1 Iwe, ewe Samol mi Lapalap a üreni Moses, 2 “Kopwe tinala ekoch mwän pwe repwe operi ewe fanü Kanaan, ewe fanü üpwe ngeni ekewe aramasen Israel. Kopwe tinala akaeman souemwen seni eu me eu ainangen semelaper kewe.” 3 Iei mine Moses a tinirela seni ewe fanüapön Paran, usun ewe Samol mi Lapalap a allük. Nge ekewe mwän meinisin ir mwänirelan ekewe aramasen Israel. 4 Iwe, ikkei iter: Samua nöün Sakur mwän seni ewe ainangen Rupen, 5 Safat nöün Hori mwän seni ewe ainangen Simeon, 6 Kalep nöün Jefune mwän seni ewe ainangen Juta, 7 Ikal nöün Josef mwän seni ewe ainangen Isakar, 8 Hosea nöün Nun mwän seni ewe ainangen Efraim, 9 Palti nöün Rafu mwän seni ewe ainangen Peniamin, 10 Katiel nöün Soti mwän seni ewe ainangen Sepulon, 11 Kati nöün Susi mwän seni ewe ainangen Josef, wesewesen seni ewe ainangen Manasa, 12 Amiel nöün Kemali mwän seni ewe ainangen Tan, 13 Setur nöün Mikael mwän seni ewe ainangen Aser, 14 Napi nöün Wofsi mwän seni ewe ainangen Naftali, 15 Keuel nöün Maki mwän seni ewe ainangen Kat. 16 Ikkei ir ekewe mwän Moses a tinirela pwe repwe operi ewe fanü. Nge Hosea nöün Nun we mwän Moses a aita ngeni Josua.

17 Iwe, lupwen Moses a tinirela, a üreniir, “Oupwe feitä lon ewe fanü Nekep o feila ngeni ewe fanü mi chukuchukutä, 18 pwe oupwe ouwasacha lapalapen ewe fanü, are ekewe aramas mi nonom won ra pöchökül ika apwangapwang, are ra chokükün ika chomong. 19 Oupwe ouwasacha are ewe fanü a mürina ika ngau, are ar kewe telinimw ra imweimw lon telinimw resap tit ika telinimw mi pöchökül tittir, 20 are ewe fanü a fanüeräs ika esap, are a mär irä won ika esap. Oupwe tipepwora o uwato ekoch föün irän ewe fanü.” Iwe, ei fansoun a otun nupun mwen uän irän wain.

21 Iwe, ekewe chon op ra feitä o operi ewe fanü seni ewe fanüapön Sin tori Rehop arap ngeni ewe al a ale ngeni Hamat. 22 Ra feitä akomw lon ewe fanü Nekep o tori Hepron ia Ahiman, Sesai me Talmai, ekewe mwirimwirin Anak, ra imweim ie. Nge ewe telinimw Hepron a kaütä fisu ier mwen ewe telinimw Soan lon Isip a kaütä. 23 Iwe, ra tori ewe lemolun Eskol, ewe ia ra kini me ie eumw umwun föün wain mi umwumong. Iwe, ruoman leir ra ämwära won efoch ämwär. Ra pwal uwato ekoch föün apel me föün fiik. 24 Iwe, ra aita ngeni ewe leni lemolun Eskol pokiten ewe umwun föün wain ekewe re Israel ra kini me ikenan.

25 Iwe, amüchülan faik rän, ekewe chon op ra liwinto seni ar operi ewe fanü. 26 Iwe, ra feito ren Moses me Aaron me ekewe aramasen Israel meinisin mi nom lon Kates lon ewe fanüapön Paran. Iwe, ra apworausa ngeniir pworauser, ra pwal apii ngeniir uän irän ewe fanü. 27 Iwe, ra üreni Moses, “Äm aia tori ewe fanü ia ka tinikeemila ie. Ewe fanü eu fanü mi pwülüöch o fanüeräs, nge iei uan. 28 Nge ekewe aramas mi nonom lon ewe fanü ra pöchökül, pwal ekewe telinimw ra watte o pöchökül tittir. Iwe, ikenan aia pwal mwo nge küna ekewe mwirimwirin Anak mi mwänemong. 29 Ekewe chon Amalek ra nonom lon ewe fanü Nekep. Iwe, ekewe chon Hit, chon Jepus me chon Amor ra nonom lon ewe fanü mi chukuchukutä, nge ekewe chon Kanaan ra nonom aroset me aropen ewe chanpupu Jortan.”

30 Iwe, Kalep a amosonosona ekewe aramas mi mwichefengen ren Moses o üreniir, “Ousipwe feitä iei chök o liapeni ewe fanü, pun sia fokun tongeni.” 31 Nge chienen Kalep kewe mi eti le feitä ra apasa, “Sisap tongeni fiu ngeni ekewe aramas, pun ra kon pöchökül senikich.” 32 Iei usun ra apworausa ngeni ekewe aramasen Israel pworaus mi mwäl fän iten ewe fanü ra operi. Ra apasa, “Ewe fanü aia fetalfeil lon eu fanüen ochoch aramas. Nge ekewe aramas aia küneer ra fokun mwänätam. 33 Iwe, ikenan aia pwal küna ekewe mwänämong, ekewe mwirimwirin Anak. Nge äm aia awewe ngenikem lifichimas me lükür, pwal usun chök me rer.”