1 Iwe, ewe Samol mi Lapalap a üreniei, “Kopwe feila o kamö echö achök seni mangaku mi pwechepwech o rietä won wänukum, nge kosap otuwolong lon koluk.” 2 Iei mine üa möni echö achök o rietä won wänüki, usun ewe Samol mi Lapalap a üreniei. 3 Mürin, ewe Samol mi Lapalap a kapas ngeniei fän aruuan, 4 “Kopwe feila ren ewe chanpupu Oifrat fän achökum we ka möni o aopala ikenan lon eu pwangen achau.” 5 Iei mine üa feila o aopala ewe achök arun ewe chanpupu Oifrat, usun ewe Samol mi Lapalap a akünö ngeniei. 6 Nge mürin chomong rän ewe Samol mi Lapalap a üreniei, “Kopwe feila ren ewe chanpupu Oifrat o angei ewe achök üa ürenuk pwe kopwe aopala.” 7 Mürin, üa feila ren ewe chanpupu Oifrat o tuwetä ewe achök seni lon ewe leni ia üa aopala ie. Iwe, üa küna pwe ewe achök a ngauala, esap chüen wor lomotan.

8 Mürin, ewe Samol mi Lapalap a kapassefäl ngeniei. 9 A apasa, “Iei usun üpwe aükätiu än chon Juta me chon Jerusalem lamalamtekia mi fokun watte. 10 Ekei aramas mi ngau, resap mochen aleasochisiei. Ra chök ülöförea le chei mochenin letiper. Ra fel ngeni pwal ekoch kot o angang ngeniir. Iei mine repwe wewe ngeni ei achök mi lomotongau. 11 Pun usun echö achök a pacheri wänükün eman aramas, iei usun üa mochen pwe chon Israel me chon Juta meinisin repwe pacheriei. Üa föri ei pwe ir repwe nei aramas üpwe iteüöch rer, aramas repwe pwal mwareitiei o alingaei rer. Nge ir resap mochen aleasochisiei.”

12 Iwe, ewe Samol mi Lapalap a üreniei, “Kopwe üreni ekewe aramas pwe iei alon ewe Samol mi Lapalap ewe Koten Israel, ‘Iteiten pör epwe ur ren wain.’ Iwe, repwe ürenuk, ‘Ifa usun, äm aisap silei pwe iteiten pör epwe ur ren wain?’ 13 Mürin kopwe üreniir pwe ngang ewe Samol mi Lapalap üpwe aünü chon ei fanü meinisin wain tori repwe pulas. Ekewe king ir mwirimwirin Tafit, ekewe souasor, ekewe soufos me chon Jerusalem meinisin repwe ün. 14 Mürin üpwe atatakisifengeniir eman ngeni eman, ekewe sam ngeni nöür kewe, usun eman a amökkü eu pör ngeni pwal eu. Üsap tongeer ika achikeer, üsap eäni ümöümöch ngeniir, nge üpwe aroserela.”

18 Iwe, ewe Samol mi Lapalap a üreniei, “Kopwe üreni ewe king me inelapan we pwe repwe tötiu seni ar lenien motun king, pun mwärir mwärin king mi ling a turutiu seni won mökürer. 19 Ekewe telinimwen Juta mi nom ör ra tala, nge esap wor eman a nom pwe epwe aüsefäliretä. Chon Juta meinisin ra oola, fokun meinisin ra oola.”

20 Jerusalem, kopwe netä o küna chon oputom mi feito seni efeng. Ia ra nom ie ekewe aramas ka wisen tümwünüür, noum kewe aramas ka aingaing wor? 21 Met kopwe apasa, are chokewe ka aita ngeniir pwe chiechiom ra liapenuk o nemenuk? Ifa usun, esap cheruk cheuch usun cheuchen fam a cheri eman fefin? 22 Nge are ka ekieki lon lelukom, “Pwota ekei feiengau ra toriei?” Pokiten watten om tipis, a fis pwe aramas ra kamwei senuk ufom o achomanauok. 23 Ifa usun, eman chon Itiopia a tongeni siwili anüanün ünüchan, ika ewe man itan lepart a tongeni siwili tiketikan? Ika ina, pwal en mi örüni föföringau, ka tongeni föri mine a mürina. 24 Iei mine ewe Samol mi Lapalap epwe atoropasok usun asepwäl seni fanüapö a atoropasa pöön wiich. 25 Iei usun mine epwe fis ngonuk, iei wisom a aükü ngonuk, pun ka manlükala Kot o lükü ekewe anümwäl. Iei alon ewe Samol mi Lapalap. 26 Püsin i epwe särifätä ufom pwe asäwum epwe pwäpwäla. 27 A küna om föför mi anioput ngeni. A küna om feila ren ekewe koten ekis won ekewe chukutekison, pwal lon ekewe mälämäl, usun eman mwän a mocheisou ngeni pwülüen chon arun, ika usun eman ätemwänin oris a mochenia ngeni eman liafefin. Feiengauom, en Jerusalem! Ifa ükükün fansoun om kopwe nom lon limengau?