13
Yesuusi Geeshsha Golli Kolettanawaa Kasetiide Odeedda
(Mat 24:1-2; Luq 21:5-6)
1 Yesuusi Geeshsha Golliyaappe kesishshin, A kaalliyaawanttuppe ittu A, <<Tamaarissiyaawoo, hawe aybe lo77o shuchchatenttonne qassi aybe lo77o shuchchaa gollatuwaa be7ay!>> yaageedda.
2 Yesuusi zaariide, <<Ha wolqqaama shuchchaa gollatuwaa be7ay? Ha gollatuwaan de7iyaa itti shuchchaynne attennaan ubbay kolettana>> yaageedda.
Goday Yaanaappe Kasetiide Gakkana Yederssuwaanne Waayyiyaa
(Mat 24:3-14; Luq 21:7-19)
3 Yesuusi Geeshsha Golliyaappe hini bagganna Debre Zayte Deriyaa bollan utteedda wode, Phexiroosi, Yayiqoobi, Yohaannisinne Inddiraasi barenttu xalala aakko yiide A, 4 <<Hewe awude hananentto, nuussi odaarikkii; qassi hewe ubbay polettana wodiyaa erissiyaa mallatuu ayaa gidanee?>> yaagiide oochcheeddino.
5 Yesuusi qassi unttunttoo hawaadan yaagiide, oduwaa doommeedda; <<Hinttentta ooninne balethenna mala naagettite. 6 Cora asatuu ta sunthan, <Taani Kiristtoosa> yaagiidde yaanawaa; cora asaa balethana. 7 Matan de7iyaa olaa kooshshaanne haakuwaan de7iyaa olaa oduwaa hintte sisiyaa wode, hirggoppite; hewaa malabay hananaw bessee; shin wurssethay bira. 8 Ayissi gooppe, itti gade asay hara gade asaanna olettana; qassi itti kawutethay hara kawutethaanna olettana; biittaa qaathay ubbasan de7ana; koshaykka de7ana; shin hewe koyro yeluwaa oythaa mala.
9 <<Shin hintte hinttenttu huuphew naagettite; ayissi gooppe, asay hinttentta oyqqiide, pirdda gollew aathiide immana; qassi bare Ayihuda woosa golletuwanikka hinttentta lissuwan shocana; gadiyaa mooddiyaawanttu sinthaaninne kaatatuwaa sinthan ta diraw hintte markkattanaw eqqana. 10 Mishiraachchuwaa qaalay koyronna asaw ubbaw odettidigganaw bessee. 11 Unttunttu hinttentta pirdda golle ahiyaa wodenne aathiide immiyaa wode, wooti haasayanitentto koyronna hirggoppite; he saatiyaan Xoossay hinttenttoo immiyaabaa haasayite. Ayissi gooppe, Geeshsha Ayyaanay haasayanaappe attin, haasayiyaawanttu hinttentta gidikkita.
12 <<Ishay bare ishaa, aawuu bare na7aa wodhissana; qassi naanay barenttu aawatuwa bollaninne barenttu aayetuwaa bolla denddiide, unttuntta wodhissana. 13 Asay ubbay hinttentta ta sunthaa diraw ixxana; shin wurssethay gakkanaw gencciyaawe attana.
Yeerusalaame Gakkana Wolqqaama Iita Metuwaa
(Mat 24:15-28; Luq 21:20-24)
14 <<Shin nabiyaa Daaneel odeedda bashshaa tunatethay eqqanaw bessennasan eqqishshin hintte be7iyaa wode, hewe waagiyaawentto, nabbabiyaawe akeeko; Yihudaa gadiyaan he wode de7iyaawanttu deriyaakko betino. Dan 9:27; 11:31; 12:11 15 Golliyaa huuphiyan de7iyaa uraykka ittibaa akkanaw duge wodhdhiide, bare soy geloppo. 16 Gaden de7iyaawekka bare mayuwaa akkanaw guyye simmoppo. 17 He wode shahaara maccawanttoonne dhanthiyaa maccawanttoo aayyeero. 18 Shin hawe ubbay haniyaa wodii balgguwaa gidenna mala, Xoossaa woossite; 19 ayissi gooppe, Xoossay sa7aa koyro medhdheeddawaappe doommiide, ha77i gakkanaw, ubbakka de7ibeenna metuu, qassi hawaappe sinthawukka ubba de7enna metuu asaa bolla he wode de7ana. Dan 12:1; Sax 7:14 20 Goday he gallassatuwaa payduwaa guuthiyaawe baawentto, asaa gideedda ooninne attenna; shin I bare dooreedda asatuwaa diraw, he gallassatuwaa payduwaa guutheedda.
