1 ꞊Dhɛ 'ö ꞊ya kë "dhʋ̈, 'yö 'wo bɔ Angfipodhi ‑pö waa‑ Apodhoni ‑pö ‑nu 'gü, 'yö 'wo dho 'wo ꞊loo Tesadhonikö ‑pö 'ö Zuifö ‑nu ‑bha ‑bhɔ "kwëë ‑kɔ do‑ gun‑ ‑bha bha‑ 'gü. 2 'Yö Pɔdhö ‑yö dho Zuifö ‑nu ‑bha ‑bhɔ "kwëë ‑kɔ 'gü ꞊dhɛ ‑kɔ 'ö‑ ‑kë 'ka ‑kpɛawo bha‑ 'dhö. 'Yö Atanna ‑wʋ 'ö ‑bɛn zë ‑sü 'ka bha‑ pö‑ ‑nu ‑dhɛ, 'yö‑ ‑nu ꞊klang ‑kë 'ka Zuifö ‑nu ‑bha ꞊glooyi ‑yaaga 'ka. 3 'Yö‑ 'klɔɔ‑ ‑nu pö‑ ‑nu ‑dhɛ ꞊dhɛ ‑kɔ 'ö ‑bɛn zë ‑sü 'ka‑ 'ka Atanna ‑bha 'sëëdhɛ 'gü ‑a 'dhö, 'yö‑ ‑zɔn ‑nu ‑dhɛ ꞊dhɛ ‑yö ‑bɛn zë ‑sü 'ka ꞊dhɛAtanna ‑bha ‑Yamɛ ‑dho sëë bho 'ö ga, 'ö go ga 'gü. 'Yö‑ pö‑ nu ‑dhɛ ꞊dhɛ: «Yesu 'a‑ ‑dhiang zë sië ka ‑dhɛ bha ꞊në Klisi bha‑ 'ka.» 4 ꞊Dhɛ 'ö ꞊ya kë "dhʋ̈, 'yö mɛ 'do 'do 'bha ‑nu ‑wo go‑ ‑nu kpö 'gü 'wo 'dhang bho Atanna ‑wʋ 'ö Pɔdhö ‑ya pö‑ ‑nu ‑dhɛ bha‑ "dhiʋ̈, 'yö 'wo ‑da Pɔdhö waa‑ Sidhasö ‑nu "piʋ̈. 'Yö mɛ kpö 'gbɛ 'wo ‑kë Glɛkö ‑nu 'ka 'wo Atanna ‑dhɔkëmɛ ‑nu 'ka 'pö waa‑ dhebhɔ ꞊bhlëësü ‑nu 'gbɛ ‑ta ‑gbɛ 'wo gun 'pödhɛ bha‑ 'gü bha 'wo‑ ‑kë ‑kɔ do bha‑ 'gü 'pö.

5 'Yö ꞊drɔ ‑yö ‑da Zuifö ‑nu 'gü, ‑a ‑gɛn ‑mü ꞊dhɛ mɛ 'gbɛ ‑bha ‑dho Pɔdhö waa‑ Sidhasö ‑nu ꞊keng‑ ‑sü 'ö ꞊dhɛ ‑kɔ bha‑ 'dhö bha 'yii dhi‑ ‑nu ‑dhɛ. 'Yö 'wo "wlaamɛ ‑nu ꞊kpaa 'kwëë‑ ‑kpinng ‑ta ‑dhɛ ‑nu 'gü, 'yö 'wo zun mɛ ‑nu ꞊bhluu "bhluu kë ‑sü ‑bha 'yö 'wo 'pö‑ ‑mɛ ‑nu zuë" ꞊kaan‑ 'ka "kwëë, 'yö 'wo nu gɔndënë do 'bha 'wo‑ ‑dhɛ Zazɔn bha‑ ‑gɔ 'kɔ "dhiëngdhö, Pɔdhö waa‑ Sidhasö ‑nu mɔɔ‑ ‑sü 'ka kö 'wo 'dho‑ ‑nu 'ka 'pö‑ dë ‑nu ‑kuu "dhiʋ̈.

