1 Te tiali magede, Jisasgo Godigo we bidi tonalubo dwagi yai po pupusu biligibu genuai be nani dabe dali, dwasianu be nani dabeba pali. Aga dali bilibo nogo si olama, sągą si peda sigisu tama bidi dabe aga dali pali. 2 Te we dabe, me badu dwai haubogo tuaide Jisasgo sela sąyani we dabe me, me badu gasi ebaso, te gasi sela sąyani we dabe me, augwali Jisas wali bilali. Te we me nogi Maria, aga bulu nogi Makdala. Polobadu dwai haubo nogo a naga olama, me badu nogo si peda selama, te tama haubo noma bidigo te we tolalubaso, Jisasgo sela sąyani. 3 We me nogi Joana, Herotgo bede sę ebo genuai bidi Kusago we dao. We me nogi Susana. Me badu we dabe hauwago augwa monego Jisas me, Jisas aga dali bilibo bidi dabe me tau sali.

4 We bidi dabe hauwa moni be nani dabedu aseselama, Jisas pageba moni pesage odogolama bidibadi, Jisasgo te po digi po augwalibolo pusali. 5 “Me sogo bidi me deligo aga tubo nai wai ge te giba telaligi pai. Tama aga te nai ge tedelalo bilibadi, me badu tųde tulaluali. Tama nosali te tųde tulaluali nai wai me badu bidigo sągągo agayu, me badu ba dabego tuali. 6 Tama aga te nai ge tededalo bilibadi, me badu elewi elalubo tǫ daiba tulaluali. Tama nosali te nai ge kulubi holali goli, tǫ ili meni duama, sasia pelama, isali. 7 Tama te bidigo nai ge me badu sesani yai bono siliba tedelaluali. Tama nosali holobadi yaide, te sesani yai bono dabe dali talua holama mesegelali, tama te nai isila pali. Tama me badu ge dabe dwagi yai tǫba tulaluali. 8 Te nai dabe holama, du umabo walali. Duga po odabo olo elalubaso da, bugagia odiąo,” Jisasgo te po wali.

9 Jisas aga dali bilali bidi dabego hanaluyu,” Nago wali po digi po mena po olama, obawe?” wali. 10 Jisasgo wei ponoyu, te po wali, “Godigo te we bidi tonalubo bomo geme dualalubo po page dagebolo da hanilai dao. Tiali goli, gasa we bidi dabebolo eno te po digi pogo naga ola mobe dao. Augwaligo gegali goli, te susiąmainu eyu, te odali goli, te konesiąmainu tebo dao,” Jisasgo te po wali. [Ais 6:9-10]

11 Jisasgo te po ma wadolu, te po wali, “Te po digi po e tama po weyu, te walio. Te tubo nai ge da, te Godigo po dao. 12 Te tubo nai ge tųde tulaluali da, te bidi dabe augwaligo po odali goli, Satan asama, te poba homu begi pelama, sana pidali weyu, agai sela sąyagasali po olama waliao. Satango homugo tiali, teyu te augwaligo homude konealubo po dąų obaso da, te Godigo augwali ma saiba homu yali. 13 Te tubo nai ge elewi elalubo tǫ daiba tulaluali po wali da, te bidi dabe augwaligo dwagi yai homu elama, te po odali tiwai yali. Tiali goli, augwa homu tomoba te po mu musiąma, olo ugwadu homugo te poba begi pelama elalubadi, te Satango dwai sę yanama sinabo sogo augwali tulalu, te Godiba homu muani tagalobo dao. 14 Te tubo nai ge sesani yai bono sili elalubo tomoba tudulaluali po wabo da, te da te bidi dabe augwaligo te Godigo po odali tiwai yali goli, e tǫde ebo naide moni homu hauwa eyu, te nai doado bage hauwa elalu, te monede me, e tǫde ebo sęde bugai homu pemene eyu, tama te nai doado bagego augwali homu hogodabo mesegelama, te augwaligo Godigo po bugagia me odobeo. Augwali te nai du bugagia walama, te inawai nai tiwai elalube dao. 15 Te tubo nai ge te ili elalubo dwagi yai geswai tǫde tudulaluali po wali da, te da te bidi dabego po odama, te augwa bugagia wali pelama, te homude dąų ola sali tiwai yali. Te augwa haliga bugagia dolasa elalubadi, te augwa bomo elama bidu, te augwa nai du walobo tiwai te elaluali dao,” Jisasgo te po wali.

