1 Te Ruben hani, me Gat hani augwaligo kau kibu dali sipsip dali hauwa mu bidali. Tama augwaligo te distrik Jaser, me Gileat tǫde te kau kibu dabego tubo nosai dabe wiegi yai mu elalubo suali. 2 Tama tibaso, augwali te Moses, me Eleasar, me te we bidi dabego tobolu bidi dabe pageba pelama, augwalibolo te po wagi pali, 3-4 “Te Genuai Bidigo da Israel dabego tǫ somainu tau sali da, teda wiegi yai mu dao. Tama te tǫ te hanu Atarot, me Dibon, me Jaser, me Nimra, me Hesbon, me Eleale, me Sipma, me Nebo, me Beon elalubo pesage da. Tama te bulu dabede te kaugo nosai dabe wiegi yai mu elalubao, tama dago kau kibu hauwa mu bidibao. 5 Tama tialima, dago homugo dagego te tǫ dage dabolo me mao homu ebao. Dago homugo dagego da te wę Jordan nogelama, u badu bidigi pomainu ebo tagalao,” wali.

6 Tama Mosesgo te Gat hani, me te Ruben hani dali po bomona weyu, te po wali, “Magi baso dage ede bidiyu, duga Israel hani meba naga boi hwįgi pomainu ebawe? 7 Dagego te meba Israel dabego homu kolesaga dolainu ebawe? Dagego homugo Genuai Bidigo augwalibolo mani te buluba Jordan wę nogelama pabo tagalamaina homu ebawe? Magi baso dagego te tama tiainu ebawe? 8 Polobadu duga aya dabego tama tiai dao, te da te bulu Kades Barneade bidali sogo, tama eno augwali te tǫ sugi pomainu tagala palali sogo. 9 Augwali te malu bulu Eskolba naga pelama, te bulu sugi pali. Tiali goli, augwali ma aselama, augwaligo te augwa abagi Israel dabe wi ilama, tama augwali te Genuai Bidigo augwalibolo mani tǫ tomoba pabeo. [Nam 13:17-33] 10 Tama tialima, te sogo polobadu Genuai Bidi aga sębę elama, bomai po te tama wali, 11 ‘Te bidi dabe te kibu be 20 elama, me te kibu be 20 edelai bidi dabe te Isip tagalama te asali da. Augwaligo homu dąų olama, tama augwaligo ena wali me asobeo. Tama tialima, mu tama, augwali me deli te eno te Abraham, me Aisak, me Jekopbolo mu mawaibao wali te buluba augwali me pogobeo. 12 Te e bidi si naga paibao, te Kalep, te Jefunego ogwa te Kenas hani, me Josua, te Nungo ogwa, augwali si naga paibao. Magi baso meni. Augwali sigo homugo ena kęą pelama, ena Genuai Bidi wali asalio,’ walio. 13 Tama Genuai Bidigo te we bidi dali wado elama, te we bidi te nai meni yai bulude kibu be bidi sese si tede bidimainu yai dao. Te bidi dabe aga sębę ilali, te bidi dabe isila pomainu yai dao,” wali. [Nam 14:26-35]

14 “Tama megi dage duga aya dede hasegelama, tama dage sęgę sai bidi dabe pedalobawe? Tama dagego Genuai Bidi sębę dwai mu emainu elama, tama agai da Israel dabe elemainu ebawe? 15 Te dage Ruben hani, me Gat hani, dagego Genuai Bidi wali megi pabeo. Tama agai da Israel dabe tudi ola mawaibao, tama da olo te nai meni yai bulude ma deli bilimainu elama, tama da sese tama ede dolaibao. Tama te sę pedalobaso da, teda te duga dagede yaibao,” Mosesgo te po wali.

16 Augwaligo te po odama, tama augwali Moses pąba pelama, te po wali, “Odao. Te nago da te sipsip obo me te hanu te masigi obo bolo ebo sula tagalaibawe? Tama dago we wai bugagia bidaibao. 17 Dago te sę elama da, nosali da hogodama, pelama, dena abagi dabe dali talua sigi pelama, tama te boi bidi dabe aiyaba elaluama, tama dago abagi dabe sela pelama, augwali duagi painogo ebo te buluba tagaligi paibao. Tialima, da te obo bolo elama, te boi hwįgi pali da, teda da hani we bidi te bomai hanude bidiyu, tama te bulu we bidigo augwali me dologobeo. 18 Te da meba Israel hani deli deligo augwa sabo tǫ bolo me siyu bolo emainao. Tama nosali da dena buluba ma asaibao. 19 Dago te wę Jordan u badu dago tǫ me sogobeo. Magi baso meni, dago te Jordan wę giliga asobo badu dago sabo tǫ polo sai dao,” te po wai.