6 ꞊Dhɛ 'ö 'wii‑ ‑nu yö 'mü, 'yö 'wo Zazɔn waa‑ 'dhang ‑bho Yesu "dhiʋ̈ ‑mɛ ‑nu 'bha ‑nu ꞊gaan "gaan ‑kë, 'yö 'wo dho‑ ‑nu 'ka 'pödë ‑nu ‑kuu "dhiʋ̈, 'yö 'wo ‑ya "gbla ‑sü ‑bha 'wo‑ pö: «'Mɛ ꞊wa "kpʋngtaamɛ ‑nu ꞊gban "pɛpɛ zuëkaankwëëdhe ꞊gban 'gü bha ꞊në ꞊wa nu ꞊wa ꞊loo 'pö‑ ya‑ 'gü ya! 7 "Kɛɛ Zazɔn ꞊në‑ ‑nu ꞊yëë bho ‑sü 'ka ö ‑gɔ 'kɔɔdhö! 'Mɛ 'wo bha ‑dhɛ "pɛpɛ 'wo ꞊loo‑ 'gü, ‑wo 'tɔng‑ ‑nu 'ö kwa ‑bha "sɛkɔɔnmɛ 'kpii‑ ‑ya dɔ bha‑ ꞊gban "pɛpɛ ‑see, 'ö 'wo‑ pö ꞊dhɛ ‑gblüdë "wɛɛ 'bha ‑yö ‑dhö 'wo‑ ‑dhɛ Yesu!» 8 'Yö ‑wʋ bha 'ö ‑siö mɛ kpö 'gbɛ waa‑ 'pödë ‑nu ‑dhɛ, 'yö‑ ‑nu zuë" ‑yö ꞊wlü. 9 'Yö Zazɔn waa‑ 'mɛ 'wo dho‑ ‑nu 'ka 'pö‑ dë ‑nu ‑kuu "dhiʋ̈ bha 'wo pë go‑ ‑nu ‑dhɛ "kɛɛ kö 'wii 'wɔn yaa 'bha kë. ꞊Dhɛ 'ö ꞊wa bo pë ‑go ‑a ‑nu ‑dhɛ ‑sü 'ka, 'yö 'wo wo ꞊kwaa‑ ‑nu ‑zü 'wo dho.

10 ꞊Dhɛ 'ö "bin ꞊ya 'ma, 'yö 'dhang ‑bho Yesu ‑wɔn "dhiʋ̈ ‑mɛ ‑nu 'wo wo ‑wʋ kpɔ Pɔdhö waa‑ Sidhasö ‑a ‑nu ‑bha kö ‑wo "suʋ̈ sië, 'yö 'wo dho Beedhe. ꞊Dhɛ 'ö ꞊wa ꞊loo mü, 'yö 'wo dho Zuifö ‑nu ‑bha ‑yakwëëkëgükɔ 'gü 'zü. 11 Zuifö ‑nu 'wo gun 'pö‑ bha‑ 'gü, "tʋ ‑to Pɔdhö waa‑ Sidhasö ‑nu ‑wʋ ‑bha ‑sü ‑yö kë ‑dhi ‑a ‑nu ‑dhɛ 'ö ꞊ziö‑ 'ka mɛ 'dhɛ 'wo gun Tesadhonikö bha‑ ‑nu ‑ta. 'Yö 'wo Atanna ‑wʋ kun 'zü wo zuë" ꞊gban‑ 'ka, 'yö yi ꞊gban "pɛpɛ 'ka 'wo ‑ya ‑dhɛ do 'gü, 'yö 'wo Atanna ‑wʋ 'ö ‑bɛn zë ‑sü 'ka bha‑ ‑wʋ pö kö ꞊ya kë ꞊dhɛ 'pë 'ö Pɔdhö 'dhö‑ pö sië bha 'ö tɛan‑ 'ka 'wo‑ dɔ. 12 'Yö Zuifö 'gbɛ 'wo go‑ ‑nu kpö 'gü 'wo 'dhang bho Yesu ‑wɔn "dhiʋ̈. 'Yö Glɛkö dhong ‑nu ꞊bhlëësü ‑nu waa‑ gɔɔn‑ ‑nu 'gbɛ ‑ta ‑gbɛ 'wo 'dhang bho Yesu ‑wɔn "dhiʋ̈ 'pö.

13 "Kɛɛ ꞊dhɛ 'ö Zuifö ‑nu 'wo Tesadhonikö ꞊waa‑ ma ꞊dhɛ Pɔdhö ‑yö Atanna ‑wʋ pö sië Beedhe ‑pö 'gü, 'yö 'wo nu 'wo ‑da 'pö‑ ‑mɛ ‑nu ‑gɔ 'gü, 'yö 'wo‑ ‑nu dɔ bhlukuudhö, 'yö 'wo‑ ‑nu zü ꞊yɔɔn Pɔdhö ‑nu ‑bha.

