29
Genuai Bidi Jerusalemba wali dali, me tǫ mali, me isi dali asaibao
1 Genuai Bidigo e tama po wali.
“Jerusalem, megi da, nage eno
alta tiwai bidibao.
Tiali goli, nage dolaibao.
Nage te genuai hanu polobadu tuni bidi
Devit bidali madi, nage dolaibao.
Kibu be deli o si bolo pomainu yao,
te tigidali lotu po wabo genuai sogo me.
2 Tiali goli, ena Genuai Bidi,
eno te sęgę nageba sela asaibao.
Nage eno alta tiwai bidali.
Tiali goli, nage gela olama, hwą dwai mu waibao.
Tama kaneme nagede pągąna paibao,
te bidi dabego te alta saide te hasa dabe elama,
te kaneme alta saide pągąbo tiwai yaibao. * Te ves 1 me 2de, Hibru pogo te Jerusalem nogi Ariel wai. Te kolesaga konea pai bidi dabego te nogi page bugagiakonesiąwai. Me badugo te tiwai homu ebao, “Godigo Laion da,” wali. Te me badugo homu te tiwai ebao, “Godigo buludu da” wai. Tiali goli, me badu hauwago te homu yali, “Godigo alta da,” wali, tama te ves side wali pogo te e wabo homukolesaga wali paiba homu ebao.
3 Eno boi bidi dabe odasa aselama,
nage bagua sagasomainu yaibao.
Tama augwaligo pu diganama, nago obo pąde munama,
te tǫ unana pelama, te pągąwai,
te daide doligiluama,
tama augwali nage dali hwįabo yali gilama.
4 Tama nage mu tama tulaluama,
tama tǫgo nage mu mesega saibao.
Tama nago po dabe te isi bidigo po
te tǫ dologode dua dua wabo tiwai tǫdu pedalaibao.
5 Tiali goli, te gasa bidi dabe nageba
hwįagasobo bage da, augwali te tǫ hogomu tiwai
hauwa mu yaibao.
Tama augwali sese polo tama gasaba
paibao, te bidigo te wit haluama,
agai nai sainu ebode te yabe dabe hauwa
bola bilibo tiwai yaibao,” wali.
Tiali goli, deli sogo tama,
6 Tigidali Bomo Elalubo Genuai Bidi te bomai wali dali,
tǫ mali dali asaibao.
Tama te be kulu weyu, te genuai
kulukulu dwai mu waibao.
Tama agai te tigidali nai dabe ulabo isi
dwai dali sesaibao.
7 Tama te gasa genuai bulu dabe
te Jerusalemba hwįagasainu asali da,
te Godigo altaba, teda augwali munu me bidigobeo.
Tama augwaligo te hanu sainu yali sę
olo dali hagawaibao.
Te sę dabe sese sia saibao,
te Jerusalemgo nade suali tiwai yaibao.
8 Tama te tigidali bulu ami bidi dabe,
te bulu du Saionba hwįagasali bidi dabe,
augwaligo magi nai me sogobeo. Mu menio.
Te bidi pila muyu, nade nasi ebaso,
nai tubo tiwai yaibao.
Tama ma hodalobode da, nasi me elaluaibao.
Te nai tabi egobeo. Te tiwai yaibao.
Tama me bidi agai wę nogonego mu isai,
tama nade te wę ma tuali,
tiali goli, aga ma hodalobode te wę
nogone me elaluaibao.
Te tibo tiwai yaibao.
Godigo we bidi wabo polomainu homu begelali
9 Te Juda we bidi, me Jerusalem
we bidi, dage te gedu hwidai we bidi yali gilama,
me tama subigila paliyu, me tama bidiagameo.
Dage te bidi dabego wain wę tuyu, me bia wę tulama,
subigila bilibo tiwai me tama bidiagameo.
Tiali goli, dage te wain me bia tulama, polobeo. Menio.
10 Genuai Bidigo dagego gedu sęgę ilali.
Tama dage te bidi godege mu pilama, isai tiwai bidali.
Tama Genuai Bidigo te profet bidi dabego
augwaligo suabo nai dabe goli
augwaligo susiąmainu yaibao. [Ro 11:8]
11 Tama tibaso, Jerusalem, nago te Genuai Bidigonage ola mawainu ebo sę dabe page nago munu mekonegobeo. Te da, te buku augwaligo bomonama haluaibuku nage nedao olama, mawai buku tiwai dao. Tamanagebolo nedao po wali. Ma, nago te buku te nedebobidibolo menama, te bukude elalubo po nedao obaso da, teda agai te po waibao, “Eno usu ebeo. Buku me dąųolalubo.” 12 Tama ma, nago te buku nedisiąwai bidibolo nago te bukude elalubo po dabe nedao obaso da, teda agai te po waibao, “Eno te buku nedebo konebeo.”
13 Genuai Bidigo te po wali,
“Te we bidi hani dabe augwaligo
eno nogi augwaligo pedauwalidu
naga ugwaba sabo dao.
