Chru MATHIƠ 22

Pơgăp-Pơmơyơu Mư̆ng Mơñŭm 'Bơ̆ng Khiăng-Gơŭ

(Luka 14:15-24)

1 Yàng Jêsu angui pơnuaĭ pơgăp-pơmơyơu bloh đờm wơ̆ sơ̆ng buơl guñu lài: 2 “Lơgăr Lơngì mơhiơ̆ yơu sa aràng mơnih pơtau dih pồ bruă mơñŭm 'bơ̆ng khiăng-gơŭ tơ anà lơkơi drơi. 3 Pơtau pơđăr mơnih hơlŭn-hơlă nau đờm pơsơdơ̆r tơ du mơnih thuai hũ jà truh mơñŭm 'bơ̆ng, bloh buơl guñu 'buh truh. 4 Pơtau pơđăr du mơnih hơlŭn-hơlă pơkơ̆n wơ̆ nau, sơ̆ng đờm kơkơi pơđăr lài: ‘Đờm bĕ sơ̆ng du mơnih thuai hũ jà lài: Ni, phơ̆n mơñŭm 'bơ̆ng hũ rơc̆ăng abih bơjơ, lơmo sơ̆ng du phơ̆n pà gah tơkai lơmă hũ sì ngă rơlo bơjơ, tơgrơ̆ bruă hũ rơc̆ăng lờih abih bơjơ. Jà truh mơñŭm 'bơ̆ng bĕ!’ 5 Bloh buơl guñu 'buh pioh hơtai-hơtiàn c̆ơ sơnư̆ng hơgĕ truh bruă nư̆n, yàu aràng kừ nau jơlàn drơi. Mơnih ni nau tơ hơma, mơnih dih nau pơblơi-sơlih akă-bơnia, 6 dò du mơnih pơkơ̆n nư̆n mă du mơnih hơlŭn-hơlă pơtau, puaĭ c̆ơ-ua sơ̆ng pơmơtai. 7 Pơtau anok hơtai, pơđăr buơl lĭng nau pơluĭ-pơlơhiă abih du mơnih pơmơtai mơnih nư̆n, sơ̆ng c̆uh abih plơi-prŏng buơl guñu. 8 Bloh nư̆n, pơtau đờm sơ̆ng du mơnih hơlŭn-hơlă: ‘Pơnuaĭ mơñŭm 'bơ̆ng khiăng-gơŭ hũ pồ abih bơjơ, bloh du mơnih thuai hũ jà 'buh aràng sơi iơŭ păl tô tơma mơñŭm 'bơ̆ng. 9 Kơyoa nư̆n, nau tơbiă bĕ tơ du jơlàn prŏng, yah păp aràng sơi, jà bĕ mơnih nư̆n truh tơma mơñŭm 'bơ̆ng.’ 10 Du mơnih hơlŭn-hơlă nau lăm abih du jơlàn prŏng, pơgùm-pơtòm abih tơgrơ̆ mơnih lơi buơl guñu păp, 'buh pơklah-krơi mơnih siàm halài jơhà, tơ̆l truh lăm adŭ mơñŭm 'bơ̆ng baŭ abih du mơnih thuai mơñŭm 'bơ̆ng.

11 Bloh tŭ pơtau tơma c̆ơ thuai mơñŭm 'bơ̆ng, pơtau 'buh sa aràng mơnih 'buh c̆ù khăn-ào pioh tơ pơnuaĭ mơñŭm 'bơ̆ng khiăng-gơŭ, 12 nư̆n đờm sơ̆ng mơnih nư̆n: ‘Ni adơi-ai gơŭ, hơyơu adơi-ai gơŭ tơma lăm ni bloh 'buh c̆ù khăn-ào pioh tơ pơnuaĭ mơñŭm 'bơ̆ng khiăng-gơŭ?’ Mơnih nư̆n dò kơđơ̆ng 'buh đờm sơđồ jiơ̆ng. 13 Nư̆n pơtau pơđăr du mơnih hơlŭn-hơlă: ‘C̆aŭ bĕ tơkai tơngàn ñu wơ̆, sơ̆ng prah ñu tơ anih kơnăm-mơsrư̆ gah agàh, la anih rơŭ hũ hia c̆ŏ sơ̆ng kĕ tơgơi.’ 14 Kơyoa lô mơnih hũ iơu, bloh tơkì mơnih hũ rơwah.”

