1 Te da olo mu bugagia bidimainogo eyu tama Krais agai te da dąų wali nai pisigina sąnama, tama megi da olo bidibao. Tama tibaso, augwaligo dage te bomo yai po dologoba ma muidali weyu, tama dage bomo elama, tama dąų wasiąbo olo bidibo bidi dabe bidiąo. 2 Odiąo. Ena da Pol da, tama eno dagebolo e sęgę yai po megi obao. Gasa bidi augwaligo dagebolo te po waidu gebao, “Te God agai dage dali ‘Dage dwagi yai doloba pai bage dao’ agai te po omainogo, duga tigiwali togwao,” augwaligo dagebolo te po mobo mabo dao. Tiali goli eno dagebolo e po obao, dage te usu da po weyu, tama duga tigiwali togoyu da, teda Krais agai dage tau somainogo yali sę te sęgo dage tau sogobeo. Agai dage tau sainogo ebo usu egobeo. 3 Te po tiwai me elalubo. Dage dolidali weyu, eno gasa dage tau sabo po waibao. Te dage tomode bidi me deli aga tigiwali togomainogo agai usu da weyu da, teda agai te gasa bomo yai po tigidali me wali pao, te bomo yai po deli naga wali pigio. 4 Tama dagego te bomo yai po wali pabo homu eyu da, tama dagego te bomo yai po wali pabode God agai dage doloba pai we bidi da te homu emainogo yali weyu da, teda dagego Krais tagalama, tama duga tali bobogasa pai. Tama dagego Krais agai dage olo tau sabo kolesaga tagalalio. Tama tiyu, dage te sęgę sai we bidi me bidaibao. 5 Tiali goli dago da te gasagi yai homu kolesaga tedali sabo dao. Tama dago e homu ebo dao: God agai Mobo Bidigo da tau siyu, tama dago homu Godide dąų wabo dao. Tama te tiwai elaluyu, dago aga tonaluyu, agai da doloba pai we bidi da omainogo bugagia bidibo dao. 6 Tama tiyu, dago koneani, te bidi aga Krais Jisasde wadoloyu da, teda aga tigiwali togobo sę te olo sę tama tiwai da, tama te tigiwali togisąwai bidi me, te me te olo sę tiwai da. Te sęde magigobeo, te olo sę tama dao. Tiali goli, te bidigo aga abagi dali te wiegi yai homu elama tama tau sabo, te bidigo Godide konealubo po dąų wabo homu kolesaga hodolobao, te agai kolesaga te usu mu elalubao.

7 Te polobadu dagego Kraisgo mu po wali peyu, te tųdu bugagia wali pai dao. Te mena bidigo te tų palibaso, dagego te po mu bugagia wali pabo tagalaliwe? 8 Te dagego megi te wali pabo homu kolesaga te po page God pagedu asobo menio. God agai dage i wali te mu po wali pomainogo yai.

9 Te eno te gasa bidi augwaligo dage dolobo sę, tede te po digi po begelama obao. Te bret bo dabo nai nogi yis, tama te nai yis dwasianunu selama, tama te ąį dali te plaua hauwa dali si taluama, tama te yisgo te plaua tigidali usu nama, bo dela silibo dao. Tama te tiwai augwaligo dage dali wabo dwai mobo mabo pogo dage tigidali mu dolaibao. [1 Ko 5:6] 10 Tiali goli, ena dage dali da tigidali te Genuai Bidi Kraisde wadolobaso, tama dagede eno e homu ebao, dagego eno homu wali pabo tagalama, gasa bidigo po wali pogobeo. Tama te dagego homu hodolobo bidi te agai nogi eno konebeo. Tialima, te bidigo dagede dwai sę ebaso, tama Godigo agabolo dene mawaibao.

11 Te tigiwali togwabo po wabo bidi augwaligo dagebolo te po wali, “Te bidi Pol me, agai te po wabo dao, ‘Bidi me Godigo agabolo te doloba pai bidi da omainogo, tama aga tigiwali togwao, aga te Godigo bomo yai po tigidali me wali asao,’ Polgo te po wabo dao,” augwaligo enade te po wali. Tiali goli te mu meni, eno te po wabo menio. Eno ama dedeo, eno te tobage po odubadi tigi sogo da, teda te Juda dabe augwaligo ena dali boi bidi eyu, ena elainogo homu me egi menio. Woo, eno te we bidibolo te Krais aga te ni pedaide isiyu dago sęgę sela sąyani po naga ola mabo dao. Tama eno te po naga ola mobaso, tama augwaligo hagela eyu, tama augwaligo ena dene mabo dao. Tialima, te eno te tigiwali togwao po me, te duga homu tigidali Kraisde muao po me, te po si taluama, tama te po si wagi sogo da, teda augwaligo ena dene dali sęgę dali magi menio. 12 Tama dage te tigiwali togwa po wabo bidi dabe augwaligo dagego wiegi yai homu elalubo te homu kolesaga augwaligo dolainogo eyu, te tigiwali togobo po wabo dao. Tama eno homugo te bidi dabe augwaligo augwa digi domo dįao!