14 ꞊Dhɛ 'ö ꞊ya kë "dhʋ̈ 'yö 'dhang ‑bho Yesu "dhiʋ̈ ‑mɛ ‑nu 'wo Beedhe bha 'wo to 'wo dho Pɔdhö dɔ zian‑ ꞊weeyi "dhiʋ̈ ‑zian 'ka ‑bɛang 'ka, 'yö 'wo ‑wʋ kpɔ‑ ‑bha 'yö dho. 15 "Kɛɛ 'yö Sidhasö waa‑ Timote ‑zë ‑wo ‑to Beedhe ‑pö 'gü. 'Mɛ 'wo dho Pɔdhö ‑dɔ zian ‑dhɛ 'gü bha ‑wo ‑dho "dhʋ̈ 'wo ꞊loo Atɛnö 'plöö. 'Yö 'wo gun ‑na wo yee ‑kë 'wo nu naɔ 'ö Pɔdhö ‑ya dɔ‑ ‑nu ‑gɔ kö ‑wa dɔ Sidhasö waa‑ Timote ‑a ‑nu ‑gɔ bha‑ 'ka ꞊dhɛ ‑wo nu "vaandhö kö ‑wo ‑kpan ö ‑bha mü.

16 "Tʋ̈ng 'ö Pɔdhö gun dɔ sië‑ 'ka Sidhasö waa‑ Timote ‑nu ‑gɔ Atɛnö bha, ‑a zuë" ‑yö ‑gi ꞊dedewo, ‑a ‑gɛn ‑mü ꞊dhɛ Atɛnö ‑pö bha ‑yö ‑gun pa ‑sü 'ka ‑dhɔkëpë ꞊në‑ 'ka. 17 'Yö Pɔdhö waa‑ Zuifö ‑nu waa‑ 'mɛ 'waa Zuifö 'ka "kɛɛ 'wo ‑kë Atanna ꞊bhlëëyamɛ ‑nu 'ka bha wo ‑ya ‑dhɛ do 'gü Zuifö ‑nu ‑bha ‑bhɔ "kwëë ‑kɔ 'gü, 'yö 'wo zaɔdhe ‑nu ‑da ('wɔn ‑nu 'ö ‑gban Atanna ‑wʋ ‑bha bha‑ 'gü). 'Yö Pɔdhö ꞊ya ‑kpan 'pö 'mɛ ‑nu 'ö‑ ‑nu ‑bha "dhɛɛ 'kpii‑ 'gü ‑dhɛ ‑nu 'gü yi "ʋʋ yi 'ö‑ 'ka, 'yö wɛng‑ ‑nu 'wo dhiang ‑nu zë 'pö. 18 'Yö 'wɔndɔmɛ 'bha ‑nu 'wo ‑wɩ 'wɔn 'ö Epikudhö ‑yö mɛ ꞊draan‑ 'ka bha waa‑ mɛ 'bha ‑nu 'wo ‑wɩ Zenɔ ‑bha pë ‑zɔn ‑wʋ ‑bha, 'wo‑ ‑nu ‑dhɛ Sitoisiɛn ‑nu bha 'wo ‑ya dhiang ‑zë Pɔdhö ‑dhɛ ‑sü ‑bha. 'Yö mɛ 'bha ‑nu ‑wa pö: «‑Më ‑wɔn ꞊në dhiang plëëdë ya 'ö‑ pö sië‑ ya?» 'Yö mɛ 'bha ‑nu ‑wa pö 'zü: «‑Kë ꞊dhɛ ‑yö ‑zlan ‑dee 'bha ‑nu ꞊në‑ ‑dhiang zë sië bha!» ‑A ‑pö "dhʋ̈ ‑gɛn ‑mü ꞊dhɛ Pɔdhö ‑yö ‑gun Yesu ‑wɔn waa‑ mɛ "bhɩɩ‑ ‑nu ‑bha ‑go ga 'gü ‑dhiang ꞊në‑ zë sië. 19 'Yö 'wo‑ ‑da wo ꞊keng‑ 'wo dho‑ 'ka mɛ zizi ‑nu ‑bha ‑yakwëëkëdhɛ 'kpii‑ 'wo‑ ‑dhɛ ‑dhɛ Adheopazö bha‑ 'gü, 'yö 'wo‑ pö‑ ‑dhɛ: «I ‑mɔɔ ‑bha 'i Atanna ‑dhɔkë ‑kɔ ‑dee 'dhɛ 'i mɛ draan‑ sië‑ ‑bha bha‑ ‑zɔn yi ‑dhɛ ‑ee? 20 ‑A pö 'yi‑ wo "dhʋ̈ bha‑ ‑gɛn ‑mü ꞊dhɛ 'wɔn ‑nu 'i‑ pö sië yi ‑dhɛ bha 'yii‑ ma do, ‑yö yi "piʋ̈ ꞊dhɛ 'yi‑ ‑gɛn ma 'kpakpadhö.» 21 (Atɛnö ‑mɛ ‑nu bha waa‑ ‑nu ‑bha ‑dhɛng ‑nu ‑a ‑nu ‑dhidhɛwɔn 'ö gun ꞊në gun 'wɔn ‑taɔng ‑dee ‑nu bha‑ ma ‑sü waa‑ pö ‑sü ‑nu 'ka yi ꞊gban 'ka.)

