1 Hacme, ne me pajõ Pahhiti pê Pahpãm to me cati prãmte,

me cumã me pahcakôc!

Ne cupê me pahpytàr catê pyrên me pajakryti to,

cu me cumã cre!

2 Hacme, ne Pahpãm to me amji kam hapac xà jũrkwa mã me axà!

Ne curia cu ha cuna mã,

cute me pahto impejti ita pyrên me pajakryti to

cumã me amji jarẽ,

ne pahtỳj me cumã cre!

3 Ne mẽr ampo na mã cu ha me to hane?

Nee mã ampo na cu ha me to hajỹr nare.

He me pajõ Pahhiti pê Pahpãm carôt tỳjti ata ri,

pjê cunea kam,

pahpãm cahàc cunea jõ pahhiti carôt tỳjti atajê

jirôa pê cati.

4 Ne pjê cunea to ihhimpej,

ne ahkre ryti rũm to ihhimpej kam pra,

nema kẽn kàhti ata mã to hahê.

5 Ne taa cute côxwa ton ata to ihhimpej,

ne taa hanea ne cute pjê ton ita to ihhimpej.

6 Cwỳrjapê cu ha ma me pra ne Pahhiti cuna mã

me pahkõn krã na me jỹ,

necumã impejti na me harẽ.

Hacme ne me cumã:

“Apê me ijõ Pahhiti pê me iton catê” hane.

7 He cupê me pajõ Pahpãam to Pahpãm,

ne me papê mehkwỳ, mã me pajamã.

Ne me papê hõ parxare pyràac,

mã ihtỳj me pamã me pahte ampo pej na prãm xà atajê gõ.

Cwỳrjapê cu ha ita kam

cute me pamã ihcawpa xà atajê na me kampa:

8 “Nee ca me apê me aquêtjêa ne me gàprãr xi nare.

He pê me aquêtjê me hàprãr xi cwỳrjapê

pêpõti kam me hamreare ata kam,

ajco amji caxuw cô na me icyt to me ipa.

9 Pê wa caku te cwarẽnta kam,

me kam mare mã icarôat kôt

ajco ampo catia pihhoti atajê ton to ipa,

ne ajco me cumã harte,

ne ajco me cumã cô gõ,

ne ajco me curê xwỳn pê mentête amtà.

Pê mento jĩa to ahna me ipupun cakrô,

cute me icapi prãmte amji caxuw me icyt,

ne ajpẽn mã me ijarẽnto:

‘Nee Pahpãm me pajamãr pej nare’ hane.

10 Pê wa caku jàhtôti ita cunea kam me aquêtjê itajê kam icryc,

ne ma amehcaca ne pa amji mã me to icakôc to:

‘Mehkrã kên atajê te amji kam hapac xà kêanre,

ne cama ijarkwa jirô pê mehpỳpỳm to me mõ,

ne ma ame ijarkwa par caca’ hane.

11 Ne wa me kam icryac to icryc,

ne ampeaj kam ite me cumã amji jarẽn,

ne me ahna amji jarẽn tu, ne me cumã:

‘He me gũpar nare ita kam,

ite pjê to me amã ijũjahkre ata mã me acunea xàr.

Ne kam me akôt xà ata kam,

ca ha nee jũ caxuw curi me axàr nare.

Na ca ha ita ri põti ita kam me atyc pa,

quê ha me akra pit pjê ata mã me axà’ hane”.

Hõ, me pajõ Pahhiti, amcro ita kam mepamã ihcawpa to hane,

na cu ha pahtỳj me kampa.