103
Godigo da godolo mu yai
1 Eno Genuai Bidigo nogi ugwaba saibao.
Ao, eno tigi me homu kolesaga tomode
elalubo nai tigidaligo
Genuai Bidigo dwagi yai nogi ugwaba sainogo ebo dao.
2 Eno Genuai Bidigo nogi ugwaba siyu,
tama agai dwagi yai sę ena dali ebo
te eno homugo tagalogobeo.
3 Agai eno dwai sę ebo tigidali sela sąwai,
tama eno gasi ebo tigidali usu yai.
4 Genuai Bidigo ena ma sai, tama ena isibeo.
Agai olo ena tau sabo dwagi yai homu eyu,
ena hobede mu ebo dao.
5 Tigidali sogo ena tǫde bidibo Genuai Bidi agai
dwagi yai nai ena mabo usu mu ebo dao.
Agai tama tiyu, ena gesi ma pedaliyu,
tama te ba kemodagego bomo tiwai
elalubo ena bidibao.
6 Genuai Bidigo dwagi yai sę we bidi
augwali gasa dwai bidi dabego
dwai sę dologode bidibadi tau sabo dao.
Tama agai augwali ma hodolama,
augwali bugagia bidibo dao.
7 Polobadu Moses dali agai yabo te sę po wai.
Tama agai Israel we bidigo
te agai bomo yai sę ebo sumainu yai.
8 Genuai Bidi agai dwagi yai homu eyu,
da hobede mu elama, olo tau sabo dao. [Je 5:11]
Agai sębę polo isąma, tama agai
da sesemane godolo mu ebo dao.
9 Agai da dali odolali olo wado po me wabo menio.
Tama agai sębę ebo hauwa sogo elalubo menio.
10 Dago dwai sę ebode da dene sabo digi,
agai te dago yali dwai sę usu nama
dene dabolo mabo menio.
Dago dwai kolesaga hauwa yai,
tama agai genuai sęgę dabolo
wei begelaibao homu yai,
tialima agai te sę ebo menio.
11 Aga dali wi ebo we bidi,
agai augwali godolo mu ebo dao.
Agai genuai godolo ebo homu augwali dali ebao,
te dagadu digibulu ugwaba mu
elaluyu, tǫ aiyadu mu elalubo tiwai dao.
12 Giliga pedalobo dali,
te giliga iba dega sigi pabo dali,
te si pąde elalubo menio.
Te digibulu mu elalubao.
Te tiwai Godigo dago dwai sę ebo
aga digibulu bidiyu, te dwai sę sela sąbo dao.
13 Ayago aga wai dabe hobede ebo dao.
Tiwai Genuai Bidigo aga dali wi ebo
we bidi augwali hobede ebo dao.
14 Agai koneai, agai da tǫ selama nigai,
tama agai homugo da te tǫ hogomu ebo tiwai dao
homu ebao.
15 Da we bidi bidibo ula pęwadage mu, te nosa tiwai.
Da pęwadage sogo bidilama,
da te plaua nosa du walama, isibo tiwai yaibao.
16 Wali asu, te plaua memenege elama, tulalubo dao,
tama bidi dabego te plaua elalubo ma subeo.
17 Tialima, Genuai Bidi agai nogi
ugwaba sabo we bidi augwali
sesemane bidada pabo sogo agai godolo mu ebo dao.
Tama aga te dwagi yai aga wąį
dabe augwali nosali pedalobo te dwagi yai yaibao.
18 Tama augwaligo Genuai Bidigo
dąų olama muani po wali peyu,
tama augwaligo agai te bomo yai po
tigidali wali pai pobaso da,
agai augwali dwagi yai we bidi nogi nogi yaibao.
19 Genuai Bidi dagalude tuni bidi bidiyu,
tama aga tigidali nai tonalubo bidi dao.
20 Dage tigidali Genuai Bidigo ensel mobo bidi,
dagego genuai bomo elalubao.
Dagego agai po wali pabo bage,
dagego olo agai po wabo digi bugagia mubo dao.
Tialima, dagego Genuai Bidi nogi ugwaba sao.
21 Dage Genuai Bidigo sę bidi, dage dagalude bidiyu,
agai homu wali pabo bage,
dagego agai nogi ugwaba sao.
22 Dagego koneao, tigidali nai Genuai Bidigo nigai,
tama tigidali tǫde elalubo,
tama aga dagego tuni bidi bidibao,
dagego Genuai Bidigo nogi ugwaba sao.
Tama eno me agai nogi ugwaba saibao.