1 Tialima, Tigidali Bomo Elalubo Genuai Bidigo po wei ponoyu, te tiwai wali, “Te eno po pusugi pabo bidi me deli te eno sunumi dodoligi pomainu polasa tagala palaibao. Dagego te Genuai Bidi asobo tonalubao, tialima polo tama aselama, te aga beba bidagasaibao. Dagego te eno po pusagasobo bidi suabo homu ebo wida, te suiąo. Tialima, aga asobo te eno dąų wali kontrak po pusagasaibao,” te po wai dao. [Mt 11:10; Mk 1:2; Lu 1:76; 7:27]

2 Tiali goli, Genuai Bidi aga asobo sogo, dego te po tų ebo ugwaba ela holobo usu egowe? Aga te pepeli diliba pedalubo sogo, de te me hagagobewe? Aga te sia posolo mu elasa asobo tiwai eyu, te silva me gol hogomu pobele bage sela sąbo tiwai yaibao. Tama aga te meda yai ugwa te sop dali wę dali sigo telabo tiwai yaibao, te meda mu sela sąwaibao. [Ped 6:17] 3 Aga asobo te tigidali we bidigo kolesaga dagalainu asaibao, bidigo te silva siaba ulama, te dwai hogomu sela sąbo tiwai yaibao. Te tiwai te Genuai Bidigo sę bidigo te pris dabego dwai meda yai kolesaga sela sąnama, tama augwa te Genuai Bidiba wiegi yai ofa igi peyu selasa paibao wali. 4 Tama nosali te Jerusalem dabe me te gasa Juda pedai badu augwa te wiegi yai ofa Genuai Bidiba eyu, te polobadu yali tiwai ebaso, tama Genuai Bidigo te augwaligo ofade wiegi yai pemene ma yaibao wai dao.

5 Tigidali Bomo Elalubo Genuai Bidigo te po wai, “Eno dagego kolesaga dagalainu asaibao,” wali. “Te polo tama eno te we sali tomode dolobo sę eyu, te pobi wabo bidi dabe po tų iliyu, te tibo po kotde pusuyu, te tonalubo bidi dabego te augwa sę bidi bugagia me abeligobeo, te we dabego tigidali doado bage sabo bidigo te muma sabo po weyu, te augwa bidi isai we dabego doado bage me siyu, te augwa aya isai wai dabego doado bage me sali, te bomai po boloyu te gasa tǫ kantridu asai bidi dabego nai me sali. Te tigidali bidi ena dologode me bidibeo, tama tibaso te eno augwali po tų ilaibao,” wai dao.

6 Genuai Bidigo po ma weyu, te po wai, “Ena naga ena Genuai Bidi, tama eno homu kolesaga me hasegeligobeo. Tama tibaso, dage te Jekopgo bulai wąįgo wai dabe, dage tigidali me hagabe dao. 7 Dage te duga bulai wąį dabe te polobadu bidali tiwai tobage naga dao. Dagego eno bomai po tudiba munama, tama dagego wali pabeo. Tialima, te dagego dwai kolesaga tagalama, te enaba ma asobaso da, eno me eno te haliga sębę ebo tagalama, te dage ma saibao. Ena te Tigidali Bomo Elalubo Genuai Bidi, eno te po walio,” wali.

“Dagego te po obao, ‘Dago mena sę elama, nageba ma asaibawe?’ te po wali. 8 Tialima eno dagebolo obao, dagego eno nai wi sali. Dagego homugo te dwagi yai kolesaga da homu eba, agawe? Mu menio. Tialima dagego e tama tebo dao. Nosali dagego enaba ma hanalu wai, ‘Magi ilama nago nai dago wi saliwe?’ Te bomai pode enaba mao wabo nai te dagego ma tolalubo dao. 9 Mu tama, eno po bomo ebao, dage tigidali dolaibao. Magi baso meni, dage tigidaligo eno nai wi sabo dao. 10 Dagego duga doado bage tigidali dobolama, te nogo si pedai elaluyu, te me deli te eno beba sesao wali. Tama eno sę bidi dabego nai hauwa elaluaibao. Dagego tama tibaso da, te eno wiegi yai doado bage hauwa umabo dageba mayu, te dage me sǫą pogobeo, te nai mubo madi te usu egobeo. Te sunumi wali pobaso da, te dagego koneyu, te eno po tigidali mu po dao waibao. [Prs 27:30; Nam 18:21-24; Bom 12:6; 14:22-29; Neh 13:12] 11 Dagego tama tibaso da, teda eno te dwai osogani dabe paniama, te dagego gi nai me dologobeo. Te ni wain du te dagego wain gide mu pągąna paibao wai dao. 12 Te gasa kantride bidibo bage tigidaligo dage sulama, tama te po waibao, ‘Augwali bugagia mu bidibao,’ waibao. ‘Augwali wiegi yai pemene umabo mu yaibao,’ waibao. Magi baso meni, te dagego tǫ te bugagia dugulalu bidabo pesage elalueibao.” Genuai Bidigo te po wali.

13 Genuai Bidigo te tiwai po wai, “Dagego te po dwai hauwa enaba wali. Tiali goli, dagego te po hanalu obao, ‘Dago mena po dwai nageba waliwe?’ Dagego te tiwai po walio, ‘Dago te Godiba lotu obadi goli, te Godigo da tau me sabeo,’ po wali. 14 ‘Magi baso dago agai po wali pobawe? Te Tigidali Bomo Elalubo Genuai Bidigo gedude dago dena yali dwai sęde homu dene yali, tiali goli agai daba te wiegi yai nai deli wei me ponobeo. Tialima, magi baso dago olodali homu dene yaibawe?’ te po walio. 15 ‘Dago te hagoma ebo bidi dabe bugagia bidiyu pemene ebo suali. Tama te dwai kolesaga ebo bidi dabego te doado bage hauwa elalubao, tama augwa te God usu sabo tobage kolesaga yalio, te augwaliba dene mabowe, ma meniwe, te suainu tiali. Tama Godigo augwali me dolisąwai. Mu menio.’ Dagego te po wai dao,” Genuai Bidigo te po wai.

16 Nosali te Genuai Bidi dologode bidama agai po odali we bidi dabe, augwa haside digi po miani, tama Genuai Bidigo augwaligo mibo po odalio. Tama Genuai Bidigo te po wai, tama te dagalude augwaligo te we bidigo nogi asęai elalubo buku me deli nigali, tede te Genuai Bidi dologode elalu, te agaba homu begi pai we bidi dabego nogi elaluali. 17 Tialima, te Tigidali Bomo Elalubo Genuai Bidigo te po wali, “Te hani dabe te ena hani naga bidaibao. Te genuai side bodolu eno muani, te hani dabe te eno we bidi mu bidaibao, te eno godolo ebo hani mu dao. Tama homu dene eyu, eno augwaliba te olo tau sabo wiegi yai kolesaga eyu, te aya me deligo te wai dabego ayago sę ebaso, te olo tau mabo wiegi yai kolesaga ebo tiwai yaibao. 18 Tama tiyu, te sogo te ena wali pabo doloba pai we bidiba eno ebo kolesaga ma suiyagameo, te eno dwai bidi dabeba ebo kolesaga, te augwaligo eno po sela sąbo dao, te bageba me eno ebo kolesaga suiyagameo,” wali.