22 'Yö Pɔdhö ‑yö ꞊wlü 'yö dɔ mɛ zizi ‑nu 'wo nu Adheopazö ‑ya "kwëë ‑ta bha‑ ‑nu wëëdhö 'ö‑ pö: «Atɛnö ‑mɛ ‑nu, a‑ dɔ 'kpakpadhö ꞊dhɛ Atanna mɔɔ‑ ‑mɛ ꞊dede ‑mü ka 'ka, ka ‑bha ‑zlan mɔɔ‑ ‑sü ‑yö ‑ziö ‑naa 'gü; 23 ‑a ‑gɛn ‑mü ꞊dhɛ 'ö gun kö a ꞊nië sië‑ 'ka ‑bha 'pödhɛ ya‑ 'gü kö a ka ‑bha ‑zlan ‑dhɔkëdhɛ ‑nu ‑ga sië, a ‑dhɛ ‑dhɔkëdhɛ do 'bha ‑yö 'ö ‑bɛn zë ‑sü 'ka mü ꞊dhɛ: «Atanna 'ö 'yaa‑ dɔ ‑a ‑dhɔkëdhɛ ꞊nɛ.» ꞊Dhɛ 'ö "dhʋ̈ a ‑nu kö Atanna 'ö 'ka‑ ‑dhɔkë "kɛɛ 'ö 'kaa‑ dɔ bha 'a yö ꞊në‑ ‑dhiang zë ka ‑dhɛ. 24 Atanna 'ö "dhʋ̈ bha ꞊në "kpʋngtaadhɛ waa‑ ö 'gü ‑pë ꞊gban ‑da, yö ꞊në "sɛ waa‑ dhang‑ ‑nu ꞊kɔɔnmɛ 'ka, ‑a ‑kë "dhʋ̈ ‑sü bha‑ 'gü, 'yaa ꞊mɔɔ‑ ‑bha kö ‑yö ‑ya 'kɔ 'ö mɛ "bhɩɩ‑ ‑nu ‑wa dɔ wo ‑kɔ "dhiʋ̈ bha‑ 'gü. 25 "Ɛɛn 'zü, ‑a "tʋ 'yaa mɛbhɩɩdhe ꞊kwɛngpë ‑bha, ‑a ‑gɛn ‑mü ꞊dhɛ yö ꞊në ‑tosɛa waa‑ "tɛɛ ‑sü ‑nu waa‑ pë "pɛpɛ 'ö mɛ "bhɩɩ‑ ‑nu ‑mawɔn ‑yö zun‑ ‑bha bha‑ nu‑ ‑nu ‑dhɛ. 26 Yö ꞊në gɔndënë do ‑da yi 'bha 'ka. Gɔndënë do bha ꞊në "kpʋngtaamɛ "pɛpɛ ꞊gban 'wo go‑ 'gü. Yö 'ö bha ꞊në‑ ‑kë 'zü kö 'mɛ 'wo bha ‑wo ꞊mɔɔ "kpʋngtaadhɛ "pɛpɛ ꞊gban 'gü. Yö 'ö bha ꞊në 'mɛ 'ö‑ ‑nu ‑da "dhʋ̈ bha‑ ‑nu ‑ya ‑dhɛ ‑nu 'wo dho "dhiëng kë‑ ‑bha 'gü 'yö "tʋ̈ng ‑nu 'wo dho‑ kë "kpʋng ꞊taa ‑a ‑nu ‑naa ‑kan 'yö gun ‑na mɛ "bhɩɩ‑ ‑nu kë. 27 Atanna ‑yö mɛ "bhɩɩ‑ ‑nu ‑da kö ‑wo ö mɔɔ‑ ꞊në‑ wo ‑kɔ "wla bho ‑sü 'ka ‑dhɛ 'gbɛ 'gü, 'bha mü "dhʋ̈ ‑wo ‑dho ö yö. "Kɛɛ 'sa kö 'yaa mɛ 'bha 'ka ꞊gblɛɛn. 28 ‑A ‑gɛn ‑mü ꞊dhɛ kwa ‑bha ‑tosɛa kë ‑sü waa‑ kwa ‑bha ‑pa diëë ‑sü ‑nu waa‑ 'pë 'ö 'kwa‑ 'ka ‑a ꞊gban‑ ‑go yö ꞊në‑ 'gü. Ka ‑bha "dhikanmɛ 'bha‑ ‑nu ‑wo ‑wʋ do ‑pö 'ö bhɔ ‑wʋ 'a‑ pö sië ka ‑dhɛ bha‑ ‑bha 'wo‑ pö: «Atanna ꞊në kwa ‑da, ‑a ‑wɔn 'gü ‑a ‑bha 'në ‑nu ‑mü kwa 'ka.» 29 ꞊Dhɛ 'ö ‑kë ꞊dhɛ kwa Atanna ‑bha 'në 'ka bha kö 'kwii 'dho kwa ‑zʋ 'gɔn ꞊dhɛ Atanna ‑yö ꞊dhɛ pë "blɛɛn‑ 'wo‑ ‑pë ‑kë "sënng waa‑ 'wëë‑ waa‑ ‑gwë ‑nu 'ka, 'ö 'mɛ 'wo dɔ‑ ‑pë kë ‑dhɛ 'ka 'wo‑ kë sië‑ 'ka bha‑ 'dhö. (Pë ‑nu 'wo "dhʋ̈ bha pë "blɛɛn‑ "wɛɛwɛɛdhe 'ö "tɛɛ ‑sü 'yaa‑ ‑gɔ ꞊në‑ ‑nu 'ka.) 30 "Tʋ̈ng 'ö mɛ ꞊gban‑ gun‑ 'ka wo tiibha bha, 'yaa gun Atanna "piʋ̈ ꞊dhɛ 'ö za dɔ mɛ ‑bha ‑a "tʋ̈ng bha‑ 'gü, "kɛɛ ꞊taamasü ya‑ 'gü, ‑yö mɛ "pɛpɛ ꞊gban ‑dhɛ sië ‑dhɛ "pɛpɛ ꞊gban 'gü kö ‑wo wo kwaa wo ‑bha ‑tosɛa kë ‑kɔ yaa ‑nu bha‑ ‑nu ‑zü kö ‑wo nu ö "piʋ̈. 31 ‑A 'klɔɔ‑ ‑mü ꞊dhɛ ‑yö ‑dhɛkpaɔyi do ‑ya ‑sü 'ka kö ‑yö bɔ‑ 'ka mɛ 'ö‑ ‑ya ('wo‑ ‑dhɛ Yesu) bha‑ ‑ta kö ‑yö za dɔ‑ 'ka "kpʋngtaamɛ ‑nu ‑bha tɛan‑ ‑ta. 'Wɔn 'ö‑ ‑wɔn 'gü 'yö‑ yi to "dhiʋ̈ 'yö 'mɛ 'ö "dhʋ̈ bha‑ bɔ, 'yö‑ bho ga 'gü kö mɛ ꞊gban ‑wa dɔ bha 'yö bha.

