Elihugo te Jop me aga abagi dabe dali po miani
32
(Dąį 32-37)
Elihugo homugo tiali, agai me po wao homu yali
1 Tama megi da, Jop aga abagi selago suali, Jop agai dwai sę me yai menio olama, po bomo elama, aga doloba pai bidi dao olama, po bomo ebaso, augwaligo Jopgo po wei me ponobe. 2 Tiali goli, gesi bidi me deli augwali pagede bidama, augwaligo po wabo odaluali. Agai nogi Elihu, te Badakelgo wai. Elihu te Ram sibigo wai, tama te Ram te Bus hani. Tama Elihu agai wado po genuai mu Job dali wainu yali. Magi baso meni. Jopgo te po wali, Jop agai da, dwagi yai kolesaga ebo dao olama, Godigo ebo kolesaga da, dobo dao wali pode. 3 Tama agai Jop aga abagi sela dali me wado yali. Magi baso meni. Augwaligo Jopgo po wei bugagia ponabo usu isąbaso. Augwaligo po olo e tama wali, Jop agai dwai sę elama, dwai kolesaga dabe yai dao wali. 4 Elihu aga pedauwali pania selama, te monu dabego po omainu yai. Tama megi tama agai homude yali po Jop dali pusainu yali. 5 Aga sębę genuai mu yali. Magi baso meni. Agai suali, te bidi selago Jopgo po wei dolo ponisąma ebaso.
6 Megi da, Elihu, te Badakelgo wai, te Bus hanigo wai, agai e tama po wali,
“Ena gesi bidi, tama dage da polo monu dabe dao.
Tama tibaso, hasia da, ena wi elama,
tama ena hale eyu yaide,
eno homude yali po dagebolo pusabo yai goli,
tagalai dao.
7 Eno e tama homu yali.
Dagego kibu be hauwa mu da weyu,
tama dagego homude yali
dwagi yai po naga pusugowe weyu
tonaludali digi dao.
8-9 Tiali goli, bidi mego kibu be hauwa
elama, dwagi yai homu kolesaga
agai naga elalugobeo. Menio.
Tigidali Bomo Elalubo Godigo Mobo Bidi daba aselama,
da dwagi yai homu kolesaga dabe mabo dao.
Tama tibaso, polo monu dabego naga
te dwagi yai kolesaga dali,
dwai kolesaga dali si dagalogobeo.
10 Tama tibaso, eno me ena homude
elalubo po pusaibao.
Tama eno homugo dagego me odao,”
Elihugo te po wali.
11 “Eno odama, dagego po tigidali osola suali.
Dagego yaide dwagi yai homu kolesaga elalubo po
naga homugo gegeyu, bomai sę mu yali,
tama Jopbolo pusali.
Tama eno dagego pusubo poba olo sagana muyu
odaluali.
12 Tama eno suali, dage me deligo Jopgo po
dolo menio olama wabo sube.
Tama dagego agai po wei dolo ponobeo.
13 Tiali goli, dagego e tama wagio.
Te dwagi yai homu da,
God aga digi Jopgo po wei ponomainu
olama sula tagalao.
Bidigo da, usu egobeo. Te tama wagio.
14 Te bidi Jopgo ena dali po me mibeo. Menio.
Te dagebolo naga po wai dao.
Tiali goli, agai te po enabolo me wai tigi sogo da,
teda eno dagego wei ponani po tiwai
wei ponogi menio,” wali.
15 “Jop, suao. Naga abagi dedego
homu kolesaga dęą salio. Magi baso meni.
Nago augwali dolama, mu aiyaba mu elaluali.
Augwaligo pedauwali mu pania sali.
Tama augwaligo po meba ma wabo usu egobeo.
16 Suao, augwali olo mu dolalubo.
Eno homugo augwaligo po meba ma wabo ąǫ ebe.
Tama tibaso, eno tonaluabo ąǫ me ebeo.
17 Te eno homu kolesagade pusabo da.
Eno te eno po meba nage dali pusaibao.
18 Magi baso meni. Eno homude hauwa mu elalubo
nago po wei ponabo.
Tama eno homude me dąų wagobeo.
19 Po eno pusabo po yaide, eno haligade mu
pągąna palio,
te wain ąį te meme kibu waligo nigai botol da
pągąna pabo tiwai yalio.
Tama pąde te kibu meme wali pisila pelama,
te wain ąį gelabo tiwai tama yalio.
20 Teda mu tama mu dao. Eno pusaibao.
Tama eno tabi duanu bidimainu yaibao.
21 Tama eno mu po dolo naga eno homude yali
po pusaibao.
Eno bidi mego odama,
pusu elama wali pabo po pusogobeo.
22 Eno gasa bidi dabe ili po olama,
pedauwali wę ilama ebo menio.
Ma, tama eno te tobage kolesaga igi sogo da,
teda deli sogo tama te ena nigai
Godigo ena ela mugi dao,”
Elihugo te po wali.