1 ሺን ሳዖሊ ጎዳ ካሊያዋንታ ዎꬋናው ማንዲዴ፥ ቄሳቱዋ ኡባቱዋ ካፑዋኮ ቤዳ። 2 ያቲዴ ጎዳ ኦጊያ ካሊያ ኣሳቱዋ ማጫዋንታኔ ኣቱማዋንታ ዴሞፔ፥ ቃቺዴ ዬሩሳላሜ ኣሃናው፥ ዳማስቆን ዴዒያ ኣዪሁዳ ዎሳ ጎሌቶ ዳቢዳቢያ ፃፋናው ኣ ዎሴዳ።

3 ኢ ቢዴ፥ ዳማስቆ ካታማ ጋካና ማቶዴ፥ ቆፔናን ሳሉዋፔ ዎልቃማ ፖዑ ኣ ዩሹዋ ኡባኒ ፖዔዳ። 4 ሳዖሊ ሳዓን ኩንዲ ኡቲና፥ «ሳዖላ ሳዖላ፥ ኣዪሲ ታና ዋዪሳይ?» ጊያ ቃላ ሲሴዳ።

5 ሳዖሊ፥ «ታ ጎዳው፥ ኔኒ ኦኔ?» ያጊዴ ኦቼዳ።

ዬሱሲካ፥ «ታኒ ኔኒ ዬዴርሳዴ ዴዒያ ዬሱሳ።» ያጌዳ።

6 ሺን ሳዖሊ ኮኮሪዲኔ ማላሌቲዴ፥ «ታ ጎዳው፥ ታኒ ኣያ ኦꬃናዳን ኮያይ?» ያጌዳ።

ጎዳይ ኣ፥ «ዴንዳዴ ካታማ ጌላ፤ ኔኒ ኦꬃናው ቤሲያባይ ኔው ያኒ ኦዴታናዋ» ያጌዳ።

7 ሳዖላና ኦጊያን ቢያ ኣሳቱ ኣይኔ ሃሳዬናን ኤቂ ኣጊዴ፥ ኮሻ ሲሲኖ፤ ሺን ኦናኔ ቤዒቤይኪኖ። 8 ሳዖሊ ሳዓፔ ዴንዲና፥ ኣ ኣይፊ ዶዬቴዳ ዎዴ፥ ኣይኔ ፄላናው ዳንዳዪቤና፤ ሄዋ ዲራው፥ ኡንቱንቱ ኣ ኩሺያ ኦይቂ ጎቺዴ፥ ዳማስቆ ጌሊሴዲኖ። 9 ሄዙ ጋላሳ ጋካናዉካ ኢ ፄሊቤና፤ ኣይኔ ሚቤና፤ ኣያኔካ ኡሺቤና።

10 ዳማስቆን ኢቲ ሃናኒያ ጊያ ካሊያዌ ዴዔ፤ ጎዳይ ሳፃን ኣ፥ «ሃናኔው» ያጌዳ።

ሃናኒ፥ «ታ ጎዳው፥ ሃዋን ዴዓይ» ያጌዳ።

11 ጎዳይ ኣ፥ «ዴንዳዴ ሱሬ ጌቴቲያ ኦጊያ ባዴ፥ ዪሁዳ ሶዪን ኢቲ ሳዖላ ጊያ ፄርሴሴፔ ዬዳ ቢታኒያ ኮያ፤ ኣዪሲ ጎፔ፥ ኢ ዎሴ። 12 ቃሲ ሃናኒያ ጊያ ቢታኒ ጌሊዴ፥ ሳዖሊ ላዔንꬁዋ ፄላናዳን፥ ባሬ ኩሺያ ኣ ቦላ ዎꬂያዋ ሳፃን ቤዔዳ» ያጌዳ።

13 ሃናኒ ዛሪዴ፥ «ታ ጎዳው፥ ዬሩሳላሜን ኔ ጌሻ ኣሳ ቦላ ሄ ቢታኒ ኣይ ኬና ኢታባ ኦꬄዴንቶ፥ ታኒ ዳሮ ኣሳፔ ሲሳዲ። 14 ቃሲ ዳማስቆን ኔ ሱንꬃ ፄሲያዋንታ ኡባ ቃቻናው፥ ቄሳቱዋ ካፓቱ ኣው ማታ ኢሜዲኖ» ያጌዳ።

15 ሺን ጎዳይ ኣ፥ «ሳዖሊ ኣዪሁዳ ጊዴና ኣሳ ሲንꬃን፥ ካታቱዋ ሲንꬃኒኔ ኢስራዔሊያ ኣሳ ሲንꬃን፥ ታ ሱንꬃ ኤሪሳናዉኔ ታው ኦꬃናዳን ዶሬቴዳ ሚሻ ጊዲያ ዲራው፥ ኔኒ ባ። 16 ኣዪሲ ጎፔ፥ ታ ሱንꬃ ዲራው፥ ኢ ኣዪኬና ዋዬታናው ቤሲንቶ፥ ታኒ ኣ ቤሳና» ያጌዳ።

