1 Taa numanyan tung pira pang kaldaw, ti Ginuu ta nagpanulduk-tulduk si tung dumang mga tauan nang pitung puluk may durua ang para pamakdulan na ra ka ta mga katengdanan nira. Pagkatapus ya ray pinanuw̱ul nang mamagpanaw ra ta taludua-taludua nga tauan ang para mamagtukaw ra tung anya duun tung mga lansangan may tung mga baryu ang kumpurming nag̱aplanu nang bisitaan. 2 Numanyan, baklu ra papanaway na yang mga tauan nang atii, pinampagngel na pa ta sasang pananglit ang mag̱aning, “Duru-durung mga tau ang simpan dang mamagpamati tung bitalaw. Yang kaalimbawaan nira, maning pa tung paray ang malapad ang arayeg̱en da. Piru durug kakulang yang mga manig̱ayeg. Purisu kumus yang Dios yay maning pa tung pag̱erekelen yang ayeg, mag̱ampuamu ra tung anya ang may duma pang matuw̱ul nang mamagtaw̱ang ta ayeg yang paray na. 3 Purisu ala, magpanawamu ra tung pag̱ipanuw̱ulu tung numyu. Piru mangamanamu. Yang kaalimbawaan mi, yamu maning pa tung mga karnirung mga butu pa ang duunamu ra ipaangayayu tung mga taung maning pa tung mga kirung talunanen ta kaiseg. 4 Ug̱aring indiamu ilem mag̱ekel-ekel ta mga kuarta pati mga puyu-puyu ang pariu ka tung pag̱aekel-ekelan ta mga manigpalimus. Maskin mga sandalyas pang mga risirba mi, anda ray kaministiran ang mag̱ekel-ekelamu pa. Kidispuis pa, alimbawa kung may mga taung mabag̱as mi tung dalan, indiamu magpaerek-erek ang magpakalingat ang mangesen-kesen tung nira. 5 Dispuis kung ariamu pang balayay ngangay, bakluamu ra magtakwal, aningen mi yang may balay ang ‘Yamung tanan ang pagtinir asan, puidiamu rang pakaayenen ta mupia yang Dios.’ 6 Pagkatapus, kung mamananged tanira tung ipagpakaw̱ut mi tung nira natetenged tung kaayenan ang atiang sinambit mi, tung nira ra ka man mag̱ineteg. Piru kung indi ra mamananged, indi ra ka mangapakinaw̱ang tung kaayenan ang atiang ipakdul da rin yang Dios tung nira. 7 Dispuis pa, kung ariamu pang balayay patakwalay, ay duunamu ra ilem magdayun ang mag̱ineteg. Ang papaanenamu ra nganing nira, mamanganamu ra ilem ang anday dalenden mi. Ay yang sasang manigparakaw̱utun, bag̱ay kang asikasuen tung mga kaministiran na ang yay maning pa tung suul na. Indiamu ilem maglakted-lakted tung duma-rumang balay. 8 Dispuis kung ariamu pang lansanganay nga distinu, kung risibienamu nira, kumpurmi ilem yang ipapaan nira tung numyu, ya ray pasalamatan ming risibien. 9 Dispuis, kung tinu pay may mga laru tung lansangan ang atia, pampamaayenen mi. Panganingen mi ka dayun yang mga tau ang, ‘Atia, ya ray pruibang pagpailala ang kinaw̱utanamu ra ka man yang puirsa yang paggaraemen yang Dios ang baklu.’ 10-11 Piru kung ariamu pang lansanganay nga distinu, kung alimbawa, indiamu ka enged risibien nira, tung paglua mi tung lansangan nira ang duunamu pa tung mga karsadag pagpanaw, yamu ra ag̱aaning tung mga taung atia, ‘Maskin apuk da ilem taa tung lansangan mi ang nadpet tung mga kakay yamen, pipien pa yamen ang ibutwan ang para asan da nga maladmaray mi ang yang kasalanan asan da ilem tung numyung mag̱ineteg. Piru naa w̱a yang dapat ang intindien mi. Pinakdulanamu ra ka ta lugar ming magpalg̱ud da rin tung paggaraemen yang Dios ang baklu, ang pagkatapus yamu kay panulmun.’ Maning tia, ya ray ianing mi tung nira. 12 Iugtulu tung numyu, kung kaw̱utun da nganing yang uras ang ipagpabungkaras yang Dios tung tanan ang belag̱an mga tauan na ang para sintinsiaan na, malakan-lakan pa yang sintinsiang dangaten yang mga tag̱a lansangan ang Sodoma kay tung dangaten yang mga taung tag̱a maskin ay pang lansanganay ang kumpurming indi ra namagrisibi tung numyu,” ag̱aaning.