13 Ama dede, polobadu God agai dage i wai dao, dage olo mu bugagia bidimainu yai. Tama dage megi olo mu bugagia bidiyu, tama bugagia suao. Te da te bomo yai po dologode bidisiąbaso, tama dago polo homu kolesaga wali peyu, tama dena tigigo kolesaga wali pinao, te homu egimio. Te menio. God agai da tau selama, tama da olo mu bugagia bidibaso, tama dage duga hasi dwagi yai homu eyu, duga abagi tau sao, te augwaligo olo sę ebo bidi tiwai bidao. 14 Tama bidigo te bomo yai po me deli bugagia wali pobaso da, teda agai gasa bomo yai po tigidali usu nagasaibao. Tama te bomo yai po me deli e dao: dagego duga hasi dali dwagi yai homu eyu godolo ebo homu yao, te duga digi naga godolo ebo homu tiwai yao. [Prs 19:18] 15 Tiali goli, dagego wado wado po weyu, tama gasa bidi aiyaba elaluyu, tama duga hasi tomode hwįbo po weyu da, teda dage dua dao. Tiyu dage tigidali hodobo hagabo dao, tama deli hani bidibo kolesaga dolaibao.

16 Te eno po e tama dao: dage te Godigo Mobo Bidigo ebo dwagi yai kolesagade bilao. Tama dagego tama tiyu da, teda dagego te dwai dwai tǫde kolesaga wali munu me pogobeo. 17 Tama te dago tigigo ebo dwai tǫde kolesaga te Godigo Mobo Bidigo ebo dwagi yai kolesaga tiwai menio. Te gasagi yai dao, tedali dao. Tama augwali sigo augwa hasi hwįyu, tama augwali si konila eyu, mego kolesagago me kolesaga te aiyaba elaluainogo eyu, te kolesaga augwa si boi bidi tiwai ebo dao. Tama te Godigo Mobo Bidigo ebo kolesaga dali, te dago tigigo tǫde ebo dwai kolesaga dali, te kolesaga si augwali dagego homude hwįbaso, tama dagego te yainogo yali te sę egobeo. [Ro 7:15-23] 18 Tama te Godigo Mobo Bidigo dagebolo ola mabo tų te tų dagego wali pidu da, teda dage te Juda dabego bomo yai po dologode bidigobeo.

19 Te bidigo tigigo tǫde ebo dwai dwai kolesaga te hania elalubo, te dago subo dao. Tama te tobage kolesaga nogi eno nedada paibao, e dao: te penani ebo sę me, te dwai meda yai kolesaga me, te homu hodolobo kolesaga hania ebo me, 20 te Godigo nogi aba munama tama gasa naigo nogi ugwaba sabo kolesaga me, te animani sabo dwai pobi wabo kolesaga me, tama boi bidi ebo kolesaga me, te wado po wabo me, te dwai homu eyu, te konila po wabo kolesaga me, te mena nai gedugo sulama godolo eyu sabo kolesaga me, te sębę ebo kolesaga me, te nai yogo ebo homu me, te bidi hani si pedebo kolesaga me, 21 te gasa bidigo naide dwai homu ebo kolesaga me, te bomo yai ąį tulama polobo bidi tiwai ebo kolesaga me, te dwai dwai penani sę ebo kolesaga me, tama te tobage haniani kolesaga ebo dao. Tama eno polobadu dagebolo wali po megi ma obao, te tobage kolesaga ebo bidi aga te Godigo we bidi tonalubo bomo dologoba munu me pisiąbaso aga tede wiegi yai homu egobeo.

22 Tiali goli Godigo Mobo Bidigo te bidigo homude hodolobo dwagi yai kolesaga e dao: te we bidide dwagi yai homu eyu, godolo mu ebo kolesaga me, te dwagi yai homu ebo kolesaga me, te homu nagame ebo kolesaga me, te wei polo ponosiąbo kolesaga me, te we bidi tigidali tau sabo kolesaga me, te doloba pelama bilibo kolesaga me, te homu kęą pabo kolesaga me, 23 te imilai bidigo ebo homu kolesaga me, te dago homu kolesaga bugagia tonalubo kolesaga me, te tobage kolesaga tigidali te Godigo Mobo Bidi agai dago homude hodolobo dao. Tama te tobage dwagi yai kolesagade te bomo yai po me deligo habu selebeo. 24 Tama Krais Jisasde wadolali we bidi augwaligo augwa tigigo tǫde ebo dwai kolesaga ela silai dao, te ni pedaide elali gilama tiwai. Tama te dwai kolesagago hodolobo sę, te gedugo mena nai sulama sainogo ebo homu kolesaga te me, te Kraisgo we bidi augwaligo te kolesaga tagala silai dao.

25 Te Godigo Mobo Bidi agai da bidibo ula menama, tama da me te Mobo Bidi bilibo kolesaga tiwaide pepela walinao. 26 Tama tiyu, dago dena digi dena nogi ugwaba siyu, tama dago dena ama homu hodolobo po weyu aga sębę yabo po wagio, tama tiyu dago homugo augwaligo nai sabo homu elamo dao.