1 ሄዋፔ ጉዪያን፥ ታኒ ኦራꬃ ሳሉዋኔ ኦራꬃ ሳዓ ቤዓዲ። ኮይሮ ሳሉኔ ኮይሮ ሳዓይ ꬋዬዳ። ኣባይካ ꬋዬዳ። ኢሳ 65፡17፤ 66፡22፤ 2ጵፅ 3፡13 2 ጌሻ ካታማታ ኦራꬃ ዬሩሳላሜ፥ ባሬ ኣሲናው ማያዴ ጊጌዳ ጌሊያ ዎዶሮ ናቲዳን፥ ጊጋ ኡቴዳዉና ሳሉዋፔ ፆሳ ማታፔ ዱጌ ዎꬌዉኖ ታኒ ቤዓዲ። ኢሳ 52፡1፤ 61፡10፤ ሳፅ 3፡12

3 ዎሊቃማ ኮሻይ ኣራታፔ ሃዋዳን ያጊዴ፥ ሃሳዪሺን፥ ታኒ ሲሳዲ፤ «ፆሳ ጎሊ ኣሳና ዴዔ፤ ፆሳይ ኣሳና ኢቲፔ ዴዓና። ኡንቱንቱ ኣ ኣሳ ጊዳና፤ ፆሳይ ባሬ ሁጴው ኡንቱንቱና ዴዓና። ኢ ኡንቱንቱ ፆሳ ጊዳና። ሂዝ 37፡27፤ ዎግ 26፡11፣ 12 4 ፆሳይ ኡንቱንቱ ኣይፊያ ኣፉꬃ ኡባ ቁጫና። ሃዋፔ ሲንꬃናው ሃይቁኔ ካዩ ዎይ ዋሱኔ ሳኩ ባዋ። ኣዪሲ ጎፔ፥ ኤጫባይ ꬋዬዳ» ያጌዳ። ኢሳ 25፡8፤ 35፡10፤ 65፡19

5 ኣራታን ኡቴዳዌ፥ «ታኒ ኡባባ ኦራፂሳይ» ያጌዳ። ቃሲካ ጉጂዴ ታና፥ «ታኒ ሃሳዪያዌ ኣማኔቲያዋኔ ቱማ ጊዲያ ዲራው ፃፋ» ያጌዳ። 6 ቃሲካ ታና ሃዋዳን ያጌዳ፤ «ፖሌቴዳ። ታኒ ኣልፋኔ ኦሜጋ፤ ዶሜꬃኔ ፖሉዋ። ሳሜቴዳ ኦናኔ ታኒ ዴዑዋ ሃꬃ ፑልቱዋፔ ጮ ኡሻና። 7 ፆኒያ ኡራይ ኦኒኔ ሃዋ ኡባ ላታና። ታኒ ኣው ፆሳ ጊዳና፤ ኢካ ታ ናዓ ጊዳና። 2ሳም 7፡14፤ ማዝ 89፡26-27 8 ሺን ያዪያዋንቱ፥ ኣማኔናዋንቱ፥ ቱናቱ፥ ሼምፑዋ ዎꬊያዋንቱ፥ ዎሹሚያዋንቱ፥ ቢቲያዋንቱ፥ ኤቃሲ ጎዪኒያዋንቱኔ ዎርዶቲያዋንቱ ኡባይ ዴዒያ ሳዓይ ታማይኔ ኤፂያ ዲኒ ኤፂያ ኣባ ጊዳናዋ። ሄዌ ላዔንꬆ ሃይቁዋ» ያጌዳ።

9 ላፑ ዉርሴꬃ ቦሻቱ ኩሜዳ ላፑ ኬሬቱዋ ኦይቄዳ ላፑ ኪታንቻቱዋፔ ኢቱ ታኮ ዪዴ ታና፥ «ሃ ያ። ታኒ ኔና ጌሌዉኖ ዶርሳ ማቻቶ ቤሳና» ያጌዳ። 10 ኪታንቻይ ታና ዳሮ ꬎቃ ዴሪያ ሁጲያ ኣያናን ኬሲዴ ጌሻ ካታማታ፥ ዬሩሳላማ ሳሉዋፔ ፆሳ ማታፔ ዱጌ ዎꬌዉኖ ታና ቤሴዳ። ሂዝ 40፡2 11 ሄ ካታማታ ፆሳ ቦንቹዋን ፖዓው። ሄ ካታማቲ ፖዑ ያስጲዲያ ጌቴቲያ ኣልዖ ሹቻ ማላ፤ ቢሪሊያዳን ጶላው። 12 ሄ ካታማቲው ታማኔ ላዑ ፔንጌቱኔ ሄ ፔንጌቱዋን ታማኔ ላዑ ኪታንቻቱ ናጊያ ዎልቃማ ኣዱሳ ዲርሳይ ዴዔ። ፔንጌቱዋን ታማኔ ላዑ ኢስራዔሊያ ዛሬቱዋ ሱንꬃይ ፃፌቲ ኡቴዳ። ሂዝ 48፡30-35 13 ኣዋይ ዶሊያ ባጋና ሄዙ ፔንጌቱ ዴዒኖ። ቃሲ ሂርኪ ባጋና ሄዙ ፔንጌቱኔ ሁጲሳ ባጋና ሄዙ ፔንጌቱ ዴዒኖ። ኣዋይ ዉሊያ ባጋናካ ሄዙ ፔንጌቱ ዴዒኖ። 14 ካታማቲ ዲርሳይ ዶርሳይ ኪቴዳ ታማኔ ላዓቱዋ ሱንꬃይ ፃፌቴዳ ታማኔ ላዑ ሹቻቱዋ ቦላ ጊምቤቴዳ።

