1 Te Jehu aga te Israel hanigo king bidi nigilama bidibadi, agai kibu be nogo a naga olama, me badu nogogo si olama kibu be pai, te Joas aga te Juda hanigo king bidi nigilama bidali. Tama aga te Jerusalemde king bidi nigilama bidibadi, agai bidi sese si, 40 kibu beba usu nigi pali. Joas aga ida, aga nogi Sibia, te Berseba we dao. 2 Te Joas aga king bidibo sogo, tama agai Genuai Bidigo gedude te agai dwagi yai doloba pai kolesaga naga yali. Magi baso meni, te polalubo pris bidi Jehoiada agai aga te e tama dwagi yai kolesaga ola mabo sę yali. 3 Tiali goli, Joas agai te augwaligo tibo god dolo lotu po wabo bulu du pesage me dolobe, tama teyu, te we bidi dabego te lotu po wabo pesageba ugwaba pelama, tama augwaligo te tibo godiba te denami yai ofa nai ula mayu, tama me te dwagi yai denami pedalomainogo ebo te pauda augwaligo uluyu yali.

4 Tama te Joas agai te pris bage i wali, tama augwali asobo si, tama agai augwalibolo e tama po wali, “Te pris bage dagego te tigidali mone selasa asao, te tigidali we bidi dabego te Genuai Bidigo tempel bede mubo takis mone dao, tama me te bidi dabego te bodolu ponaniba usu numainogo te augwaligo te mabo mone me, [Sai 30:11-16] 5 tama pris bidi dabego te we bidi dabe augwaligo dagebolo mabo mone dagego bugagia tonaluao. Tama te sogo dagego suali madigi, te Genuai Bidigo tempel be te me badu pedai badu deli dolai baso da, teda dagego te mone selama, tama dagego te tempel be dolali dodolobo bidi abelao,” wali.

6 Tiali goli, me badu nosali kibu bede, agai te king bidi bidibadi, agai e tama kibu be bidali, te 23 kibu be bidali, te Joasgo suali, ma te pris bage augwaligo te sę me deli ebe, te Genuai Bidigo tempel be dodolobeo. 7 Tama tibaso, te king Joasgo te polalubo pris Jehoiada dali, te gasa pris bidi dabe dali, augwali asao olama i wali, tama augwali asobo si, tama Joas agai e tama po augwalibolo wali, “Magi baso dagego te Genuai Bidigo tempel be me badu pedai dologa pali dodolisiąma tonalubawe? Tama teyu da, teya dagego te we bidi dabe augwalide te sabo mone te dagego munu ma tonalugio. Menio. Dagego te tonalubo mone te eno bidi me deli eno digi dąį ilama, tama dagego te bidibolo maiyagameo. Tama tilama, te tempel be me badu pedai dologa pali dodolomainao,” po wali. 8 Te pris bidi dabe augwaligo te Joasgo wali po usu dao wali, tama augwaligo augwa po minama, po me deli dąų weyu, e tama po olama dąų walali, tama augwaligo te we bidi dabe dali mone me sogobeo wali, me te augwaligo te po wali, “Te Genuai Bidigo tempel be dologa pai baso, dodolobo sę me te dago me tonalugobeo,” wali.

9 Tama nosali Jehoiadago te halobage me deli selama, tama agai te halobagede dedage me deli nigilama, tama gedu ge gagawai nigali. Tama tilama, te halobage te alta pąde muani. Tama te we bidi dabe te tempel be bologobea sali obo tomoba te we bidi dabe augwali aselama, bagula bilibo sogo, tama augwaligo te halobage te alta elalubo madi dolo nogo badu munalubo suali. Te pris bage augwaligo te pabo tųde tonaluali, magi baso meni, augwaligo te we bidi dabego muagasobo mone augwaligo sainogo, tama tilama augwaligo te mone selama, te halobageba bulali. 10 Tama te pris bidi dabego subo sogo suali, ma te halobage te monego pągąwainogo yali tama tibaso, te pris bage augwaligo te king bidi dali, te tobolu pris bidi dali, te augwali sigo te mone dodolobo kuskus bidi asao olama, po ola tolali. Tama te kuskus bidi augwali si aselama, tama te mone begde bulama, tama sela pelama, tama te mone nedigi pali. 11 Tama augwaligo neda silama, tama te augwaligo Genuai Bidigo tempel be dologa pali dodolomainogo sę tonalubo bidi dabe augwalibolo te mone menama, tama augwaligo te be sę ebo kamda bidi abelali. 12 Tama te bidi dabe augwaligo te masigi be sę ebo koneai bidi me, me te masigi togobo koneai bidi me, tama me te ni name me, me te masigi me, te sę yabo doado bage abelebo bidi dabe me tama abelali. Tama me te gasa nai dabe me te nai dabego augwaligo te sę ebo tau sabo da, tama augwaligo te deli monego naga abelebo dao.

13-14 Te mone augwaligo te Genuai Bidigo bede sabo da, te deli sę naga da, te deligo naga te Genuai Bidigo be dologa pali dodolobo dao. Tama teyu, augwaligo te mone selama, te monego te silvago nigali te dis pou me, me te dwasianu plet pou me, te monego augwaligo abelebo munu me usu egobeo, me te bu wabo nai biugel me, tama me te augwaligo lam sole sula sabo nai me. Tama te me badu te gasa doado bage dabe augwaligo te golgo me, me te silvago me nigali nai dabe me, te nai dabego te Genuai Bidigo tempel be tomode sę ebo nai naga dao. Te nai dabe augwaligo te tempel be ma dodolabo monego abelebeo, te tedali mu dao. 15 Te sę tonalubo bidi dabe augwaligo te monede me subigila kolesaga elama, augwaligo wi tubo meni, tama teyu, te polalubo tobolu bidi dabe augwaligo te mone tonalubo bidi dabe augwali dali te monego dagego magi sę me yaliwe olama, augwaligo me hanalubeo. 16 Tiali goli, te we bidi dabe augwaligo te God dolo mu augwa te dwai kolesaga yali sęgę dodoluyu ofa mabo mone me, me te sęgę sela sąbo ofa yali, te tibo mone augwaligo te Genuai Bidigo tempel be dologa pali dodolobo mone mubo halobagede augwaligo te mube. Augwaligo te tobage ofa mone te pris bidi dabe augwalibolo naga dolo mani. [Prs 7:7]

17 Te Juda dabego king bidi Joasgo te Genuai Bidigo tempel be dodolabo bidi augwali dąį ila silali, tama te nosali te Siria king bidi Hasael aga ami soldia bidi dabe dali augwali aselama, tama te taun Get hanude boi hwįani. Tama te augwaligo te taun Get bage augwali aiyaba elaluama, tama augwaligo te Get hanu sali. Tama tialima, augwali ma begegi soyu, te Jerusalemba boi hwįgi painu pali. 18 Tiali goli, te king Joasgo agai te homu yali, ‘Te king Hasaelgo aga ami soldia bage dali aselama, te eno hani dali te e Jerusalem taunba hwįagasigio,’ homu yali. Tama teyu, te Joas agai te king Hasaelbolo te olo mabo doado bage tolali. Tama te Joasgo te aga wąį nǫųgo tigidali doado bage aga naga sai, te king Jehosafatgo doado bage me, tama me te king Jehoramgo doado bage me, tama me te king Ahasiago doado bage me, augwaligo te Genuai Bidiba dąį ilai doado bage dabe da, tama te king Joas agai me te tigidali doado bage te Genuai Bidiba dąį ilali me, tama me te agai te tigidali gol me, te Genuai Bidigo tempel bede te mone mubo habadu muani goli me, me te kingo bede muani gol me agai sali. Tama agai te nai dabe selama, te king Hasaelbolo olo mu te bugai homu pemene iliyu mani. Tama te king Hasaelgo te doado bage dabe sali, tama tibaso, agai te Jerusalem bage dali hwįsąma, sula taga pali.

19 E te king Joasgo te gasa sę dabe yali po dabe elalubao, te gasa bukude elalubao, te buku augwaligo nogi weyu, Juda Hanigo King Bidi Dabego Yali Sę Po Elalubo Buku dao. 20-21 Me sogo deli te Joas aga sę ebo gavman ofisa bidi dabe augwaligo te Joas elabo po sisinama, minama dąų wali. Tama augwali me sigo, me nogi Josakar, Simeatgo ogwa da, tama me te Jehosabat, aga te Somergo ogwa da. Tama te augwaligo te Joas aga te Sila buluba aiyaba pabo tųde be me delide bidibadi, augwaligo te Joas elama, isilali. Te be te Jerusalem elalubo pedai badu te bulu odogo elalubo madigi be teba naga maganama be sę eyu yai. Joas aga isali. Tama augwaligo aga te aga wąį nǫųgo gų pageba pubaligi pai, te Devitgo moni hanude, tama te aga ogwa Amasia, agai aga ayago sę yali silide tama te king nigilama, sę yali.