17 ሃናኒ ቢዴ፥ ሶይ ጌሊዴ፥ ባሬ ኩሺያ ሳዖላ ቦላ ዎꬂዴ፥ «ታ ኢሻው ሳዖላ፥ ኔኒ ዪያ ኦጊያን ኔው ቤቴዳ ዬሱሲ፥ ኔኒ ፄላና ማላኔ ጌሻ ኣያናይ ኔናን ኩማና ማላ፥ ታና ኪቴዳ» ያጌዳ። 18 ኤሌካ፥ ኣዬንቶ ፖቁዋ ማላይ ሳዖላ ኣይፊያፔ ዎꬊና፥ ሳዖሊ ላዔንꬁዋ ፄሌዳ፤ ቃሲ ዴንዲዴ ፃማቄቴዳ። 19 ቁማ ሚዴ ሚኔቲ፥ ዳማስቆን ዴዒያ ካሊያዋንቱና ኣማሬዳ ጋላሳ ጋሚዔዳ።

20 ኤሌካ፥ «ዬሱሲ ኪሪስቶሲ ፆሳ ናዓ» ያጊዴ፥ ኣዪሁዳ ዎሳ ጎሌቱዋን ቃላ ኦዴዳ።

21 ሄዋ ሲሴዳ ኡባይ ማላሌቲዴ፥ «ሃዌ ዬሩሳላሜን ዬሱሳ ሱንꬃ ፄሲያዋንታ ꬋዪሲያዋ ጊዴኔ? ቃሲ ኡንቱንታ ቃቺዴ፥ ቄሳቱዋ ካፓቱዋ ሲንꬃ ኣፋናው ዪቤኔዬ?» ያጌዲኖ።

22 ሺን ሳዖሊ ቃላ ኦዲያ ኦዱ ሚኒ ሚኒ ቤዳ፤ ዬሱሲ ቃሲ ኪሪስቶሳ ጊዲያዋካ ኢ ኣኬኪሲዴ ኦዴዳ ዲራው፥ ዳማስቆን ዴዒያ ኣዪሁዳቱ ኣው ዛሪያዋ ꬋዬዲኖ።

23 ጮራ ጋላሳፔ ጉዪያን፥ ኣዪሁዳቱ ሺቂዴ፥ ሳዖላ ዎꬋናው ዞሬቴዲኖ። 24 ሺን ኣዪሁዳቱ ባሬና ዎꬋናው ቆፖዋ ሳዖሊ ሲሴዳ፤ ኡንቱንቱ ኣ ዎꬋናው ቃማኔ ጋላሲ ካታማ ፔንጊያ ናጊኖ። 25 ሺን ካሊያዋንታ ኣ ቃማ ኣፊዴ፥ ዲርሳ ሁጲያና ታዪያን ዱጌ ዎꬄዲኖ።

26 ሳዖሊ ዬሩሳላሜ ጋኬዳ ዎዴ፥ ካሊያዋንቱና ኢቲፔ ጋኬታናው ሺቂ ቤዔዳ፤ ሺን ካሊያዋ ኢ ጊዴዳዋ ኡባይ ኣማኔናን ኢፂዴ፥ ኣው ያዬዲኖ። 27 ሺን ባርናባሲ ሳዖላ ዬሱሲ ኪቴዳዋንቱኮ ኣፌዳ፤ ኦጊያን ጎዳ ኢ ዋኒዴ ቤዔዴንቶ፥ ኣው ጎዳይ ዎቲ ሃሳዬዴንቶኔ ቃሲ ሳዖሊ ዳማስቆን ዬሱሳ ሱንꬃን ያዬናን ዎቲ ቃላ ኦዴዴንቶ፥ ኡንቱንቶ ጌሺዴ ኦዴዳ። 28 ሳዖሊ ዬሩሳላሜን ዩዪዴኔ ጎዳ ዬሱሳ ሱንꬃን ያዬናን ቃላ ኦዲዴ፥ ዬሱሲ ኪቴዳዋንቱና ኢቲፔ ዴዔዳ። 29 ቃሲ ሳዖሊ ጊሪኬ ቃላ ሃሳዪያ ኣዪሁዳቱዋና ሃሳዬኔ ፓሉሜቴ፤ ሺን ኡንቱንቱ ኣ ዎꬋናው ኮዬዲኖ። 30 ኢሻቱ ሄዋ ሲሲዴ፥ ሳዖላ ዱጌ ቂሳሪያ ኣፊዴ፥ ፄርሴሴ ዬዴዲኖ።

