IZESUꞌ EVENELE ZUHO LOMA EBEKUꞌ MINANIꞌ ENGIꞌ LUHUVO NITEꞌ PAULOꞌ GIZE-NGIMINEꞌ
Izesuꞌ Evenele Loma Ebekuꞌ Minaniꞌ Neti Luhuvo Niteꞌ Pauloꞌ Gize-ngidingumuꞌ Gomuꞌ Gataaꞌ Gamazi
Mene luhuvo niteꞌ nene aposoloꞌ Pauloꞌ gizineꞌ. Eikumuꞌ nene monoꞌ godolo gosohokuꞌ Aposoloꞌ buku neuꞌ nene mukiꞌ goloso gatelesane. Izelehoi melehoi ne Zuda aleve minasineꞌza Zuda alevelite misuboꞌninguꞌ minamasineꞌ. Siti nabaꞌ naba Taliso ve languꞌ Kilikia polovinisi ve laniꞌ neuꞌ nene minaniꞌ. Gamene ma nene Pauloꞌ meleho aza Loma ve loloꞌ ineꞌ. Loma ngamani neꞌmo nene leliꞌ misuboteutiꞌ ve ne neive lo lineꞌ. Nemuꞌ Pauloꞌ sotoꞌ ineꞌ gameneuꞌ nene Loma ve ve li-daaꞌ idoꞌ Zuda ve ve li-daaꞌ aniꞌ. Pauloꞌ gulive Zuda velatiꞌ nene Sauloꞌ ve lo minineꞌ idoꞌ Loma velatiꞌ nene Pauloꞌ ve lo minineꞌ. Aꞌmine gulive Pauloꞌ neꞌmi monovo nene ngomo ve losa ve. Pauloꞌ aza umungiveloꞌ minineꞌ gameneuꞌ nene Talisola mino seli numuno gizaatoꞌ lainimi ineꞌ. Mine do vo naba ineꞌ nene Zelusalemila vo Zuda tisaꞌ naba gulive Gamalieleꞌ ve lo minineꞌ neꞌmo sukulu lo-ngemaaꞌ ineꞌ sukuluuꞌ vo sukulu lo minineꞌ. Halisaioꞌ ve gehepeve loloꞌ ogo Zuda velite louꞌ gamaziloꞌ eꞌmetelesa amuzo goloso molaaꞌ ineꞌ. Alingeꞌ Izesuꞌ evenele zuholite Izesuꞌnimuꞌ nene Oꞌmosoꞌmi gipele mino aza do luꞌ izelive lo Oꞌmosoꞌmo imiselelesa live ma ne neive laniꞌ gelo aꞌmine nene gosohoꞌ nilave lo gelo nemuꞌ aꞌmidoꞌ gili eleꞌvoleꞌ igi idoꞌ eveneꞌ li-ngimamilizave lo oꞌve lo-ngedelesa amuzo molaniꞌ. Neꞌmine ogo apiꞌ ogo mono Izesuꞌ evenele viseꞌ ogo do vo nalaꞌ numunguꞌ hulo-ngedelesa vineꞌ. Ebeꞌ hota atoꞌ aleveliti misuboukosi neꞌmine o-ngedelesa vineꞌ. Neꞌmine ogo nomonivo Izesuꞌ Kilisitoꞌ aza holiꞌmi labanaꞌve nesi ivileꞌ ivo atoliꞌmine labanaꞌvesi mino sotoꞌ o emavo nelotiꞌ lulo do velepeꞌ izo Izesuꞌ evenele loloꞌ ineꞌ. Zuda ve minamineꞌ heta atoꞌ ve nene monoꞌ gamazi lamineꞌ nene lo-ngemelive lo Oꞌmosoꞌmo eletineꞌ. Ebeꞌ atoꞌ atoꞌ mukita neꞌmine olosa vineꞌ. Zuda vesi idoꞌ eveneꞌ linge ma netesi oꞌve li-dilisa amuzo milaniꞌ. Gamene ma nene bilaaꞌ aniꞌ. Gamene ma nene nalaꞌ numunguꞌ eleꞌmize milaaꞌ aniꞌ. Bili hiladineꞌza Oꞌmosoꞌmo gizebo lamineꞌ oꞌdeꞌmo vo minivo gonoꞌve do osuꞌ lineꞌ. Pauloꞌ aza nadiꞌ ogo hilihe neꞌmi monovo nene ma monoꞌ godolouꞌ gizamaniꞌza gomutatiꞌ vomine eveneꞌ nete tiꞌ li laaꞌ nave. Izesuꞌnimuꞌ eveneꞌ lo-ngimingumuꞌ Loma ve nete gonitoꞌ eleꞌmize mili luvono nene bainati mitetunuꞌ giti hulaniꞌ ve laaꞌ nave.
