1 Lengikumuꞌ nisivo mulumo gelo minuvoniꞌ nene edamivo Timoteoꞌ aza hulo-nedo lengita vavo nenikovoꞌ Atena numuda minelove lo gelo 2-3 lelikisi makaꞌ Oꞌmosoꞌmi gono do Kilisitoꞌ gamaziꞌve lamineꞌ lo sotoꞌ ogaꞌ ive leze zuho Timoteoꞌni imiselekuve. Idoꞌ imiseluvoniꞌ nene aza lengita vo monokumuꞌ lengiꞌ goboni mili-lingidi nizaniꞌ neꞌmo nene monoꞌ hulikelizave lo gatine do lutine do ngi lo-lengedo Izesuꞌnimuꞌ gili eleꞌvoleꞌ naniꞌ nene do amuzo molo-lengedelive lo imiseluvoniꞌ ve. Ee, Oꞌmosoꞌmo gelavo aꞌmine geni nene ha gehelonidoꞌ o noneꞌ nene lingine mo gili nizave. 4 Ee, aꞌmine geni olihe sotoꞌ amivo laza lengita ha minuneꞌ gameneuꞌ nene mulumo geni niteꞌ sotoꞌ o-ledelesa neive lo gomuꞌ ogo lo-lingimuneꞌ nenako nemuꞌ nene aꞌminemuꞌ mo ningi gili nizave. 5 Idoꞌ lemenguꞌ molaaꞌ ive lengemenguꞌ molavo lengita gono duneꞌ nene vo haza ogalinako monoꞌ gili di nizahe idoꞌ hulahe lo neꞌmi monovo gelelove lo lengikumuꞌ mulumo naba gelosa ogo molo minuvonikisi edamivo Timoteoꞌni imiselekuvo vineꞌ ve.

6 Idoꞌ Timoteoꞌ aza lingisi minadatiꞌ lezela ogo hetelo lingine Izesuꞌnimuꞌ gili eleꞌvoleꞌ igi minaniꞌ nemuꞌ veteteꞌ ogo lo-lemave. Idoꞌ lelikumuꞌ gilikevo gamene gamene lamineꞌ ogo minaaꞌ ivo laza lingine ningelone lo minaaꞌ uneꞌ neꞌmino linginesi aꞌmineꞌmine igi lezemuꞌ ningelone li gili minaaꞌ aniꞌ nesi lo-leme osuꞌ lave. 7 Lo-leme osuꞌ lavo neze zuho, lingine Izesuꞌnimuꞌ gili eleꞌvoleꞌ igi minaniꞌ nene gelo nemuꞌ lengikumuꞌ geni libilineꞌ nene mate-ledavo goboni mili-lidi nizavo mulumo gelo noningukisi lamineꞌ giluneꞌ ve. 8 Idiꞌnise lingine Guvetesi vela vi giꞌmizi eleꞌvoleꞌ i nilizaniꞌ nemuꞌ gelo luteuꞌ lamineꞌ ogavo gohi mine lamineꞌ ogo ogo molo minelesune. 9 Idoꞌ lengikumuꞌ ve lo Oꞌmosoꞌmi veleloꞌ muludeuꞌ lamineꞌ goloso giluningumuꞌ ve lo lengikumuꞌ do dizosa Oꞌmoso opoꞌni lolone. 10 Gele lemavo lengita vo ge ninge ne ninge lo monoꞌ linge ma mineꞌmo vo neineꞌ nene imineꞌ molo lo-lengemelone lo holisekisi holukakisi vauve elo Oꞌmosola laaꞌ noune.

11 Idoꞌ Meteho Oꞌmoso asiꞌvesi Guvetesi ve Izesukisi voloneꞌ akate velo hulo lengita ivo. 12 Guvetesi ve lengita gono davo lengikuꞌ lutine ge neme ne geme li mini laꞌlise leliꞌ lute linginela muluneꞌ neꞌmini linginesi aꞌmineꞌmine igi lutine eveneꞌ mukita milikevo buu lo aꞌmine monovo amuzo molo minelive lo Oꞌmosola nolune. 13 Neꞌmine ogo Guvetesi veꞌmo lutine do ngi lo-lengedavo Guvetesi ve Izesuꞌ eze evenele zuho mukikisi ogo hetelelineꞌ gameneuꞌ lingine nene Oꞌmosoꞌmo ningivo lihimetine nomivo lutine laminekisi minilizave.