15 Ne Jeju te hanea ne ihkôt me ipa catêjê mã:

— Quê Pahpãm na mehkwỳ nõ acuna mã ihkên xà nõ to, ca ha ma hỹrmã mõ, ne ahte ajpẽn na me ajkrut peaj ne cumã cute ato kên xà ata jarẽ. Quê ha cute aparna, ca ha curia hacpỹ mã me ajpẽn to impej.

16 — Quê apar nare, ca hacpỹa mã amji jaxà ne amji caxuw jũmjê to ajkrut, nare, mencrê ne me haprô, ne ma hỹrmã me to mõ. Quê ha cute ato kên xà na me hõmpun xà atajêa na me cumã harẽ. Nãmri pê mam ramã Pahpãm jõ kàhhôc harẽn to hane he: “Quê jũm pyxit peaj mehcukij catê wỳr tẽ, ne cumã jũm jarẽn to kên na, quê ha nee impar nare, nãmri quê ha jũmjê incrê ne cute hõmpun xàa na ajpẽan kôt me harẽnna, quê ha ihtỳj mekampa” hane. Quê ihhêaj to me akampa ne ihkên ton jicu, ca ha hacpỹa mã me ajpẽn to impej.

17 — Quê ihhêaj to me akwỳ nõ ata me apar nare, ca ha Pahpãm na mehkwỳ mã ihcunea naharẽn pa, mãr quê taa me acuxà cumã mehcakôc. Quê ha nee Pahpãm na mehkwỳ par nare na, quê ha cupê mehcahkrit pyràc, ne cupê Pahpãm jarkwajahkre kêt catêjê nõ, ne cupê Pahhiti jarkwa jirô pê ihpỳpỳm catê. Ne cupê amjia kôt ipa to prãm catê, ne ihtỳj ampo kêanre ton to ipa.

18 — Ỹhỹ, pom ate pjê kam ampo kên cahpêrhyr ita, haneane côjkwa kam ate ihcahpêrhyr. Ne hanea ne ate pjê kam ampo pej to tojnõ ita, hanea ne côjkwa kam ate to tojnõ.

19 — Ne hanea ne pjê kam cute ito amji mã mehhimpej atajê, quê ha jũmjê ajkrutne ijaprỳa na, ajpẽan kôt me hàhwỳr na, quê ha côjkwa kam Inxũ Cati ihtỳj ampo na me hàhwỳr xà ata to me cumã. 20 Ne quê jũ ri jũmjê incrêre cakrô, amji mã ijaprỳ to pôj xà ata kam, wa ha ramã ame cahê na ipa — hajỹr.

21 Mã Petrô Jeju na hàhtêp ne ihcukij ne cumã:

— Ijõ Pahhi, jũ mã wa ha? Xà wa ha ikjê te ito kên to xet xà ata na kam icryc jicu, ne cute ito kên atajê na to tojnõ to xet? — hane.

22 Mã cumã:

— Jũ wỳr ca cute ato kên xà ata jahpan xà na, kam acryc jicu to xet peaj. Ca ha cute ato kên ata na to tojnõ to xetxẽnta, ne nee cormã kam acryc jicu to tojnõ nare — hane.

23 Ne Jeju mehcunea mã ihkôt harẽn to:

— He côjkwa kam Pahpãm himpej xà te amji kam hapac xà pê ihhêj rũm jũmjê te hõ pahhi mã me hàpên, ne cute ajpẽn mã me hõ newto mehcakôc, ne ahna me ajpẽn par ata pyràac. 24 Ne mam cute ihpore to, cute to new to mirjãw ata, pahhi ata wỳr cator. 25 Mã cumã hàpên catê ata pê cute to new catihti ata caxuw ihporejamreare. Mã hamre, hõ pahhi te jũm te to new atato ampo na hàhpan na me mẽn, hĩxi me mehkra mea mã. Ne hanea ne hàhcukrêj cunea to hõ new ata caxuw ihpore na me to hàhpan par na, cute me mẽn.

26 — Mã cumã hàpên catê ita hõ pahhi cuna mã ihkõn krã na hỹr, ne cute ahna hàhwỳr ne cumã:

— “Ijõ pahhi, ito amji mã awjamã, wa ha itỳj amã ijàmjõr to imõr ita kam ijàmjõr pa!” hane. 27 Mã hõ pahhi mã caprĩ xà, mã cute hõ new catihti ata mea mã, ihcunea na to tojnõ.

28 — Mã ma cute hõ pahhi to new ata na tẽ. Ne cute jũm te ihpore hy te xẽj peaj to, to new ata cajpar. Mã cute jũm ita jõkre riihcuhtom, ne apu to ahcujrõ ne cumã:

— “Imã amgõ! Ampo to ate ito new ata jahpan xà na imã amgõ!” hajỹr.

29 — Mã jũm ita cuna mã ihkõn krã na hỹr, ne ahna hàhwỳr, ne cumã harkwa to:

— “Ito amji mã awjamã, wa ha itỳj amã ijàmjõr to imõr ita kam ijàmjõr pa!” hajỹr.

30 — Cakrô, mã nee ajte cute impar nare, ne ihkên mã mẽn. Ne cute me hacjên xà kam haxàr, mãr quê curia ihcuhhê, ne ihcuhhê xà ata to cumã amgõ.

31 — Mã hamre, me hàpên catêjê na mehkwỳ nõ, cute ihkên ton ita na hõmpun, ne apu kam incryac to incryc, ne ma hõ pahhi te to tojnõ ata wỳr tẽ, ne cutecumã harẽn par.

32 — Mã pahhi te hipêr cumã hàpên catê ata na hàhwỳr ne cumã harkwa to:

— “Imã hàpên catê kêanre ita! Ca ate iwỳr, wa ite ate ito new catihti ata na ato tojnõ, ca ma tẽ. 33 Ne nee ate amji cuxà akwỳ nõ ata caprĩ, ne to tojnõ nare icuxà, pom wa iteacaprĩ ne amã hikran, ca ma tẽ ita? Ampo na mã ate icuxà to hajỹr nare?” hane. 34 Ne hõ pahhi ita apu kam incryac to incryc, ne ma me hacjên xà wỳr cute cumã hàpêncatê ata kujahêc, mã cute me haxàr. Na quê ha curia ihcuhhê, ne amji pupun to kêanre to ihcuhhê, ne xacute ampo to hõ pahhi to new atajê cunea jahpan xà na hàmjõr pa, necormã amji caprã — hajỹr.

35 Ne Jeju te me cumã hũjarẽn jicu xàa kam me cumã:

— Ca ha cute me ato new catêjê me, cute me ato kên catêjê atajê to tojnõ ne me hicu nare na, quê ha côjkwa kam Inxũ Cati me acuxà nee ate me to kên atajê to tojnõ ne hicu nare — hajỹr.