1 Te Genuai Bidigo Mosesbolo te tiwai po wai, 2 “Te mena bidide oiyabe gasi elalubaso, te sę yabo bomai po e dao. Te aga gasi silama, te aga eno gedude wiegi yai pedelainogo ebaso da, teda augwaligo te prisba tede po wagi pao. [Mt 8:4; Mk 1:44, Lu 5:14; 17:14] 3 Tialima, pris te we bidi bidibo pesage tagalama, buluba solama, te oiyabe gasi sai bidi tedali bidibo madiba peyu, tama te aga tigi bugagia osola suao. Te oiyabe gasi mu silai baso da, 4 teda prisgo augwalibolo olama, te eno gedude wiegi yai ba si bidibadi sesao,” wali, “te ni sida dwasianu dage sobadi, te mama yai dila pai hobi me sesao, te ni hisop nologo me selasa asao,” wai dao. 5 “Te prisgo augwaliba walama, te tǫgo nigai sospen selama, te dwasianu wę asobo madi te ąį tulama sesao. Tialima, nosali augwaligo te ba si wali bago me deli selama, te tǫgo nigai sospen ugwadu tolaluama, te ela munama, te kaneme sospen seneba dulaibao. 6 Te prisgo gasa ba me ni sida dage, te mama yai hobi string me, ni hisop me, te selama, te kaneme yai ąįba munama, te ugwaba polo ma sao. 7 Tama elama, agai te kaneme dwasianu te nogo a naga olama, te me badu nogo si wagi soabode te eno gedude dwagi yai pedelabo bidi tigiba sąsągą bilao. Tama prisgo agabolo te tiwai po walao, ‘Megi da nage God gedude wiegi yai pedelalio.’ Tama prisgo te bidibo ba selama, te buluba solama, te aga bola pomainogo yaibao. 8 Te bidi aga wiegi yai pedelainogo eyu da, te aga ugwa ąį tedelama, te tobolu nisi togolama, te aga tigi me te aga ąį pauwao. Agai tama tibaso da, teda aga eno gedude wiegi yai pedelaibao. Tama aga te bidibo pesageba pagameo, tiali goli aga ugwa bede bulu, badu bidibadi a naga me si sogo usu nama te usu dao. 9 Te nogo a naga si wabo side te aga tobolu nisi me penani nisi tigidali ma togwao, te gedu nisi me, te aga tigide gasa tigi nisi elalubo tigidali mu poayao. Te aga ugwa me ąį telayu, te aga me ąį pauwao, teda aga eno gedude wiegi yai magi meda meni yai pedelaibao,” wali.

10 “Te 8 wabo side agai te sipsip omai wai si selama, te sipsip kibu so me deli kibu be deli yai sobadi yao. Augwali te dwai keni kenigo me dolisąwai wiegi yai mu sao. Tama agai te plaua sęgę kilogram sela yali wiegi yai sao, agai te oliv wel dali taluali, te wit ofa ulubo ofa tiwai eyu, te oliv kap wel si me sao,” wali. 11 “Tama agai te kibu sipsip dabe te plaua nai me eno sel Ugwa Beba sela pao, te pris me deligo aga wiegi yai pedalumainogo tau saibao. Tialima, prisgo te bidi te aga ofa yabo nai dabe dali te ena Genuai Bidi eno sel Ugwa Be sunumiba selasa pao,” wai dao. 12 “Megi da prisgo te sipsip sigo te me deli selama, agai te oliv wel dali te dwai są yali isilibo ofa tiwai yao. Hasia bolo agai te nai dabe nogogo tulama, te eno gedude hogayu, iba eda yao,” po wai. 13 “Tama nosali prisgo te sipsip wai te pesagede elao, augwaligo te sęgę sela sąyu, te bulmakau dabe elama, ofa ebo pesage, te isigo tigidali dela silimainu ofa ebo digi dao. Prisgo tama tiao, magi baso meni, te dwai sę silimainu ebo ofa tiwai te sęgę sela sąbo ofa tiwai ebao. Te ena dolo mu ebo sę ena God, eno te sipsip mi te pris dabebolo mawai dao. 14 Nosali prisgo te sipsipgo kaneme dwasianu selama, te meda sela sąnama, wiegi yai pedelainu ebo bidigo dolo nogo olo badu muao, te dolo nogo a danide me mubadi, te bidigo dolo sągą a danide me muao,” wali. 15 “Tama prisgo te oliv wel dwasianu selama, te aga pobase nogoba gelama, te wel nogo diąyao. 16 Tama agai dolo nogo dani me deli te welba munama, te wel a naga si sogo sąsągą bilibaso da, te ena Genuai Bidi, eno aga sueibao. 17 Nosali prisgo te aga nogode elaluali dwasianu wel selama, te wiegi yai pedalumainu ebo bidigo dolo nogo badu oloba muao, te genuai a nogo danide elalubo kanemeba me muyu, te bidigo a sągą danide elalubo me mubadi yao. 18 Te wel me badu prisgo nogode elalubo agai te bidi toboluba muao. Te tebo kolesagade agai te bidi eno gedude wiegi yai pedalubo sę ilibo dao,” wali.