32 ꞊Dhɛ 'ö Atɛnö ‑mɛ ‑nu ꞊wa 'wɔn 'ö ‑kë mɛ "bhɩɩ‑ ‑nu ‑bha ‑go ga 'gü ‑sü 'ka bha‑ ma, 'yö mɛ 'bha ‑nu 'wo ꞊wɛɛ dɔ Pɔdhö ‑bha, 'yö mɛ 'bha ‑nu ‑dɩ 'pö 'wo‑ pö: «Yi ‑dho yi "tʋ 'to 'wɔn ‑nu 'i‑ pö sië bha‑ ‑bha yi "wɛɛ 'bha 'ka.

33 ꞊Dhɛ 'ö ꞊ya kë "dhʋ̈, 'yö Pɔdhö ‑yö ‑kan ‑nu ‑bha. 34 "Kɛɛ yö ‑zë ꞊gban 'gü, mɛ ga 'bha ‑wo kë ‑slɔɔ mü 'wo to ‑kplü ‑sü 'ka Pɔdhö ‑bha, 'ö 'wo 'dhang bho ‑wʋ ‑nu 'ö‑ pö bha‑ "dhiʋ̈. Denisi 'ö ‑kë zagɔbhomɛ ‑nu 'wo Adheopazö mü bha‑ mɛ do 'ka bha waa‑ dhebhɔnë do 'bha 'wo‑ ‑dhɛ 'pö Damadhisö bha waa‑ mɛ ga "kɛɛ bha ‑zë ‑wo kë 'dhang ‑bho Atanna ‑wʋ "dhiʋ̈.