Bruă Daŭ Jia Tơ Sesa

(Mak 12:13-17; Luka 20:20-26)

15 Tŭ nư̆n, du mơnih Pharisi nau tơbiă, tămbơyai sơ̆ng gơŭ tô duah pơnuaĭ mă pơkăl Yàng Jêsu mư̆ng pơnuaĭ đờm. 16 Buơl guñu pơđăr du mơnih tui-mơgru drơi găm sơ̆ng du mơnih lăm tơrpuơl Herôt, truh đờm sơ̆ng Yàng Jêsu lài: “Ơ Pô-Pơto, buơl dơlhă thơu Pô-Pơto la mơnih tơpă-tơpe, sơ̆ng tui pơnuaĭ tơpă bloh pơto jơlàn păng-tui Yàng Pô Lơngì, 'buh kơmlưh huơĭ tơ aràng sơi, kơyoa Pô-Pơto 'buh c̆ơ tui gah agàh anà mơnih ơu. 17 Yơu nư̆n, yòng Pô-Pơto brơi buơl dơlhă thơu, Pô-Pơto sơnư̆ng hơyơu lơi: Hũ păl daŭ jia tơ Sesa halài 'buh ơu?” *

18 Bloh Yàng Jêsu thơu hơtai-hơtiàn jơhà buơl guñu, nư̆n Pô đờm: “Ơ du mơnih hơtai-hơtiàn mơthĭ-lơ̆r, kơđa hơgĕ buơl guhã lòng Kơu? 19 Brơi bĕ tơ Kơu c̆ơ priă daŭ jia.” Buơl guñu apăn tơ Pô sa đơnie. 20 Pô tơnia: “Rùp sơ̆ng angăn ni la aràng sơi?” 21 Buơl guñu đờm sơđồ: “Sesa.” Pô đờm: “Yơu nư̆n, bơ-yàr bĕ tơ Sesa phơ̆n hơgĕ phơ̆n Sesa, sơ̆ng bơ-yàr bĕ tơ Yàng Pô Lơngì phơ̆n hơgĕ phơ̆n Yàng Pô Lơngì.” 22 Mơhư̆ Pô đờm yơu nư̆n, buơl guñu mă ngă krơi-takơtuă, sơ̆ng luơi Pô bloh nau.

Pơnuaĭ Tơnia Mư̆ng Bruă Hơdiŭ Wơ̆

(Mak 12:18-27; Luka 20:27-40)

23 Kŭng lăm hơrơi nư̆n rơi, hũ du mơnih Sađuse, la tơrpuơl mơnih đờm lài 'buh hũ pơnuaĭ hơdiŭ wơ̆, truh sơ̆ng Yàng Jêsu bloh tơnia: 24 “Ơ Pô-Pơto, Môise hũ đờm: ‘Yah sa aràng mơnih mơtai bloh 'buh hũ anà, nư̆n mơnih adơi păl khiăng sơ̆ng kơmơi bơdrau nư̆n tô hũ anà pioh jơi tơ sơ-ai drơi.’ 25 Tŭ ni, tơkrah buơl dơlhă hũ tơjuh aràng adơi-ai lơkơi. Mơnih sơ-ai kơc̆ua khiăng kơmơi, bloh nư̆n mơtai, bloh kơyoa 'buh hũ anà, nư̆n luơi sơdiŭ wơ̆ tơ adơi. 26 Mơnih dua, bloh nư̆n mơnih klơu, tơ̆l truh tơ mơnih tơjuh, mơnih lơi kŭng yơu nư̆n rơi. 27 Hơdơi luĭ, mơnih kơmơi kŭng mơtai. 28 Yơu nư̆n, tŭ hơdiŭ wơ̆, mơnih kơmơi nư̆n rơŭ la sơdiŭ aràng sơi lăm tơjuh aràng adơi-ai nư̆n? Kơyoa yàu aràng buơl guñu, aràng sơi kŭng hũ khiăng sơ̆ng kơmơi nư̆n abih.” 29 Yàng Jêsu đờm: “Buơl guhã asŭ bơjơ, kơyoa buơl guhã 'buh wờng 'Bồn Bơ-àr Sơc̆ih-Sri sơ̆ng kŭng 'buh wờng gơnăp-gơnuăr Yàng Pô Lơngì. 30 Kơyoa tŭ hơdiŭ wơ̆, aràng rơŭ 'buh khiăng kơmơi halài khiăng lơkơi, bloh rơŭ yơu du mơnih gơdrưh tơ ngŏ lơngì rơi. 31 Dò mư̆ng bruă mơnih mơtai hơdiŭ wơ̆, nư̆n buơl guhã 'buh pơrpoh-c̆ơ pơnuaĭ Yàng Pô Lơngì hũ đờm ơu? 32 ‘Kơu la Yàng Pô Lơngì Abraham, Yàng Pô Lơngì Isak, sơ̆ng Yàng Pô Lơngì Jakôp.’ † Pô 'buh iơŭ la Yàng Pô Lơngì mơnih mơtai bloh la Yàng Pô Lơngì mơnih hơdiŭ.” 33 Tŭ buơl làng mơhư̆ pơnuaĭ nư̆n, buơl guñu mă ngă c̆rih-takơtuă biă mư̆ng pơnuaĭ Pô pơto-pơsài.