31 ዪሁዳን፥ ጋሊላኒኔ ሳማሪያን ኡባን ዴዒያ ኣማኒያ ኣሳቱ ሳሮቴꬃን ዴዔዲኖ፤ ቃሲ ሚኔዲኖ፤ ጎዳሲ ያዪያዋኒኔ ጌሻ ኣያና ማዱዋን ጌሜቲዴ፥ ፓይዱዋንካ ዳሪ ዳሪ ቤዲኖ።

32 ጴፂሮሲ ኡባሳን ዩዪዴ፥ ሊዳን ዴዒያ ጌሻ ኣሳቱዋኮ ቃሲ ዎꬌዳ። 33 ያቲዴ ሄዋን ሆስፑን ላይꬃ ሲሊዴ፥ ኣርሳን ጊሲዴ ዴዒያ ኢቲ ኤኒያ ጊያ ቢታኒያ ዴሜዳ። 34 ጴፂሮሲ ኤኒያ፥ «ኤናው፥ ዬሱሲ ኪሪስቶሲ ኔና ፓꬄ፤ ዴንዳዴ ኔ ሂፃ ዬጋ» * ሂፃ ዬጋ፡ ሃዋ ጉሳይ ሜቴቲያባ ጊጊሳ ጉሳ። ያጌዳ። ሄዋፔ ጉዬ ኤሌካ ዴንዲ ኤቄዳ። 35 ሊዳኒኔ ሳሮናን ዴዒያ ኣሳይ ኡባይ ኤኒያ ቤዒዴ፥ ጎዳኮ ሲሜዲኖ።

36 ዮጴ ካታማን ኢቲ ፃቢቶ ጌቴቲያ ኣማኔዉና ዴዓው፤ ፃቢቶ ጉሳይ ጊሪኬ ቃላን ዶርቆ ጊያዋ። ኢዛ ባሬ ዴዔዳ ዎዲያ ኡባን ሎዖባ ኦꬃዴኔ ሂዬሳ ማዳዴ ዴዓው። 37 ሄ ዎዴ ኢዛ ሃርጋዴ ሃይቂና፥ ኣሳይ ኢዚ ኣኃ ሜጪዴ፥ ፖቂያ ፑዴ ኬሲዴ ጊሲሴዳ። 38 ሊዳይ ዮጴሲ ማታ፤ ካሊያዋንቱ ጴፂሮሲ ሊዲያን ዴዒያዋ ዮጴን ሲሲዴ፥ «ሃያና ኑኮ ኤሌካ ያሪኪ» ያጊያ ኪታ ላዑ ኣሳቱዋ ቦላ ኣኮ ኪቴዲኖ።

39 ሄዋፔ ጉዬ ጴፂሮሲ ዴንዲዴ፥ ኡንቱንቱና ቢ ጋኪና፥ ፖቂያ ፑዴ ኣ ኬሲዴ፥ ኪፊሊያ ጌሊሴዲኖ። ኣሲኒ ባይና ኣምዔ ማጫዋንቱ ኡባይ ዬኪዴኔ ዶርቃ ኡንቱንቱና ዴዒያ ዎዴ ኦꬄዳ ቃሚሻቱዋኔ ማያቱዋ ኡባ ጴፂሮሳ ቤሲዴ፥ ኣ ዩሹዋን ዩዪ ኣꬊዴ ኤቄዲኖ። 40 ጴፂሮሲ ኡንቱንታ ኡባ ካሬ ኬሲዴ፥ ጉልባቲ ፆሳ ዎሴዳ፤ ቃሲ ኣኃኮ ሲሚዴ፥ «ፃቢቴ፥ ዴንዳ» ያጌዳ፤ ፃቢታካ ባሬ ኣይፊያ ዶያ ጴፂሮሳ ቤዓዴ፥ ꬎቃ ኡታዱ። 41 ጴፂሮሲ ኢዞ ባሬ ኩሺያን ማዲዴ፥ ዴንꬂ ኤሴዳ፤ ሄዋፔ ጉዪያን፥ ኣማኒያዋንታኔ ኣሲኒ ባይና ኣምዔ ማጫዋንታ ፄሲዴ፥ ፓፄዳዉኖ ኡንቱንቶ ኢሜዳ።

42 ሃ ዬዉ ዮጴ ካታማ ኡባን ላሌቲና ጮራ ኣሳይ ጎዳ ኣማኔዲኖ። 43 ጴፂሮሲ ዮጴን ኢቲ ሲሞና ጊያ ጋልባ ቃጪያዋና ዳሮ ዎዲያ ጋሚዔዳ።