1 Tuni bidi Serksisgo te aga tonalubo tǫ pedai tigidalide bidali we bidibolo te takis mone mao po weyu, te po mu dąų walali. Te nambis provins dabe dali, te agai tonalubo tǫ tomode mu elaluali provins dabe dali, te tigidali tǫ pedai badu tede te takis mone sabo sę yai dao. 2 Te tigidali dwagi yai me genuai sę me, tama tigidali po wabo kolesaga ebo me, te gavman tuni bidigo te genuai nogi Mordekaibolo mayu tama tiali, te tigidali sę yali augwaligo te Persia de Midia genuai tǫ tonalubo king bidi dabego buku dabede te sę yali po asęanio. 3 Tama te Juda bidi Mordekai aga te gavman king bidi Serksisgo kisalubo tomo bidi bidali. Tuni bidi naga aga daide ugwadu elaluali. Tama Juda dabego aga godolo mu elama, tama augwali genuai nogi agabolo mawai. Tama agai te Juda dabe augwali bugagia bidabo sę tau sali, tama augwa hani dabe nosali pedalubo bage te augwali magi nai mede wi me isąma, augwali bugagia naga bidimainu tiai dao.