Mene luhuvo niteꞌ nene Loma ebekuꞌ Izesuꞌ evenele minaniꞌ nene Pauloꞌ gize-ngidineꞌ. Loma neve nene kanitili Italia ve laaꞌ nanguꞌ nene siti naba minineꞌ ve. Vanu milioni (1 000 000) nesi ivileꞌ ivosa eveneꞌ vaiꞌ goloso minaniꞌ ve. Loma aleve nene amuzo malehe aleve goloso minaniꞌ ve. Engiꞌ amiꞌine nete kanitili mukiꞌ nene ngivileꞌ aniꞌ nenako nemuꞌ ve nabaꞌine Kaesaleꞌ aza Zuda velite ebeꞌinesi ne gizebo ogo ebeꞌ mukitoꞌ gizebo ineꞌ. Pauloꞌ monoꞌ gamazi lo-ngemelesa monineꞌ ebeꞌ mukiꞌ nene Lomaliꞌmo gizebo o minineꞌ. Loma ebekuꞌ nene monoꞌ nado apiꞌ ogo sotoꞌ ihe nemuꞌ nene ma gelamune. Ebeꞌ atota monoꞌ aleve liliꞌ aniꞌ mukiꞌ nete aꞌmida igi mini monoꞌ zuho di sotoꞌ aniꞌ noloseive. Pauloꞌ aza aꞌmine monoꞌ nene Loma vetinguꞌ ma do sotoꞌ amineꞌza eiꞌ vo Izesuꞌnimuꞌ lo-ngimineꞌ ebeꞌ linge mautiꞌ aꞌmida vaniꞌ nene gele neive. Guliveꞌine nene mene luhuvo gizo osuꞌ lo meseꞌ aseka lo-ngidida nene gatelesane.
Pauloꞌ aza Kolidi ebekuꞌ minineꞌ gamene nene Izesuꞌ evenele zuholite gohoꞌ gahalikumuꞌ moni di nubo aniꞌ nene do Zelusalemila volosa do nene ogo minineꞌ gamenela mene luhuvo niteꞌ nene gizineꞌ ve. Aꞌmine moni do vo ngemosa nelotiꞌ Loma vetinguꞌ Izesuꞌ evenele zuho minanikisi gamene ngomosiꞌ ma minosa nelotiꞌ nene kanitili gosohoꞌ gulive Sipeni ve languko nene vo Izesuꞌnimuꞌ monoꞌ gamazi lamineꞌ nene lo-ngemelesuve lo Loma vetinguꞌ Izesuꞌ evenele zuho minaniꞌ nene luhuvo niteꞌ gize-ngidineꞌ.
