1-2 Pahpãm pyxit peaj ne cute amji jahkre pej catia to cati. Ne cumãa ri jũ mã pahte amji kam me pajapac xà ata na me pajahkre pej. Ne cupêari me pahkrã kreti to cute me pamã hahkre catê, na cu catyt kam ihkôt me papajahkre pej.

Pahpãm te amji jahkre pej catia ata pê me hũmre nõ te hũrkwati catia ton, ne kam amji kĩn nõ ton ata pyràac. Ne cute me hõ jàhtôa to cuprõn, ne hàpàn xà na me cumã hãm. 3-6 Ne hanea ne cute cumã me hàpên catêjê kwỳ kujahêc, krĩ cape na, mãame cumã me hàkjêr to me pra, mã cute me to cuprõn xà caxuw me cumã:

— Me amã prãm, ne me amã kôr atajê! Ajpên ijũrkwa wỳr ame pra neame apà ne ame ikõ! — hajỹr.

Ita jĩkjê na mã Pahpãm te me pamã ampo to hahkre xà itajê pê me pajõ pyràac. Ne ihtỳj me pamã to hàkjêr to ipa ne me pamã:

— Ate me amji jahkre kêatre ne me akrã nare atajê! Ajpên iwỳr me apkjê, ne ite me amã ikrã kreti to hahkre xà ita na me ikampa, ne ateme amji jahkre kêt itajê mã me hikra. Ne catyt kam amji to me ajpa. Ne me akrã kreti itajê to me hahkre, ne me hahkre pej. Ampo na? Me akrã kreti itajêa kôt ca ha quêt me apej pêa mã me apa — hajỹr.

7 Ỹhỹ me ikwỳ, ca ha mehkêanre nõ to ate impejti to prãmte cumã, cute amji kam hapac xà pejti to hahkre, quê ha cama ajte apu akam incryc, ne ihtỳj apu ato kên prãm. Ca ha ate jũm te hajỹr to impej prãm to apu amõr na, ca ha caa apu amji to akênjapên to mõ, ne apu apahàm. 8 Cwỳrjapê ca ha cute me hajỹr catêjê to tojnõ, ne nee apu catàtkrena me acjêj nare. Ampo na? Nee mã ampo na nare, ca ha ate ampo kên tête cumãn jahpan xà na, quê ha ihtỳj apu acurê.

Ne mehkrã kreti te nee mehajỹr nare. Ca ha ampo kên tête cumã, quê ha ate ampo kên tête cumãn xà ita jahpan xàna, ihtỳj cumã akĩn. 9 Ne me hũpar pejti catêjê ca ha me jũm japackre, quê ha hipêr me hũparkrã kreti ata to amji mã me ajcamẽ. Ne me hũmre catyt kam me ipa atajê quê ha hipêr me hũpar to me ajcamẽ, ne catyt kam ame ipa.

10 Ne quê ha jũmjê amji to ihkrã kreti to prãm, ne mam cati mã amji mã Pahpãm cupahti to ipa. Ỹhỹ, por jũm amji mã Pahpãm pejti cupa ata, quê ha ihtỳj cute amji kam hapac xà impejti te Pahpãmcajpuaw ata to amji to ajpa. 11 Ne mehkrã kreti atajê, mehkrã kre atajêa mehtehcajpa, mã amji to meipijapar to me irya to me iry.

12 Ca ha ate amji mã Pahpãm krã kre te amji jahkre pejti ata pyr na, ca ha atỳj to amji mã ampopejti jàhtôa ne to. Nãmri ca ha ate amji pê Pahpãm krã kreti ita caca na, ca ha me pahcurê xwỳn pê Xatanaj te amji kam hapac xà kêanreata py ne caa akên mã amji jaxà.

13 Ne Xatanaj ata pê ihhêj rũm jũm cahãj xyre ata pyràac, mã me hũmre to hapactu to pit mã amji kampa, ne ma apu Pahpãm kôtampo pej krã kreti itajê to amji kam hapac caca. 14 Ne hãn ne ikre jarkwa mã ihkrĩ to ipa, ne krĩ cape te amji jacjên kam ipa. 15 Ne hãn ne me hũmre, cute amji kamme hapac xà wỳr me pra atajê jator to me cumã hàkjêrto ipa. 16 Ne cute me amji cajpẽr, krã kre nare atajê mã harkwa to:

— Ajpên ijũrkwa wỳr ikôt mõ, ne ipjê pê ina gũhkra! 17 He, ampo to me pajàhkĩj itajê ri quêt impej! Ne kwỳr te pro to me pajàhkĩj itajê ri quêtpapimxuar pê pahte mehkur xà, ne ampeaj kam cuxwa! — hane. 18 Mã me hũmre jàhtôa ne hãn ne ihtỳj me kampa, ne amji mã me to hane, ne ma mehtyc xà wỳr me pra, cute me amji jahkre pej nare kam. Ne ramã me hàhtôa te amji mãmehkên xà ita capi, na quê ha ma jũ caxuw cuhy tyc xànare ata wỳr me pra.