1 Mürin, Elihu a pwal apasa,

2 “Ifa usun, ka ekieki pwe mi pwüng om apasa,

pwe esap wor om tipis fän mesen Kot?

3 Ka pwal aisini Kot, ‘Met feiöchi?

Met ai win pwe üsap tipis?’

4 Ngang üpwe pälüenuk, pwal chiechiom kewe mi nom reöm.

5 Kopwe netä läng o nenengeni.

Kopwe atola ekewe kuchu mi tekia ra nom asom.

6 Ifa usun, are ka tipis, met epwe fis ngeni Kot?

Are om pupungau a chomongola, met ka föri ngeni i?

7 Nge are ka pwüng, met kopwe ngeni,

ika met epwe angei seni lepoum?

8 Om föföringau a chök afeiengaua eman aramas usun chök en,

nge om föri mine a pwüng a atoto feiöch won aramas. ✡ Hiop 22.2-3

9 Pokiten chomongun riaföü ekewe aramas ra siö,

ra kökkö pwe eman epwe alisiir seni chokewe mi wor maner.

10 Nge esap wor eman me leir a ais, ‘Ifa i Kot ewe mi föriei,

ewe mi atufichiei pwe üpwe kölün mwareiti lepwin,

11 ewe mi asilelapaei lap seni ekewe man won fanüfan

o atipachemaei lap seni ekewe machang?’

12 Iei mine lupwen ra siö, Kot esap pälüeniir

pokiten ra lamalamtekia o föri mine a ngau.

13 Ellet, Kot esap aüselinga eu siö esor lomotan,

Ewe mi Unusen Manaman esap afäli.

14 Epwe fen ifan en, Hiop, lupwen ka apasa pwe kosap küna Kot,

pwe om osukosuk a nom fän mesan, nge ka chök witiwiti.

15 Ka ekieki pwe Kot esap awora apwüng fän an song,

esap pwal fokun afäli pupungau,

16 iei mine en Hiop ka eäni kapas mi lomotongau,

ka achomonga om kapas, nge esap wor om silelap.”