6
Izipahaꞌinesi Izeꞌninge Meꞌningesi Igi Mili Miniliza Monovomuꞌ Pauloꞌ Lo-ngimineꞌ Gamazi
1 Idoꞌ Kilisitoda giꞌmizi minave nete igi mili ilizadoꞌ o neineꞌ monovoloꞌ nene izipe lingine izetingine metingine gelekeleꞌ i-ngidi minilizadoꞌ lisiheꞌ o neineꞌ nenaze. Lingine gelekeleꞌ i-ngidi minilo. 2 Nemuꞌ nene monoꞌ godolouꞌ tiꞌ li gizi nizaniꞌ ma neive:
Lingine izetingine metinginemuꞌ gilikevo dizo minavo naꞌnaꞌ i-ngidi minilo.
Neꞌmino neineꞌ nenako Moseꞌ aza aka gamazi mukiꞌ nene gizeꞌmo nolemo aꞌmida nene Oꞌmosoꞌmo do lamineꞌ o-ledelesa lo huko lineꞌ gamazi imineꞌ molo ma gizamo aꞌmine mene luvoniꞌ gamazi maloꞌ nene ganaꞌ apiꞌ ogo neꞌmine gamazi ma imineꞌ molo tiꞌ lo gizineꞌ ve:
3 Lingine izetingine metinginemuꞌ gilikevo dizo minavo naꞌnaꞌ i-ngidi minilizaniꞌ neꞌmo nene naza lokuvo
misubouko mene vetinesi gamene haꞌna lamineꞌ ha mini di vi minilisave.
4 Idoꞌ izeꞌninge meꞌninge lingine izipahatine nene ngizeboloꞌ molali initeꞌ initeꞌ i-ngidami Guvelesi veꞌmi monovomuꞌ apizi ngimi eze akaꞌveloꞌ eꞌmeti vi minilizangumuꞌ ve li di hehe li-ngidi minilo.
Gonouꞌ Vesi Gizebo Veꞌinesi Igi Mili Minilizaniꞌ Monovomuꞌ Pauloꞌ Lo-ngimineꞌ Gamazi
5 Idoꞌ gonouꞌ ve lingine nene Kilisitoꞌ gamazi lidoꞌ gili di minaniꞌ gilivosa me misubouko gizebo i-lingidaaꞌ navetine nene eveneꞌ nabate nizave li engikumuꞌ lengehelele izivo mini lutine mili hamoꞌ gehepeve i mini lilizadoꞌ gili di gelekeleꞌ i-ngidi minilizave. 6 Idoꞌ gonouꞌ ve lingine gizebo vete nete lezemuꞌ ningi lamineꞌ gililizave li engiꞌ veꞌnidoꞌ nene gono amuzo mili daaꞌ nave gili gono di minisa idoꞌ alingeꞌ gizebo vetine nete ningamavo gono gilizevo igi di minaaꞌ naniꞌ neꞌmine nene amilo. Kilisitoꞌ goboni ve gihilelite gono dalizaniꞌ monovo lisihetokovoꞌ nene eꞌmeti Oꞌmosoꞌmo gilidoꞌ nene eꞌmeti gizebo vetine nete gono lingimilizaniꞌ nene lutine laminetotikovoꞌ dalo. 7 Ee, evenekumuꞌ gono dami asi Guvelesi vemuꞌ gono daniꞌ gilivosa lingine nene lutine lamineꞌ o minivo aꞌmine gizebo vetine nete gono lingimilizaniꞌ nene dalo. 8 Lingine mo gili nizaniꞌ ma neive. Ve malite gono lamineꞌ dalizaniꞌ nene Guvelesi veꞌmo meni lamineꞌ ngemeleseive. Idoꞌ aꞌmine ve nene gelekeleꞌ ve nilizahe idoꞌ gelekeleꞌ ve minami haza ve nilizahe aꞌmine hamo hamoꞌ mukitoꞌ nene gono dalizaniꞌ votigileloꞌ votigileloꞌ ogo meni ngemeleseive. 9 Idoꞌ gonoloꞌ veti gizebo veꞌine lingine aꞌmineꞌmine igi gonouꞌ vetine nene monovo laminekovoꞌ i-ngidilo. Lingine gili nizave. Gizebo ve lengiꞌ nesi gonouꞌ ve nesi gizebo vetine hamoꞌ minive nene Okulumokuꞌ Guvelesi ve hamoꞌ nene neive. Idoꞌ aza nene ningivo laza linge ma dizo nonivo linge ma limi minikevo minamo laza mukitoꞌ nene lisihetokovoꞌ none. Nemuꞌ nene gizebo ve lingine gonouꞌ ve nene gono amuzo mili dalizangumuꞌ ve li golise gililiza initeꞌ initeꞌ i-ngidaaꞌ naniꞌ nene huli monovo laminekovoꞌ i-ngidilo.
