23
Genuai Bidigo hanu Tair dolaibao
1 Genuai Bidigo te hanu Tairde pedalabo sę dabe po mani. [Ese 26:1-28:19; Jol 3:4-8; Amo 1:9-10; Sek 9:1-4; Mt 11:21-22; Lu 10:13-14]
Te genuai sip dabe, dage tamu węde
bilibo sip dabe, dage hobede elama,
gela waiąo. Magi baso meni.
Dagego bulu Tair sese tigidali polo dolai dao.
Tama tede be me dolalubeo, te bulude.
Me, te sip dabe tubo pesage tede dolai dao.
Nago te sę te ailan Saiprus tagalama,
ma asobode dagego koneaibao.
2 Te dage Tair bage, te tamu wę
sesegede bidibo Tair bidi dabe, dage,
me te hanu Saidonde bisnis
bidi dabe, dage hobede elama,
po wasiąyu, dua bidiąo.
Hanu Saidon, te sip dabego haniani dabe
hauwa mu nageba sela asai dao.
3 Tama nage te nai abeliyu,
te nai maketde muyu ebo genuai
nogi sabo bulu tiwai yai dao.
Te sip dabe te Isipba, te wę Nail elalubo badu pelama,
tama te wit nai dabe nageba sesai dao.
Tama nago te nai dabede bisnis sę elama,
te naide mone hauwa sai dao.
4 Hanu Saidon, nage hale yao. Magi baso meni.
Te bomai hanu te tamu ąįde elaluali hanu polo dolalio.
Tama te tamu ąįgo te po walio,
“Hobede mu dao.
Eno wai dabe ame nabe.
Tama ena te wego wai ame nainu dene isąwai ąǫ yalio.
Tama eno sawi ogwa wegi ame nisąwai
ąǫ elama, negisąwai ąǫ yalio,” wali.
5 Tama te Isip dabego te sę dabe
te hanu Tairde pedalali po odobosi da,
teda augwali wi mu elama,
augwaligo bomo mu sia saibao.
6 Dage te tamu wę sesegede bidibo
we bidi dabe, dage hobede elama,
gela olama, te Tarsis buluba poloba tama wi pao.
7 Magi nai mu te Tairde pedalaliwe?
Te polobadu bomai hanu mu,
te dage tigidali wiegi yai
homu elama gana pai madi dao.
Polobadu te hanude we bidi dabe meba
te gasa digibulu buluba taga palama,
te gasa gesi hanu geseligi pomainu yai dao.
Tiali goli, magi baso te hanu dolama elalubawe?
8 Dego pode mu te hanu Tair dolaliwe?
Te hanugo te gasa hanu dabe
tonalumainu sa muai hanu dao.
Tama agai bisnis bidi dabe
te genuai bidi mu tiwai bidama,
tama te tǫde we bidi dabego augwali
nogi ugwaba siyu,
genuai nogi mu mabo dao.
9 Te da te Tigidali Bomo Elalubo Genuai Bidigo pode
te bulu tama dolai dao.
Genuai Bidigo te tama tiali da. Magi baso meni.
Agai te bidi hani augwa bomo de
augwa genuai nogi dabe ugwa siyu,
me augwa homu gana peyu ebo
bidi dabego nogi aiyaba elalubo dao.
Tama me, agai te bidi dabe
genuai nogi yai bidi dabe me agai
aiyaba elalubo dao.
10 Dage te Tarsis badu bidibo we bidi,
dage duga homu duga haniani
sę dabe iyąo. Magi baso meni.
Te hanu Tair bidi dabego dagego
homu kolesaga tolalugobeo.
11 Genuai Bidigo nogo
te tamu wę daide balalubao,
te tamu wę sesegede elalubo bulu dabe dolainu.
Tama tibaso, te bulu we bidi dabe
augwali didibili dwai mu ebao.
Agai te Fonisia bulude bomai hanu dabe
dolainu po polo mawai dao.
12 Agai e tama po wali, “Sawi yai hanu Saidon,
nage wiegi yai homu me ma elama,
bidigobeo. Magi baso meni.
Nage dolama, mu dolama elaluaibao.
Tama tibaso, dage hanu Saidon we bidi, dage hogodama,
te ailan Saiprusba piąo.
Tama tiali goli, tede me dage bugagia
me bidigobeo,” wali.
13 Te Babilon dabego tǫ suiąo,
te bidi dabe me tede bidibeo. Magi baso meni.
Te Asiria dabego augwaligo bulu dolai dao.
Tama augwaligo bulu te bulu
hasa dabego bulu gagalai dao.
Te Asiria dabego te augwaligo hanu obo
bobegelama, sai ela pai dao.
Tama augwali te sai dabede dolaluyu,
tama augwali dali hwį yai dao.
Tama augwaligo te hanu dabego bomai
obo dabe hųgiai dao.
Tama te hanu dabe sese tama dolai dao.
14 Te genuai sip dabe, dage tamu węde
bilalubo sip dabe,
dage hobede elama, gela waiąo.
Magi baso meni. Dagego te bomai hanu polo dolai dao.
15 Tama te sę dabe pedalobo sogo da, te we bidi dabego te hanu Tair te kibu be 70 tama gegeda pelama, bidaibao. Te hanu Tair te penani sę ebo we te bidi dabego te we tagalama tęąbi wabo we tiwai bidaibao. Te tęąbi wabo po e tama edao,
16 O penani sę ebo we.
Augwaligo nage homu kone gegeda palalio.
Tama tibaso, nage gita selama, hanuba biligi pao.
Tama nago te tęąbi po wao.
Tama wiegi yai musik elao.
Tama te bidi dabego nage ma koneaibao.
17 Tama te 70 kibu be silibo si da, Genuai Bidigo te hanu Tair te we bidigo nai dabe abeliyu, nai maketde muyu ebo bulu ma emainu sula tagalaibao. Tama te hanu Tairgo te gasa tǫde bulu dabe sese aga dali bisnis sę yagasomainu kegaibao, te penani sę ebo wego agaba asomainu kegebo tiwai yaibao. 18 Tiali goli, te mone dabe agai sabo da, aga sabo sabogobeo. Menio. Te nai dabe te God Genuai Bidigo nai dabe tiwai pedalaibao. Tama te Genuai Bidigo we bidigo te hanu Tairgo sisinani nai dabe saibao. Tama augwaligo tuabo nai hauwa mu elaluaibao. Tama wiegi, wiegi yai gudubo ugwa me elaluaibao.