1 Ve ma aza gizebo ve loloꞌ olosa ive nene mo gono gihile lamineꞌ maloꞌ nene lulo nomolave li evenelite laaꞌ naniꞌ nene mo lamineꞌ laaꞌ nave. 2 Aꞌmine gono nene gono lamineꞌ nenako aꞌmine gizebo ve loloꞌ ilive nene eveneliti veꞌnidoꞌ nene monovo golosoꞌvesi minamaaꞌ ilive minoo veneꞌ hamoꞌ do minive mino getipe ve minamo monovo goloso ogalove lo monovoꞌveloꞌ gizebo ogo initeꞌ ogo molo ilineꞌ nene mo lisihekovoꞌ ilive mino venenga ve ngeleꞌmize lamineꞌ ogaꞌ ive mino eveneꞌ gamazi apize ngemaaꞌ ilidoꞌ o minelive mineleseive. 3 Noso geli geli ogo naaꞌ ive minamilive. Idoꞌ evenekumuꞌ izeboloꞌ malaꞌ malaꞌ ogaꞌ ive minamo asi hongu lo-ngemo lamineꞌ minaaꞌ ive lovo lolize amaaꞌ ilive minelive. Idoꞌ aꞌmine monoꞌ muliseloꞌ gizebo o-ngedaaꞌ ilive nene monimuꞌ lulo molaaꞌ ilive minamilive. 4 Aꞌmine ve nene eiꞌ veneꞌ izipahala zuholoꞌ gizebo lamineꞌ ogo ngeleꞌmize akaloꞌ ogaꞌ neivo aꞌmine izipahala ingine meꞌnibinemuꞌ gilavo dizavosa peleseveꞌ izami gamaziꞌveloꞌ gili daaꞌ ave minelive. 5 Neꞌmine noluvoniꞌ nene eze zuho gizebo ogo ngeleꞌmize akaloꞌ o-ngedaaꞌ monovo gele vevesamilineꞌ nene Oꞌmosoꞌmi muliseloꞌ gizebo ogaꞌ gono dalidoꞌ nene ngelo lisiheꞌ o minelihe. Mo kekeꞌ lisiheꞌ o minamoloseinako nemuꞌ nene noluve. 6 Aꞌmine monoꞌ muliseloꞌ gizebo ve nene monokuꞌ olihe lodive amive eveneꞌ gosohoꞌ neꞌmine eleꞌmizi milalizaniꞌ nene neꞌmine i-nidikeve loo okoꞌno do dizavo Oꞌmosoꞌmo Satani lihime molo-do mulumo gono emelesa neineꞌ neꞌmine ogo lihime molo-do mulumo gono emaalinako olihe monokuꞌ lodive amive eveneꞌ gosohoꞌ nene monoꞌ gizebo ve liliꞌ i-damilizave. 7 Idoꞌ Izesuꞌ evenele minamave nete ezemuꞌ gamangi mili-daaꞌ avevoꞌ nene monoꞌ gizebo ve liliꞌ i-dilizave. Monoꞌ gizebo ve nene neꞌmine ve minamilineꞌ nene eveneꞌ malite monovo goloso ogave li elemikevo Sataniꞌmo emenguꞌ molo ivileꞌ ogavo lihime daalive losa noluve.

8 Idoꞌ monoꞌ muliseloꞌ medeli mini ato atoꞌ gono adoꞌ gohoꞌ gahaliꞌ nasahiliꞌ i-ngidaaꞌ gono nevoꞌmidoꞌ gizebo ve nete nene aꞌmineꞌmine igi monoꞌ muliseloꞌ gizebo ve neꞌminisa mini evenelite gamangi mili-ngidilizadoꞌ i minave mini eveneꞌ goꞌine izaaꞌ ave minami noso geli geli igi naaꞌ ave minami monovo goloso igi moni heneni vaiꞌ dalisa gilaaꞌ ave minami 9 monoliꞌmi sunoꞌ gamazi Oꞌmosoꞌmo do sotoꞌ o-lede neineꞌ nene di mini monoꞌ gili nizadoꞌ nene ha eꞌmetivoꞌ minisa engiꞌ luꞌninguꞌ monovo goloso minivo ningisaꞌmave minilizave. 10 Idoꞌ aꞌmine ato atoꞌ gonoloꞌ gizebo ve liliꞌ i-ngidilizave nene gomuꞌ engiꞌ monovomuꞌ izeꞌ mili-ngidi ningavo engita aꞌmine eꞌmetamilizave luvoniꞌ initekutiꞌ nene ma nomivo minilizanikovoꞌ nene aꞌmine gonoloꞌ dalizangumuꞌ di oti-ngidilizave. 11 Idoꞌ engikisi bizi minaniꞌ veneꞌ neve nene evenelite gamangi mili-ngidilizadoꞌ lisiheꞌ i minaniꞌ veneꞌ minii divi lediviꞌ gamazi li-ngidisaꞌmaniꞌ veneꞌ mini negi hizami monovoꞌnidoꞌ gizebo lamineꞌ igi mini neꞌmine manaꞌmine gono dalizaniꞌ nene monovo lisihetokovoꞌ eꞌmetisa di minilizaniꞌ veneꞌ minilizave. 12 Idoꞌ aꞌmine ato atoꞌ gonoloꞌ gizebo ve liliꞌ i-ngidilizave nene veneꞌ hamoꞌ di minisa engiꞌ izipahaꞌnidokisi engiꞌ numuꞌninguꞌ ingaaꞌ avelokisi nene gizebo lamineꞌ i-ngidi ngeleꞌmize akaloꞌ igaꞌ ave minilizave. 13 Neꞌmine noluvoniꞌ nene nanitekumuꞌ ve. Aꞌmine gonoꞌine nene laminisa ma di minilizaniꞌ nene eveneꞌ gilavo dizi minisa Izesuꞌ Kilisitodoꞌ giꞌmizo mino gelaaꞌ nouneꞌ monokumuꞌ nene ngehelele izamivo livi kiseliviꞌ ilisanako nemuꞌ nene noluve.

14-15 Naza geiꞌ nanida nene liteꞌ lo alohe lo gele nouha liteꞌ lo amuvo ma nene gaza ladani amo Oꞌmosoꞌmi evenele zuhoutiꞌ alevelite igi mili ilizaniꞌ monovomuꞌ nene gaza gele mineline losa gamazi mene nogize-giduve. Aꞌmine Oꞌmosoꞌmi evenele zuhomuꞌ luvoniꞌ nene minevoꞌ minevoꞌ ogaꞌ neineꞌ Oꞌmosola giꞌmizunive leliꞌ mulisemuꞌ nene luve. Langise neꞌmo numuno hize eleꞌ ogo do minaaꞌ neineꞌ neꞌmino gamazi gihile hize eleꞌ ogo do minaaꞌ neineꞌ nene leliꞌ Oꞌmosoꞌmi evenele mulise neve nene none. 16 Idoꞌ sunoꞌ gamazi leliꞌ monoteuꞌ sotoꞌ ogo minineꞌ nene gamazi naba neive lo lo sotoꞌ ogaꞌ nouneꞌ nene adoꞌ