Oꞌmoso Biluvaꞌ I-daaꞌ Ave Lovo O-ngemeloningumuꞌ Nene Laza Oꞌmosolatiꞌ Lovo Hizaaꞌ Initeꞌ Dosa Mineloningumuꞌ Pauloꞌ Lo-ngimineꞌ
10 Idoꞌ naza gamazi lo osuꞌ nolo tiꞌ lo noluve. Lingine Guvelesi vela vi giꞌmizi mini eitatikisi amuzo disa eleꞌvoleꞌ igi minilo. 11 Satani neꞌmo gotine izo do gopoꞌnapa o-lengedo lingivileꞌ olosa ilineꞌ nene lingine mo limi ingami ha eleꞌvoleꞌ igi oti minilizangumuꞌ ve li Oꞌmosolatiꞌ lovo hizaaꞌ initeꞌ mukiꞌ nene di okodida igisa minilo. 12 Idoꞌ laza neꞌmino lovo hizaaꞌ initeꞌ Oꞌmosolatiꞌ do ngolo mineloneꞌ nene nanitekumuꞌ ve. Laza lovo oloneꞌ nene haza eveneꞌ leliꞌ okodesi neꞌmine minaniꞌ nene lovo o-ngemeloneꞌ nevoba asi Sataniꞌmi zuho goloso guveꞌinesi ve naba amuzoꞌine ato atokisi minave okulumoꞌ gahevela minaaꞌ naniꞌ initeꞌ ingine nene me misubouko eveneꞌ litiꞌmusouꞌ neꞌmine ha minaveloꞌ nene amuzo malaꞌ malaꞌ i-ngidi gizebo i-ngidi minaaꞌ nave engikisi lovo hizeloneꞌ nemuꞌ nene Oꞌmosolatiꞌ lovo hizaaꞌ initeꞌ nene do ngolo minelone. 13 Nemuꞌ nene Satanilatiꞌ ve goloso ingine lovo i-lingimilizanguꞌ nene lingine limi ingami ha oti pehe li amuzo mili mini mo ngivileꞌ igi osuꞌ li minilizangisi Oꞌmosoꞌmo lovo hizaaꞌ initeꞌ mukiꞌ lemaaꞌ neineꞌ nene ha di minilo. 14 Idoꞌ neꞌmine igi lingine lovo hizi ngivileꞌ ilizangumuꞌ ve li eleꞌvoleꞌ igi oti mini gamazi laminetokovoꞌ laaꞌ monovo neꞌmo nene gopotidoꞌ leti neꞌmine loloꞌ ogo minavo idoꞌ monovo lisiheꞌ ogo molo minaaꞌ neꞌmo nene losodidoꞌ lepese neꞌmine loloꞌ ogo minavo 15 idoꞌ monoꞌ gamazi lamineꞌ hongu lo minaaꞌ monovomuꞌ lo-lemaaꞌ neineꞌ neꞌmo nene lisi ngi li minilizangumuꞌ suuꞌ neꞌmine loloꞌ ogavo 16 initeꞌ linge mukiꞌ neꞌmine disa Kilisitoꞌnimuꞌ gili eleꞌvoleꞌ igaꞌ naniꞌ nedunuꞌ nene ve golosolatiꞌ oloꞌ lo minineꞌ elese alineꞌ nene bili lihizi di hulilizadoꞌ i minilizaniꞌ nenako nemuꞌ nene aꞌmine gili eleꞌvoleꞌ igaꞌ naniꞌ neꞌmo nene lepese naba neꞌmine loloꞌ ogavosa di minilo. 