15 ታናና ሃሳዬዳ ኪታንቻው ካታማቶ፥ ኢዚ ፔንጌቱዋኔ ኢዚ ዲርሳ ሊኪያ ዎርቃ ጋቲማይ ዴዔ። ሂዝ 40፡3 16 ካታማቲው ኦይዱ ጋፃይ ዴዔ፤ ካታማቲ ጌሳይኔ ጎምፓይ ኢቲ ማላ። ኪታንቻይ ካታማቶ ባሬ ጋቲማን ሊኬዳ። ካታማታ ላዑ ሻዓኔ ላዑ ፄቱ ኪሎ ሚቲሪያ ጊዳዱ፤ ካታማቲ ጌሳይ፥ ጎምፓይኔ ꬎቃቴꬃይ ኢቲ ማላ። 17 ኪታንቻይ ቃሲ ዲርሳካ ሊኬዳ። ኣሳ ኩሺያን ኢቲ ፄታኔ ኦይታማኔ ኦይዱ ዋꬋ ጊዴዳ። ሄዌ ኦኒኔ ሊኪያ ኦጊያን ኪታንቻይ ሊኪናዳ።

18 ካታማቲ ዲርሳይ ያስጲዲያ ጌቴቲያ ሹቻን ዲሬቴዳ። ካታማታ ቢሪሊያዳን ጶሊያ ጌሻ ዎርቃን ሜꬌታዱ። ኢሳ 54፡11-12 19 ካታማቲ ዲርሳው ሂፄቴዳ ሹቻይ ቦንቼቴዳ ሹቻ ኡባን ኣሌቄቴዳ፤ ኮይሮ ሂፄቴዳ ሹቻይ ያስጲዲያ፤ ላዔንꬁ ሳምፔሪያ፤ ሄዜንꬁ ኬልቄዶኒያ፤ ኦይዴንꬁ ባሉሪያ፤ 20 ኢቼሼንꬁ ሳርዶንኪሳ፤ ኡሱፑንꬁ ሳርዲዮና፤ ላፑንꬁ ኪሪስቲሎባ፤ ሆስፑንꬁ ቢራሊ፤ ኡዱፑንꬁ ቶጳዚዮኒያ፤ ታሙንꬁ ኪሪስጲራሲሳ፤ ታማኔ ኢቴንꬁ ያኪንቲያ፤ ታማኔ ላዔንꬁ ኣሜቴስፂኖሲያ።

21 ታማኔ ላዑ ፔንጌቱ ታማኔ ላዑ ኢንቁዋ ጌቴቲያ ኣልዖ ሹቻ፤ ኢቲ ኢቲ ፔንጊ ኢቲ ኢንቁዋን ኦሴቴዳ። ካታማቲ ኦጊ ቢሪሊያ ማላ ጌሻ ዎርቃ።

22 ጎዳይ፥ ኡባፔ ዎልቃማ ፆሳይኔ ዶርሳይ ካታማቲ ጌሻ ጎሊያ ጊዲያ ዲራው፥ ታኒ ሄ ካታማቲን ጌሻ ጎሊያ ቤዓቤይኬ። 23 ካታማቲው ፖዒያ ኣዋይ ዎይ ኣጌናይ ኮሼና። ኣዪሲ ጎፔ፥ ፆሳ ቦንቹ ሄ ካታማቲን ፖዔ፤ ዶርሳይካ ሄ ካታማቲው ፆምፒያ። ኢሳ 60፡19-20 24 ኣሳ ዜሬꬃይ ካታማቲ ፖዑዋን ሃሜታና። ሳዓ ካታቱካ ባሬንቱ ቦንቹዋ ሄ ካታማቲኮ ኣሃና። ኢሳ 60፡3 25 ካታማቲ ፔንጌቱ ኡባ ጋላሲካ ዶያ ዴዓና፤ ኡባካ ጎርዴቲኪኖ። ኣዪሲ ጎፔ፥ ሄዋን ቃማይ ባዋ። 26 ኣሳ ዜሬꬃ ጊታቴꬃይኔ ቦንቹ ሄ ካታማቲኮ ሺቃና። 27 ሺን ቱናባይ ዎይ ካዉሻባ ኦꬂያዌ፥ ዎይ ዎርዶቲያዌ ኦኒኔ ሄ ካታማቶ ጌሌና። ቃሲ ዶርሳ ዴዑዋ ማፃፋን ሱንꬃይ ፃፌቴዳዋንቱ ፃላላይ ሄ ካታማቶ ጌላና። ኢሳ 52፡1፤ ሂዝ 44፡9