19 “Te silama da, teda prisgo te sęgę sela sąbo ofa ebaso da, te bidi eno gedude wiegi yai mu pedelaibao. Te nosali agai te isigo tigidali mu dela silibo ofa yao,” te po wai dao. 20 “Tama agai te ofa ebo kibu dali te wit ulubo ofa dali te altade yao. Te kolesagade prisgo te bidi sęgę sela sąbo ofa ebao, tama te bidi eno gedude meda meniama, wiegi yai mu pedelai dao,” te po wai dao.

21 “Te bidi magi nai mu meniama, te aga wiegi yai pedelabo ofa yabo nai dabe abelabo mone meni baso da, teda agai te omai sipsip wai deli naga sesao. Te kibu sipsipgo te aga dwai sę yali silimainu yaibao. Te nosali prisgo nogogo tolaluyu, te iba eda eno gedude tama tiao. Tama te bidigo te kilogram deli yai wiegi yai plaua somainao, tama te oliv wel dali taluama te wit ulubo ofa yao. Te agai oliv wel kap si sesemainao,” wali. 22 “Tama agai augwaligo te nogi hi wabo tobage ba si sesao, te ofa yabo, magi baso meni, agai te sipsip hauwa abelabo usu ebeo. Te ba hi me deligo te dwai sęgę sela sąyu, te me deligo te isiba ulama tigidali dela silibo ofa yaibao,” te po wai dao. 23 “Te augwaligo aga te wiegi yai pedalumainu sę ebo side, te 8 wabo side, agai te kibu doado bage te prisba sela peyu, te Genuai Bidi eno sel Ugwa Be sunumiba selasa asobaso da, teda eno sueibao,” wali. 24 “Tialima, prisgo te sipsip me oliv wel saibao, te nogogo tulama, te eno gedude iba eda yao. 25 Tama prisgo te sipsip wai elama, te dwai sę yali silimainogo ofa yaibao. Agai te ofa ebo nai kaneme dwasianu selama, te wiegi yai pedelainu ebo bidigo dolo nogo olo badu pilao, te agai dolo nogo a danide me pilibadi, te bidigo dolo sągą a danide me pilao,” wai dao. 26 “Te prisgo oliv wel dwasianu selama, te aga pobase nogode gealuama, te wel nogo tuwao. 27 Te agai dolo nogo dani te welba munama, te wel nogo a naga si sogo sąsągą pobaso da, te ena Genuai Bidi, eno sueibao. 28 Nosali prisgo te dwasianu wel ąį te hasia agai te dwasianu kaneme muani pesagede muao. Agai te bidigo dolo olo badu mumainao, te dolo a nogo danide me muyu, te agai dolo sągą a danide me muao. 29 Te nogode elalubo wel tigidali te prisgo te wiegi yai pedelainu ebo bidigo tobolude pilao, te kolesagade prisgo te bidigo sęgę sela sąbo ofa ebao. 30 Tama prisgo te ba hi si te bidigo sela asali te salio, te ofa yabo dao. 31 Agai te ba higo te sęgę sela sąbo ofa tiwai eyu, te gasa bago te isiba tigidali ulama dabo ofa yaibao. Agai te wit ulubo ofa dali te ba hi si dali ofa yao. Te kolesagade prisgo te bidigo sęgę sela sąbo sę eyu, eno gedude wiegi yai pedalubo sę tama yaibao. 32 Te bomai po te oiyabe gasi yali bidigo gasi sia somainu ebo bomai po, tiali goli te aga mone sǫą pobaso, te agai te bomai pode sesao wali nai tigidali sela pabo usu isąbaso, te aga eno gedude wiegi yai emainogo te tiwai ofa ebo dao,” wali.

