Hebrew K'uyalhdukne Buts'ó K'eyiguz-i
1
'Andit 'udek'ez dzin whe Yak'usda duYe' 'en be nebulh yaílhduk
1 Lhat-un 'ink'ez lhelhts'un un'a, niz haóodanzut, Yak'usda be nus hoo'enne, 'enne bube netsoda'ne bubulh yaílhduk.
2 'Et njan 'andit 'udek'ez dzin whe Yak'usda duYe' 'en be nebulh yaílhduk. 'En za 'uja ooBá ndai la yut'i-i, 'i ts'iyawh ooch'e' yutileh, 'et whuz un'a ooBá yutl'ahón'ai. OoYe' 'en be 'uja ts'iyaitsuk 'uhóonla.
3 'En za 'unt'oh ooBá ye dizti'-i, 'i whunénulhtun. 'Ink'ez ooBá dant'oh la, 'et ooYe' 'en soo ts'ih'un yundult'oh. Ndai la 'uhóonla, ooghuni ulhtus-i be yalhduk-un, 'i be ndulcho hoontun. 'En za 'uja, nelubeshi 'i ts'iyawh neba yuna'alhde. 'Et hukw'elh'az 'et yak'uz ts'e Yoodoghun ncha-un, 'et nailhni ts'e yughu nátl'adida'.
4 'Et huwa lizasne buba nus ncha-un 'unt'oh. Ndi boozi' oogha ídilts'ut-i, 'i lizas buboozi' ba nus dizti' whé 'unt'oh. 'Et 'uhoolcho whe buba ndo 'unt'oh.
Yak'usda ooYe' 'en lizasne buba ndo 'unt'oh
5 Ndiz un'a nja dúhoont'oh, Yak'usda 'aw 'ilhoghun lizas 'et ndulhúbudinel,
“Nyun sYe' 'int'oh.
'Inka 'andit dzin sYe' sinli',
whuz un'a nyoozúszi.”
'Ink'ez njan cha Yak'usda 'utni,
“'En ba 'uBá tisdleh
'ink'ez si sba sYe' tileh.”
6 'Ink'ez 'udechoo whuzdlí-un, Yak'usda doo cha ndi yun k'ut neítalhtelh whe 'et ndutni,
“Yak'usda oolizas,
'enne ts'iyawh hits'u teni' noolhdzin.”
7 'Et dulizas bughu yalhduk whe nja dutni,
“Oolizas nilhtsi k'un'a 'ubinla.
'Enne yuba 'ut'enne 'uhint'oh
'ink'ez kwun nudúnat-i k'un'a nabulhtsi.”
8 'Et hoonts'i duYe' yughu yalhduk whe ndiz un'a 'et ndutni,
“O Yak'usda nts'e la whulerwe inli-un,
'et 'i 'ilhiz wheni 'unt'oh.
'Ink'ez ts'ih'un un'a k'une' whutal'en.
9 Ts'ih'un 'uhoont'oh-un za hukw'entsi'.
'Uk'únulhe'ust'en-i, 'i oots'u dintni.
'Et huwa O Yak'usda,
nYak'usda ndi khe 'ilho didowh-i,
'i dune be ba ts'odilhti'-i 'unt'oh,
'i gha budzi hoont'i',
'i nts'ú ditnine buba nus lhai be nyúlhtlo.”
10 'Ink'ez 'udun cha ooghuni 'uk'eguz whe 'et ndutni,
“Moodihti nyun 'udechoo whe' whudit'en 'et whuts'un, ndi yun cha inla.
Nla be yat cha 'uhóonla.
11 'I ts'iyawh gak whutáleh,
'et hoonts'i nyun 'ilhiz wheni 'int'oh.
Ndai la inla-i, 'i 'ants'i naih 'ujut 'ulhih te whuz un'a 'uwhutanelh.
12 'Ink'ez nahuyitsuz-i, 'i k'un'a lhenántantelh,
'ink'ez 'uyoo natidleh.
'Et hoonts'i nyun whuz un'a za 'et ndint'oh.
Nye yus k'ut 'aw whulátanálhuhóo'oh,”
Yak'usda 'et duyúlhni.
13 'Et hoonts'i Yak'usda oolizas 'aw 'ilhoghun hoonts'i 'et njan dúlh budinel,
“Nch'az ditníne ts'iyawh nke buk'ut natalhyis-un mba butisdlelh.
'Oh de 'et whuts'un 'et duhóoja de,
nailhnih ts'e sughu tandalh.”
14 'Et ndiz un'a nja dúhoont'oh, ndunne lizasne, 'enne nudúdeh 'ink'ez be 'ustlene 'uhint'oh. Yak'usda whébalh'a' 'et de la mbene la ndi bé uzdujis-i nets'u tíkulh, 'et huba neba ne'ut'enne 'uhint'oh.