1 Pues ¿tiaꞌ watar e sian qꞌuijnar y e sian qꞌuecraner lo que ayan tijam nox? Pues watar tama iwalma xeꞌ bꞌutꞌur taca tunor lo que uyusre uche iwerir xeꞌ war aticruma macuir iwalma. 2 Pues nox ayan lo que cꞌani ichꞌami xeꞌ merato ichꞌami y tamar era war iche meyra mabꞌambꞌanir este que ixchamsan tuaꞌ ichꞌami lo que icꞌani. War ixcꞌuxnaqꞌui meyra tamar lo que ayan tuaꞌ otronteꞌ, y cocha machi uyubꞌiox ichꞌami war ixqꞌuijna tamar. Pero machi war ichꞌami lo que icꞌani era umen que machi war icꞌajti taca e Dios. 3 Pero jay ixixin icꞌajti lo que war iyusre era taca e Dios machi war ichꞌami umen que war icꞌajti taca inteꞌ mabꞌambꞌan bꞌijnusiaj, porque war icꞌani tuaꞌ taca itzayjres ibꞌa tama iwerir tamar lo que cꞌani ani ichꞌami era. 4 Ajmabꞌambꞌanirox, ¿machi ca inata que tin e atzay uwira lo que ayan tara tor e rum war uxejbꞌe ut e Dios? Porque tin e ubꞌijnu tuaꞌ atzay uwira lo que ayan tara tor e rum war ubꞌijnu tuaꞌ aqꞌuijna uwira ut e Dios. 5 ¿O war ca ibꞌijnu que matucꞌa ucꞌampibꞌir lo que chꞌar tzꞌijbꞌabꞌir tama uyojroner e Dios tiaꞌ che que: “Unawalir e Dios xeꞌ turbꞌana tama cawalma umen Catata Dios war uyajta coit uwiron iraj iraj?” Bꞌan chꞌar tzꞌijbꞌabꞌir tama uyojroner e Dios. 6 Pero Cadiosir war utacrion meyra taca ucꞌunersiaj bꞌan cocha chꞌar tzꞌijbꞌabꞌir tama uyojroner: “E Dios uxejbꞌe ut tin e war uche ubꞌa que jax taquix tara tor e rum, pero war utacre tin e war umanxujres ubꞌa tut jaxir.” Bꞌan chꞌar tzꞌijbꞌabꞌir tama uyojroner e Dios. 7 Entonces osenic ibꞌa yebꞌar ucꞌotorer e Dios, y ira iyubꞌi lo que war uyareox e diablo sino que arenic tuaꞌ alocꞌoy tiwejtzꞌer y jaxir tuaꞌ alocꞌoy ajni tiut. 8 Cꞌotenic tut e Dios y jaxir tuaꞌ ayopa tiaꞌ turox. Ajmabꞌambꞌanirox, poquic icꞌabꞌ tama tunor e mabꞌambꞌanir lo que war iche, y poquic iwalma nox xeꞌ chagojr ijor xeꞌ war ibꞌijnu tuaꞌ iyajta ut e Dios y xeꞌ war ibꞌijnu tuaꞌ iyajta ut lo que ayan tara tor e rum ubꞌan. 9 Cꞌayenic ibꞌa tamar imabꞌambꞌanir, y aruenic tamar, y bꞌijnunic tuaꞌ iwacta inyajrer tunor e mabꞌambꞌanir lo que war iche. Y tin e war atzene tamar e mabꞌambꞌanir lo que war uche ucꞌani tuaꞌ aꞌru tamar y ucꞌani tuaꞌ asubꞌajra tamar. 10 Manxujresic ibꞌa tut e Cawinquirar Dios y jaxir tuaꞌ uchiox ixquetpa más nojta tamar jaxir.

11 Pues entonces niwermanuox, ira ixojron upater otronteꞌ porque tin e war oꞌjron upater inteꞌ hermano o xeꞌ war utuchꞌi ut, war oꞌjron upater uley e Moisés y war uche juzgar. Y jay war ache juzgar e ley era, war isutpa juez tujor y machi war icꞌupseyan tut. 12 Ayan inteꞌ taca xeꞌ uyajcꞌu uley e Moisés xeꞌ jax e Dios y jax taca jaxir xeꞌ aquetpa e juez tama tunor, y jax jaxir xeꞌ erer ucorpeson y xeꞌ erer utijreson. Y net, ¿chiet net tuaꞌ iyojron upater apiarobꞌ?

13 Pues ubꞌinic era tunorox xeꞌ war ixojron cocha era y che: “Coner o ejcꞌar cꞌani caxin tama inteꞌ chinam tuaꞌ caturuan yajaꞌ tama inteꞌ año tuaꞌ cachonma y tuaꞌ cache abꞌoro catumin”, che inteꞌ. 14 Pero nox machi war inata tucꞌa tuaꞌ anumuy tamarox ejcꞌar. Porque nox larox tacar e tocar xeꞌ achecta watar y wacchetaca nien iwira tiaꞌ ixin. 15 Pero lo que ucꞌani tuaꞌ iware jax era: “Jay e Dios ucꞌani erer caturuan y erer cache meyra chonmar.” 16 Pero nox machi war ibꞌijnu tamar era conda ixojron tamar lo que war ibꞌijnu iche y tamar era war taca itattzꞌi ibꞌa y machi war ixsubꞌajra tuaꞌ ixojron cocha era. Pero tunor e tattzꞌarsiaj cocha era mabꞌambꞌan tut e Dios. 17 Entonces tin e war unata uche lo que erach y machi war uche, mabꞌambꞌan war uche.