1 Mürin, ewe mwän a emwenieiwu lon ewe leni mwen Imwenfel o emwenieila ren eu imw mi nom peliefengin ewe Imwenfel, nge esap toau seni ewe imw mi nom pelilotoun ewe Imwenfel. 2 Iwe, langatamen ewe imw mi nom efeng ükükün ipükü wone me walü fiit, nge chölapan walik me rüanü fiit. 3 Iwe, a wor pwalangen ewe imw me rüepek, nge iteiten pwalang a wor ülüngat sässärin. Eu pwalangan a wene ngeni ewe leni ünükün Imwenfel, chölapan ükükün ilik me rüanü fiit, nge eu pwalangan a wene ngeni eu lenien fetal mi nom lon ewe leni lükün Imwenfel. 4 Mwen ekewe rum a wor eu lenien fetal chölapan ükükün engol me wonu fiit, nge langataman ipükü wone me walu fiit. Iwe asamalapen ekewe rum ra sape ngeni efeng. 5 Iwe, chölapen ewe rumwen asan a chökisikis seni chölapen ekewe rumwen fan, pun ekewe pwalang ra chöwatte me asan lap seni me lukalapan pwal me fan. 6 Iwe, ekewe rum won ekewe ülüngat sässär esap wor ürer usun ekewe ür mi nom lon ewe leni lükün Imwenfel. Iei popun ekewe rumwen asan ra chökisikis seni ekewe rumwen lukalapan me rumwen fan. 7 Iwe, mwen ekewe rum mi sapewu ngeni ewe leni lükün Imwenfel a wor tit mi ouwärer ngeni ekewe rum langataman ükükün walik me rüanü fiit. 8 Pun langatamen tettelin ekewe rum mi sapewu ngeni ewe leni lükün Imwenfel ükükün walik me rüanü fiit, nge langatamen tettelin ekewe rum mi sape ngeni ewe Imwenfel ükükün ipükü wone me walu fiit. 9 Iwe, ekewe rumwen fan mi wor eu lenien tolong, a wene ngeni ötiuen ewe leni lükün Imwenfel lepopun ewe tit.

10 A pwal wor eu imw mi nom peliörün ewe Imwenfel, nge esap toau seni ewe imw mi nom pelilotoun ewe Imwenfel. Iwe, lon ei imw a wor rum, 11 nge mwen ekewe rum a wor eu lenien fetal. Iwe, ekewe rum ra usun chök ekewe mi nom efeng, pun langatamer me chölaper ra wewefengen, pwal ar lenien towu me tolong, pwal lapalaper. 12 Iwe, ekewe rumwen fan mi nom peliörün ewe imw a wor eu lenien tolong, a wene ngeni ötiuen ewe leni lükün Imwenfel.

13 Mürin, ewe mwän a üreniei, “Ekei rum mi nom efeng, pwal ekewe mi nom ör ra wene ngeni ewe leni lükün Imwenfel ra pin. Iei ekewe rum ia ekewe souasor mi angang ngeni ewe Samol mi Lapalap repwe mongö me ie ekewe asor mi unusen pin. Ikenan repwe iseis ekewe asor mi unusen pin, asoren mongö, asoren amusamusen tipis me asoren amusamusen pupungau, pun ei leni a pin. 14 Iwe, lupwen ekewe souasor ra tolong lon ewe leni mi pin, resap tongeni towu lon ewe leni lükün Imwenfel ika resap akomwen pwilitawu üfer mi pin ra üföüf, lupwen ra angang ngeni Kot. Iwe, repwe üföüf pwal och sokun üf mwen ar repwe feila lon ewe leni ia aramas ra mwich ie.”

15 Iwe, lupwen ewe mwän a wes me aükü unusen lon ewe lenien Imwenfel, a emwenieila ren ewe asamalap mi sape ngeni ötiu o emwenieiwu, pwe epwe aükü unusen ewe leni lükün Imwenfel. 16 Iwe, a aükü peliötiuan ren ewe wokun aükük ükükün walüpükü faik fiit. 17 A aükü peliefengin ren ewe wokun aükük ükükün walüpükü faik fiit. 18 A pwal aükü peliörün ren ewe wokun aükük ükükün walüpükü faik fiit. 19 Mürin a feila ngeni pelilotoun o aükü ren ewe wokun aükük ükükün pwal walüpükü faik fiit. 20 Ina usun a aükü ewe leni lepelian me rüanü. Iwe, a wor eu tit pwelin ünükün, langatamen lepekin me rüanü ükükün walüpükü faik fiit. Iwe, ewe tit a refiela lefilen ewe leni mi pin me ewe leni esap pin.