33 Te Genuai Bidigo Moses de Aron dali sibolo te tiwai po wali, 34 “Nosali dage te tǫ kantri Kenanba bidigi paibao, te eno dageba mawainogo homu ebo bulu, te dagego tǫ mu sesemane elalueibao. Tama dage te Kenan tǫba sabolama bidibo sogo, te eno nai me deli te oiyabe pedalubo tiwai elama, te dagego masigigo nigai be mebade pedelama, te be dolobo sę ilaibao. 35 Te be aga ayago suali, te tama sę elalubaso, aga te prisba pelama, agabolo te tiwai po walao, ‘Eno suali, te oiyabe tiwai nai me deli eno beba pedelama, te eno be dolainu homu ebao.’ 36 Prisgo te tiwai po odobaso da, teda agai te be page bidibolo walama, te be tomode doado bage tigidali selama, te buluba sela soao. Te bidigo tama tisąwani da, te pris aselama, agabolo te tiwai po walaibao, ‘Te bede tigidali doado bage te God gedude dwalio olama, te nagebolo habu selaibao.’ Tialima, bidigo te bede doado bage tigidali buluba sela soai digi yai baso da, teda pris te be tomoba pelama, te be sumainogo yao,” po wai. 37 “Agai te be paiyali daga masigi dabe dolobo nai te bugagia osola suao. Te agai suali madi te ni yabe tiwai nai ma mama yai naigo te amamogo tubo tiwai te be daga paiyali masigi dabede dwasianu dodogo paibaso, tama agai homugo te naigo te be daga dodogo pelama, tomoba mu paibaso da, 38 teda pris te buluba dią solama, te po walao, ‘Te bede bidisąma, habu selama, te nogo a naga olama, me badu nogo si sogo olo elalumainao.’ 39 Te 7 wabo side pris aselama, te be ma suagasao. Te nai te be paiyali daga masigi dabede genuai mu pedelaibaso da, 40 teda prisgo augwalibolo walama, te dwai nai elalubo masigi dabe sela sąnama, te taun bulu, badu sąyao te eno gedude dwai nai sela sąbo pesageba sela sąyao. 41 Augwaligo tama tilama da, teda augwaligo te masigi mesegelali simen tigidali te be tomode elalubo sela sąyao. Tama augwaligo te taun buluba sela solama, te dwai meda yai nai sąbo pesageba naga sąyao. 42 Tama augwaligo te gesi masigi dabe selama, te poloba elaluali masigi hasegelama, te be daga masigi te pedai badu ma nigao. Te augwaligo gesi simen selama, te be daga nigali tigidali ma haluao,” wali.

43 “Te oiyabe tiwai nai te be obo dagade ma pedaliyu, te sę yali tudi, badu te nai ma pedalubaso da, 44 teda pris te beba ma pelama, bugagia suao. Te nai genuai pedelama, te be dolabo homu ebaso da, teda te be eno gedude dwali dao. 45 Tibaso, te be augwaligo hųgilama, te tigidali masigi me, ni me, simen me, sela sąyao. Tama augwa te taun bulu badu sela soao, te augwa eno gedude meda yai doado bage sela sąbo pesageba pelama, mugi pao,” te po wai dao.

46 “Te be habu selali elalubadi, te be tomoba bidi me deli pobaso da, te bidi eno gedude meda pedelama, aga te tiwai bididubadi te giliga iba dega sigulaibao,” wali. 47 “Te bidi me deli te tomode godege piali ma nai tubaso da, teda aga ugwa ąį telayao,” wali.

48 “Tialima, prisgo te be suagasobo sogo da, teda agai suali, te be wiegi yai elaluyu, te nai ma pedalisąbaso, te agai te tiwai po augwaliba walao, ‘Te be Godigo gedude wiegi yai elalubao.’ Magi baso meni, te oiyabe tiwai naigo te be dolali, te munu ma elalubeo. 49 Te be eno gedude wiegi yai pedalubo kolesaga e tiwai elalubao. Prisgo te ba hi si sobadi, te ni sida dwasianu dagenu siyu, te mama hobi string dagenu sobadi, te ni hisop nologo sobadi yao. 50 Tama augwaligo te tǫgo nigai sospen selama, te dwasianu asobo ąįba pelama, te ąį tulama sesao. Te prisgo ba hi me deli selama, te sospen ugwadu tolaluyu elama, te kaneme sospenba dulaibao,” wali. 51 “Nosali agai te ni sida dagenu me siyu, te ni hisop nologo me siyu, te mama hobi string me sobadi, te bidibo ba hi selama, te kaneme elalubo ąįba munama, te polo ma kega sao. Tama agai te kaneme elalubo ąį te a naga si sogo te beba sągąyao. 52 Prisgo tama tilama, te be eno gedude wiegi yai pedelaibao. 53 Tama agai te bidibo ba bidibadi te taun buluba te kala elalubo pesage buluba bola pomainogo tagala palama, bola pomainu yao. Te kolesaga te bego dwai meda elalubo sia selama, te be eno gedude wiegi yai ma pedalubo tiwai ebo dao,” wali.

54-56 “Te bomai pode te tama po wali, te oiyabe gasi yai we bidi, me te habo keni keni yai we bidi, me te keni ebo me dili keni ebo, me te masalu tigide pedalubo po me walio, te ugwa doado bage, me be dolobo te bomai pode te po wali. 57 Te bomai pogo te dagebolo ola mayu, te mena nai te meda yai nai, ma te mena nai te wiegi yai eno gedude pedalubo, te bomai pogo page ola mabo po dao,” te po wai dao.