1 Ỹhỹ me ikwỳ, por ca me acunea catyt kam me apa atajê,

Pahpãm pyrên me gakrya ne.

Mempejti catêjê te me Pahpãm mã catihti,

ne impejti jarẽn xà ri quêt ahnaa.

Na ca ha atỳj me cumã cati ne impejti jarẽ.

2 Ca ha Pahpãm mã catihti ne impejti jarẽn xà ata kam,

atỳj me cumã cre ne me gàkôr xà cakô,

ne cumã cuhkõnre cakô.

3 Ne Pahpãm mã me acrer xà intuwti to

kỳj cati pêa mã, me cumã cre,

ne cuhtõj cajrõn pejti ata to,

ca ha me gakryti to me cumã cre.

4 Ne mẽr ampo na mã cu ha me to hajỹr to prãm?

Nee mã ampo na nare, he Pahpãm jarkwa pê ri quêt,

ampeaj kam, ne catyt kam,

ne quêt cute ampocunea ton xà na,

ihtỳj amji jarkwa na amji kampa.

5 Ne Pahpãm mã, pjê kam mehkrĩ atajê cunea kĩn,

mã me hamãr to impejti.

Ne cumã ihtỳj catyt kam me ipa atajê kĩn,

ne catyt kam, cute mehkwỳ to amji kam hapac na

cumã me to prãm.

6 Pê Pahpãm ihcakôc xàa to, cama ihcakôc,

ne ramã côjkwa to,

ne kamcaxêre me ampo cunea ihkrĩ atajê to.

7 Pê Pahpãm côxwa cunea to cuprõ, ne hỹr xàa kam hỹr,

mãr quê hàhhuc tu rohnỳtti mã.

8-9 Pê cama Pahpãm pjê ton xà ata to cumã ihcakôc,

pê ramã pjê amji to,

ne ampo cunea te amji ton xà na cumã harkwa,

pê ramã ampo cunea amji to.

Na ca ha pjê cunea kam me akrĩ itajê,

ate atỳj amji mã me Pahpãm cupa xà.

He me pahcunea mã,

pahte amji mã me Pahpãm cupahti kam

me cumã amji jarẽn xà.

10 Ne mẽr ampo na mã pahte me to hajỹr xà?

Nee mã ampo na nare.

Pahpãm ihtỳj krĩxàre te me ajpẽn par xà kêanre atajê to

me cupê hamre,

mãr quê nee ihkôt me ampo kên ton to me ipa nare.

11 Ne quêt Pahpãm te ampo na amji ton xà ata ri,

nee ihkôt hamre xà nare,

ne ihtỳj quêt cute ahna amji ton xà, ne ahna to hãm ita na.

12 Pê Pahpãm cute me pahto hõ tekjê xà caxuw

amji mã me pahcapi,

na ri hũrên me pajakryti.

He ampeaj kam quê ha jũ ri, krĩ nõ kam,

Pahpãm toamji mã me hõ Pahhiti,

ne por toa amji mã mehhimpej atajê,

quê ha ihtỳj hanea ne me hakry.

13 Ne ampo na mã

cu ha cumã cati me impejti to cumã me cre?

Nee mã ampo na nare.

Côjkwa pĩn Pahhiti pjê kam mehcunea mehkrĩ atajê cunea pupu.

14-15 Ne cutea ri me pamã pahte amji kam me pajapac xà ton,

ne ihtỳj pahte me ampo cunea ton atajê na me pahpupu,

ne kam amji kampa.

Ne ihtỳj ihkrĩ xà ata pĩn pjê kam,

por mehcunea mehkrĩ atajê pupu,

cwỳrjapê cu ha pahtỳj me cumã cre.

16 Ne mẽr ampo na mã cu ha me cumã cre?

Nee mã ampo na nare.

Jũ wỳr quê Pahpãm krãhtare jõ pahhi tehcajpar nare kam,

quê apu amji mã hamã, ne curê xwỳn tohjê.

Ne quê ha te krãhtare pahtỳj cakrô,

quê Pahpãm cumã carôt jõr nare,

quê nee ihtyc xà ata jahpan nare.

17 Quê me pamã cawrô carôt tỳjti cati cakrô,

jũ wỳr quê Pahpãm ihtehcajpar nare kam,

quê cawrô ata me pahcurê xwỳn pê me pahpytà.

18 Ne Pahpãm ihtỳj quêt amji mã me hũpahti atajê jamã.

Cu ha me Pahpãm jàhcaprĩa kam,

cumã me pahkĩn rohnỳtti mã ata te,

me pahtehcajpar xà naaracri me hikaj,

quê ha ihtỳj me pajamãr to ipa.

19 Ne quê ha ihtỳj pahte me pahtyc xà jahpan na me pahto,

cu ha me hahpa.

Ne prãm catia te cator xà ata kam,

quê ha nee prãm ata te me pajipej na hamãr nare.

Ỹhỹ me ikwỳ,

cu ha Pahpãm te me pahto impejti itajê cunea pyrên

me pajakryti na cumã me amji jarẽ,

ne cumã me cre to hane he.

20 “Ỹhỹ me ijõ Pahhiti, apê me itehcajpar catê,

ne apê ampo kên pê itête gàmtàr catê.

Na wa itỳj aracri ahna me gikaj to me ipa ita na.

21 He apyrêan ri me ijakryti.

Na wa itỳj apejti ita to amji mã me ihimpej to me ipa.

22 Ne wa itỳj cormã aracri me gikaj to ipa ita kam,

ca ha gàhcaprĩa kam, amã me ikĩn ita na” hane.