Mene luhuvo nitekuꞌ Pauloꞌ aza monoꞌ gamazi li-ngimangutiꞌ gilivo naba o minineꞌ nene Loma vetinguꞌ monoꞌ aleve minaniꞌ nene gize-ngidineꞌ. Oꞌmosoꞌmi veleloꞌ lisiheꞌ i minikevo Oꞌmosoꞌmo do nguꞌ izelineꞌ aka hamoꞌ nene Izesuꞌnidoꞌ gili eleꞌvoleꞌ ikevosavoꞌ ve lo monoliꞌmo lo neive lo lo-ngimineꞌ. Eveneꞌ mukiꞌ nene lihime monovo dikeve. Zuda aleve Oꞌmosoꞌmi louꞌ di minave netesi idoꞌ louꞌ gamazi damave heta atoꞌ ve netesi dikeve. Neꞌmine o neineꞌ nenako nemuꞌ eveneꞌ mukiꞌ ingine Oꞌmosoꞌmi veleloꞌ ve lisihetoꞌ ve liliꞌ ilizadoꞌ o neive. Gamene gamene Oꞌmosoꞌmi louꞌ gamazi mukitoꞌ eꞌmetatoꞌ nene eveneꞌ hamoliꞌmosi ngelo neꞌmine amilineꞌ nenako louꞌ neꞌmo ngelo Oꞌmosoꞌmi veleloꞌ do lisihetoꞌ ve loloꞌ o-ledamoloseive. Zuda vesi idoꞌ heta atoꞌ vesi Oꞌmosoꞌmi veleloꞌ lisiheꞌ o minaaꞌ aka hamoꞌ nene Izesuꞌnidoꞌ gele eleꞌvoleꞌ ogaꞌ ne neive. Idoꞌ Izesuꞌnimuꞌ gele eleꞌvoleꞌ uneꞌ neꞌmi gihileꞌve nene Oꞌmosoꞌmo lemeni dameni gosohoꞌ leme neidoꞌ do molo ogo molo minelonidoꞌ o neineꞌ monovomuꞌ nesi lo-ngimineꞌ. Idoꞌ Izesuꞌ malipo zaloꞌ helosa lihimete do hulaniꞌ nenako Oꞌmoso aza lelikumuꞌ gohi goloso gele minelidoꞌ nomive. Neꞌmine o neineꞌ nenako Oꞌmososi lezesi olusoteuꞌ nene hongu idoꞌ zogo monovosi nene neive lo lineꞌ. Oꞌmosoꞌmi Sikalahuꞌ neꞌmo Oꞌmosoꞌmi izipahala zuho nizave lo do kegese-ledo lihime dikilizave lo hize eleꞌ o-ledaaꞌ neive. Neꞌmine ogaꞌ neineꞌ nenako helaaꞌ neꞌmosi ngelo doꞌmo leme-ledamoloseive. Moseꞌ louꞌ gamazi neꞌmo naniꞌmine gono daaꞌ neihe nemuꞌ lo ngoloꞌ lineꞌ. Zuda aleve mukiꞌ adoꞌ Oꞌmosoꞌmo eiꞌ izipahala zuho gehepeve ve lo do kegesekineꞌ nete Izesuꞌni nanitekumuꞌ ningi hulahe nemukisi lineꞌ. Oꞌmosoꞌmo gelavo neꞌmino sotoꞌ ineꞌ ve. Nanitekumuꞌ. Aꞌmine neꞌmine ineꞌ neꞌmo heta atoꞌ ve netesi Izesuꞌnidoꞌ gili eleꞌvoleꞌ ilizadiꞌmo Oꞌmosoꞌmi izipahala zuho liliꞌ ilizaniꞌ aka do ngoloꞌ lineꞌ ve lo lineꞌ. Gamene ma Zuda ve ingine Izesuꞌni ningi goseleꞌ igaꞌ aniꞌ monovoꞌine nene huli Izesuꞌnimuꞌ gili eleꞌvoleꞌ ilisave. Idoꞌ neꞌmine ilizadotiꞌ gihileꞌve lamineꞌ nene eveneꞌ mukita sotoꞌ o-ngedeleseive lineꞌ. Neꞌmine losa Izesuꞌ evenele zuho ingine naniꞌmine monovoloꞌ izi mili minilizahe nemuꞌ lineꞌ. Leze hamo hamoꞌ nene Oꞌmosoꞌmo dalizave lo molo-lede neineꞌ gono nene dalone. Goseleꞌ amo gono nene amuzo molo dalone. Ge luka neme ne luꞌne geme idoꞌ ge hize eleꞌ o-nede ne hize eleꞌ o-gede lolone. Initeꞌ di goloso i-lidaaꞌ nave nesi nene lute ngemo monovo goloso do velepeꞌ izo o ngemamo monovo lamineꞌ o ngemelone. Dinate nene bekimi ogo takisi meni hizelone. nGamani nesi idoꞌ ngamani gono daaꞌ nave naba netesi gamaziꞌine gele dalone. Monovo goloso atoꞌ atotoꞌ nene mine olovoꞌ o minelone. Izesuꞌ evenele zuho linge malite initeꞌ ma adoꞌ ize nene nalobe namolobe idoꞌ gamene naba ve lo gizebo lamineꞌ olobe amolobe li gilii nevoꞌmine initekumuꞌ lezesi luꞌine mili hamoꞌ amaaꞌ nave nene lovo o ngemamo asi hamoꞌ zuho none lo bizo minelone lineꞌ. Initeꞌ olonidiꞌmo Izesuꞌ evenele linge ma luꞌninguꞌ do goloso ogalive lo monovoteloꞌ gizebo lamineꞌ ogo idoꞌ initeꞌ goloso neive lo ningo gele minelive ma aꞌmine initeꞌ goloso nene dalineꞌ initeꞌ ogalone lo gizebo lamineꞌ ogo monelone lineꞌ. Neꞌmine lo luhuvo gize osuꞌ loo eveneꞌ mukiꞌ nene meseꞌ aseka lo-ngedo Oꞌmoso gulive do hozi loo gize osuꞌ lineꞌ.
