1 Idoꞌ ma giluvoniꞌ nene Oꞌmosoꞌmi kekeize numuꞌveutiꞌ nene nolo naba ma sotoꞌ ogo angeloꞌ seveni engikumuꞌ nene tiꞌ lo nolivo giluve: Lingine vi Oꞌmosoꞌmo eveneꞌ lihimeꞌinemuꞌ izeboloꞌ molangumuꞌ lihime ngemelineꞌ initeꞌ adoꞌ lapesetinguꞌ lapesetinguꞌ neineꞌ ma nene lepi huli misubouko ilo.

2 Neꞌmine lavo angeloꞌ naba vanu neꞌmo vo eiꞌ lapeseꞌveuꞌ minineꞌ initeꞌ goloso nene lepe hulo misubouko ineꞌ ve. Neꞌmine ogavo eveneꞌ ma ingine loposo niteliꞌmi makiꞌve di mini aꞌmine loposo niteliꞌmi avazahaloꞌ gubiꞌ izi imi opoꞌni li minaaꞌ aveti okoꞌnidoꞌ nene huso goloso galasa gehepeve nene izekaꞌ izekaꞌ oꞌmo vineꞌ ve.

3 Nelotiꞌ nene angeloꞌ naba tuu neꞌmo vo eiꞌ lapeseꞌveuꞌ minineꞌ initeꞌ goloso ma nene lepe hulo guvo nosouꞌ ogavo aꞌmine guvo noso nene eveneꞌ hilaveti vaniseꞌine neꞌmine loloꞌ ogavo aꞌminguꞌ veꞌinesi minaaꞌ aniꞌ initeꞌ mukiꞌ nene hili geseꞌ aniꞌ ve.

4 Idoꞌ nelotiꞌ angeloꞌ naba tili neꞌmo vo eiꞌ lapeseꞌveuꞌ minineꞌ initeꞌ goloso ma nene lepe hulo noso nabaꞌ nabaukisi hinipiniꞌ noso ngomo ngamaukisi ogavo vanise gehepeve loloꞌ ineꞌ ve. 5 Neꞌmine ogavo noso mukitoꞌ gizebo ogaꞌ ineꞌ angeloꞌ neꞌmo nene tiꞌ lo nolivo giluve:

8 Idoꞌ nelotiꞌ nene angeloꞌ naba fo neꞌmo vo eiꞌ lapeseꞌveuꞌ minineꞌ initeꞌ goloso nene lepe hulo hokuꞌ ogavo hoꞌ neꞌmo oloꞌ ahuꞌ loosa eveneꞌ okoꞌnidoꞌ honoponoꞌ minelive lo Oꞌmosoꞌmo hoꞌ nene gele imineꞌ ve. 9 Neꞌmine ogavo eveneꞌ okoꞌnidoꞌ nene holiꞌmi oloꞌ ahuꞌve neꞌmo loꞌvote-ngedavo ingine nene neꞌmino eveneꞌ do goloso o-ngedelineꞌ amuzoꞌvesi minive Oꞌmosoꞌmi gulive nene divi lediviꞌ igi mini luꞌine di velepeꞌ izi lihimeꞌine hulami Oꞌmoso di naba i-damaniꞌ ve.

10 Idoꞌ nelotiꞌ nene angeloꞌ naba faef neꞌmo vo eiꞌ lapeseꞌveuꞌ minineꞌ initeꞌ goloso nene lepe hulo loposo niteliꞌmo gizebo o-ngedo minaaꞌ ineꞌ moꞌmosiꞌveloꞌ nene ogavo aꞌmine gizebo o-ngedo minaaꞌ ineꞌ alevetida nene litiꞌmuso naba izineꞌ ve. Neꞌmine ogavo eveneꞌ ingine mulumo giladiꞌmo veꞌine nahuno nene ingihi mataꞌ mataꞌ izi minii 11 adoꞌ husoꞌine golosoutiꞌ mulumo neivo mulumo gilaniꞌ neꞌmo nene Okulumokuꞌ Oꞌmoso nene divi ledivika li-di mini luꞌine di velepeꞌ izami igi mili igaꞌ aniꞌ initeꞌ golosoꞌine nene mo hulamaniꞌ ve.