13 Mag̱aning ti Jesus ang nagsugpat yang bitala na, “Iugtulu tung numyu, tung uri ta kaldaw, kanugun yang mabtangan yang mga taung tag̱a Corasin may yang tag̱a Betsaida. Kipurki kung duunaw ra rin tung Tiro may Sidon napagpalapus ta mga pruibang maktel ang pariu ka tung ipinagpaluaw duun tung mga lansangan nirang atia, siguru nabuay ra ka rin ang nangapanligna tung mga kasalanan nira. Nabuay ra ka rin ang nangapagsuut ta aw̱el ang magig̱ilek ang nangapagrumug ta kaw̱u tung mga tinanguni nira ang para asan da mamagpailala ang tanira pamanligna rang matuud. 14 Piru maskin indi ka man nangapanligna, kung kaw̱utun da nganing yang uras ang ipagsintinsia yang Dios tung tanan ang mga tau, malakan-lakan pa yang parusang dangaten yang mga tag̱a Tiro may Sidon kay tung dangaten yang mga tag̱a Corasin may tag̱a Betsaida. 15 Pati yang mga taung atiang tag̱a Capernaum, ya ka, kanugun ka yang mabtangan nira. Ay kipurki ang kanisip nira mamagkatinir da ta dengeg nirang mas abwat ang asta mamanungkuk da tung langit, ang pagkatapus duun da ka ilem mangalambeg tung pag̱aningen ang Hades. 16 Kapurisu ta yamung pag̱apanuw̱ulu, tandaan mi yang bitalaw. Kung tinu pay mamati tung numyu, katimbang nang yuu kay pamatien na. Piru kung tinu pay magpakuindi tung numyu, katimbang na kang yuu kay pangindian na. Kidispuis pa, belag̱an ilem yuuy pangindian na, kung indi, pati yang nagtuw̱ul tung yeen, ya kay pangindian na,” mag̱aning. Atia ya ray ipinampaetad ni Jesus tung mga tauan na baklu papanaway na.

17 Taa numanyan tung pagbalik yang pitung puluk may dura nga tauan ang atia, pinangampayan da ta kasadyaan nirang duru. Mag̱aning yang balita nira, “Ginuu, maskin nganing yang mga dimunyung pamagpasilaw̱et tung mga tau, kung lalangan nganing yamen, antimanung mamananged dang lag̱ing mamaglayas ay natetenged tung kagaeman ang ipinagpiar mu tung yamen.” 18 Mag̱aning ti Jesus ang minles, “Anday dumang pagpamalaru tung pagparanangeren nirang atia tung numyu, kung indi, duun da nga bistu ang ti Satanas ang pagmangulu tung nira talagang lumagpak da ka enged tung uri. Manulad tung kudlap ang gulpi ra ilem ang lumagpak. 19 Kapurisu asan da ngaintindiay mi ang matuud ka man ang pinakdulanamu ra yeen ta kagaeman mi ang para madeeg̱an mi yang pag̱apanuw̱ul ni Satanas ang atia. Maskin durug kaansianu tanira ang katulad ka tung mga iraw, maskin madalit pa ang katulad ka tung mga sipitan, kayanan mi ka enged yang tanan ang puirsa nirang deeg̱en. Indiamu maunu pa tung nira* 10:19 Ikumpalar tung Marcos 16:18.. 20 Ug̱aring ilem, kaministiran ang belag̱an masyadu ang yay ipagkalipay mi yang pagsurukuen yang mga dimunyu tung numyu, kung indi, yang pagkalipayan mi enged ang yamu rinisibiamu ra yang Dios ang yang mga aran mi ipinaglista na ra duun tung langit,” mag̱aning.