Pơnuaĭ Adăt-Pơđăr Prŏng-Màng Rơlau Abih

(Mak 12:28-34; Luka 10:25-28)

34 Tŭ mơhư̆ thơu Yàng Jêsu hũ ngă tơ du mơnih Sađuse păl kơđơ̆ng kàng 'buh đờm sơđồ jiơ̆ng, nư̆n du mơnih Pharisi pơgùm-pơtòm gơŭ wơ̆. 35 Bloh nư̆n sa aràng mơnih gơnuăr-pơto pơnuaĭ adăt-adia lăm tơrpuơl buơl guñu tơnia Pô pơnuaĭ tô lòng Pô: 36 “Ơ Pô-Pơto, lăm pơnuaĭ Adăt-Adia, pơnuaĭ adăt-pơđăr lơi la prŏng-màng rơlau abih?” 37 Yàng Jêsu đờm: “ ‘Hã păl abih hơtai-hơtiàn, abih bơngă-joa, abih hơtai-akŏ bloh duh-rơnăm Yàng la Yàng Pô Lơngì hã.’ ‡ 38 Nư̆n la pơnuaĭ adăt-pơđăr dơlhơu rơlau abih sơ̆ng prŏng-màng rơlau abih. 39 Dò pơnuaĭ adăt-pơđăr dua kŭng mơhiơ̆ yơu nư̆n rơi: ‘Hã păl rơnăm tơ mơnih gơŭ sa plơi adơi sa 'băng yơu rơnăm rùp-phŭn drơi.’ § 40 Abih tơgrơ̆ pơnuaĭ adăt-adia sơ̆ng pơnuaĭ gơnuăr-hwơ̆r la kơyoa mư̆ng dua pơnuaĭ adăt-pơđăr nư̆n bloh tơbiă.”

Pô Krist Sơ̆ng Pơtau Đabit

(Mak 12:35-37; Luka 20:41-44)

41 Lăm tŭ du mơnih Pharisi pơgùm pơtòm sơ̆ng gơŭ, nư̆n Yàng Jêsu tơnia buơl guñu lài: 42 “Buơl guhã sơnư̆ng hơyơu lơi mư̆ng Pô Krist? Pô la anà aràng sơi?” Buơl guñu đờm: “Anà pơtau Đabit.” 43 Pô tơnia: “Yơu nư̆n, kơđa hơgĕ pơtau Đabit tŭ hũ Bơngă Sơc̆ih-Sri pơsàng sơrdah, iơu Pô la Yàng, sơ̆ng đờm lài:

44 ‘Yàng đờm sơ̆ng Yàng dơlhă:

Dò guh bĕ tơ gah hơnuă Kơu,

Tơ̆l truh tơ tŭ Kơu daŭ mơnih mơbai-tămdră sơ̆ng Anà tơ ala tơkai Anà.’ *

45 Yơu nư̆n, yah pơtau Đabit hũ iơu Pô la ‘Yàng’, nư̆n ngă hơyơu Pô la anà pơtau nư̆n jiơ̆ng?”

46 'Buh aràng sơi hũ rơgơi đờm sơđồ jiơ̆ng sa boh pơnuaĭ. Sơ̆ng kŭng mư̆ng hơrơi nư̆n, 'buh aràng sơi khĭn tơnia Pô tra.

*22:17 22:17 Mơnih Rôma iơu tơ pơtau buơl guñu la Sesa.

†22:32 22:32 Tơbiă Mư̆ng Ejiptơ 3:6.

‡22:37 22:37 Akhàn Wơ̆ Pơnuaĭ Adăt-Adia 6:5.

§22:39 22:39 Lebi 19:18.

*22:44 22:44 Pơđik Adoh Mơyòm 110:1.