1
Pauloꞌ Aza Izesuꞌ Evenele Loma Ebekuꞌ Minaniꞌ Nene nGopoꞌni Lo Luhuvo Niteꞌ Gize nGimineꞌ Monovo
1-7 Pauloꞌ neniꞌ nene Izesuꞌ Kilisitoꞌ aposolo mineline lo Oꞌmosoꞌmo neleꞌmize molo eiꞌ gamaziꞌve lamineꞌ nene lo soto sotoꞌ ogo mineline lo do kegese-nedavo Izesuꞌ Kilisitoꞌ gonoꞌve daaꞌ uve loloꞌ ogo minuve naza Oꞌmosoꞌmi lulo lengemo eiꞌ evenele loloꞌ igi minilizave lo lengeleꞌmize molave Loma ebekuꞌ minave lengiꞌ nene luhuvo niteꞌ mene nogize-lingiduve. Aꞌmine Oꞌmosoꞌmi gamazi lamineꞌ nene Oꞌmosoꞌmo lo-ngemavo eze veleutiꞌ gamazi li sotoꞌ igaꞌ ave nete gomukutiꞌ monoꞌ godolouꞌ gizikavo minineꞌ ve. Aꞌmine gamazi lamineꞌ nene eiꞌ Oꞌmosoꞌmi gipele Guvetesi ve Izesuꞌ Kilisitoꞌnimuꞌ gizaniꞌ ma neive. Aꞌmine Oꞌmosoꞌmi gipele aza eveneꞌ okode neꞌminesi sotoꞌ ineꞌ nene Zuda veti guvetesi ve naba gomuꞌ minive Davidiꞌ aꞌvopilemoꞌ zuhoutiꞌ sotoꞌ ogo minineꞌ ve. Idoꞌ eiꞌ Sikalahuꞌve nene atoliꞌmine ogo lisiheꞌ lamineꞌ minidiꞌmo Oꞌmosoꞌmo amuzo molo hilingutiꞌ do ote-dineꞌ neꞌmo eiꞌ gipele gehepeve minineꞌ nene lelebizave. Idoꞌ eiꞌ Izesuꞌ Kilisitoꞌ nene Oꞌmosoloꞌ medelo mino aza nasahiliꞌ o-nedo aposolo neleꞌmize molaniꞌ nene naza eze gulive nene do ote-do eveneꞌ zuho ato atoꞌ mukiꞌ miniꞌmi monaniꞌ nene ezemuꞌ lo-ngemekuvo ezemuꞌ gili eleꞌvoleꞌ igi gamaziꞌve gili di eꞌmetilizave losa neleꞌmize molaniꞌ ve. Idoꞌ Loma ebekuꞌ Oꞌmosoꞌmo Izesuꞌ Kilisitoda lengeleꞌmize molave linginesi nene aꞌmine Oꞌmosoꞌmo eveneꞌ zuho ato atoꞌ mukita viline lo lo-nimineꞌ aleveti muliseutiꞌ nene nizave. Nemuꞌ nene luhuvo niteꞌ mene nogize-lengedo Oꞌmoso metehosi idoꞌ Guvetesi ve Izesuꞌ Kilisitoꞌ nesi nasahiliꞌ i-lingidikesivo neꞌmo lengiꞌ muludinguꞌ hongu lo minivo mine lamineꞌ igi minilizave lo Oꞌmosola noluve.