21 Yang uras dang atii, ti Jesus pinaeyangan da yang Espiritu Santo ta kasadyaan nang duru ang nag̱ampu tung Dios ang mag̱aning, “Amang makagag̱aem tung tanan, mag̱ing tung kalangitan may tung katanekan man, durug dakul yang pagpasalamatu tung nuyu. Ay pinapaglaw̱uk mu ra yang isip yang mga taung pagtalig tung pagkamataku nira ang para indi ka ilem maintindian nira sigun tung paggaraemen mung naang baklu ang nag̱ipagpakaw̱utu. Ang pagkatapus binuskad mu yang isip yang mga taung mga inusinti ug̱ud mamaresmesan da nira yang mga bag̱ay ang atia. Salamat, Ama, ang nagkamaning da ka man ta maning tia, ay natetenged ya kang lag̱i ay uyun tung kalelyag̱an mu,” mag̱aning. 22 Numanyan pagkatapus na ta pag̱ampu, dayun dang nagpasanag tung mga tau ang mag̱aning, “Yang tanan ang atiang nag̱ipagpalatayu tung numyu, luw̱us dang ipinag̱intriga tung yeen ni Ama. Andang pisan ay nag̱asangkad yang kabag̱ay-bag̱ayan yang pagkabetangu ang yuuy pag̱aningen nang Ana na, kung indi, tanya ilem ang pag̱aningenung Amaw. Pati tanya, anda kang pisan ay nag̱asangkad yang kabag̱ay-bag̱ayan yang pagkabetang na ang tanyay pag̱aningenung Amaw kung belag̱an yuu ka ilem ang pag̱aningen nang Ana na pati yang kumpurming nag̱alelyag̱anung pabunayag̱an,” mag̱aning. 23 Numanyan, pagkatapus ta pagpasanag na tung mga tau, dayun dang nanalunga tung mga taung atiang nag̱apangugyatan na. Ay may iksen na tung nira ang indi na mapagngel tung kadaklan. Mag̱aning tung nira, “Teed mi tiang kaayenan ang nag̱ipakdul yang Dios tung numyung nag̱aita tung mga bag̱ay ang nag̱aita mi simanyan tung yeen. 24 Ag̱aningenamu ra yeen ta maning tia ay atiing tukaw pang mga panimpu, dakeleng mga manigpalatay yang bitala yang Dios pati mga adi pa ang duru ka rin ang kalelyag nirang mangaita yang nag̱aita mi numanyan tung yeen, ang pagkatapus indi ra ka naita nira. Duru ka rin ang kalelyag nirang mangagngel yang nag̱agngel mi numanyan tung yeen ang pagkatapus indi ra ka nagngel nira,” ag̱aaning.

25 Taa numanyan may sasang pagpakigmaepet asan ang sag̱ad tung pinanubli tung mga kinaampu ang ya ray kumindeng ang nagtalimaan tung ni Jesus ang basi pa ra ilem matuung na. Mag̱aning, “Ameey, may gustuu rin ang magtalimaan tung nuyu. Unu pa w̱asu ay dapat ang buatenu ang para mapagpasapenaw tung Dios ang anday katapus-tapusan?” 26 Mag̱aning ka ti Jesus ang tuminuw̱al, “Abir, unu pay napabtang tung kasulatan? Unu pay pag̱intindi mu tung nag̱abasa mu asan?” 27 Tumuw̱al yang pagpakigmaepet, “Yang katuw̱ulan ang nag̱aintindianu maning taa: ‘Pabuyukan mi ta gegma mi ti Yawi ang yay Dios mi. Yang paggeregmaen mi tung anya dapat ang tedek ang pisan tung mga kinaisipan mi ang indi ka magtenakan. Ya ra kay papruibaan mi tung tanan ang mga buat-buat mi,’ mag̱aning† 10:27a Deuteronomio 6:5. Dispuis may sam bilug pang mag̱aning, ‘Gegmaan mi yang mga aruman mi ang katulad ka tung paggeregmaen mi tung sadili mi,’ mag̱aning‡ 10:27b Levitico 19:18. Atia, yay nag̱askeanu,” ag̱aaning. 28 Mag̱aning ka ti Jesus ang minles, “Tama ka man tiang tuw̱al mu. Kung yay pirming tumanen mu, atia mapagpasapena ra tung Dios ang anday katapus-tapusan,” mag̱aning. 29 Numanyan yang taung atia, kumus naseekan da, yang gustu na, magdipinsa tung sadili na. Purisu dayun na sing tinalimaan ti Jesus ang inaning, “Piru Ameey, tinu pa enged ay arumanu ang dapat ang gegmaanu?” ag̱aaning. 