Ooratha Caaquwaa Yohaannisa 1

Yohaannisi Xaafeedda

Mishiraachchuwaa Qaalaa

Geluwaa

Yohaannisi xafeedda mishiraachchuu, Yesuusi ashuwaa mayyiide asaa gidduwan beetteedda De7uwaa Xoossaa Qaalaa gidiyaawaa qonccissee. Ha maxaafay bare huuphew qonccissiyaawaadan ha Mishiraachchuwaa Qaalay xaafetteeddawe, A nabbabiyaa asay Yesuusi asaa ashshiya dhaliyaa gidiide yaanawaa getetteedda Xoossaa Na7aa gidiyaawaa ammanana malanne aani ammano gaasuwan medhinaa de7uu unttunttussi de7anaawaa unttunttu erana mala xaafetteedda (20:31).

Mishiraachchuwaa Qaalaw koyro shaakuu Medhinaa Xoossaa qaalaynne Yesuusinne ittuwa gidiyaawaa odi simmiide, Yesuusi ashshiyaawaa gidiide yaana geetetteedda Xoossaa Na7aa gidiyaawaa bessiyaa dumma dumma malaatatuwaa shiishshee. Hewaappe kaalliide qassi ha malaatatuwappe beetteedda ayfiyaa odiyaa taarikatuu kaalliino. Ha kifili itti itti asay Yesuusan ammaniide, A kaalliyaawantta gideeddawaa odee; haratuu qassi A ayaw ixxeeddenttonne aani ayaw ammanokko geeddentto odiino. (Shemppuwaa 13-17) Yesuusi oyqetteedda omarssi aw A kaalliyaawanttunna ay keena mino ittipetethay de7inttonne, qassi I kaqettanaw mateedda wonttetha gallassi unttunttussi giigettana malanne minnana mala I haasayeedda qaalaa odiino. Wurssethaa shemppatuu Yesuusi oyqetteeddawaanne pirddaw shiiqeeddawaa, A kaquwaanne A dendduwaa, qassikka dendduwaappe guyyiyan barena kaalliyaawanttussi I qoncceedda hanotaa odiino.

Yohaannisi Godaa Yesuusi Kiristtoosa bagganna beettiyaa Medhinaa De7uwaa qoncciyaan bessiya ha aadho keekatethay ha77ippe doommiide Yesuusi oge, tumanne de7o gidiyaawaa ammaniyaawanttussa. Yohaannisi xaafeedda mishiraachchuwaa qaalaa haratuwappe dummayiyaawe, ayyaanaa tumatethatuwaa tamaarissanaw de7uwaa ubbaan asay meezeteedda qaalatuwaa go77ettiyaa diraassa. Hewanttukka, haathaa, soolluwaa, poo7uwaa, henthanchchaa, dorssaa, woyiniyaa mithaa, woyiniyaa ayfiyaanne hewantta malatiyaawantta.

Woshummaade oyqetteedda mishiratti taarikiyaa 7:53-8:11 cora bilethatuunne beni maxaafatuu barenttun gujjikkino; haratuu Yohaannisa mishiraachchuwaan 21:24 guyyiyan gelissiino; haranttu qassi Luuqaasa mishiraachchuwaa 21:38 guyyiyan gelissiino; itti beni xaafetteedda bilethay Yohaannisa mishiraachchuwaa 7:36 guyyiyaan gelisseedda.

Shemppatuwaa Ubbatuwaassi Imetteedda Qantha Qofatuwaa

Ha Maxaafaa xaafeeddawaa qofaa (1:1-18)

Xammaqiyaa Yohaannisanne Yesuusa koyro kaalleeddawantta (1:19-51)

Yesuusa oosuwaa domethaa (2:1-12:50)

Yeerusalaameninne izi yuushshuwaan wurssethaa gallasatuwan haneedda Yesuusa oosuwaa (13:1-19:42)

Godaa Yesuusa dendduwaanne qonccethaa (20:1-31)

Wurssethaa qutiyaa, Galiilaan zaariide barena kaalliyaawanttussi Yesuusi qoncceeddawaa (21:1-25)

De7uwa Qaalaa

1 Qaalay koyro de7ee; qaalaykka Xoossaanna ittippe de7ee; qaalaykka Xoossaa. 2 I koyroppekka Xoossaanna de7ee. 3 Ubbabay qaalaa bagganna medhetteedda. Medhetteeddabaani ubbabaani I baynnaan ittibaynne medhettibeenna. 4 Aani de7uu de7ee; de7uu asaw poo7uwaa. 5 Poo7uu dhumaani poo7ee; dhumay poo7uwaa xoonibeenna.

6 Xoossaappe kiitetti yeedda A sunthay Yohaannisa geetettiyaa itti bitani de7ee. 7 Asay ubbay A bagganna ammanana mala, poo7uwaabaa markkattanaw yeedda. 8 Poo7uwaabaa markkattanaw yeeddappe attin, I bare huuphew poo7uwaa gidenna. 9 Ikka tumu poo7uwaa gideeddawe asaw poo7issanaw ha sa7aa yiyaawaa.