12 Idoꞌ nelotiꞌ nene angeloꞌ naba sigisi neꞌmo vo eiꞌ lapeseꞌveuꞌ minineꞌ initeꞌ goloso nene lepe hulo Zupalati noso nabauꞌ ogavo aꞌmine noso naba nene hoꞌ dizaaꞌ idatiꞌ guveꞌinesi ve naba alizaniꞌ akaꞌine nene do vaꞌvaꞌ o-ngedo gokoꞌ lineꞌ ve. 13 Idoꞌ neꞌmine ogavo ma ninguvoniꞌ nene sataꞌ naba gele vineꞌ loposo niteliꞌmi veleutikisi ezelotiꞌ sotoꞌ ineꞌ loposo niteliꞌmi veleutikisi idoꞌ soza polohete ma minidiꞌmi veleutikisi nene sikalahuꞌ goloso seto hamo adoꞌ gizeleꞌ gili vanikovoꞌ nene limi heta aniꞌ ve. 14 Aꞌmine sikalahuꞌ goloso nene ve golosoꞌmi zuhoutiꞌ mini engiꞌ amuzoꞌine ngelebizi ato atoꞌ suno di sotoꞌ igi misubouꞌ misubouꞌ eveneꞌ zuho ato atoꞌ ngamaniꞌine ato atokisi miniꞌmi monadaa monadaa nene vaniꞌ ve. Idoꞌ aꞌmine gizeleꞌ gili vaniꞌ sikalahuꞌ goloso neꞌmine igi vaniꞌ nene amuzo malehe Oꞌmosoꞌmo lihime ngemo ngebelelesa ilineꞌ gamene adoꞌ gamene nabala nene aꞌmidatiꞌ aꞌmidatiꞌ guveꞌinesi ve naba nete nene lovo i imilizangumuꞌ ve li di nubuho i-ngidilisa vaniꞌ ve.

15 Idoꞌ Guvelesi veꞌmo tiꞌ lo nolive: Gililo. Naza nene gumineloꞌ ve alive li gilamadoꞌ ogaꞌ neineꞌ neꞌmino alosuve. Eveneꞌ ma ingine laza aꞌmine gameneuꞌ nene geneganate viseꞌ ogo bakaꞌ nomonunivo eveneꞌ ningikevo lovozo helalone li eheꞌ igi mini geneganaꞌnidoꞌ gizebo lamineꞌ igi minilizave nene ngolize izilizadoꞌ mini mili minilisave.

16 Neꞌmine igi aꞌmine sikalahuꞌ goloso nete aꞌmine vi di nubo i-ngidave nene ngeleꞌmizi ebeꞌ ma gulive Zuda veti gamaziꞌningutiꞌ Halamagedoni ve laaꞌ naada nene di nubo i-ngidaniꞌ ve.

17 Neꞌmine ikevo angeloꞌ naba seveni neꞌmo eiꞌ lapeseꞌveuꞌ minineꞌ initeꞌ goloso nene lepe hulo akaꞌvozene hepeꞌ monaaꞌ idoꞌ ogavo Oꞌmosoꞌmi kekeize numuꞌveuꞌ moꞌmosiꞌvelatiꞌ nene nolo naba ma sotoꞌ ogo tiꞌ lo lineꞌ ve: Me gono osuꞌ nolineꞌ gameneꞌve nene mo ogo novive. 18 Neꞌmine lavo aꞌmidoꞌ nene goꞌ paꞌna paꞌna ogo nolo nolo molo goꞌ ngilili ngilili nolo mimiꞌ naba ma ineꞌ nene mo naba goloso ive. Eveneꞌ me misubouꞌ apiꞌ ogo sotoꞌ ogo mine do dizo idiselasi nonidoꞌ nene aꞌmine mimiꞌ naba goloso neꞌmine nene ma amineꞌ ve. 19 Neꞌmine ogavo neꞌmo numuno ebeꞌ naba nene hoꞌlo seto hamo neivo idoꞌ eveneꞌ zuho ato atoliti numuno ebeꞌine miniꞌmi monaniꞌ nesi nene simeꞌ naniꞌ ve. Ee, Oꞌmosoꞌmo numuno ebeꞌ naba dizo minineꞌ Babelonia nemuꞌ nene ha gele mino lihimeꞌinemuꞌ izeboloꞌ goloso molangumuꞌ lihime ngemaaꞌ neineꞌ initeꞌ goloso vaini noso neꞌmine nene minineꞌ nenako aꞌmine izeboloꞌ vaini noso nene nalizave lo Babelonia numuno ebekuꞌ aleve ngimineꞌ ve. 20 Idoꞌ ailani mukiꞌ nene vi haha ikevo golosi nene limi ingi osuꞌ li gohi ma minamavo ningamaniꞌ ve. 21 Neꞌmine ogavo okulumokutiꞌ nene osupo gihile nabaꞌ naba adoꞌ gihile hamo hamoliꞌmo geniꞌve vanu hadeti (100) pauni (foti faef kilo (45Kg)) neꞌmine minekaꞌ minekaꞌ ineꞌ nene evenetoꞌ limiꞌmi vaniꞌ ve. Neꞌmine neivo aꞌmine nene initeꞌ goloso gehepeve sotoꞌ o-ngidineꞌ nenako aꞌmine osupo gihile evenetoꞌ diꞌmoziꞌ moziꞌ aniꞌ nemuꞌ nene aꞌmine aleve ingine Oꞌmoso divi ledivika li-daniꞌ ve.