(19) 1 Nago te dwai kolesaga ebo bidi dabego ebo dwai kolesaga wei homu me elamuo. Tama nago augwali dali kisa sabo homu me elamu dao. 2 Augwaligo te bidi dolabo homu naga elama, tama augwaligo te sesemane sogo po miyu, te dwai sę pedalubo kolesaga ebo dao.

(20) 3 Te wiegi yai kolesaga koneani homu elalubo bidigo aga be te wiegi yai elaluyu, tama aga we wai te boma pai pedelaibao. 4 Te tobage bidigo te wiegi yai gasa bomai nai dabe te abelama, tama aga beba muaibao.

(21) 5 Te wiegi yai kolesaga koneani homu elalubo bidigo, tama agai te aga bulu tǫ pedai me te bomo yai pedalumainu ebo dao. 6 Te kingo gasa bulu tǫ pedai bage dali hwįainogo eyu da, teda hasia bolo te hwįbo kolesaga koneani bidi dabede te homu kolesaga konea saibao. Te king agabolo homu kolesaga mabo bidi hauwa elaluyu da, teda agai te hwįbode ugwaba ela holaibao.

(22) 7 Te wiegi yai homu kolesaga koneani te ugwanu mu elaluyu, tama te wiegi yai homu kolesaga konesiąwani bidigo kolesaga te aiyaba elaluaibao. Tama te bidi dabe dugulama, te genuai naide po mibo konila obaso da, teda te wiegi yai homu kolesaga konesiąwani bidi da, te olo dugulalu, tama pedauwali panialubo dao.

(23) 8 Te bidigo te sesemane sogo dwai kolesaga yabo homu ebo bidi yai baso da, teda augwaligo aga te tibo kolesaga ebo bidi nogi poaibao. 9 Te wiegi yai homu kolesaga meni yani bidi dabe, augwaligo te dolo isiąbo tobage kolesaga dabe yabo homu elama, tama te kolesaga tigidali te dwai sę ebo kolesaga ebao. Te bidi dabego te hagoma ebo bidi dabe subo, te dwai bidi mu subo tiwai ebo dao.

(24) 10 Te dwai sogogo nage gegelama, tama nago tigi dili te kimi isilibaso da, teda nago bomo te mu meni ebao.

(25) 11 Te po tųde te po olama, tama augwaligo te bidi ela muainu ebaso da, teda nage pelama, te bidi ma sigi pao. 12 Tiyu, nago te po weyu, “Dago sę menio,” po wabuo. Genuai Bidigo te nage bugagia tonaluyu, tama nago ebo homu kolesaga tigidali te dagalubao. Tama agai nago te po page koneai. Tama agai te tigidali bidi deli deligo ebo kolesaga te augwa yali sęde wei usu nama ponobo dao.

(26) 13 Eno waio, nago te bunu ge hani tuao, te wiegi yai nai tama te nago pedauwalide pusu mu yaibao. 14 Tama eno homugo nago te konemainu yai, te wiegi yai homu konebo kolesaga me te wiegi yai eyu, tama pusu mu yaibao. Te nago sobaso da, teda nago wiegi yai sogo nosali gegaibao, tama nage polo tama me isigobeo.

(27) 15 Nage dwai bidi, nage geme duala selama, tama te doloba pai bidigo bede tonalugio, te agai be aluama, tama agai doado bage dabe sainogo te tiwai me elamu dao. 16 Te doloba pai bidi hauwa sogo tulalubadi digi tagala, te sesemane sogo aga ma hodaluaibao. Tiali digi, te dwai sogogo te dwai kolesaga ebo bidi dabe gegebaso da, teda augwali mu dolobo dao.

(28) 17 Te nago boi bidi te dwai sęgo dolobo subo sogode, te nago homu wiegi yai pemene igio. Tama agai te nai me deli sągąde enama, te tulaluainu ebaso da, teda nago gisugu me olamu dao. 18 Tiyu, nago wiegi yai homu pemene ebo Genuai Bidigo sulama, te agai nageba dwai haliga eyu, tama agai te boi bidi dali wado po ma wagobeo.

(29) 19 Nago te dwai kolesaga ebo bidigo kolesaga te nago homu si me elamuo. Tiyu, naga homu kolesaga dolabuo. Tama nago augwaligo ebo kolesaga me te homu godolo me elamuo. 20 Magi baso meni, te bidi dabe augwali te wiegi yai sogo bidibo gegebo usu me egobeo. Menio. Te augwali te lam sole isibo tiwai gilama yaibao.

(30) 21 Eno waio, nage te Genuai Bidide wi eyu, aga dologode me bidiyu, te kingde wi eyu, aga dologode me bidao. Nage te Genuai Bidide me kingde te hagoma ebo we bidi augwalide digibulu bidao. 22 Te tama tebo tobage we bidi te dolobo sęgo polo tama gegaibao. Te Genuai Bidigo me kingo te mena tiwai sęgę augwaliba maiabo, te dago me konebeo.

23 Te wiegi yai homu kolesaga elalubo bidi dabego me te po pusali.

Te bidi dabe te po tųba asobo sogo, te jasgo te meba tau siyu, meba aiyaba elalubo, te dolo me ebeo. 24 Te bidi me deligo dwai sę ebaso, augwaligo aga po tų ilali, tiali goli te jasgo aga odolali pomainu tagala palobaso da, teda te tigidali bulu tǫ pedaide bidalubo we bidigo te jas bidi wei homu me isiąma, tama augwaligo agaba te i ola mabo po waibao. 25 Tiali digi, te jasgo augwaliba te po weyu, te dwai sę ebo bidiba te dene mayąo po obaso da, teda te jas bugagia bidiyu, tama God Genuai Bidigo aga dali haniani dwagi yai sę yaibao.

26 Te bidigo doloba pai po nageba wei ponobaso da, aga te nago abagi mu dao.

27 Hasia bolo nago te naga tǫ dodolama, tama te gi dabe bulao, tama nosali nago te be sę ebaso, te usu dao.

28 Te nage te po tų ebode te witnes bidi pedalubaso da, nago tibo po me olama, tama te magi dwai sę me isąwani bidigo nogi aiyaba odolali me aiyaba elalugio. 29 Nago te tiwai po weyu, “Megi da, eno te agai dwai sę yali wei ponaibao,” po wagio. “Te eno agai ena dali te yali tobage sę tiwai kolesaga te aga dali yaibao,” po me olamu dao.

30 Eno biliyu, tama eno te bidi me deligo gi suali. Te bidigo homu te wiegi yai elalusiąwai, te hagela bidi dao. 31 Te sesane yai bonogo, me te dwai dosago te gi mesega sai elaluai. Tama te gi bagulali masigi obo te degasa pai yalio. 32 Eno te gi sulama, tama eno homu hauwa elama, tama eno te wiegi yai kolesaga me salio. 33 Te hagela bidi dabego te po wai, “Tagalao, da godege manu gana piaibao,” wali. “Da te dwasianu sogo naga toma nenama, tama da hodaluaibao,” wali. 34 Augwaligo te tama tiyu, tama polo tama augwa doado bage tigidali te sia siyu, tama augwali te dwai mu te magi doado bage meni yai bidi pedelaibao. Awe, te nai wi sabo bidi dabego te augwaligo doado bage tigidali sela pai tiwai ąǫ ebo dao. [Bid 6:10-11]