10 Qaalay alamiyaan de7ee; Xoossay Qaalaan alamiyaa medhdheedda; shin alami A eribeenna. 11 I bare baggatuwakko yeedda; shin unttunttu A shiishshi akkibeykkino. 12 Gidoppe attin I barena shiishshi akkeedda ubbatoo, bare sunthaani ammaneeddawanttoo, Xoossaa naanaa gidana mala, maataa immeedda. 13 Unttunttu Xoossaappe yeletteeddinoppe attin, asay yeliyaa maaraani woy ashuwaa sheniyaan woy attuma asaa sheniyaa xalalaan yelettibeykkino.

14 Qaalay asa gidiide, aadho keekatethaaninne tumatethaan kumiide nu gidduwan de7eedda. Nuuni, I bare aabboo itti Na7aa gidiide akkeedda aw de7iyaa bare Aawuwaa bonchchuwaa be7eeddo.

15 Yohaannisi aabaa bare kooshshaa dhoqqu oothiide, <<Taani, <Taappe kaalla yiyaawe taappe bollaa; ayissi gooppe, ta yellettanaappe kasenna I de7iyaawaa> gaade hinttenttoo odowe hawaa>> yaagi markkatteedda.

16 Nuuni ubbay A kumentha aadho keekatethaan palaheedda anjjuwaa akkeeddo. 17 Xoossay higgiyaa Muse bagganna immeedda; shin aadho keekatethaynne tumatethay Yesuusi Kiristtoosa bagganna yeedda. 18 Xoossaa be7eedda asay ooninne baawa; bare Aawuwaa matan de7iyaa bare huuphew Xoossaa gideeddawe itti Na7aa xalalay aabaa markkatteedda.

Xammaqiyaa Yohaannisa Markkatethaa

(Mat 3:1-12; Mar 1:1-8; Luq 3:1-18)

19 Yeerusalaamen de7iyaa Ayihudatuwaa ayissiyaawanttu qeesatuwaanne Leewatuwaa Yohaannisakko, <<Neeni oonee?>> giide A oochchana mala kiittina, Yohaannisi unttunttussi markkatteedda markkatethay hawaa.

20 Yohaannisi, <<Taani Kiristtoosa gidikke>> yaagiide geeshshi markkatteeddawaappe attin, markkattussa ixxibeenna.

21 Unttunttu, <<Yaatina, neeni oonee? Neeni Eelaasee?>> yaagiide oochcheeddino.

Yohaannisi, <<A gidikke>> yaageedda.

Qassikka unttunttu, <<Neeni nabee?>> yaagiide oochcheeddino.

Yohaannisi, <<Gidikke>> yaagi zaareedda.

22 Unttunttu, <<Yaatina neeni oonee? Nuuni nuuna kiitteeddawanttoo odana mala, neeni neena oona gay?>> yaageeddino.

23 Yohaannisi zaariide, <<Nabiyaa Isayaase geeddawaadan, woraan bare qaalaa dhoqqu udiide,

giyaa kooshshay tawaa>>

yaageedda.

24 Qassi Parisaawatuu kiitteedda asatuu 25 Yohaannisa, <<Neeni Kiristtoosa woy, Eelaasa woy nabiyaa gidana dhayooppe, yaatina ayissi xammaqay?>> yaagiide oochcheeddino.

26 Yohaannisi, <<Taani haathaan xammaqay; shin hinttenttu erennawe ittu hawaani hinttenttu gidduwan de7ee. 27 I taappe kaalla yee. Taani A caammaa qashuwaa billanawukka bessikke>> yaagi zaareedda.

28 Hawe ubbay Yorddaanoosa Shaafaappe hefintha bagga Yohaannisi xammaqiyaasaa Biitaaniyaan haneedda.

Xoossaa Orgge Dorssaa

29 Yohaannisi wonttetha gallassi Yesuusi barekko yiyaawaa be7iide, <<Xoossaa orgge dorssaa, * Alamiyaa asaa nagaraa dhayissiyaawe, haweshi! 30 Taani, <Taappe kaalla ittu yaanawaa; I taappe bollaa; ayissi gooppe, ta yelettanaappe kasenna I de7iyaawaa> gaade odeeddawe hawaa. 31 I oonentto taani erikke; shin Israa7eliyaa asaw A qonccissanaw haathaan xammaqaadde yaaddi>> yaageedda.

32 Yohaannisi markkattiidde, <<Geeshsha Ayyaanay saluwaappe haraphphiyaadan wodhdhishiinanne A bollan uttishshin, taani be7aaddi. 33 Taani A erikke; shin haathaani xammaqana mala taana kiitteedda Xoossay, <Geeshsha Ayyaanay wodhiide, itti asaa bolla shemppishshin, neeni be7ana; ikka Geeshsha Ayyaanaan xammaqee> yaagiide taw odeedda. 34 Taani hewaa be7aaddi; I Xoossaa Na7aa gidiyaawaakka markkattay>> yaageedda.