Pauloꞌ Loma Ebekuꞌ Izesuꞌ Zuho Minaniꞌ Nene Vo Monoꞌ Gamazi Lo-ngemelesa Lulo Otingumuꞌ Gizineꞌ Gamazi
8 Gamazi lo haꞌna ogo loloze. Ganaꞌ nene apiꞌ ogo tiꞌ lo noluve: Lingine Izesuꞌ Kilisitoꞌ gamaziꞌve amuzo mili gili eleꞌvoleꞌ igi minaniꞌ monovotine nene misubouꞌ misubouꞌ buu lo nomonive likevo naza gelo Izesuꞌ Kilisitoꞌ velemuꞌ ogo lengiꞌ mukikumuꞌ tangezoꞌ ve lo Oꞌmosola noluve. 9 Idoꞌ neꞌmine noluvoniꞌ nene naza eiꞌ gipeleꞌmi gamaziꞌve lo sotoꞌ o ngemeꞌmo mono eze gono nodo luꞌne molo opoꞌni laaꞌ nouvoniꞌ Oꞌmoso neꞌmo ezela luvonguꞌ lengikumuꞌ gamene gamene laaꞌ nouvoniꞌ monovoꞌne nene gele neive. Naza nene mo laminetoꞌ noluve. 10 Idoꞌ naza gamene gamene aꞌmine Oꞌmosola luvo gameneloꞌ nene eiꞌ gilivo lisiheꞌ o nolineꞌ nene naza gomuꞌ lengita alove lo gamene haꞌna geleꞌmo ogo minuvoniꞌza aka ma sotoꞌ o-nidamivo amuvoniꞌ mamuꞌ nene idise aka ma vele-nidavo lengita alohe lo laaꞌ nouve. 11 Idoꞌ neꞌmine lo Oꞌmosola laaꞌ nouvoniꞌ nene naza lengita vo Oꞌmosoꞌmi Sikalahutatiꞌ daaꞌ nouneꞌ amuzo ma nene lehize-lengedekuvo monokuꞌ amuzo mili oti minilizave lo lengita volove lo amuzo molo gelaaꞌ uvoniꞌ nenako nemuꞌ nene laaꞌ nouve. 12 Idoꞌ lengiꞌ do amuzo molo-lengedelove noluvoniꞌ nene naza tiꞌ lo gelosa noluve. Naza lengiꞌ nizada vokuvo lingine Kilisitoꞌnimuꞌ gili eleꞌvoleꞌ igaꞌ naniꞌ nemukisi idoꞌ naza gele eleꞌvoleꞌ ogaꞌ nouvoniꞌ monovoꞌne nemukisi nene lo voleloꞌ meloꞌ ogo gelo lute do amuzo molalone lo gelosa noluve. 13 Idoꞌ neze zuhokizo, naza lengita volove lo gamene vaiꞌ gaꞌne gelo minuvoniꞌ nemuꞌ lingine gilamilizaniꞌ nene edamoloseive lo gelosa nolo-lingimuve. Aꞌmine gomuꞌ lengita vamuvoniꞌ nene voloniꞌ akaꞌne ma ngoloꞌ lamivo vamuvoniꞌza idise akaꞌne ngoloꞌ lavo volosa gelekuve. Akaꞌne ngoloꞌ lavo volosa giluvoniꞌ nene eveneꞌ linge zuho ato atota vo gono dokuvo gihile izineꞌ neꞌmino lengita aꞌmineꞌmine ogo vo gono dokuvo gihile izavo monoꞌ lengemeni damenisi minilizave lo volosa giluvoniꞌ ve. 14 Oꞌmosoꞌmo monoꞌ gono nene eveneꞌ ato atoꞌ mukita daline lo nimineꞌ nenako nemuꞌ nene nGiliki aleveti monovoꞌnidoꞌ ngeꞌmetaaꞌ ave nevoꞌmine maduꞌninguꞌ gamazi lamineꞌ minaaꞌ ineꞌ alevelasi idoꞌ nGiliki aleveti monovoꞌnidoꞌ ngeꞌmetamave nevoꞌmine maduꞌninguꞌ gamazi lamineꞌ minesaꞌmineꞌ alevelasi mukita nene monoꞌ gono daloniꞌ o neive. 15 Nemuꞌ nene Loma ve linginelasi Izesuꞌ gamaziꞌve lamineꞌ nene lo sotoꞌ ogo lo-lengemelesa gilingili ogo nouve.
