EZRA
LEKHABU
Ezra Lekhabu Sung Thu Umdan
Ezra lekhabua kon kimu, vannoi kivaihomna lenpen ahitoh kilhon in, nam mite aki-chon nau thudol aseijin ahi. 539 BC in Babylon lenggam chu Medo-Persia khutnoija anaum in, hichu gamchom’a kon galjam Judate ding in lungmon umtah anasoh in ahi. Hiche lekhabu hin Judate gam chom apat akile kit’uva Jerusalem houin asahphat nau thudol jong aseijin, chule vannoi thilsoh jouse chunga thaneipen Pakai ahi, tihi Ezra in aphongdoh e.
Ezra Lekhabu Jihpa Chule Ajih Kum
Mi kimkhat seidan in Ezra in Nehemiah lekhabu jong ajih ahi atiuvin, chule Ezra le Nehemiah jihpa hin 1 & 2 Chronicles jong ajih ahi tin thuchaina asem un ahi.
Hebrew Bible dungjui in Ezra le Nehemiah hi akigom khomin ahi. Hichu 440 BC kum’a kijih chai ahi.
Thusim Um Dan
Kipana Thupha! Kum sottah akichou doh nung un Judaten Cyrus kiti Persia mia kon in Babylon ana jouvin, chuin Judate Jerusalem akile uva, Houin sah abanjop diuvin phalna apen ahi.
1
Cyrus Lengpa Judate Asoh Chan Naova Konna Kile Kit Dia Phalna Apeh
1 Persia lengpa Cyrus vaipoh kum masapen chun Pakaiyin Jeremiah komma anaphondoh thuchu ana guilhunsah tan ahi. Pakaiyin Cyrus lungthim ana suthouvin alenggam pumpia thuphon khat simphong dingin anathot doh tan ahi. ✡ Jeremiah 25:11; 29:10 2 “Persia lengpa Cyrus thupeh chu hiche hi ahi, Pakai van Pathen in leiset chunga leng gam jousehi keima eipe tan ahi. Aman Judah gamsunga Jerusalem ah ama dinga Houin khat tungdoh dingin eingansen ahi. ✡ Isa 44:28 3 Mi koihileh ama mite ho jouse chu Jerusalem’a nache theiyu ahitai, Nangho Jerusalem’a nacheova Pakai Israel Pathen Jerusalem minna nahoupao Pakai Houin chu nagasah phat diu ahi. Chule Pathen in naum piuhen! 4 Amite ahingdoh tua hingnalai jouse chu hoikom munna khopem hijongleu, akhopem nao gam'a miten sana le dangka a ahin kitopi diu, thilto le gancha jong apehdiu, Jerusalem khopia Pathen Houin sahdoh teina dinga deichoma athilto diu kalvalla hijat pichu ahinpeh tha diu ahinalaiye,” ati. 5 Hijouchun Pathen in thempu hole Leviho lungsung ahin choh thouvin, Judah leh Benjamin phung lamkai ho Jerusalem a acheuva Pakai houin agasapha dingin asol tan ahi. 6 Aheng akomhon apanhu na in sana le dangka, thil le lo chuleh gancha jong apeuvin chuleh akholjin naova acholam diuvin jong apeuvin ahi. Amahon acham chamma ahin phaldoh’u chung chon in thil manlu tah tahjong tamtah apeuvin ahi. 7 Lengpa Nebuchadnezzar in Jerusalem houin na anakoi khontheng hojong chu Cyrus lengpan amaho pathen houin a kon in ahin ladohtan ahi. 8 Cyrus in Persia sumchingpa Mithredath chu hiche thilho jouse chu asimtoh a Judah gamma kilekit ho lamkai pa Sheshbazzar khutna apehlut tan ahi. 9 Noija hohi hichea thil kilepeh hochu ahi:- Sana a kisem kisilna kongho - somthum, dangka a kisem kisilna kong-sangkhat, gimnamtui lhutna lheng- somni le ko 10 Sana khon-somthum, chuleh dangka kisem khon-jali le somkhat, chuleh adang dang-sangkhat ho chu ahi. 11 Hicheng chu abonchan sang nga le jail alhing in ahi, sohchang mite Babylon gamma konna Jerusalem geija ahintol tou chun Sheshbazzar kitipan thilkeo hijatpi hi ahintol tha tan ahi.
DRAFT COPY