1 Iwe, lon engol me waluen ierin mwün Jehosafat ewe kingen Juta, Joram nöün Ahap we mwän a tolong lon wisan wisen king o nemeni Israel. A nom lon Samaria o nemenem lon ükükün engol me ruu ier. 2 Joram a föri mine a ngau me fän mesen ewe Samol mi Lapalap, nge esap chök usun mine saman me inan ra föri. A ataela ewe fau mi pin fän iten ewe anü Paal saman we a falei. 3 Nge a chök kamwöch won ekewe tipis Jeropoam nöün Nepat we mwän a föri, lupwen a emweni Israel ngeni tipis. Iwe, esap likitala ekewe tipis.

4 Iwe, Mesa ewe kingen Moap a foleni sip. Iteiten ier a wisen ngeni ewe kingen Israel ükükün ipükü ngeröü nienifön sip me ülöülen ipükü ngeröü ätemwänin sip. 5 Nge lupwen Ahap ewe kingen Israel a mäla, ewe kingen Moap a ü ngeni Israel. 6 Iei mine ewe king Joram a feila seni Samaria o achufengeni chon Israel meinisin lon ewe chök otun, pwe repwe maun. 7 Mürin, a tinala pworaus ngeni Jehosafat ewe kingen Juta o üra, “Ewe kingen Moap a ü ngeniei. Ifa usun, kopwe etiei le maun ngeni Moap?” Nge Jehosafat a üra, “Üpwe etuk. Üa molotä usun en, pwal nei kewe sounfiu me nei kewe oris ra molotä usun noum kewe.” 8 Jehosafat a pwal aisini, “Meni al sipwe feila won?” Nge Joram a pälüeni, “Sipwe feila won ewe aletam mi alelong lon ewe fanüapön Etom.”

9 Iei usun ewe kingen Israel a feila, nge ewe kingen Juta me ewe kingen Etom ra eti. Nge mürin ar fetal lon ükükün fisu rän, esap chüen wor ünümen ekewe sounfiu ika ünümen nöür kewe man koluk. 10 Mürin, ewe kingen Israel a üra, “Feiengauach, ewe Samol mi Lapalap a körifengenikich kei ülüman king, pwe epwe atolongakich fän nemenien chon Moap.” 11 Nge king Jehosafat a ais, “Ifa usun, esap wor ikei eman nöün ewe Samol mi Lapalap soufos, pwe i epwe tongeni angei öüröürach me ren ewe Samol mi Lapalap?” Mürin, eman nöün ewe kingen Israel meilap a pälüeni, “A nom ikei Elisa nöün Sofat we mwän mi piin angang ngeni Elias.” 12 King Jehosafat a üra, “Än ewe Samol mi Lapalap kapas a nom ren.” Iei mine ewe kingen Israel, ewe kingen Juta me ewe kingen Etom ra feila ren Elisa.

13 Iwe, Elisa a üreni ewe kingen Israel, “Pwota ka feito rei pwe üpwe alisuk? Kopwe feila ren ekewe soufos semom me inom ra angei öüröürer seniir.” Nge ewe kingen Israel a üreni Elisa, “Apwi, ewe Samol mi Lapalap, i a körifengenikem kei ülüman king, pwe epwe atolongakem fän nemenien chon Moap.” 14 Nge Elisa a üra, “Mwo manauen ewe Samol mi Unusen Manaman, ewe üa angang ngeni. Are üsap aücheani Jehosafat ewe kingen Juta, üsap nenengenuk ika afäluk. 15 Nge iei oupwe emwenato rei eman mi sile ettik kitar.” Iwe, lupwen ätewe a ettiki ewe kitar, manamanen ewe Samol mi Lapalap a feito won Elisa. 16 Iwe, Elisa a üra, “Iei alon ewe Samol mi Lapalap, ‘Oupwe tuw chomong warawar lon ei lemol mi pwasapwas. 17 Inamwo ika ousap küna üt, esap pwal enien asepäl, nge ei lemol epwe uren koluk, pwe ämi me nöümi mwichen sounfiu pwal nöümi man oupwe tongeni ün.’ 18 Nge ei och mettoch mi mecheres ngeni ewe Samol mi Lapalap. I epwe pwal ewinnakemi pwe oupwe akufu ekewe chon Moap. 19 Oupwe liapeni ekewe telinimw meinisin mi pöchökül tittir, pwal ekewe telinimw mi fokun mürina. Oupwe pöküela iteiten irä mi mürina o pineela ekewe puächen koluk meinisin, oupwe pwal aingauala ekewe tanipi mi mürina ren fau.” 20 Iwe, lesosorun ewe rän mürin, lupwen fansoun asor, koluk a puto seni akawenewenen Etom, tori ewe fanü a ur ren koluk.

21 Iwe, lupwen ekewe chon Moap meinisin ra rong pwe ekewe ülüman king ra feito pwe repwe maun ngeniir, ra körifengeni chokewe meinisin mi tongeni uwou pisekin maun, seni alüalät tori chinlap. Iwe, ra tettel won kiännin fanüer. 22 Lupwen ekewe chon Moap ra pwätä lesosorusich, ewe akkar a tineiti ewe koluk, nge itä me rer ewe koluk mi nom akawenewener a paraparen cha. 23 Iwe, ra üra, “Elleti cha. Eli ekewe ülüman king ra fiufengen o nifengeniir. Iei mine ousipwe feila o angei liapach.” 24 Nge lupwen ra tori ewe lenien chon Israel, ekewe chon Israel ra ütä o maun ngeni chon Moap, tori ra sü me mwer. Iwe, ekewe chon Israel ra tapweri ekewe chon Moap o nirela. 25 Ra ataela ekewe telinimw o monelong fau lon iteiten tanipi mi mürina tori ra pwölüla. Ra pwal pineela ekewe puächen koluk meinisin o pöküela ekewe irä mi mürina meinisin. Ewe telinimw Kir-hareset chök a chüen nom. Nge ekewe chon öülün ra pwelifeili ewe telinimw o maun ngeni. 26 Lupwen ewe kingen Moap a küna pwe epwe kuf lon ewe maun, a angei füpükü mwän mi wor nöür ketilas, pwe epwe süwu me akawenewenen ewe ia ewe kingen Etom a nom ie, nge ese tongeni. 27 Mürin, ewe kingen Moap a angei nöün mwänichi, ätewe itä epwe siwili lon wisan wisen king, o eäni asoren kek ngeni an we kot me won tittin ewe telinimw. Ren ei ekewe chon Israel ra fokun niuokus, iei mine ra kul seni ewe kingen Moap o liwiniti fanüer.