1 Iwe, ewe Samol mi Lapalap a kapas ngeni Moses me Aaron, 2 “Oupwe üreni ekewe aramasen Israel, ‘Ikkei ir ekewe mönümanau oua tongeni ochoch me lein man meinisin won fanüfan: 3 Oua tongeni ochoch ekewe man meinisin mi keang kün pachapacher o lülüsefäli ener. 4 Nge ousap ochoch ekewe man mi chök lülüsefäli ener ika keang chök kün pachapacher: Ewe kamel epwe limengau ngenikemi, pun a lülüsefäli anan, nge esap keang kün pachapachan. 5 Pwal ewe man itan pächer mi nom won achau epwe limengau ngenikemi, pun a lülüsefäli anan, nge esap keang kün pachapachan. 6 Iwe, ewe üsangi epwe limengau ngenikemi, pun a lülüsefäli anan, nge esap keang kün pachapachan. 7 Nge pik epwe pwal limengau ngenikemi, pun a keang kün pachapachan, nge esap lülüsefäli anan. 8 Ousap fokun ochoch fituken ekei man, ousap pwal fokun atapa ekei man men mä, pun repwe limengau ngenikemi.

9 Iwe, oua tongeni mongö ekewe ik meinisin mi nom lon koluk ika leset a wor ililir me töröüner. 10 Nge ekewe mönümanau mi nom leset ika lon koluk esap wor ililir me töröüner, ese lifilifil ika ra kükün ika ra watte, repwe anioput ngenikemi. 11 Iwe, repwe chök anioput ngenikemi. Ousap mongö fituker, nge are ra mäla, repwe pwal anioput ngenikemi. 12 Mönümanau meinisin mi nom lon koluk ika leset esap wor ililir me töröüner repwe chök anioput ngenikemi.

13 Iwe, ikkei iten ekewe machang ousap ochoch fituker, pun repwe anioput ngenikemi: Ikel me sokopaten ikel iter wolcher me osprei, 14 ekewe machang iter kait me sokopaten machang iter falkon, 15 iteiten sokopaten ängä, 16 ewe machang itan ostrich, kawakawen lepwin, nipöüwanei, sokopaten kawakaw, 17 fukuro, niwanök me ewe machang itan ipis, 18 niaupinik, ekewe machang iter pelikan me karion wolcher, 19 öröpwech pwal iteiten sokopaten örö, ewe machang itan hupo me pöüte.

20 Iwe, ekewe kükün man meinisin mi äkkäs, nge ra pwal tö won fofoch aütür, repwe anioput ngenikemi. 21 Nge me lein ekewe kükün man mi äkkäs o tö won fofoch aütür oua tongeni mongö ekewe mi wor aför, pwe ra tongeni mwetemwet won pwül. 22 Ikkei ir ekewe kükün man oua tongeni mongö: sokopaten lifichimas, sokopaten lifichimas mi äkkäsfetal, sokopaten korongi, pwal sokun lifichimas mi nom won fetil. 23 Nge ekewe lusun kükün man mi äkkäs, a pwal wor fofoch aütür, repwe anioput ngenikemi.

24 Are ämi oua atapa ekei man, oupwe limengau. Iwe, eman mi atapa ekei man men mä, epwe limengau tori lekuniol. 25 Nge eman mi uwei eman lein ekei man men mä epwe sopuni üfan o limengau tori lekuniol. 26 Iteiten man mi kinikin kün pachapacher, nge resap keang ika resap pwal lülüsefäli ener, repwe limengau ngenikemi. Eman mi atapa ekei man men mä epwe pwal limengau. 27 Iwe, ekewe man mi fetal won pöür me pecher, nge a chök wor kün aütür, repwe limengau ngenikemi. Eman mi atapa ekei man men mä epwe limengau. 28 Nge eman mi uwei ekei man men mä epwe sopuni üfan o limengau tori lekuniol. Ekei man repwe limengau ngenikemi.

29 Iwe, ikkei ir ekewe mantötö mi tö won pwül repwe limengau ngenikemi: eman man itan wisel, nakich, sokopaten koluf, 30 litopach, niparoch, kuel, sokun kuel mi nom leppi me niküch. 31 Ekei man me lein ekewe mantötö repwe limengau ngenikemi. Eman mi atapa inisir men mä epwe limengau tori lekuniol. 32 Nge ika eman lein ekei man a mäla o turutiu won och mettoch, ewe mettoch epwe limengau, ese lifilifil ika a för seni mwüch, ika echö üf, ika silin man, ika eu tuk, ika sokopaten sepi aramas ra aea. Iwe, ewe mettoch epwe soso lon koluk, epwe pwal limengau tori lekuniol, nge mürin epwe limöch. 33 Iwe, are eman me lein ekewe man men mä epwe turulong lon eu sepi mi för seni pwül, meinisin mine a nom lon epwe limengau, kopwe pwal amökkü ewe sepi. 34 Nge are chichin ewe sokun sepi mi limengau a niti och mongö, ewe mongö epwe limengau, pwal kolukun ün mi nom lon epwe limengau. 35 Iwe, are eman lein ekewe kükün man men mä a torii och mettoch, epwe limengau, ese lifilifil ika eu lenien um ika eu sitof, repwe chök katala. Iwe, ekei mettoch ra limengau, repwe pwal limengau ngenikemi. 36 Nge ika ewe man epwe turulong lon kolukun eu miich ika eu chönüttu, epwe chök limöch. Iwe, nge mine a torii ekewe kükün man men mä epwe limengau. 37 Are eman lein ekewe kükün man men mä a turutiu won föün irä fän iten fofot, ekewe föün irä repwe chök limöch. 38 Iwe, are ekewe föün irä ra nom lon chöchön, nge eman lein ekewe man men mä a turutiu won, ekewe föün irä repwe limengau ngenikemi.

39 Iwe, are eman lein ekewe man ämi mi tongeni ochoch a püsin mäla, nge eman a atapa, ätewe epwe limengau tori lekuniol. 40 Nge eman mi ochoch ewe man men mä epwe sopuni üfan, i epwe pwal nom lon tettelin chon limengau tori lekuniol. Iwe, eman mi eki ewe man mi mä epwe sopuni üfan, epwe pwal nom lon tettelin chon limengau tori lekuniol.

41 Iteiten mantötö mi tö won pwül repwe anioput ngenikemi. Ousap fokun ocheer. 42 Man meinisin mi tö won upwer lepwül, pwal meinisin mi tö won fofoch pecher ika lap seni, ousap ocheer, pun ra anioput. 43 Ousap alimengauakemi ren ekewe mantötö, pwe ousap nom lon tettelin chon limengau. 44 Pun ngang ewe Samol mi Lapalap ämi we Kot. Iei mine oupwe püsin apinikemi pwe oupwe pin, pun ngang üa pin. Ousap püsin alimengauakemi ren ekewe mantötö mi tö won pwül. ✡ Lif 19.2; 1.Pet 1.16 45 Ngang ewe Samol mi Lapalap üa emwenikemiiwu seni ewe fanü Isip pwe üpwe ämi Kot. Iei mine oupwe pin, pun ngang üa pin.’ ”

46 Iei ewe allük fänäsengesin ekewe man me machang, fänäsengesin mönümanau meinisin mi nom leset me lekoluk, pwal fänäsengesin ekewe mantötö meinisin mi tö won pwül. 47 Ei allük a alefila lefilen mine a limengau ika limöch, pwal lefilen ekewe mönümanau aramas ra tongeni ochoch me ekewe resap tongeni ochoch.