Izesuꞌ Kilisitoꞌnimuꞌ Gamazi Lamineꞌ Nene Amuzoꞌvesi Neive Lo Pauloꞌ Lineꞌ Gamazi
16 Naza Loma ebetasi vo Izesuꞌ gamazi lamineꞌ lo-lengemelove luvoniꞌ nene aꞌmine gamazi neꞌmo Oꞌmosoꞌmo Izesuꞌnimuꞌ gili eleꞌvoleꞌ ave do nguꞌ izelineꞌ amuzoꞌve nene do sotoꞌ ogaꞌ neivosa nemuꞌ nene naza aꞌmine gamazi lamineꞌ nene lo sotoꞌ olosa novozo helamo nolize izo laaꞌ nouvoniꞌ nenako nemuꞌ luve. Ee, aꞌmine gamazi lamineꞌ neꞌmo nene Oꞌmosoꞌmo do nguꞌ izelineꞌ amuzoꞌve nene gomuꞌ Zuda vela do sotoꞌ o-ngedosa Zuda ve minamave nGiliki ve nevoꞌmida nesi nene do sotoꞌ o do novive.
17 Idoꞌ Oꞌmosoꞌmo eveneꞌ do nguꞌ izelineꞌ amuzoꞌve nene Izesuꞌ gamazi neꞌmo do sotoꞌ ogaꞌ neive luvoniꞌ nene nemuꞌ luve: Aꞌmine gamazi laminekutiꞌ nene Oꞌmosoꞌmo eveneꞌ do luꞌ izelidoꞌ do lisiheꞌ o-ledaaꞌ neineꞌ akaꞌve nene sotoꞌ ogavo ningo gelekune. Aꞌmine aka nene neꞌmino neive: Eveneꞌ ma laza Izesuꞌnimuꞌ gele eleꞌvoleꞌ ogo mineloneꞌ neꞌmovoꞌ nene Oꞌmosoꞌmi veleloꞌ eveneꞌ lisiheꞌ lamineꞌ loloꞌ ogo minelesune. Ee, gele eleꞌvoleꞌ olonidotikovoꞌ nene Oꞌmosoꞌmo do luꞌ izelidoꞌ lisiheꞌ ogo minelesune. Neve nene monoꞌ godolouꞌ tiꞌ li gizi nizadoꞌ nene vo dave:
Ingine Oꞌmoso nenikumuꞌ gili eleꞌvoleꞌ igi minilizadotiꞌ
eveneꞌ lisiheꞌ lamineꞌ liliꞌ ilizave nene do nguꞌ izekuvo
miniviꞌ miniviꞌ ilisave.
Eveneꞌ Mukiꞌ Lelita Nene Lihimetesivoꞌ Noneꞌ Nenako Nemuꞌ Nene Oꞌmosoꞌmo Lihime Lemo Lebeleleseive Lo Pauloꞌ Lineꞌ Gamazi
18-19 Eveneꞌ laza Oꞌmoso mehede emo goloso niteꞌ mukiꞌ daaꞌ nouningumuꞌ nene Oꞌmoso izeboloꞌ molavo lihimete lemelingumuꞌ nene Okulumokutiꞌ lo sotoꞌ ogavo aꞌmine monovo nene mo gelekune. Idoꞌ gelekuneꞌ nenako nemuꞌ nene Izesuꞌnimuꞌ gele eleꞌvoleꞌ olonidotikovoꞌ do luꞌ izeleseive luvoniꞌ nene nemuꞌ luvoniꞌ ve. Eveneꞌ ingine goloso niteꞌ di minaaꞌ adiꞌmo Oꞌmosomuꞌ gamazi gihile lamineꞌ neineꞌ nene engiꞌ luꞌninguꞌ sotoꞌ ogo minelineꞌ akaꞌve hizi tilaaꞌ nave. Ee, Oꞌmosomuꞌ ingine gililizaniꞌ o neineꞌ gamazi gihile lamineꞌ nene Oꞌmosoꞌmo inginela do sotoꞌ ogavo aꞌmine gamazi nene inginela sotoꞌ ogosa sotoꞌ neive. Sotoꞌ neineꞌ nenako aꞌminemuꞌ gilisaꞌmaniꞌ nene ingine aꞌmine gamazi gihile lamineꞌ luꞌninguꞌ sotoꞌ ogo minelineꞌ akaꞌve nene angiseꞌine hizi tiladiꞌmo nene gilisaꞌmave. 20 Idoꞌ evenelite Oꞌmosomuꞌ gililizaniꞌ o neineꞌ gamazi nene Oꞌmosoꞌmo inginela do sotoꞌ ineꞌ ve luvoniꞌ nene Oꞌmosoꞌmi monovo linge ma nene vetedunuꞌ ningamolonidoꞌ o minineꞌza Oꞌmosoꞌmo Okulumoꞌ misubo initeꞌ mukiꞌ do sotoꞌ molavo mine do ogo neivo aꞌmine initeꞌ mukiꞌ ningaaꞌ nounidotiꞌ nene eze monovo vetedunuꞌ ningamolonidoꞌ o minineꞌ nene ha ningo gelaaꞌ nounako nemuꞌ luvoniꞌ ve. Ee, do sotoꞌ molaniꞌ initeꞌ ningaaꞌ nounidotiꞌ nene aza minevoꞌ minevoꞌ ogo minaaꞌ neineꞌ amuzoꞌvesi idoꞌ emeni dameniꞌve atoliꞌmine ogo minineꞌ laza ma ivileꞌ amolonidoꞌ o minineꞌ nesi nene ha ninge gelelonidoꞌ o neive. Idoꞌ ha ningo gelelonidoꞌ neineꞌ nenako Oꞌmoso huli minilizave ingine nene laza eze monovo danava ningo gelamosa huluneꞌ ve li gamene nabala ma lamilisave. 21 Ingine nene Oꞌmoso neive li eiꞌ monovolo ha gili minaniꞌza Oꞌmoso neive li eikumuꞌ gilavo dizamivo opoꞌni li di naba i-disaꞌmaniꞌ ve. Neꞌmine ami gaꞌine gilaaꞌ aniꞌ nene vo gopoꞌnapa gehepeve ogo luꞌninguꞌ gilaaꞌ aniꞌ nene gili lamineꞌ ami litiꞌmusouꞌ nizaniꞌ gilivo minaaꞌ aniꞌ ve. 22 Neꞌmine igi mini ingine leliꞌ nene gate gele nge lo nonive none li minaniꞌza ingine neꞌmini ma minami negi hizi mini 23 emeni dameni lamineꞌ atoliꞌminesi mino helamo minevoꞌ minevoꞌ ogo minaaꞌ ive Oꞌmoso nene huli ezeloꞌ medeli eveneꞌ miniviꞌ miniviꞌ ami hilaaꞌ naniꞌ neti avazaha nehe idoꞌ nama gaha ize guloti avazaha nehe gosiheliti avazaha nehe neꞌmine niteꞌ loloꞌ igi ngopoꞌni laaꞌ aniꞌ ve.