16 Jisasgo po ma wadolama weyu, te po wali, “Bidi mego te lam sole domonama bogoli ebadi, tama sela asama, te senego mesegelu, ma pibo bet dologoba mugibu me egobeo. Menio. Te bidi dabe augwaligo te tebol sai daiba ugadu dugulaibao, te be tomoba asobo we bidi dabe augwaligo te ula sumainogo tebo dao. 17 Te tigidali magi magi nai geme dualaluali, te nosali pebeli diliba hanilaibao. Te tigidali magi magi po te bidi dabego geme mesegaluali, te po te hania pebeli diliba pedelama, we bidigo odaibao. 18 Dagego te po odoyu, mu dua dao. Bidi mego nai meba tolalubo bidi yai baso da, teda Godigo agabolo gasa nai me ugadu daganama mawaibao. Tiali goli, bidi mego nai me deli menibadi goli, te dwasianu aga tobade munaluba homu yali nai sela paibao,” Jisasgo te po wali, te bidi dabe augwa homu agaba muani bidi dabeba magi paibao po wali.

19 Jisas aga ida me ama dabe me aga pageba asainu yali goli, tama we bidi dabego sesela selama, te Jisas suabo ąǫ ebeo. 20 Mebago Jisasbolo te po wali, “Naga ida me, naga ama dabego me nage sueo olama, bulu badu e dodoladubao,” wali. 21 Jisasgo te we bidi augwalibolo te po wali, “Godigo po odama, wali pabo we bidi da, ta eno ida dabe, ama dabe dao,” wali.

22 Me sogo Jisas me aga dali bilibo bidi dabe me moni geba ugwaba daiba holama, tomoba dualama, tama agai te po wali, “Da e sigi ąį u badu bogo badu pinao.” Tama augwaligo nogebo gagalali. 23 Tama augwaligo te wę gebadu hąbesegego todogo pidubadi, te Jisas godege piali. Moni bomai wali te sigi ąįde pedelama, te geba tomoba ąį pągela sąwani. Augwali dwai tųba mu degelali. 24 Augwaligo Jisas hodolagasu, te po wali, “Genuai Bidi, Genuai Bidi. Da isabo magana pali.” Tama Jisas hodaloama, wali hageyu, te waligo sabilibo ąį hagelama togoliyu yali. Te waligo me, ąįgo me moni te bomo hodali tagalama, ma tamugulali. 25 Tama aga wali bilibo bidi dabebolo te po wali, “Magi baso enaba homu beagasobewe?” Tiali goli, augwali noma selama, wi yali. Augwa hasi ugwa tono eda, tono elama, te po wali, “E magwai bidi yaliwe? Agai te wali dabe, ąį dabebolo me hage baso, augwali sigo agai wabo po wali pabo dao,” augwaligo te po wali.

26 Te augwali te moni gebadu pelama, te u badu bogo badu Gerasa dabego buluba sabolali. Te bulu te Galili bulu dolo si dao. 27 Tama Jisas te gebadu asobadi yaide, dwai haubogo toai bidi Jisas tiąba asali, te ąį saniba. Polobadu te be nanide bidama, bolu olo te isai bidi mubo ola be dabeba gudasa pelama, bidai. 28 Te bidigo Jisas suyu, moni hai gela olama, Jisas sągą pageba degagaselama, moni i hai olama, te po wali, “Jisas, nage moni genuai Godigo Ogwa dao. Nago enabolo magi sę egowe? Nago ena dene magio,” wali.

29 Jisasgo dwai haubo pomainu gudulu baso, te bidigo te po wali. Polobadu hauwa sogo bidi dabego te bidi aligabo bidilama, kalabuside muani. Mubadi goli, dwai nomago tulama, dią paludali. Tama te dwai haubogo te bidi te bidi meni yai bulu tomoba sela piduali. 30 Jisasgo agabolo hanalu wali, “Nage nogi de dawe?” te po wali. “Ena nogi Hauwa dao,” te bidigo te po wali. Dwai haubo noma bidi hauwa mu aga tigiba dagawani baso, te nogi “Hauwa” poai. 31 Tama te dwai haubo dabego Jisasbolo hanalu, te po wali, “Da megi dwai bulu te bidibolo dene mabo madiba mugio,” wali.

32 Te kibu dabe umabo ugwadu sau pado pąde nai tuyu bidaluali. Tama te dwai haubo dabe augwaligo u kibu dabe tigiba dagana sigi pai hagede, Jisasbolo gonai. Tama gonobaso, Jisasgo augwa te emainu tagala palali. 33 Tama tibaso, te bidi tagalama, kibu dabe tomoba pali. Moni te kibu dabe tigidali wi peyu, te sigidu sau padoba samonama, sigi ąįba tulaluama, tama augwali te wę tulama poma peyu isila pai dao.