Tiali goli, augwaligo homu dali,
homu kolesaga si enade digibulu mu elalubao.
Augwaligo enaba mu lotu po wabo menio.
Augwaligo te bidigo digi muai bomai po,
te po naga augwali ola mani po,
augwaligo te po naga wali pabo dao.
[Mt 15:8-9; Mk 7:6-7]
14 Tama tibaso, eno gasa sę dabe mu
te we bidiba pedalumainu yaibao.
Tama augwali mu noma mu saibao.
Eno te bidi dabego augwalibolo
wiegi yai kolesaga mabo bidi dabego
homu kolesaga sela sąwaibao.
Tama eno augwaligo kolesaga sai
bagego kolesaga eno mu silaibao,” wali. [1 Ko 1:19]
Genuai Bidigo tigidali haniani nai dabe hasegelaibao
15 Te we bidi dabego augwa
dwai kolesaga dabe Genuai Bidigo
gedude dualainu usu sabo dao.
Te augwali da, mu dolaibao.
Augwaligo te kolesaga dabe augwaligo sesąwai madi,
me hulia sai pesagede augwaligo
te kolesaga dabe ebo dao.
Tama augwaligo te po wabo dao,
“Dego mu da sulama, dego mu koneaibawe?”
16 Augwaligo te tigidali nai dabe hasegelama,
tigidali nai dabe dolobo dao.
Te augwaligo wali po tiwai tama,
“Te tǫ sene nigibo bidi te sene nigibo tǫ tiwai dao.”
Mena tama tialiwe?
Te olo nai mego te aga nigali bidibolo
te tama po waibawe,
“Nago ena nigai menia?”
Ma, te tǫ senego te aga nigali bidibolo
te tama po waibawe,
“Nago mage nai me konebeo,” te po waibawe? [Ais 45:9]
17 Te pęwądage sogo tigidali nai dabe hasegelaibao.
Te Lebanonde moni busi te gi yabo tǫ
wiegi yai pedalaibao.
Tama wiegi yai gi dabe te moni busi mu gagawaibao.
18 Tama te sogo da, te olo degai dabego
te bidigo te bukude nedebo po augwaligo odaibao.
Tama te gedu hwidai dabe megi augwali
moni hulia sai madi bidibo,
te bidi dabe augwaligo ma gedu peda paibao, tama
nai dabe ma suaibao.
19 Tama te we bidi augwa digi augwa
aiyaba elalubo we bidi dabe
augwali te Genuai Bidiba wiegi yai homu yaibao.
Tama te nai habuge yai we bidi dabe
augwali me te Israel Dabego
te Dwagi Yai Doloba Pai Kolesaga Naga Ebo Godiba
wiegi yai homu yaibao.
20 Tiali goli, te gasa bidi dali
homu dene isąbo dwai bidi dabe,
me te Godigo po olo nai dao homu ebo bidi dabe,
me te dwai kolesaga hauwa yabo homu ebo
bidi dabe, augwali sese dolama, hagala silaibao.
21 Tama te deli tobage dene me te ili po olama,
gasa bidi dabe po tų ela mabo
bidi dabe me, dene saibao.
Te gasa bidi dabe olo dali po tų ela mabo
bidi dabe tiaibao.
Te dwai sęgę elalubo bidi dabe tau sela menama,
te sęgę meni yai bidi dabego po dolobo bidi dabe,
te dedeli dene naga saibao.
Te augwaligo po tų dolama,
tama doloba pai bidi dabego te po tų dolama,
tama doloba pai bidi dabego
te po tų ugwa ela hologobeo.
22 Tama tibaso, te Genuai Bidi te polobadu Abraham te dwai sogo ma oda sali, te Godigo te tama po walio, te Israel we bidi dagebolo,
“Dage Jekopgo we bidi wąį hani, dage hale me elama,
tama dage gesabidi huli me egobeo.
23 Te dagego eno sę dabe dagego
tomode te sę ebo subo si da,
teda dagego ena mu koneaibao.
Ena te Dwagi Yai Doloba Pai Sę Ebo
God dao homu koneaibao.
Tama dagego eno nogi ugwaba selama,
tama dage wi eyu, ena dologode naga bidaibao.
24 Tama te bidi dabe homu kolesaga
megi umuna pabo bidi dabe,
augwali te wiegi yai homu kolesaga ma saibao.
Tama te konila po dabe hauwa olama,
tama po sela sąbo bidi dabe,
augwali te wiegi yai homu elama,
eno po ola mabo odaibao,” te po wali.
*29:2: Te ves 1 me 2de, Hibru pogo te Jerusalem nogi Ariel wai. Te kolesaga konea pai bidi dabego te nogi page bugagiakonesiąwai. Me badugo te tiwai homu ebao, “Godigo Laion da,” wali. Te me badugo homu te tiwai ebao, “Godigo buludu da” wai. Tiali goli, me badu hauwago te homu yali, “Godigo alta da,” wali, tama te ves side wali pogo te e wabo homukolesaga wali paiba homu ebao.