24 Neꞌmine igi mini Oꞌmoso meheꞌine imikevo nemuꞌ Oꞌmoso aza nene eleꞌninge vaꞌninge ingalizaniꞌ monovo di gopo igi luꞌine do goloso ilineꞌ monovo goloso nene di mini engiꞌ okoꞌine di gopo ilisa eveneꞌ ingine luꞌninguꞌ laniteꞌ giladoꞌ nene eꞌmetamilizanako luꞌineꞌmo laniteꞌ gilidoꞌ nene ha eꞌmetilizave lo hulo-ngidineꞌ ve. 25 Ingine Oꞌmoso gihile nene huli-di ezeloꞌ medeli soza oꞌmoso di sotoꞌ igisa initeꞌ mukiꞌ do sotoꞌ molave Oꞌmoso nene gubuꞌ izi imi opoꞌni li-dami Oꞌmoso asiꞌve loloꞌ ineꞌ initetoꞌ nene gubuꞌ izi ngimi ngopoꞌni li minaaꞌ aniꞌ ve. Neꞌmine aniꞌza initeꞌ mataꞌ do sotoꞌ ive Oꞌmosovoꞌ nene laza gamene gamene opoꞌni laaꞌ olonidoꞌ o neive. Nemuꞌ nene neꞌmino minivo. 26 Idoꞌ eveneꞌ neꞌmine igi Oꞌmoso huli-di soza oꞌmoso ngopoꞌni li minaniꞌ nemuꞌ Oꞌmoso aza ninge mate ngimikivo ingine monovo goloso adoꞌ neꞌmine igi minaniꞌ ve: Veneꞌ nete vaꞌningesivoꞌ ingalizaniꞌ monovo Oꞌmosoꞌmo ganakutiꞌ ngelebizineꞌ ma nene huli Oꞌmosoꞌmo ngelebizamineꞌ monovo goloso di sotoꞌ igi engiꞌ veneꞌ okoꞌninguꞌ initeꞌ igaꞌ aniꞌ ve. 27 Idoꞌ aꞌmineꞌmine igi vemohoꞌ ingine Oꞌmosoꞌmo venekisi ingaaꞌ monovo ganakutiꞌ ngelebizineꞌ nene meheꞌine imi ve malite ve mamuꞌ ma duvo lo okoꞌninguꞌ oloꞌ lavo ngovozo niteꞌ goloso di sotoꞌ igi angiseꞌine okoꞌninguꞌ initeꞌ igaꞌ aniꞌ ve. Neꞌmine adotiꞌ lihime daniꞌ votigileloꞌ do molo Oꞌmosoꞌmo lihime ngemavo okoꞌine nene goloso ogaꞌ neive. 28 Ee, ingine Oꞌmosomuꞌ gili minilizaniꞌ nemuꞌ nene levelenga li huli-dikevo Oꞌmoso aza nene eveneꞌ ingine goloso monovomuꞌ gohi gili minikevo aꞌmine gaꞌine giladoꞌ nene eꞌmeti evenelite amilizaniꞌ o minineꞌ monovo goloso ato atoꞌ igi mili minilizave lo ninge mate-ngidineꞌ ve. 29 Neꞌmino ninge mate-ngedavo eveneꞌ ingine lisiheꞌ amineꞌ monovo danava goloso vaiꞌ lihime daaꞌ monovo nene engita vaiꞌ goloso sotoꞌ ivo minaniꞌ ve. Aꞌmine monovo goloso nene neꞌmini nizave: Mumuzoꞌ igaꞌ, evenekumuꞌ lukehe igaꞌ, eveneꞌ mala initeꞌ lamineꞌ ma sotoꞌ o ngemavo ma aꞌmine vemuꞌ ngizeboloꞌ gohi molaaꞌ, eveneꞌ ngibili hilaaꞌ, lolize hizaaꞌ, eveneꞌ goꞌine izaaꞌ, 30 eveneꞌ dovo ledevoꞌ ogo ngemenga laaꞌ, Oꞌmosoꞌmi biluvaꞌve minaaꞌ, hokolizeꞌ igi hokolizeka li engiꞌ okoꞌine di dizaaꞌ, monovo goloso di sotoꞌ igaꞌ, izeꞌninge meꞌninge laniꞌ gamazi gili hulaaꞌ, 31 negi suno suno daaꞌ, gamazi angise li hukisa aꞌmidoꞌ eꞌmetamaaꞌ, luꞌine ngimamaaꞌ, idoꞌ eveneꞌ muheleꞌine ningamaaꞌ ave mukiꞌ neꞌmine nene nizave. 32 Neꞌmino neivo Oꞌmosoꞌmo eveneꞌ neꞌmine monovo goloso ilizadotiꞌ nene golo hizi meniꞌve helaaꞌ nene dikevosa lisiheꞌ oloseive lineꞌ nemuꞌ nene mo gili minisasi aꞌmine luvoniꞌ neꞌmine monovo goloso nene ha igi mili minaaꞌ nave. Idoꞌ neꞌmine igaꞌ naniꞌ nene goloso neineꞌza ingine aꞌmine monovo goloso aꞌnevoꞌ nene ma amave. Ingine ningavo eveneꞌ malitesi aꞌmine luvoniꞌ monovo goloso nene igi mili nizavo ma nene ingine lamineꞌ ve li siza li-ngidaaꞌ nave. Ingine aꞌneꞌmine igaꞌ naniꞌ neꞌmo nene goloso gehepeve ogaꞌ neive.