Yesuusi Koyro Barena Kaalliyaawantta Dooreedda

35 Wonttetha gallassi Yohaannisi shirettiidekka barena kaalliyaawanttuppe laa77atuwanna ittippe eqqeedda; 36 I Yesuusi aadhdhishshin be7iide, <<Xoossaa dorssay haweshi!>> yaageedda.

37 Yohaannisa kaalliyaa laa77atuu Yohaannisi giyaawaa sisiide, Yesuusa kaalleeddino. 38 Yesuusi barena kaalliyaawantta guyye simmi be7iide, <<Ayaa koyyiitee?>> yaagi oochcheedda.

Unttunttu zaariide, <<Rebii, neeni haqan de7ay?>> yaageeddino. <<Rebii>> guussay <<Tamaarissiyaawoo>> giyaawaa.

39 Yesuusi unttuntta, <<Haa yiide be7ite>> yaageedda. Unttunttu biide, I de7iyaasaa be7eeddino; he gallassi sa7ay tammu saate heera gidiyaa diraw, unttunttu aananna peesheeddino.

40 Yohaannisi geeddawaa sisiide, Yesuusa kaalleedda laa77u asatuwaappe ittuu, Simoona Phexiroosa ishaa Inddiraasa. 41 Inddiraase koyro bare ishaa Simoona demmiide, <<Nuuni Xoossay kiitteeddawaanna gaketteeddo>> yaageedda. Hewaa guussay <<Kiristtoosa>> giyaawaa. 42 Inddiraase Simoona Yesuusakko aheedda.

Yesuusi Simoona be7iide, <<Neeni Yohaannisa na7aa Simoona; ne sunthay Keefaa geetettanawaa>> yaageedda. <<Keefaa>> giyaawaa bilethay <<Phexiroosa>> woy <<Zaallaa>> giyawaa.

Yesuusi Piliphoosanne Naatinaa7eela Xeegeedda

43 Wonttetha gallassi Yesuusi Galiilaa baanaw qofaa qachcheedda; I Piliphphoosanna gakettiide, <<Taana kaalla!>> yaageedda. 44 Piliphoosi, Inddiraasinne Phexiroose de7eedda Beetesayda geetettiyaa katamaappe yeedda asa.

45 Piliphoosi Naatinaa7eelanna gakettiide, <<Muse maxaafatuwaaninne Nabatuwaa maxaafatuwaan † aabay xafetteeddawaadan, Yooseefo na7aa Yesuusi Naazireete katamaan de7iyaawaanna nuuni gaketteeddo>> yaagi odeedda.

46 Naatinaa7eeli zaariide, <<Naazireete katamaappe lo77obay kesanaw danddayii?>> yaageedda.

Piliphoosi, <<Yaade be7a>> yaageedda.

47 Naatinaa7eeli barekko yiyaawaa Yesuusi be7iide, <<Makkalay baynna tumu Israa7eliyaa asay hawaa!>> yaageedda.

48 Naatinaa7eeli Yesuusa, <<Neeni taana haqan eray?>> yaagi oochcheedda.

Yesuusi zaariide, <<Piliphoosi neena xeesanaappe kase, neeni balasiyaa geetettiyaa mithaappe hirkkinna de7ishshin, taani neena be7aaddi>> yaageedda.

49 Naatinaa7eeli zaariide, <<Tamaarissiyaawoo, neeni Xoossaa Na7aa! Neeni Israa7eliyaa kaatiyaa!>> yaageedda.

50 Yesuusi, <<Taani neena balasiyaa geetettiyaa mithaappe hirkkinna be7aaddi geedda diraw ammanay? Neeni hawaappe aadhdhiyaawaa be7ana!>> yaageedda. 51 Qassikka Yesuusi, <<Taani hinttenttussi tumuwaa oday; saluu dooyettina, Xoossaa kiitanchchatuu ta bolla, Asa Na7aa bolla, pude kesishshiinanne duge wodhdhishshiina, hinttenttu be7ana>> yaageedda.

1:6 Mat 3:1; Mar 1:4; Luq 3:1-2

1:21 Zar 18:15, 18; Mil 4:5

1:23 Isa 40:3

*1:29 Xoossaa orgge dorssaa: Paasigaa (kessuwaa), Ayihude asatuwaa payduwaan Niisaan geetettiyaa agenaa gidiide Tophiyaa asaa payduwaan laappuniyaanne hosppuniyaa agenatuwaa. Ayihude asaan Paasigaa geetettowe, Xoossay Israa7eeliyaa asatuwaa Gibxeppe wolqqaama malaataan kesseedda wodiyaa gidiyaa diraassa. Wog 23:5-8 xeellite. Xoossaa Orgge Dorssaa, Ooratha Caaquwaan Kiristtoosan xeeseetto gaasuu, I ha alamiyaa asaa hayquwassi barena aathi immiide medhinaa muraappe kessi akko diraassa. 1Qor 5:7; 1Phx 1:18-19 xeellite.

†1:45 Muse maxaafatuwaaninne Nabatuwaa maxaafatuwaan: Ayihudatuwaa maxaafaa, Eca Caaquwaa.

1:51 Dom 28:12