꞌa! Èèna tareꞌa-reꞌa!
Jiꞌi koa-kio Ama Lamatua kahèi!
Jiꞌi jꞌoka padedha-dedha kolongara Lamatua kahèi!
Ngangee dènge lii padhai Lamatua, dhu lèke mola-mola.
Koasa Lamatua dhu kapai risi eele.
Aꞌèra Lamatua seli eele.
Jiꞌi loe boe manèngi makasi mi Ama Lamatua.
Jiꞌi loe boe pakabꞌua Lamatua.
Lèke! Tareꞌa sèmi èèna!”
13 Ropa rèngu koa-kio rare sèmi èèna, hèia nèti 24 (dua nguru èpa) katua se, èci karèi jaꞌa, aku nèngu na, “Dhèu ae-ae dhu pake kodho pudhi se, èu tadha si, do? Rèngu se mai nèti mia?”
14 Te ngaa jaꞌa dhaa, peka na, “Aadꞌo, ama. Jaꞌa tadhe boe rèngu se, cee. Ama ka dhu tadhe risi.”
Ka na peka dènge jaꞌa, aku nèngu na, “Rèngu se, dhèu dhu bhodho nèti dꞌara jꞌajꞌèra aae.
Rèngu se, dhèu dhu pake le raa Ana Kalèbho ne,
sèna ka rase mèdha-papake ra,
aa tao papudhi kodho ra.✡ Daniel 12:1, Mateos 24:21, Markus 13:19
15 Nèti èèna ka, rèngu titu ètu madha kadera paredha Ama Lamatua.
Mèu-mèda rèngu lalau-laloꞌo Lamatua ètu dꞌara Èmu Manèngi-Mangajꞌi Na.
Lamatua dènge si taa-taa.
Lamatua madhenge si taa-taa.
16 Pe rèngu reꞌa heka manganga.
Pe rèngu koko-kamango heka.
Pe madha lodꞌo pakèpu heka si.
Pe kaꞌuri rèngu carici heka lèke lodꞌo pana.✡ Yesaya 49:10
17 Ana Kalèbho dhu padètu dènge kadera paredha èèna,
Pe Nèngu ka jꞌajꞌi dhèu bata-magee kètu rèngu.
Èèna na Nèngu ka eo nèti si,
lasi rinu asa madha èi dhu nèti mamuri hia dhèu.
Pe Lamatua saku eele sasusa ra,
sèna ka ra tangi ia ka.”✡ Lii Sodꞌa Koa-Kio 23:1-2, Yeskial 34:23, Yesaya 49:10, Yesaya 25:8
✡7:1 Yermia 49:36, Daniel 7:2, Sakaria 6:5
✡7:3 Yeskial 9:4, 6
✡7:14 Daniel 12:1, Mateos 24:21, Markus 13:19
✡7:16 Yesaya 49:10
✡7:17 Lii Sodꞌa Koa-Kio 23:1-2, Yeskial 34:23, Yesaya 49:10, Yesaya 25:8