30 Numanyan anday dumang itinuw̱al ni Jesus tung anya, kung indi, nagpananglit dang mag̱aning, “May sasang taung nanliit tung Jerusalem ang minangay duun tung Jerico. Numanyan atiing panuldak da tung karsada, napanawan da ta mga tulisan. Pagdeep nira tung anya, dayun da nirang linuasan ta mga aw̱el na ang pagkatapus tinaraw̱angan da nira ta palu ang pinaepdan da ilem nira ta linawa nang gesye, baklu butwanay nira. 31 Taa numanyan may sasa kang paring panuldak da ka tung karsadang atii. Numanyan pagkaita na tung taung atiang tinulisan, dayun na ra ka ilem ang linilingan ang tinakliw̱an. 32 Utru si may sasa kang manig̱asikasu tung pagtuuan ang pinakalusu ang pagpanaw ka tung karsadang atii. Kaw̱utan na yang tinulisan, pinaalengtan nang tinelengan ang pagkatapus, tinakliw̱an na ra ka ilem ang binutwanan. 33 Taa numanyan may sasang Samarianen§ 10:33 Atii kanay yang mga Samarianen may yang mga Judio dating pagkasuayan. Yang mga Samarianen pag̱alamku yang mga Judio ang mga kaliw̱ug̱an ilem ang laket-laket unu yang mga dug̱u nira. Belag̱an unu pariu tung nirang mga Judio ang piur ang pisan. Dispuis nag̱alamku ka nirang belag̱an unu tama yang pagturuuen nira tung Dios. Telengan mu ilem asan tung birsikulu 37. ang pagpanaw ra ka tung karsadang atii. Kaw̱utan na yang tinulisan, pagteleng na, ya ra ngaildaw. 34 Anday dumang binuat na, dayun na rang pinaalengtan ang binulung yang mga luka na. Ninagnag̱an na ra ta irinemen ang gesye, ang pagkatapus piniiran na ra ka ta lana, baklu putusay na ta sinabat. Pagkatapus ta pagbulung na, dayun na rang ipinasaay tung asnung atiang pag̱asaayan na ra rin ang ginuyuran duun tung balay ang darayunan ta mga dayuan ang para masikasu na duun. 35 Pangayag yang kaliw̱utan, dayun dang nanduuk ta kuarta tung puyu-puyu nang ipinakdul tung may balay ang mag̱aning, ‘Kung mga sarang tung nuyu, asikasuen mu ra kanay yang taung naa. Ug̱aring kung alimbawa magkakulang da yang ipinakdulu tung nuyu, kung pira pay magastus mu tung anya, yuu ray balang magbayad tung nuyu tung uman ang pagbaliku taa,’ ag̱aaning yang Samarianen duun tung may balay.” 36 Ag̱aaning ti Jesus ang nagsugpat yang bitala na tung pagpakigmaepet, “Ta, tung nuyung pag̱intindi, tung tulung atiing nagkarapanaw duun tung taung atiing tinulisan, tinu pa w̱asu tung nira ay nag̱ilala tung anyang yay aruman nang dapat ang gegmaan na?” 37 Mag̱aning yang pagpakigmaepet ang tuminuw̱al, “Siguru yang naildaw tung anya* 10:37 Indi nganing nagsambit yang nasyun yang naggegma tung masigkatau na ay naglignaan da kang lag̱i tung mga Samarianen..” Tumuw̱al ti Jesus, “Ala, pati yawa, maning ka tia yang buaten mu,” mag̱aning.

38 Taa numanyan atiing pagpadayun da na Jesus yang pagparanawen nirang pamagdistinu tung Jerusalem, nanakluy ra kanay ti Jesus tung sasang baryu. May baw̱ay duun ang nag̱aranan tung ni Marta ang yay nag̱imbitar tung anyang magpadayun tung balay na. 39 Yang baw̱ay ang naa may ari nang nag̱aranan tung ni Maria ang ya ray luminupakpak tung pinagtalungaan nira ni Jesus ang para mamati tung pag̱itulduk na. 40 Ug̱aring naang aka na, yang isip na duru rag kalingalag tung pagsirimpanen nang duru. Purisu numanyan, anday dumang binuat na, nagpalenget dang nagkig̱a tung ni Jesus ang mag̱aning, “Ay yawa Ginuu, anda ra pala tung isip mu ang yang ariung atiang ya ra ilem aglupakpak asan, pinaw̱ayaanaw ra ilem anya tani tung tanan ang pagsirimpanenung naa? Purisu kung panganuguna ka w̱a tung yeen, aningen mu ra kanay ang magtaw̱ang da tani tung yeen,” mag̱aning. 41 Mag̱aning ka ti Ginuu tang nagtimales, “Aa Marta, midyu nag̱abegbeg̱an da ta mupia yang kulu mu. Duru-durung nag̱apatarantaan mu. 42 Piru sam bilug ilem yang dapat ang impurtaen. Yang ipinalandaw ni Maria, ya ra yang durug tinlu ang indi ra enged mabawi tung anya,” mag̱aning.