21 <<He wode ooninne hinttentta, <Be7ite; Kiristtoosi hawaan de7ee> woy, <Be7ite; Kiristtoosi hewaan de7ee> yaagooppe, hewaa ammanoppite. 22 Ayissi gooppe, worddanchcha Kiristtoosatuunne worddo nabatuu denddiide barenttoo danddayettooppe, haray atto Xoossay dooreeddawanttakka balethanaw malaataanne maalalissiyaabaa bessana. 23 Shin hintte naagettite; taani hinttenttoo ubbabaa kasetaade odaaddi.
Kiristtoosa Laa7entho Yuussaa
(Mat 24:29-31; Luq 21:25-28)
24 <<Shin he wode he waayyiyaappe guyyiyan,
away dhumaana;
agenay poo7iyaawaa aggana; Isa 13:10; Hiz 32:7; Iyu 2:10, 31; 3:15; Sax 6:12
25 xoolinttatuu saluwaappe kunddana;
qassi saluwan de7iyaa wolqqatuukka qaaxettana. Isa 34:4; Iyu 2:10; Sax 6:13
26 He wode taani, Asaa Na7ay, wolqqaama wolqqaannanne bonchchuwaanna shaariyaa giddonna yiishshin, unttunttu be7ana. Dan 7:13; Sax 1:7 27 He wode taani kiitanchchatuwaa sa7aa oyddu bagga kiittana; sa7aa gaxaappe saluwaa gaxaa gakkanaw, Xoossay dooreedda asaa shiishshana.
Wodiyaa Wurssethay Gakkeeddawaa Malaataa Bessiyaa Balasiyaa Mithatto
(Mat 24:32-35; Luq 21:29-33)
28 <<Leemisuwaa balasatto giyaa mithattippe tamaarite; balasatta aaciya wodenne izi haythay haytiyaa wode, bonii mateeddawaa hintte eriita. 29 Hawaadankka hintte he ubbabay haniyaawaa be7iyaa wode, I * I: Yesuusa guussaa. matattiide penggiyaa shiiqeeddawaa † matiide penggiyaa shiiqeeddawaa: Guussay, Yesuusa yuussay mateedda guussaa. erite. 30 Taani hinttenttoo tumuwaa oday; ha ubbabay hanana gakkanaw, ha wodiyaa yeletay hayqqidiggenna. 31 Saluunne sa7ay aadhdhana; shin ta qaalay ubbakka aadhdhenna.
Wurssetha Gallassaanne Saatiyaa Ooninne Erenna
(Mat 24:36-44)
32 <<Shin he gallassaanne he saatiyaa Aawuwaa xalalaappe attin, haray atto saluwan de7iyaa kiitanchchatuwaa gidina, woy taana Na7aa gidinakka ooninne eriyaabay baawa. 33 He wodii awude gidanentto, hintte erenna diraw, naagettite; minnite; Xoossaa woossite. 34 Ta yuussay bare golliya aggiide, ogiyaa biyaa bitaniyaa mala; bitani bare qoomatuwassi huuphiyaan huuphiyaan oosuwaa immiide, unttuntta bare oosuwaassi kaappo ootheedda; qassi kariyaa naagiyaawekka minissiide naagana mala azazeedda.
35 <<Hewaa diraw, minnite; ayissi gooppe, golliyaawu omarssa gidina, woy qamma bilahe gidina, woy kuttuu waassiyaa wode gidina, woy guura wonttumaathaana gidina awude yaanentto, hintte erikkita. 36 Hinttenttu akeekennaan I yooppe, hinttentta gemi77isheeddawantta demmenna mala minnite. 37 Taani hinttenttoo odiyaawaa asaa ubbaw oday; minnite.>>