20 Tama Mosesgo augwalibolo po wei ponoyu, te po wali, “Te dagego po mu oba wida, teda dagego duga ami bidi dabe dodolama, tama Genuai Bidigo gedude dage boi hwįgi pao. 21 Dagego ami bidi dabe sese Genuai Bidi dologode elaluyu, tama te Jordan wę nogelama, tama dago boi bidi dabe dali hwįgi pelama, Genuai Bidigo augwali aiyaba elaluboba usu nama, 22 tama augwaligo tǫ saibao. Te tama tilama, nosali dage ma asagameo. Magi baso meni. Dagego Genuai Bidigo dage mani sę silama, me dagego duga abagi dabe polo tau sela silali dao. Tama tibaso da, Genuai Bidigo dagego te Jordan wę giliga asobo badu elalubo tǫ sobaso, te usu dao po waibao,” wali.

23 “Megi eno po bomona dage dali te obao, dagego duga dąų wali po wali pisiąbaso da, teda dagego Genuai Bidi dali sęgę saibao. Tama dagego te tama koneao, Genuai Bidigo dagego dwai sęgę kone palama, tama dage ela silaibao. 24 Te usu dao, dagego hanu dabe geseliyu, me sipsip obo dabe bolo eyu yao. Tama nosali dage hwįgi piąo, duga po polo yaibao wali gilama,” Mosesgo te po wai.

25 Tama te Gat hani de Ruben hani sigo Mosesbolo te po wali, “Genuai bidi, da naga sę bidi dabe dago nago po wali paibao. 26 Tama te we wai, me kau kibu, me sipsip kibu dabe te Gileat dabego hanude bidaibao. 27 Tiali goli, da bidi dabe dena hwįbo nai dabe dodolama, tama te Genuai Bidigo da tonalumainu usu elama, tama hwįgi paibao. Da te Jordan wę nogelama, tama te boi bidi dabe dali hwįgi paibao, te nago wali yali gilama,” te po wali.

28 Tama tialima, Mosesgo po meba te pris bidi Eleasar, me Josua aga aya nogi Nun, me te Israel dabe tobolu bidi dabebolo mani. 29 Mosesgo te po wali, “Te Gat hani bidi, me Ruben hani bidi dabe, augwaligo Genuai Bidigo po wali pelama, tama dage dali Jordan wę nogelama, tama boi bidi dabe dali hwįgi peyu da, teda usu dao, wiegi yai dao. Tama dagego te boi bidi dabe aiyaba elaluama, te bulu sobaso da, teda dagego te Gileat tǫ pedai me te bage augwalibolo menama, tama augwali tigidali sogo tede bidimainao. 30 Tiali goli, augwali te Jordan wę nogelama, dage dali hwįgi pisąma ebaso da, teda augwaligo tǫ Kenan bulude tǫ somainao, dage yali gilama.” Mosesgo te genuai bidi dabebolo te po wai.

31 Tama Gat hani de Ruben hani sigo po wei ponoyu, te po wali, “Te usu dao, dago te Genuai Bidigo wali po wali pelama, tama tiaibao. 32 Genuai Bidigo da tonalubadi, te wę Jordan nogelama, tama Kenan buluba boi hwįgi paibao. Tama nosali da te Jordan ąį giliga asobo bulu tǫde tede bidaibao, te wę e badu,” wali. [Jos 1:12-15]

33 Tama tialima, Mosesgo te Sihongo tǫ sese magi yali, te Amor tuni bidigo tǫ, me te Basan tuni bidi Okgo tǫ me magi yali, te hanu dabe me tǫ dabe tama magi yali, me pąde elalua pabo bulu me. Tama agai te tǫ te Gat hani, me Ruben hani, me te Manase hani bugai, tama bage augwalibolo mani. 34 Tama te Gat hani we bidigo te polobadu bomai obo elaluali te sipsip tomoba muabo obo dabe ma dodolali. Augwaligo hanu Dibon, me Atarot, me Aroer, 35 me Atrot Sofan, me Jaser, me Jokbeha, 36 me Betnimra, me Betharan ma geselali. 37 Tama te Ruben hani we bidigo te hanu Hesbon, me Eleale, me Kiriataim, 38 me Nebo, me Balmeon, tama hanu ma geselali. Augwaligo hanu Balmeon nogi ma hasegelali, tama gasa nogi me polali. Tama augwaligo hanu Sipma ma geselali. Tama augwaligo te geselali hanu dabe gesi nogi dabe ma poali.

39 Tama te Manasego ogwa Makirgo aga hani kegasa pelama, te Gileat tǫba pelama, te Amor dabe dali hwįnama, augwali sela sąnama, tama augwaligo tǫ sali. 40 Tama tialima, Mosesgo te Gileat tǫ te Makirgo hanibolo mani, tama te hani we bidi augwali te tǫ selama, bidali. 41 Tama bidi me nogi Jair, te Manase hani bidi, aga hani selama, tama gasa bulu mebaba pelama, hwįgi pali, tama te bulu selama, tama te bulu nogi te tama poali, “Te Jairgo Bulu Dabe Dao,” po wali. 42 Tama bidi me nogi Noba, aga hani kegasa pelama, tama te hanu Kenat me te Kenat sesegede elalubo buluba hwįgi pelama, te bulu sali. Tama te bulu nogi te hanu Noba polali, te aga nogi tiwai polali.