34 Te kibu dabe negeduali bidi dabego te tebo sulama, polo pelama, moni be nani dabeba me, moni gi sę eyu bidalubo bidi dabeba me te sę yali po pupusu bilali. 35 Te we bidi dabe augwaligo te tiali sę po odama, sugibu pebelawali. Augwali Jisas pageba aselama, suali, te dwai haubo dabego tulama wabo pali bidi te dwai haubo bidi sela sąbaso, te aga ugwa ma gudama, Jisas sągą pagede dugulalubo suali. Aga polobadu wiegi yai homu dali ma elama, duguladubo suali. 36 Tama tibaso, augwali moni wi mu yali. Jisasgo te sę ebo suali bidi dabego te we bidibolo te bidi sana palobo suali po pusali. 37 Tama te Gerasa bulu bidi dabe tigidali wi kisu mu dobaso, Jisas pao olama, gudulali. Tama te po obaso, Jisas te geba daiba holama, painu yali. 38 Tama te dwai haubo noma bidi dabego taga pali bidigo Jisasbolo po bomo elama mu hanalu wali, “Ena me nage dali paio,” wali. 39 Tiali goli, Jisasgo te bidi ma geliyu, te po wali, “Nage ma geasa pelama, Godigo nagebolo yali sę po naga pesageba pupusu biligi pao.” Tama te bidigo te be nanide bidibo we bidi tigidalibolo Jisasgo agade yali sę po pupusu bilama, siminani.

40 Jisas te sigi ąį me badu pedai bogo badu te moni gebadu ma nogebadi yaide, te we bidi tigidali augwaligo aga asobaso sulama, te augwa dwagi yai homu pemene yali. Magi baso meni. Augwaligo aga asobo tonaluai dao. 41 Tama Juda dabego bomo yai po ola mabo lotu be tonalubo genuai bidi tobolu bidi nogi Jairus sabolali. Aga Jisas sągą pageba degelagaselama, “Nage eno beba asaibawe?” olama, hanalu wali. 42 Aga wegi deli digi kibu be nogo si olama, sągągo si peda sigi soai te wegi isai sinabaso, te po wali. Jisas tų sisu pobadi yaide, genuai hani we bidigo aga mu beasa pali. 43 We me deli bididuai, te wego tigide kaneme pidubadi, kibu be nogo si olama, sągągo si peda sigi soali. Aga mone dabe tigidali aga tau somainu dokta bidi dabe abeliyu mone mani goli, augwaligo aga me tau sabo ąǫ ebe. 44 Te we bidi tomode te we Jisas tudi badu aselama, Jisas agai ugwa sabi badu dią yani. Te sogo naga tama agai tigidu kaneme duludali polo tama togwa salio.

45 Jisasgo te po hanalu wali, “Ena dego dią yaniwe?” Tigidaligo “Ena menio” ola silali. Tama Pitago te po wali, “Genuai Bidi, we bidi hauwago nage mu bealu, nage pogolobao.” 46 Tiali goli, Jisasgo te po wali, “Eno bomo dią si da obaso, eno koneanio, bidi mego ena dią yani homu ebao.” 47 Tama te wego agai yali sę Jisas agai aga sulama konebaso, te we didibili dali eyu, Jisas sągą pageba kidu sugunagasalio. Te we bidi tigidali gesabidide Jisasbolo Jisas aga tigi dią yani po pusali. Tialigo aga ma polo gesa pali po pusali. 48 Tama Jisasgo te webolo te po wali, “Eno wegi, naga enaba homu konealubo homu bealubogo nage te usu ilaliąo. Dwagi yai homu elasa pao,” wali.

49 Jisasgo te po odubadi yaide, genuai bidi Jairusgo bedu tolai po wagasobo bidi asali. Te po sesali bidi agai Jairusbolo te po weyu,” Nago wegi isai dao,” wali. “Te po ola mabo bidi aga asao po ma wagio,” wali. 50 Tiali goli Jisasgo te po odama, Jairusbolo te po wali, “Wi egio. Enaba naga homu beaduao. Nago wegi ma hodaluaibao,” wali. 51 Tama Jisas te beba sabolama, bidi me asa wabe. Tiali goli, Pita badi, Jems badi, Jon badi, te wegi aga ida de aya si badi elama naga Jisas dali te be tomoba pali. 52 Te isali wegi diliigi asai we bidi tigidali te wai hagede moni hobede elama, gela wali. Tama Jisasgo augwalibolo “Gela wagimio, e wegi isibe dao. Aga olo pila mubao,” te po wali. 53 Te wegi isai goli, Jisasgo mu isibe da obaso, augwaligo Jisas gisugu mani. 54 Tiali goli, Jisasgo nogogo te wegi nogo tulama, bomonama, “E wegi, nage hodaluao,” te wali. Aga noma ma bula sagasama, te sogo tama polo hodaluali. 55 Tama Jisasgo te wegi aga ida ayabolo “Tubo nai me te wegibolo mao,” wali. 56 Te wegi aga ida aya moni noma sali goli, Jisasgo “E tama tiali po gasa we bidibolo pusugio,” wali.