1 Ісус пгендя ко пескєре сікаде:

— Андро светос міндик ейла ода, со ле манушен цірдел ко бійнос, та біда одалескє, прекал касте ода авел. 2 Федер увлягас, гой лескє те фійґінен мельнічно бар андре мен і те чівен лес андро морьос, сар спокушінела хоча єкгєс кадале цікнендар. 3 Меркінен пал туменде. Те кєрела тийро пграл бійнос, повакєр лега, а те покаїнелапес, одмук лескє. 4 Минґ те ефтавар про дівес кєрела о бійнос протів туте і ефтавар про дівес манґєла тутар, гой те одмукєс лескє, і пгенела тукє: «Каїнав ман», — одмук лескє.

5 Апостоли пгенде ле Раєскє:

— Барар андре аменде патябе!

6 Рай ленґє отпгендя:

— Те кє туменде гін патябе андро горчічно дів і тумен пгенена ле тутовскєре дубоскє: «Цірде тут аврі ле коренєнца і садзін тут андро морьос», — акор ов шунела тумен.

7 Домукага, со кє туменде гін о совґас, саво оврінел або пасінел ле бакрен. Чі пгенена тумен лескє, кана ов вісальола пале маля: «Ав сіґєредер і беш пажо скамін»? 8 Сіґєредер пгенена лескє авка: «Кєр манґє варесо те хан пре раті, а паліш препганд дерекос і совґалін манґє, адик ме хава те піява, а паліш коркоро хага те пієга». 9 Чі палікєрел о хулай ле совґаскє важ ода, со ода кєрел, со лескє есас пгендо? 10 Авка те тумен, кана кєрен ода, со туменґє есас преказіме, пгенен: «Амен сам совґі, саве ніч на тердьон, амен кєрдям чак ода, со маїндям те кєрен».

11 Кана Ісус джялас андро Єрусалім, то преджялас машкар Самарія те Галілєя. 12 Кана Ов заджялас андро єкг баро ґав, одя Лес ужаренас деш прокажоне мануша. Оне тердьонас надур 13 і фес вріскіненас:

— Ісус, Танітов! Посаїн амен!

14 Кана Ісус лен дикгля, Ов ленґє пгендя:

— Джян і сікавенпес ле рашаєнґє.

Оне ґейле і пало дром ачіле жувже. 15 Єкг лендар, сар дикгля, со ов гіно сасардо, вісаліля і баре ганґога ашарелас ле Девлес. 16 Ов пейля ко Ісусоскєре піндре і палікєрелас Лескє. Ода мануш есас самарянос.

17 Ісус пгучля:

— Чі на деш мануша пес жувжарде? Та кай гіне авер ейняджяне? 18 Хіба на аракгляпес ані єкг, ко вісалілялас, гой те ашарен ле Девлес, чак када єкг цузопгувакєро?

19 І пгендя Ісус лескє:

— Уші і джя, патябе тийро ратиндя тут.

20 Єкгвар фарісєї пгучле Лестар, кана авела Краліпе ле Девлескєро. Ов отпгендя ленґє:

— На авела Краліпе ле Девлескєро авка, со шай ейла лес те дикгєн. 21 Ніко на ейла гонно те пгенен: «Акєс гіно», або: «Одя гіно». Бо Краліпе ле Девлескєро гіно машкар туменде.

22 Паліш пгендя Ов ле сікаденґє:

— Авела айсі овра, кана тумен камена те дикгєн хоча бі єкг дівес ле Час Манушенґєрес, но на дикгєна. 23 Туменґє вакєрена: «Акєс гіно» або «Одя гіно», та тумен на денашен те дикгєн. 24 Бо, сар о перумос бліскінел пало єкг аґор нєбоскєро ко авер, авка ейла о Ча ле Манушенґєро андро дівес, кана Ов вісальола. 25 Та єкгвар Ов мушінел іґєн бут те семвединен, а паліш ейла отчідо кадале родога. 26 Сар есас андро Нойоскєре дівеса, авка ейла андро дівеса ле Час Манушенґєрес: 27 мануша ханас, пієнас, ленас пескє ромня, джянас роместе джі ко ода дівес, сар о Ной заґейля андро ковчег. Акор авля баро пані і саворен мурдардя.

28 Авка есас те андро дівеса, кана джівелас о Лот: мануша ханас, пієнас, цінкєренас, бікєнкєренас, садзінкєренас і кєренас о кгєра. 29 Та андро дівес, кана Лот авля аврі андал Содом, акор кєздиндя те перен брішиндескєро яґ те сіра пало нєбос і саворен мурдардя.

30 Авка ейла те андро ода дівес, кана сікавелапес о Ча ле Манушенґєро. 31 Андро ода дівес, ко ейла про падос, а ренті лескєре андро кгєр, те на мукєлпес тейле пал ленде. І ко ейла пре маля, те на вісальол пале. 32 Паматинен Лотоскєра ромня! 33 Сако, ко камела те ратинен пескєрі вовді, ода нашавела ла, а ко нашавела пескєрі вовді, ода сохранінела ла. 34 Пгенав туменґє: андре оди раті дуйджяне ейна про єкг тган, єкгєс залена, а дуйтонес мукєна. 35-36 Дуй ромня андре єкг ірнінена е дів, та єкга залена, а дуйтона мукєна* 17.35-36 Андре варесаве манускріпти гін лава: «Ейна дуй мануша пре маля, єкгєс залелапес, а дуйтонес мукєна»..

37 Сікаде пгучле Лестар:

— Кай, Раєя?

Ов ленґє пгендя:

— Одя, кай трупос, одя ейна те орли.