1 Te Jehoiakim, te Josaiago king ogwa, te Juda king bidali sogo, Genuai Bidigo ena Jeremaiabolo te tiwai po wali, [2 Kin 23:36; 24:6; 2Sto 36:5-7] 2 “Nage pelama, te Rekap hani bidi sugi pelama, te augwali dali po minama, te augwali ena Genuai Bidi, eno be habu me deliba odasa asao. Tama nago te wain augwaliba menama, te augwaligo tumainogo yao,” te po wali. 3 Genuai Bidigo po obaso da, teda ena pelama, te Rekap hani me deli sugi pali, aga nogi te Jasania dao. Aga da, te gasa bidi Jeremaiago ogwa, te Habasiniago wąį nǫų. Te eno aga dali, aga ama dabe me, aga ogwa dabe me sobadi, te gasa Rekapgo hani bidi tigidali me selama, 4 tama eno augwali te Genuai Bidigo beba odasa pali. Tama eno augwali te Hanango hanigo be habuba odasa pali, te Ikdaliago ogwa dao. Hanan te Godigo po wali pabo bidi me deli bidai. Te be habu te Genuai Bidigo bede bidibo ofisa bidi dabego be habu pąde elaluali, te Maseago be habu ugwadu daide elaluali, te Salum ogwa. Masea te Genuai Bidigo bede te polalubo ofisa bidi me deli dao. 5 Tialima, eno te kap wain selama, te Rekapgo hani dabeba mani, tama eno te tiwai po augwaliba wali, “Tegoba, dage tuiąo,” te po wai.

6 Tialima, augwaligo po wei ponoyu, te tiwai po wali, “Hobede yao, dago te wain tugobeo. Magi baso meni, dago wąį nǫų Jonadap, te Rekapgo ogwa, agai bomo yai po me deli dabolo menama, tama dabolo dali te dago haniba habu selama, dago te wain ąį tugio wai dao. 7 Tama me agai te po weyu, dago te be me sę igio olama, te gi dabe bulugio wali, te dago wain gi dabe me bulugobeo. Menio. Sesemane sogo da te ugwa bede naga bidalueibao. Dago te po wali pobaso da, teda da polo me isigobeo. Menio. Te da bobobage sogo sesabi elama, te tǫde bidaibao. 8 Tama sesemane sogo dago te po tigidali wali paibao, dena wąį nǫų Jonadapgo dabolo mawai. Dago dali, te we wai dabego me, dago te wain tubo menio. 9 Tama dago te be me sę isąma, tama dago te wain gi dabe me, gasa gi dabe me, elalubeo. Menio. 10 Da te ugwa bede bidalu, tama tebo kolesagade dago te Jonadapgo dabolo mani po tigidali wali pabo dao. 11 Tiali goli, Nebukatnesar, Babilon kingo, te tǫ kantriba hwįagasali sogo, da te Kaldia me Siria ami dabede wi elama, tama dena po mia selama, te Jerusalemba bidagasaibao wali. Tialima, megi da te Jerusalemde bidibo dao,” te po wali.

12 Augwa po ola silibo si da, teda Genuai Bidigo Jeremaiabolo te tiwai po wai dao, 13 “Ena Israelgo God, Tigidali Bomo Elalubo Genuai Bidi, eno po obao, nage pelama, te Juda dabeba me Jerusalemba te tama po wagi pao. ‘Ena Genuai Bidi, eno dagebolo te eno po wali pabo kolesaga ola mawainogo ebo dao. 14 Polobadu Jonadap, te Rekapgo ogwago, aga hani dabeba te po weyu, augwaligo te wain tulamuo wali. Te megi tama me, te Rekap dabego te augwa wąį nǫųgo wali po bugagia wali pelama, tama augwa te wain me tubeo. Tiali goli, eno dageba hauwa sogo po madu geai, te dagego eno po me odobo menio. 15 Hauwa sogo eno sę bidi, te profet dabe, te dageba tagala palidu geai. Tama augwa te po wali, dage deli deligo te duga homu begelama, dwai kolesaga tagalama, te duga kolesaga dodolao. Te dagego tibo godiba tibo po ola mayu, te augwaliba lotu me wagimio. Dagego eno te po wali pobaso da, teda dage te eno duga wąį nǫų dabeba me dugaba me mani tǫde bugagia bidaibao. Te profet dabego te tobage po pusali, tiali goli, dagego eno po me odisąyu, te wali me pabeo. 16 Te Jonadap hani, te Rekapgo ogwa te bage, augwaligo te augwa wąįgo po bugagia wali pali. Tiali goli, dage we bidi dabego eno po wali me pabeo. 17 Tama tialima, ena Genuai Bidi, ena Tigidali Bomo Elalubo God, ena Israelgo God, eno te po obao. Dage Juda me Israel we bidigo, odao. Polobadu eno po dageba pusali, tiali goli dagego te poba olo me mubeo. Eno dage i wali, tiali goli dagego eno i wali wei me ponobeo. Tama tibaso, eno te dwai dene mabo sę tigidali dageba pedalumainogo ebao, eno te sę yaibao po wai dao,’ te po te Jerusalem bage dali te Juda bagebolo pusigi pao,” Genuai Bidigo Jeremaiabolo wali.

18 Tialima, nosali Jeremaiago te Rekap dabeba te tiwai po wali, “Tigidali Bomo Elalubo Genuai Bidi, te Israelgo God, agai te po wali, ‘Dagego te duga wąį Jonadapgo po odama, tama dagego agai po tigidali wali peyu, tama dagego te agai dagebolo yao po wali sę tigidali ebo dao. 19 Tama tialima, ena, Tigidali Bomo Elalubo Genuai Bidi, eno te po obao, sesemane sogo Jonadapgo hani, Rekapgo ogwade, te eno sę yabo bidi dabe augwali hanide elalueibao,’ Genuai Bidigo te po dagede wali,” Jeremaiago te po wai dao.