17 Neꞌmine igi Oꞌmosoꞌmo do luꞌ izaaꞌ neineꞌ neꞌmo nene lovo angilitine ainidunuꞌ liliꞌ aniꞌ neꞌmine loloꞌ ogavo di gihi mini Oꞌmosoꞌmi gamazi eiꞌ Sikalahuꞌveliꞌmo lengemaaꞌ neineꞌ neꞌmo nene bainati miteꞌ neꞌmine loloꞌ ogavo di minilo. 18 Neꞌmine igi mini lingine nene Oꞌmosoꞌmi Sikalahuꞌ neꞌmi amuzololoꞌ nene gamene gamene Oꞌmosola li mini initeꞌ nanitekumuꞌ viseꞌ ilizahe nemuꞌ nene Oꞌmosola livoꞌ minilo. Neꞌmine ilizangumuꞌ nene goseleꞌ lengebelamivo lutine okise ongamivo mini Oꞌmosoꞌmi zuho mukiꞌ engikumuꞌ nene Oꞌmosola liviꞌ liviꞌ igi minaaꞌ ilo. 19-20 Idoꞌ naza Izesuꞌ velemuꞌ ogo ezemuꞌ gamazi lamineꞌ gomuꞌ sunoꞌ minineꞌ nene lo sotoꞌ ogaꞌ nouve nouvoniꞌ nenako nemuꞌ nalaꞌ numunguꞌ huli-nidikevo nouvongukisi aꞌmine gamazi lamineꞌ nene lovoꞌ kiselevoꞌ ogo lo sotoꞌ olodoꞌ o neineꞌ nenako nemuꞌ nene lingine Oꞌmosola lilizanguꞌ nene lovoꞌ kiselevoꞌ ogo lo sotoꞌ olongumuꞌ ve li nenikumukisi nene Guvelesi veꞌmo veꞌne do lapa nomineꞌ ogavo aꞌmine gamazi lamineꞌ nene nehelele izamivo veꞌne telo lo sotoꞌ olongumuꞌ ve li Oꞌmosola nenikumuꞌ lilo.
Pauloꞌ Luhuvo Gize Osuꞌ Lolosa Gekeꞌ Lo-ngedo Gizineꞌ Gamazi
21 Naza mela mine molo nouvongumukisi idoꞌ gono do nouvongumukisi nene Tikikoꞌ vo lo-lengeme osuꞌ lilive lo imiselekuvo novive. Aza nene Kilisitoꞌ aleve leliꞌ zuho Guvetesi veꞌmi gelekeleꞌ izipeꞌve lisiheꞌ lamineꞌ neivo luꞌne emaaꞌ nouve minive 22 neꞌmo leliꞌ gamazi nene lo-lengemo muludinguꞌ do lamineꞌ ilive lo imiselekuvo lengita nesene novive.
23 Oꞌmoso metehosi idoꞌ Guvelesi ve Izesuꞌ Kilisitokisi ingine hongu lo minaaꞌ monovo nene neze zuho lengita di sotoꞌ i-lingidi idoꞌ lingine engikumuꞌ gili eleꞌvoleꞌ adoꞌ nene imineꞌ mili lutine ge neme ne geme li minilizaniꞌ amuzo nesi nene di sotoꞌ i-lingidilisiho. 24 Idoꞌ lingine Guvetesi ve Izesuꞌ Kilisitoda giꞌmize lamineꞌ igi lutine mudise eleꞌvoleꞌ igi imaaꞌ aniꞌ aleve mukita nene Oꞌmosoꞌmi nasahiliꞌ neꞌmo mine molo minivo.
Moda ve.